عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئازادبوون له‌ مردن 
1
كه‌واته‌ ئێستا تاوانباركردن بۆ ئه‌وانه‌ نییه‌ كه‌ له‌گه‌ڵ عیسای مه‌سیحدا یه‌كن،
2
چونكه‌ له‌ ڕێگه‌ی عیسای مه‌سیحه‌وه‌ یاسای ڕۆحی ژیان له‌ یاسای گوناه و مردن ئازادی كردیت.
3
خودا ئه‌وه‌ی كرد كه‌ ته‌ورات به‌هۆی لاوازی سروشتی دنیایی نه‌یتوانی بیكات: كوڕه‌كه‌ی خۆی له‌ شێوه‌ی جه‌سته‌ی مرۆڤی گوناهبار[a] نارد بۆ ئه‌وه‌ی ببێته‌ قوربانی گوناه. له‌ جه‌سته‌ی مرۆڤانه‌دا گوناهی تاوانبار كرد،
4
تاكو داواكارییه‌ دروسته‌كانی ته‌ورات له‌ ئێمه‌دا بێته‌ دی، كه‌ به‌گوێره‌ی سروشتی دنیایی ناژین، به‌ڵكو به‌گوێره‌ی ڕۆحی پیرۆز.
5
ئه‌وانه‌ی به‌گوێره‌ی سروشتی دنیایی ده‌ژین، بایه‌خ به‌ كاروباری سروشتی دنیایی ده‌ده‌ن، به‌ڵام ئه‌وانه‌ی به‌گوێره‌ی ڕۆحی پیرۆز ده‌ژین، بایه‌خ به‌ كاروباری ڕۆحی پیرۆز ده‌ده‌ن.
6
بایه‌خی سروشتی دنیایی مردنه‌، به‌ڵام بایه‌خی ڕۆحه‌كه‌ ژیان و ئاشتییه‌.
7
بایه‌خی سروشتی دنیایی دوژمنایه‌تییه‌ له‌گه‌ڵ خودا، چونكه‌ ملكه‌چی ته‌وراتی خودا نابێت، له‌به‌ر ئه‌وه‌ی ناتوانێت.
8
جا ئه‌وانه‌ی له‌ژێر كاریگه‌ری سروشتی دنیایین ناتوانن خودا ڕازی بكه‌ن.
9
به‌ڵام ئێوه‌، ئه‌گه‌ر ڕۆحی خودا له‌ناوتاندا نیشته‌جێ بێت، ئه‌وا له‌ژێر كاریگه‌ری سروشتی دنیایی نین، به‌ڵكو له‌ له‌ژێر كاریگه‌ری ڕۆحدان. ئه‌گه‌ر یه‌كێكیش ڕۆحی مه‌سیحی نه‌بێت، ئه‌وا هی مه‌سیح نییه‌.
10
ئه‌گه‌ر مه‌سیح له‌ ئێوه‌دا بێت، ئه‌وا جه‌سته‌ به‌هۆی گوناه مردووه‌، به‌ڵام ڕۆح به‌هۆی ڕاستودروستی زیندووه‌.
11
ئه‌گه‌ر ڕۆحی ئه‌وه‌ی عیسای له‌نێو مردووان هه‌ستانده‌وه‌ له‌ ئێوه‌دا نیشته‌جێ بێت، ئه‌وا ئه‌وه‌ی مه‌سیحی له‌نێو مردووان هه‌ستانده‌وه‌ به‌ ڕۆحی خۆی كه‌ له‌ ئێوه‌دا نیشته‌جێیه‌ له‌شی مردووشتان زیندوو ده‌كاته‌وه‌.
12
بۆیه‌ ئه‌ی خوشك و برایان، ئێمه‌ قه‌رزارین، به‌ڵام قه‌رزاری سروشتی دنیایی نین، تاكو به‌گوێره‌ی ئه‌و بژین.
13
ئه‌گه‌ر بێتو ئێوه‌ به‌گوێره‌ی سروشتی دنیایی بژین ده‌مرن، به‌ڵام ئه‌گه‌ر به‌ ڕۆحی پیرۆز كرداره‌كانی سروشتی دنیاییتان مراند، ئه‌وا ده‌ژین،
14
چونكه‌ هه‌موو ئه‌وانه‌ی ڕۆحی خودا به‌ڕێوه‌یان ده‌بات، ڕۆڵه‌ی خودان.
15
ئێوه‌ ڕۆحی كۆیله‌ییتان وه‌رنه‌گرتووه‌ تاكو بۆ ترس بتانگه‌ڕێنێته‌وه‌، به‌ڵكو ڕۆحی له‌خۆگرتنه‌وه‌تان[b] وه‌رگرتووه‌، به‌هۆیه‌وه‌ هاوار ده‌كه‌ین: «بابه‌! باوكه‌!»
16
ڕۆحی پیرۆز خۆی شایه‌تی بۆ ڕۆحمان ده‌دات كه‌ منداڵی خوداین.
17
ئه‌گه‌ر منداڵی بین، میراتگریشین، میراتگری خودا و هاومیراتی مه‌سیح، ئه‌گه‌ر له‌ ڕاستیدا له‌گه‌ڵ ئه‌و ئازار بچێژین، بۆ ئه‌وه‌ی تاكو له‌گه‌ڵ ئه‌و شكۆدار بین.
ئازاره‌كانی ئێستا و شكۆی داهاتوو 
18
پێم وایه‌ ئازاره‌كانی ئێستا له‌گه‌ڵ شكۆی داهاتوو كه‌ تیاماندا ئاشكرا ده‌كرێت به‌راورد ناكرێت،
19
چونكه‌ به‌دیهێنراو به‌ په‌رۆشه‌وه‌ چاوه‌ڕێ ده‌كات ڕۆڵه‌كانی خودا ئاشكرا بكرێن.
20
به‌دیهێنراو ملكه‌چی بێنرخبوون بوو، نه‌ك به‌ ویستی خۆی، به‌ڵكو به‌ ویستی ئه‌وه‌ی كه‌ ملكه‌چی كرد[c] ، به‌ هیوای ئه‌وه‌ی
21
كه‌ خودی به‌دیهێنراو له‌ كۆیلایه‌تی گه‌نده‌ڵی ئازاد بكرێت تاكو هاوبه‌ش بێت له‌ سه‌ربه‌ستی شكۆمه‌ندی منداڵانی خودا.
22
ده‌زانین هه‌موو به‌دیهێنراوان هه‌تا ئێستا به‌یه‌كه‌وه‌ ده‌ناڵێنن و ژانیان گرتووه‌.
23
ته‌نها ئه‌مه‌ نا، به‌ڵكو ئێمه‌ كه‌ یه‌كه‌مین به‌رهه‌می ڕۆحی پیرۆزمان وه‌رگرت، له‌ ناخماندا ده‌ناڵێنین و به‌ په‌رۆشه‌وه‌ چاوه‌ڕێی له‌خۆگرتنه‌وه‌ین، واته‌ ڕزگاریی جه‌سته‌مان،
24
چونكه‌ به‌ هیواوه‌ ڕزگارمان بوو. به‌ڵام هیوای بینراو هیوا نییه‌. ئه‌وه‌ی ده‌یبینی هیوای چی پێ ده‌خوازیت؟
25
به‌ڵام ئه‌گه‌ر هیوای شتێك بخوازین كه‌ بینراو نییه‌، ئه‌وا به‌ دانبه‌خۆداگرتنه‌وه‌ چاوه‌ڕێی ده‌كه‌ین.
26
به‌ هه‌مان شێوه‌ ڕۆحی پیرۆز له‌ لاوازییه‌كانماندا یارمه‌تیمان ده‌دات. نازانین له‌ پێناوی چی نوێژ بكه‌ین، به‌ڵام ڕۆحی پیرۆز خۆی به‌ ناڵه‌وه‌ داكۆكیمان لێده‌كات به‌ شێوه‌یه‌ك كه‌ باس ناكرێت.
27
ئه‌وه‌ی دڵی مرۆڤ ده‌پشكنێت، ده‌زانێت ڕۆحی پیرۆز بایه‌خ به‌ چی ده‌دات، چونكه‌ به‌گوێره‌ی خواستی خودا داكۆكی له‌ گه‌لی پیرۆزی خودا ده‌كات.
28
ئێمه‌ ده‌زانین خودا له‌ هه‌موو شته‌كاندا كار ده‌كات بۆ چاكه‌ی ئه‌وانه‌ی ئه‌ویان خۆشده‌وێت، ئه‌وانه‌ی به‌گوێره‌ی مه‌به‌ستی ئه‌و بانگكراون،
29
چونكه‌ ئه‌وانه‌ی پێشتر ناسیبوونی، پێشتر دیاری كردن بۆ ئه‌وه‌ی وه‌ك وێنه‌ی كوڕه‌كه‌ی ئه‌ویان لێ بێت، تاكو له‌نێو زۆرێك له‌ خوشك و برایاندا ئه‌و ببێته‌ نۆبه‌ره‌.
30
ئه‌وانه‌ی پێشتر دیاری كردن بانگیشی كردن، ئه‌وانه‌ی بانگی كردن بێتاوانیشی كردن، ئه‌وانه‌ی بێتاوانی كردن شكۆداریشی كردن.
سه‌ركه‌وتنی له‌ ڕاده‌به‌ده‌ر 
31
ئیتر چی به‌مانه‌ بڵێین؟ ئه‌گه‌ر خودا له‌گه‌ڵمان بێت، كێ دژمانه‌؟
32
ئه‌وه‌ی ده‌ستی به‌ كوڕه‌كه‌ی خۆیه‌وه‌ نه‌گرت، به‌ڵكو له‌ پێناوی هه‌موومان پێشكه‌شی كرد، ئیتر چۆن له‌گه‌ڵ ئه‌و هه‌موو شتێكمان به‌خۆڕایی ناداتێ؟
33
كێ سكاڵا له‌ هه‌ڵبژێردراوانی خودا ده‌كات؟ خودایه‌ ئه‌وه‌ی بێتاوان ده‌كات.
34
كێیه‌ تاوانبار ده‌كات؟ كه‌س نییه‌. عیسای مه‌سیحه‌ كه‌ مرد، به‌ڵكو له‌مه‌ش زیاتر هه‌ستێنرایه‌وه‌، هه‌ر ئه‌ویش له‌ ده‌سته‌ ڕاستی خودایه‌ و داكۆكیمان لێده‌كات.
35
كێ له‌ خۆشه‌ویستی مه‌سیح جیامان ده‌كاته‌وه‌؟ ناخۆشی یان ته‌نگانه‌ یان چه‌وسانه‌وه‌ یان قاتوقڕی یان ڕووتی یان مه‌ترسی یاخود شمشێر؟
36
وه‌ك نووسراوه‌:
{له‌ پێناوی تۆ به‌ درێژایی ڕۆژ ڕووبه‌ڕووی مردن ده‌بینه‌وه‌،
وه‌ك مه‌ڕ بۆ سه‌ربڕین داده‌نرێین.}[d]
37
به‌ڵام له‌ هه‌موو ئه‌مانه‌دا له‌ ڕاده‌به‌ده‌ر سه‌ركه‌وتووین له‌ ڕێگه‌ی ئه‌وه‌ی كه‌ خۆشی ویستووین،
38
چونكه‌ دڵنیام نه‌ مردن و نه‌ ژیان، نه‌ فریشته‌كان و نه‌ سه‌رۆكه‌كان، نه‌ شته‌كانی ئێستا و نه‌ شته‌كانی داهاتوو، نه‌ هێزه‌كان،
39
نه‌ به‌رزی و نه‌ قووڵی، نه‌ به‌دیهێنراوی دیكه‌، ناتوانێت له‌ خۆشه‌ویستی خودا جیامان بكاته‌وه‌ كه‌ له‌ ڕێگه‌ی عیسای مه‌سیحی گه‌وره‌مانه‌وه‌ بۆمان دێت.
  1. a. 8‏:3 مه‌سیح خۆی بێ گوناه بوو، به‌ڵام هه‌مان جه‌سته‌ی مرۆڤانه‌ی گوناهباری هه‌بوو.
  2. b. 8‏:15 منداڵی كه‌سێكی دیكه‌ وه‌ك منداڵی خۆی په‌روه‌رده‌ ده‌كات و هه‌موو مافه‌كانی پێده‌دات.
  3. c. 8‏:20 جیهان به‌ ویستی خۆی نییه‌ كاتێك تووشی كاره‌سات و ناخۆشی دێت، به‌ڵكو له‌لایه‌ن خوداوه‌ بۆی دێت.
  4. d. 8‏:36 \+xt زه‌بووره‌كان 44‏:22.‏\+xt*‏