عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئازادبوون له‌ ته‌ورات 
1
ئه‌ی خوشك و برایان، بۆ ئێوه‌ ده‌دووێم كه‌ له‌ ته‌ورات ده‌زانن، ئایا ئێوه‌ نازانن ته‌ورات ده‌سه‌ڵاتی به‌سه‌ر مرۆڤدا هه‌یه‌ هه‌تا ئه‌و كاته‌ی زیندووه‌؟
2
بۆ نموونه‌، ژن به‌پێی ته‌ورات به‌ مێرده‌ زیندووه‌كه‌یه‌وه‌ به‌ستراوه‌ته‌وه‌، به‌ڵام كه‌ مێرده‌كه‌ مرد، ئه‌وا له‌و ته‌وراته‌ ئازاد ده‌بێت كه‌ به‌ مێرده‌كه‌یه‌وه‌ به‌ستبوویه‌وه‌.
3
كه‌واته‌ تاكو مێرده‌كه‌ زیندوو بێت، ژنه‌كه‌ به‌ داوێنپیس ناوده‌بردرێت ئه‌گه‌ر بووه‌ هی پیاوێكی دیكه‌. به‌ڵام ئه‌گه‌ر مێرده‌كه‌ بمرێت، ئه‌وسا له‌ ده‌سه‌ڵاتی ته‌ورات ئازاده‌ و داوێنپیس نییه‌ ئه‌گه‌ر بووه‌ هی پیاوێكی دیكه‌.
4
ئیتر براكانم، ئێوه‌ش به‌ له‌شی مه‌سیح سه‌باره‌ت به‌ ته‌ورات مردن، تاكو ببنه‌ هی یه‌كێكی دیكه‌، بۆ ئه‌و كه‌سه‌ی له‌ناو مردووان هه‌ستێنرایه‌وه‌، تاكو بۆ خودا به‌رهه‌م بده‌ین،
5
چونكه‌ كاتێك له‌ژێر كاریگه‌ری سروشتی دنیایی ده‌ژیاین، ئاره‌زووه‌كانی گوناه به‌هۆی ته‌وراته‌وه‌ له‌ ئه‌ندامه‌كانی له‌شماندا كاری ده‌كرد، تاكو ئه‌و كارانه‌ی ده‌كه‌ین ببێته‌ هۆی مردن.
6
به‌ڵام ئێستا ئازاد بووین له‌ شه‌ریعه‌تی ته‌ورات، مردین سه‌باره‌ت به‌وه‌ی ئێمه‌ی به‌ستبووه‌وه‌، تاكو به‌ ڕێگای نوێی ڕۆحی پیرۆز خزمه‌ت بكه‌ین، نه‌ك به‌ ڕێگای كۆنی شه‌ریعه‌تی نووسراو.
ته‌ورات پیرۆزه‌ 
7
كه‌واته‌ چی بڵێین؟ ئایا ته‌ورات خۆی سه‌رچاوه‌ی گوناهه‌؟ حاشا! به‌ڵام له‌ ڕێگه‌ی ته‌وراته‌وه‌ نه‌بێت گوناهم نه‌ده‌ناسی. هه‌روه‌ها واتای ته‌واوی چاوچنۆكیم نه‌ده‌زانی ئه‌گه‌ر ته‌ورات نه‌یگوتایه‌ {چاو مه‌بڕه‌ هیچ شتێك كه‌ هی كه‌سێكی دیكه‌ بێت.}[a]
8
به‌ڵام گوناه ئه‌م ڕاسپارده‌یه‌ی قۆسته‌وه‌ و هه‌موو چاوچنۆكییه‌كی له‌ مندا وروژاند، چونكه‌ گوناه به‌بێ ته‌ورات مردووه‌.
9
منیش له‌پێشدا به‌بێ ته‌ورات ده‌ژیام. به‌ڵام كاتێك ڕاسپارده‌ هات، گوناه هاته‌ ژیان و منیش مردم.
10
بینیم هه‌مان ئه‌و ڕاسپارده‌یه‌ی بۆ ژیانه‌ بۆ من بۆ مردنه‌،
11
چونكه‌ گوناه ڕاسپارده‌كه‌ی قۆسته‌وه‌ و منی خه‌ڵه‌تاند و به‌و منی كوشت.
12
كه‌واته‌ ته‌ورات پیرۆزه‌، ڕاسپارده‌ش پیرۆز و دادپه‌روه‌ر و چاكه‌.
13
ئایا چاكه‌ بۆ من بووه‌ته‌ مایه‌ی مردن؟ حاشا! به‌ڵكو گوناه به‌هۆی چاكه‌وه‌ مردنی له‌ مندا هێنایه‌ كایه‌وه‌، بۆ ئه‌وه‌ی ده‌ربكه‌وێت كه‌ گوناه به‌ ڕاستی گوناهه‌ و تاكو له‌ ڕێگه‌ی ڕاسپارده‌كه‌وه‌ ئاشكرابێت كه‌ گوناه ته‌واو خراپه‌.
14
ئێمه‌ ده‌زانین ته‌ورات ڕۆحییه‌، به‌ڵام من دنیاییم و وه‌ك كۆیله‌ فرۆشراوم به‌ گوناه.
15
ئیتر نازانم چی ده‌كه‌م، چونكه‌ ئه‌وه‌ی ده‌مه‌وێت نایكه‌م، به‌ڵكو ئه‌وه‌ی ڕقم لێیه‌تی ئه‌وه‌ ده‌كه‌م.
16
ئه‌گه‌ر ئه‌وه‌ بكه‌م كه‌ نامه‌وێت، ئه‌وسا ته‌ورات په‌سه‌ند ده‌كه‌م كه‌ باشه‌.
17
ئیتر من نیم كه‌ وا ده‌كه‌م، به‌ڵكو ئه‌و گوناهه‌ی له‌ مندا نیشته‌جێیه‌،
18
چونكه‌ ده‌زانم هیچ چاكه‌یه‌ك له‌ مندا نیشته‌جێ نییه‌، واته‌ له‌ سروشتی دنیاییمدا. خواست له‌لام ئاماده‌یه‌، به‌ڵام توانای چاكه‌كردنم نییه‌،
19
چونكه‌ ئه‌و چاكه‌یه‌ی ده‌مه‌وێت نایكه‌م، به‌ڵكو ئه‌و خراپه‌ی كه‌ نامه‌وێت ئه‌وه‌ ده‌كه‌م.
20
ئه‌گه‌ر ئه‌وه‌م كرد كه‌ نامه‌وێت، ئیتر ئه‌وه‌ من نیم كه‌ ده‌یكه‌م، به‌ڵكو ئه‌و گوناهه‌ی له‌ مندا نیشته‌جێیه‌.
21
كه‌واته‌ ئه‌م یاسایه‌ ده‌بینم: كاتێك ده‌مه‌وێت چاكه‌ بكه‌م، خراپه‌ له‌لام ئاماده‌یه‌،
22
چونكه‌ له‌ ناخمدا به‌ ته‌وراتی خودا دڵشادم،
23
به‌ڵام یاسایه‌كی دیكه‌ له‌ ئه‌ندامانی جه‌سته‌مدا ده‌بینم، كه‌ به‌ربه‌ره‌كانێی یاسای هزرم ده‌كات و ده‌مكاته‌ دیلی یاسای گوناه كه‌ له‌ ئه‌ندامه‌كانی جه‌سته‌مدایه‌.
24
ئای له‌ منی مرۆڤی به‌دبه‌خت! كێ فریای ئه‌م جه‌سته‌یه‌م ده‌كه‌وێت كه‌ ده‌بێت بمرێت؟
25
سوپاسی خودا ده‌كه‌م كه‌ له‌ ڕێگه‌ی عیسای مه‌سیحی خاوه‌ن شكۆمانه‌وه‌ ده‌ربازم ده‌كات!
كه‌واته‌ به‌ بیری خۆم خزمه‌تی ته‌وراتی خودا ده‌كه‌م، به‌ڵام به‌ سروشتی دنیاییم خزمه‌تی یاسای گوناه ده‌كه‌م.
  1. a. 7‏:7 \+xt ده‌رچوون 20‏:17 و دواوتار 5‏:21.‏\+xt*‏