عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
زه‌بوورێكی داود. 
1
به‌هۆی خراپه‌كاران مه‌راق مه‌خۆ،
به‌غیلی به‌ به‌دكاران مه‌به‌،
2
چونكه‌ وه‌ك گیان، زوو وشك ده‌بن،
وه‌ك گژوگیای سه‌وز زوو سیس ده‌بن.
3
پشت به‌ یه‌زدان ببه‌سته‌ و چاكه‌ بكه‌،
له‌سه‌ر خاكه‌كه‌ نیشته‌جێ به‌ و چاودێری دڵسۆزی بكه‌.
4
خۆشی له‌ یه‌زدان ببینه‌،
داواكارییه‌كانی دڵت پێده‌به‌خشێت.
5
ڕێگای خۆت به‌ یه‌زدان بسپێره‌ و
متمانه‌ی پێ بكه‌ و ئه‌و ئاوا ده‌كات:
6
ڕاستودروستیت وه‌ك ڕووناكی ده‌رده‌خات،
بێتاوانییه‌كه‌ت وه‌ك خۆری نیوه‌ڕۆ.
7
له‌به‌رده‌م یه‌زدان بێده‌نگ به‌ و به‌ ئارامییه‌وه‌ چاوه‌ڕێی بكه‌،
كاتێك ئه‌وانه‌ له‌ ڕێگاكانیان سه‌رده‌كه‌ون،
كاتێك فرتوفێڵه‌كانیان جێبه‌جێ ده‌كه‌ن، مه‌راق مه‌خۆ.
8
له‌ تووڕه‌یی هێوربه‌وه‌ و خۆت له‌ قین لابده‌.
مه‌راق مه‌خۆ، ده‌نا به‌ره‌و خراپه‌ت ده‌بات.
9
چونكه‌ به‌دكاران دوایان ده‌بڕدرێته‌وه‌،
به‌ڵام ئه‌وانه‌ی ئومێدیان به‌ یه‌زدانه‌، ده‌بنه‌ میراتگری خاكه‌كه‌.
10
پاش ماوه‌یه‌كی كه‌م به‌دكار نامێنێت،
ده‌ڕوانیته‌ شوێنه‌كه‌ی، له‌وێ نه‌ماوه‌.
11
به‌ڵام بێفیزه‌كان ده‌بن به‌ میراتگری خاكه‌كه‌ و
خۆشی له‌ زۆری ئاشتی ده‌بینن.
12
خراپه‌كار پیلان له‌ دژی كه‌سی ڕاستودروست داده‌ڕێژێت و
ددانی لێ جیڕده‌كاته‌وه‌،
13
به‌ڵام په‌روه‌ردگار پێی پێده‌كه‌نێت،
چونكه‌ ده‌زانێت ڕۆژی دێت.
14
به‌دكاران شمشێر هه‌ڵده‌كێشن و
كه‌وانه‌كانیان ده‌چه‌مێننه‌وه‌،
بۆ ئه‌وه‌ی هه‌ژار و نه‌داره‌كان بپێكن،
بۆ سه‌ربڕینی ئه‌وانه‌ی ڕێگایان ڕاسته‌.
15
به‌ڵام شمشێره‌كانیان ده‌چێته‌ ناو دڵی خۆیان،
كه‌وانه‌كانیان تێكده‌شكێت.
16
ئه‌و كه‌مه‌ی كه‌ كه‌سی ڕاستودروست هه‌یه‌تی،
له‌ سامانی گه‌لێك به‌دكاران باشتره‌،
17
چونكه‌ به‌دكاره‌كان بازوویان ده‌شكێت،
به‌ڵام یه‌زدان پشتی ڕاستودروستان ده‌گرێت.
18
یه‌زدان ته‌مه‌نی ئه‌وانه‌ ده‌زانێت كه‌ بێ كه‌موكوڕین،
هه‌تاهه‌تایه‌ میراتیان ده‌مێنێت.
19
له‌ ڕۆژگاری به‌ڵا شه‌رمه‌زار نابن،
له‌ ڕۆژگاری قاتوقڕیدا تێر ده‌بن.
20
به‌ڵام به‌دكاران ده‌فه‌وتێن،
دوژمنه‌كانی یه‌زدانیش وه‌ك گوڵی كێوی له‌ناوده‌چن،
وه‌ك دووكه‌ڵ له‌ناوده‌چن.
21
به‌دكاران قه‌رز ده‌كه‌ن و پێیان نادرێته‌وه‌،
به‌ڵام ڕاستودروسته‌كان به‌ دڵفراوانییه‌وه‌ ده‌به‌خشن.
22
ئه‌وانه‌ی یه‌زدان به‌ره‌كه‌تداری كردوون ده‌بن به‌ میراتگری خاكه‌كه‌،
به‌ڵام ئه‌وانه‌ی به‌ر نه‌فره‌تی كه‌وتوون دوایان ده‌بڕدرێته‌وه‌.
23
یه‌زدان هه‌نگاوه‌كانی مرۆڤ ده‌چه‌سپێنێ،
به‌ ڕێگاكه‌ی دڵخۆش ده‌بێ.
24
ئه‌گه‌ر پێی بخزێت، ناكه‌وێت،
چونكه‌ یه‌زدان به‌ ده‌ستی خۆی پشتی ده‌گرێت.
25
من گه‌نج بووم و ئێستا پیرم،
هه‌رگیز نه‌مبینی ڕاستودروست وازی لێ بهێنرێت،
یان منداڵه‌كانی سواڵی نان بكه‌ن.
26
هه‌رده‌م دڵفراوانه‌ و قه‌رز ده‌دات،
منداڵه‌كانیشی به‌ره‌كه‌تدار ده‌بن.
27
له‌ به‌دكاری لابده‌ و چاكه‌ بكه‌،
ئینجا هه‌تاهه‌تایه‌ له‌ خاكه‌كه‌ نیشته‌جێ ده‌بیت.
28
چونكه‌ یه‌زدان حه‌ز له‌ دادپه‌روه‌ری ده‌كات،
واز له‌ خۆشه‌ویستانی ناهێنێ.
هه‌تاهه‌تایه‌ ده‌پارێزرێن،
به‌ڵام منداڵه‌كانی به‌دكاران دوایان ده‌بڕدرێته‌وه‌.
29
ڕاستودروستان ده‌بن به‌ میراتگری خاكه‌كه‌ و
هه‌تاهه‌تایه‌ له‌سه‌ری نیشته‌جێ ده‌بن.
30
ده‌می پیاوچاك به‌ دانایی ده‌دوێت،
زمانیشی باسی دادپه‌روه‌ری ده‌كات.
31
فێركردنی[a] خودای خۆی له‌ناو دڵ،
بۆیه‌ پێی ناخلیسكێت.
32
به‌دكار خۆی مات ده‌كات بۆ ڕاستودروست،
هه‌وڵده‌دات بیكوژێت،
33
به‌ڵام یه‌زدان له‌به‌رده‌ستی به‌جێی ناهێڵێت،
ناهێڵێ له‌ دادگاش تاوانبار بكرێت.
34
چاوه‌ڕێی یه‌زدان بكه‌ و
ڕێگای ئه‌و بگره‌.
ئه‌ویش به‌رزت ده‌كاته‌وه‌ و ده‌تكات به‌ میراتگری زه‌وی،
كاتێك به‌دكاران دوایان ده‌بڕدرێته‌وه‌، ده‌یانبینیت.
35
به‌دكارم دی بێ ویژدان بوو،
وه‌ك دار ئورزێكی سه‌وز له‌ خاكێكی به‌پیت گه‌شه‌ی ده‌كرد،
36
به‌ڵام زوو تێپه‌ڕی و نه‌ما،
هه‌رچه‌ند بۆی گه‌ڕام به‌ڵام دیار نه‌بوو.
37
بڕوانه‌ مرۆڤی بێ كه‌موكوڕی، سه‌یری مرۆڤی ڕاست بكه‌،
مرۆڤی ئاشتیخواز دواڕۆژی هه‌یه‌.
38
به‌ڵام هه‌موو یاخیبووه‌كان له‌ناوده‌چن،
دواڕۆژی به‌دكاران ده‌بڕدرێته‌وه‌.
39
ڕزگاریی ڕاستودروستان له‌لایه‌ن یه‌زدانه‌وه‌ دێت،
ئه‌و قه‌ڵای ئه‌وانه‌ له‌ كاتی ته‌نگانه‌.
40
یه‌زدان یارمه‌تییان ده‌دات و ده‌ربازیان ده‌كات،
له‌ به‌دكاران ده‌ربازیان ده‌كات و ڕزگاریان ده‌كات،
چونكه‌ په‌نا بۆ ئه‌و ده‌به‌ن.
  1. a. 37‏:31 ته‌ورات.