عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بۆ سه‌رۆكی كۆمه‌ڵی مۆسیقاژه‌نان، زه‌بوورێكی داود. 
1
ئه‌ی یه‌زدان، من په‌نا ده‌به‌مه‌ به‌ر تۆ،
با هه‌رگیز شه‌رمه‌زار نه‌بم،
به‌ ڕاستودروستی خۆت ده‌ربازم بكه‌.
2
گوێت بۆم شل بكه‌،
به‌ زوویی فریام بكه‌وه‌،
ببه‌ به‌و تاشه‌به‌رده‌ی په‌نای بۆ ده‌به‌م،
به‌و قه‌ڵا سه‌خته‌ بۆ ڕزگاركردنم.
3
له‌به‌ر ئه‌وه‌ی تاشه‌به‌رد و قه‌ڵای منی،
له‌ پێناوی ناوی خۆت ڕابه‌رایه‌تی و ڕێنماییم بكه‌.
4
له‌و ته‌ڵه‌یه‌ی بۆم نراوه‌ته‌وه‌ ئازادم بكه‌،
چونكه‌ تۆ په‌ناگای منی.
5
ڕۆحی خۆم به‌ ده‌ستی تۆ ده‌سپێرم،
ئه‌ی یه‌زدان، خودای ڕاستی، بمكڕه‌وه‌.
6
من ڕقم له‌وانه‌ ده‌بێته‌وه‌ كه‌ ده‌ست به‌ بتی پووچه‌وه‌ ده‌گرن،
من متمانه‌م به‌ یه‌زدان هه‌یه‌.
7
من به‌ خۆشه‌ویستی نه‌گۆڕی تۆ شاد و دڵخۆش ده‌بم،
چونكه‌ تۆ ده‌ردی منت بینیوه‌ و
له‌ ته‌نگانه‌دا گیانی منت ناسیوه‌.
8
نه‌تخستوومه‌ته‌ به‌رده‌ستی دوژمنان،
به‌ڵكو له‌سه‌ر شوێنێكی فراوان ڕاتگرتووم.
9
ئه‌ی یه‌زدان، له‌گه‌ڵم میهره‌بان به‌، چونكه‌ له‌ ته‌نگانه‌دام.
چاوه‌كانم كزبوون له‌ خه‌فه‌تان،
ڕۆح و له‌شم له‌ خه‌مان.
10
ژیانم به‌ خه‌م و خه‌فه‌ت فه‌وتاوه‌،
ساڵانی ته‌مه‌نم به‌ ئاخ هه‌ڵكێشان،
له‌به‌ر ده‌رد و به‌ڵا هێزم لێ بڕاوه‌،
ئێسقانه‌كانم پووكاونه‌ته‌وه‌.
11
به‌هۆی دوژمنه‌كانمه‌وه‌،
به‌ ته‌واوی بوومه‌ته‌ مایه‌ی شه‌رمه‌زاری لای دراوسێكانم،
بوومه‌ته‌ مایه‌ی ترس بۆ ئاشناكانم،
ئه‌وانه‌ی له‌ شه‌قامدا ده‌مبینن، لێم دوور ده‌كه‌ونه‌وه‌.
12
له‌بیركراوم وه‌ك ئه‌وه‌ی مردبم،
وه‌ك قاپێكی شكاوم به‌سه‌رهاتووه‌.
13
چونكه‌ گوێم له‌ چپه‌چپی زۆر كه‌س بووه‌،
«له‌ هه‌موو لایه‌كه‌وه‌ ترس و تۆقین هه‌یه‌!»
هه‌موو پێكه‌وه‌ پیلان له‌ دژم ده‌گێڕن،
بیر له‌وه‌ ده‌كه‌نه‌وه‌ ژیانم له‌ناو ببه‌ن.
14
به‌ڵام ئه‌ی یه‌زدان، من پشتم به‌ تۆ به‌ستووه‌،
ده‌ڵێم: «تۆ خودای منیت.»
15
ڕۆژگارم له‌ناو ده‌ستی تۆدایه‌،
له‌ ده‌ستی دوژمنان و
ئه‌وانه‌ی ڕاوم ده‌نێن ده‌ربازم بكه‌.
16
با ڕوخسارت به‌سه‌ر خزمه‌تكاری خۆتدا بدره‌وشێته‌وه‌،
به‌ خۆشه‌ویستی نه‌گۆڕی خۆت ڕزگارم بكه‌.
17
با شه‌رمه‌زار نه‌بم ئه‌ی یه‌زدان،
چونكه‌ هاوار بۆ تۆ ده‌هێنم،
با به‌دكاران شه‌رمه‌زار بن،
له‌ناو جیهانی مردووان خامۆش بن.
18
با زمانه‌ درۆزنه‌كانیان لاڵ بێت،
چونكه‌ به‌ فیز و وشه‌ی ناشیرینه‌وه‌
سووكایه‌تی به‌ سه‌رڕاستان ده‌كه‌ن.
19
چاكه‌ت چه‌ند مه‌زنه‌،
كه‌ هه‌ڵتگرتووه‌ بۆ ئه‌وانه‌ی ترسی تۆیان له‌ دڵدایه‌،
ئه‌وه‌ی به‌ به‌رچاوی خه‌ڵكه‌وه‌،
به‌وانه‌ی ده‌به‌خشیت كه‌ په‌نات بۆ ده‌هێنن.
20
له‌ په‌نای خۆت ده‌یانشاریته‌وه‌،
له‌ پیلانه‌كانی خه‌ڵكی،
له‌ژێر سێبه‌ری خۆت ده‌یانپارێزیت،
له‌ زمانی سكاڵاكه‌ران.
21
ستایش بۆ یه‌زدان،
چونكه‌ خۆشه‌ویستییه‌ نه‌گۆڕه‌ سه‌رسوڕهێنه‌ره‌كه‌ی خۆی نیشاندام،
كاتێك له‌ شارێكی ئابڵوقه‌دراو بووم.
22
له‌ كاتی سه‌رلێشێوانم گوتم:
«له‌به‌رچاوت نه‌ماوم!»
به‌ڵام تۆ گوێت له‌ ده‌نگی پاڕانه‌وه‌م گرت،
كه‌ هاوارم بۆت هێنا.
23
ئه‌ی هه‌موو خۆشه‌ویستانی، یه‌زدانتان خۆشبوێت!
یه‌زدان دڵسۆزه‌كان ده‌پارێزێت،
به‌ڵام به‌ ته‌واوی سزای لووتبه‌رزه‌كان ده‌دات.
24
ئازابن و دڵتان به‌هێز بكه‌ن،
ئه‌ی هه‌موو ئه‌وانه‌ی هیواتان به‌ یه‌زدان هه‌یه‌.