عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
زه‌بوورێكی داود. 
1
یه‌زدان ڕووناكی و ڕزگاریی منه‌،
له‌ كێ بترسم؟
یه‌زدان قه‌ڵای ژیانی منه‌،
له‌ كێ بتۆقم؟
2
كاتێك به‌دكاران لێم نزیك بنه‌وه‌
بۆ ئه‌وه‌ی گۆشتم بخۆن،
كاتێك دوژمنان و ناحه‌زانم په‌لامارم بده‌ن،
ساتمه‌ ده‌كه‌ن و ده‌كه‌ون.
3
ئه‌گه‌ر له‌شكرێكیش ده‌ورم بدات،
دڵم ناترسێت.
ئه‌گه‌ر جه‌نگ به‌رپا بكه‌ن دژم،
ئه‌و كاته‌ش هه‌ر دڵنیا ده‌بم.
4
داوای یه‌ك شت له‌ یه‌زدان ده‌كه‌م،
ئه‌وه‌ی به‌دوایدا ده‌گه‌ڕێم:
كه‌ هه‌موو ڕۆژانی ژیانم
له‌ ماڵی یه‌زدان نیشته‌جێ بم،
هه‌تا ته‌ماشای جوانی یه‌زدان بكه‌م و
له‌ په‌رستگاكه‌ی ورد ببمه‌وه‌.
5
چونكه‌ له‌ ڕۆژی به‌ڵا،
له‌ژێر سێبه‌ری خۆی ده‌مشارێته‌وه‌،
به‌ پڵاسی نشینگه‌كه‌ی دامده‌پۆشێت.
بۆ سه‌ر تاشه‌به‌ردێك بڵندم ده‌كاته‌وه‌.
6
ئێستاش سه‌رفرازم به‌سه‌ر دوژمنانی ده‌وروبه‌رم،
له‌ناو نشینگه‌كه‌یدا به‌ هاوار و خۆشییه‌وه‌ قوربانی پێشكه‌ش ده‌كه‌م،
سروود بۆ یه‌زدان ده‌ڵێم و مۆسیقا ده‌ژه‌نم.
7
ئه‌ی یه‌زدان، گوێت له‌ ده‌نگم بێ كاتێك لێت ده‌پاڕێمه‌وه‌،
له‌گه‌ڵم میهره‌بان به‌ و وه‌ڵامم بده‌وه‌.
8
سه‌باره‌ت به‌ تۆ دڵم ده‌ڵێت: «ڕووت له‌و بكه‌!»
ئه‌ی یه‌زدان، ڕووم له‌ تۆ ده‌كه‌م.
9
ڕووی خۆتم لێ مه‌شاره‌وه‌،
خزمه‌تكاری خۆت له‌ كاتی تووڕه‌ییت مه‌گه‌ڕێنه‌وه‌،
تۆ یارمه‌تیده‌ری من بوویت.
ئه‌ی خودای ڕزگاركه‌رم،
ڕه‌تم مه‌كه‌ره‌وه‌ و جێم مه‌هێڵه‌.
10
ته‌نانه‌ت دایك و باوكیشم وازم لێ بهێنن،
یه‌زدان ده‌مگرێته‌ خۆی.
11
ئه‌ی یه‌زدان، ڕێگای خۆتم فێر بكه‌،
بۆ ڕێگای ڕاست ڕێنماییم بكه‌،
له‌به‌ر دوژمنه‌كانم.
12
به‌ ویستی ناحه‌زه‌كانم مه‌مسپێره‌،
چونكه‌ شایه‌تی درۆ لێم ڕاست بوونه‌ته‌وه‌،
هه‌ناسه‌ی زۆردارییان لێ دێته‌ ده‌ره‌وه‌.
13
من هێشتا باوه‌ڕم به‌وه‌ هه‌یه‌،
كه‌ له‌ خاكی زیندووان
چاكه‌ی یه‌زدان ده‌بینم.
14
چاوه‌ڕێی یه‌زدان به‌،
خۆت ئازا بكه‌ و دڵت به‌هێز بكه‌،
چاوه‌ڕێی یه‌زدان به‌.