عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
بانگه‌وازی دانایی 
1
ئایا دانایی بانگه‌واز ناكات؟
ئه‌ی تێگه‌یشتن ده‌نگی خۆی هه‌ڵنابڕێت؟
2
له‌سه‌ر لووتكه‌ی به‌رزاییه‌كان،
له‌سه‌ر ڕێگاكان، له‌ چواڕیانه‌كان ڕاده‌وه‌ستێت.
3
له‌لای ده‌روازه‌ی شاره‌كان،
له‌به‌رده‌م ده‌رگاكان، هاوار ده‌كات:
4
«ئه‌ی خه‌ڵكینه‌، بۆ ئێوه‌ بانگ ده‌كه‌م،
ده‌نگم بۆ ئاده‌میزاده‌.
5
ساویلكه‌كان، فێری ژیری بن،
گێله‌كان، فێری تێگه‌یشتن بن.
6
گوێ بگرن، چونكه‌ باسی شتی به‌رزتان بۆ ده‌كه‌م،
كردنه‌وه‌ی لێوه‌كانم بۆ ڕاسته‌ڕێییه‌.
7
چونكه‌ ڕاستگۆیی وێردی ده‌ممه‌،
خراپه‌ش قێزه‌ونه‌ بۆ لێوه‌كانم.
8
قسه‌كانی ده‌مم هه‌موو ڕاستودروستن،
هیچ فێڵ یان خواروخێچی تێدا نییه‌.
9
هه‌موو ڕێكن لای كه‌سی تێگه‌یشتوو،
ڕاسته‌ڕێیه‌ لای ئه‌وانه‌ی زانیاری ده‌دۆزنه‌وه‌.
10
ته‌مبێكردن له‌ من وه‌ربگرن نه‌ك زیو،
زانیاریش زیاتر له‌ زێڕی پوخته‌كراو.
11
چونكه‌ دانایی له‌ یاقووت[a] باشتره‌،
هه‌رچی ئاره‌زووی ده‌كه‌یت نابێته‌ هاوتای.»
12
«من داناییم، له‌گه‌ڵ ژیریدا نیشته‌جێم،
زانیاری و سه‌لیقه‌م هه‌یه‌.
13
ئه‌وه‌ی له‌خواترس بێت، ڕقی له‌ خراپه‌ ده‌بێت،
من ڕقم له‌ لووتبه‌رزی و خۆبه‌زلزانییه‌،
له‌ ڕێگای خراپ و له‌ قسه‌ی به‌ فێڵه‌.
14
ڕاوێژ و دانایی ته‌واو هی منن،
من تێگه‌یشتنم، هێز هی منه‌.
15
به‌ منه‌وه‌ پاشاكان پاشایه‌تی ده‌كه‌ن و
فه‌رمانڕه‌وایان به‌ ڕاستودروستی یاسا ده‌رده‌كه‌ن.
16
به‌ منه‌وه‌ میره‌كان میرایه‌تی ده‌كه‌ن،
به‌گه‌كان و هه‌موو ئه‌وانه‌ی به‌ ڕاستودروستی دادوه‌ری ده‌كه‌ن.
17
من ئه‌وانه‌م خۆشده‌وێت كه‌ منیان خۆشده‌وێ،
ئه‌وانه‌ش كه‌ به‌ په‌رۆشه‌وه‌ به‌دوامدا ده‌گه‌ڕێن، ده‌مدۆزنه‌وه‌.
18
ده‌وڵه‌مه‌ندی و ڕێزداری له‌لای منه‌،
ڕاستودروستی[b] و ئه‌و سامانه‌ی كه‌ ده‌مێنێته‌وه‌.
19
به‌رهه‌می من له‌ زێڕ باشتره‌، له‌ زێڕی بێگه‌ردیش،
ده‌غڵیشم له‌ زیوی پوخته‌كراو باشتره‌.
20
به‌ ڕێچكه‌ی ڕاستودروستیدا ده‌ڕۆم،
له‌سه‌ر ڕێبازی دادپه‌روه‌ری،
21
هه‌تا سامان بكه‌مه‌ میرات بۆ ئه‌وانه‌ی منیان خۆشده‌وێت و
ئه‌مباره‌كانیان پڕ بكه‌م.»
22
«یه‌زدان له‌ سه‌ره‌تای به‌دیهێنانه‌كه‌ی منی دروستكرد،
هه‌ر له‌ كۆنه‌وه‌ له‌پێش كاره‌كانی.
23
له‌ ئه‌زه‌له‌وه‌ من دامه‌زراوم،
له‌ سه‌ره‌تاوه‌، له‌پێش زه‌وی.
24
هێشتا زه‌ریاكان نه‌ببوون من به‌دیهێنراوم،
هێشتا كانییه‌ پڕ ئاوه‌كان نه‌بوون.
25
پێش ئه‌وه‌ی چیاكان بچه‌سپێن،
پێش گرده‌كان، من به‌دیهێنراوم،
26
هێشتا نه‌ زه‌وی و نه‌ پانتاییه‌كانی دروستكردبوو،
نه‌ سه‌ره‌تای خۆڵی زه‌وی.
27
كاتێك كه‌ ئاسمانی جێگیر كرد من له‌وێ بووم،
كاتێك كه‌ هێڵی ئاسۆی به‌سه‌ر قووڵاییدا كێشا،
28
كاتێك كه‌ هه‌وری له‌ ئاسمان ڕاگرت و
سه‌رچاوه‌ی قووڵاییه‌كانی چه‌سپاند،
29
كاتێك كه‌ سنووری بۆ ده‌ریا كێشا
بۆ ئه‌وه‌ی ئاوه‌كان فه‌رمانی ئه‌و نه‌شكێنن،
كاتێك كه‌ بناغه‌ی زه‌وی داڕشت.
30
له‌گه‌ڵ ئه‌و وه‌ستایه‌كی لێزان بووم،
ڕۆژبه‌ڕۆژ شادمانی ئه‌و بووم،
هه‌میشه‌ له‌به‌رده‌میدا دڵخۆش بووم،
31
له‌ زه‌وییه‌ ئاوه‌دانه‌كه‌ی دڵخۆش ده‌بووم،
له‌گه‌ڵ ئاده‌میزاد شادمان بووم.
32
«ئه‌ی كوڕینه‌، ئێستاش گوێم لێ بگرن،
خۆزگه‌ ده‌خوازرێ به‌وانه‌ی ڕێگای من ده‌پارێزن.
33
گوێ له‌ ته‌مبێكردن بگرن و دانا بن،
پشت گوێی مه‌خه‌ن.
34
خۆزگه‌ ده‌خوازرێ به‌و كه‌سه‌ی گوێم لێ ده‌گرێت،
ڕۆژبه‌ڕۆژ له‌لای ده‌رگاكه‌م ئاگاداره‌،
له‌لای ده‌روازه‌ی ده‌رگاكه‌م ئێشك ده‌گرێت.
35
چونكه‌ ئه‌وه‌ی من بدۆزێته‌وه‌، ژیان ده‌دۆزێته‌وه‌،
ڕه‌زامه‌ندی یه‌زدانیش به‌ده‌ستده‌هێنێت.
36
به‌ڵام ئه‌وه‌ی من نه‌دۆزێته‌وه‌ زیان به‌ خۆی ده‌گه‌یه‌نێت،
هه‌موو ئه‌وانه‌ی ڕقیان له‌ منه‌، مردنیان خۆشده‌وێت.»
  1. a. 8‏:11 یاقووت: گه‌وهه‌ری سووری تۆخ.
  2. b. 8‏:18 مه‌به‌ستی له‌ به‌رهه‌می ڕاستودروسته‌.