عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ژنی دانا ماڵی خۆی بنیاد ده‌نێت،
گێلیش به‌ ده‌ستی خۆی كاولی ده‌كات.
2
ئه‌وه‌ی ڕاسته‌ڕێیه‌كه‌ی خۆی بگرێت له‌خواترسه‌،
به‌ڵام ئه‌وه‌ی ڕێگای خۆی خوار بكاته‌وه‌ سووكایه‌تی پێ ده‌كات.
3
گێل به‌ قسه‌كانی خۆی تووشی گۆچانی سزادان ده‌بێت،
به‌ڵام دانایان لێوه‌كانیان ده‌یانپارێزێت.
4
كه‌ مانگا نه‌بێت ئاخوڕ به‌تاڵه‌،
دروێنه‌ی زۆریش به‌ هێزی گایه‌.
5
شایه‌تی ده‌ستپاك درۆ ناكات،
به‌ڵام شایه‌تی درۆزن درۆ بڵاو ده‌كاته‌وه‌.
6
گاڵته‌جاڕ داوای دانایی ده‌كات و نایدۆزێته‌وه‌،
به‌ڵام زانیاری بۆ تێگه‌یشتوو ئاسانه‌.
7
له‌به‌رده‌م كه‌سی گێل دووربكه‌وه‌،
چونكه‌ له‌ لێوه‌كانی زانیاری نابیستیت.
8
دانایی ژیر تێگه‌یشتنی ڕێگای خۆیه‌تی،
به‌ڵام گێلایه‌تی گێله‌كان فریودانه‌.
9
گێله‌كان گاڵته‌ به‌ تاوان ده‌كه‌ن،
به‌ڵام له‌نێو سه‌رڕاستان ڕه‌زامه‌ندی خودا ده‌دۆزرێته‌وه‌.
10
هه‌ر دڵێك تاڵیێتی گیانی خۆی ده‌زانێت،
بێگانه‌ش له‌ خۆشییه‌كه‌ی به‌شداری ناكات.
11
ماڵی به‌دكاره‌كان كاول ده‌بێت،
به‌ڵام ڕه‌شماڵی سه‌رڕاستان گه‌شه‌ ده‌كات.
12
ڕێگا هه‌یه‌ له‌به‌رچاوی مرۆڤ ڕاست دیاره‌،
به‌ڵام كۆتاییه‌كه‌ی به‌ره‌و مردنه‌.
13
بگره‌ له‌ پێكه‌نینیشدا دڵ ته‌نگ ده‌بێت،
له‌وانه‌یه‌ كۆتایی خۆشیش خه‌م بێت.
14
كه‌سی ڕاڕا له‌ ڕێگای خۆی تێر ده‌بێت،
پیاوچاكیش له‌وه‌ی كه‌ هه‌یه‌تی.
15
ساویلكه‌ به‌ هه‌موو قسه‌یه‌ك بڕوا ده‌كات،
به‌ڵام ژیر ده‌ڕوانێته‌ هه‌نگاوه‌كانی خۆی.
16
كه‌سی دانا ده‌ترسێت و له‌ خراپه‌ لاده‌دات،
به‌ڵام گێل سه‌رگه‌رمه‌ و پشت ئه‌ستووره‌.
17
كه‌سی هه‌ڵه‌شه‌ ڕه‌فتاری گێلانه‌ ده‌كات،
پیاوی ته‌ڵه‌كه‌بازیش مایه‌ی ڕقه‌.
18
ساویلكه‌كان میراتگری گێلایه‌تین،
به‌ڵام ژیره‌كان سه‌ریان به‌ زانیاری ده‌ڕازێنرێته‌وه‌.
19
به‌دكاران له‌به‌رده‌م پیاوچاكان ده‌چه‌مێنه‌وه‌،
خراپه‌كارانیش له‌ به‌رده‌رگای كه‌سی ڕاستودروست.
20
هه‌ژار ته‌نانه‌ت دراوسێكه‌شی ڕقی لێی ده‌بێته‌وه‌،
به‌ڵام ده‌وڵه‌مه‌ند دۆستی زۆره‌.
21
ئه‌وه‌ی سووكایه‌تی به‌ دراوسێكه‌ی بكات گوناه ده‌كات،
به‌ڵام خۆزگه‌ ده‌خوازرێ به‌وه‌ی له‌گه‌ڵ هه‌ژاران میهره‌بانه‌.
22
ئایا وێڵ نابن ئه‌وانه‌ی پیلانی خراپه‌ داده‌ڕێژن؟
به‌ڵام خۆشه‌ویستی نه‌گۆڕ و دڵسۆزی له‌گه‌ڵ ئه‌وانه‌یه‌ كه‌ پلانی چاكه‌ داده‌ڕێژن.
23
له‌ هه‌موو ماندووبوونێك سوود هه‌یه‌،
به‌ڵام ته‌نها قسه‌ی لێوان بێت به‌ره‌و نه‌بوونییه‌.
24
ده‌وڵه‌مه‌ندی تاجی دانایانه‌،
به‌ڵام گێلایه‌تی نادانایان ده‌ڕازێنێته‌وه‌.
25
شایه‌تی ڕاستگۆ ده‌ربازكه‌ری خه‌ڵكه‌،
به‌ڵام ئه‌وه‌ی درۆ بڵاو ده‌كاته‌وه‌ ته‌فره‌ده‌ره‌.
26
ئه‌وه‌ی له‌ یه‌زدان بترسێت دڵنیاییه‌كی به‌هێزی هه‌یه‌،
بۆ كوڕه‌كانیشی ده‌بێته‌ په‌ناگا.
27
له‌خواترسی كانی ژیانه‌،
بۆ دووركه‌وتنه‌وه‌ له‌ داوی مردن.
28
زۆری گه‌ل شكۆمه‌ندییه‌ بۆ پاشا،
به‌ڵام نه‌مانی گه‌ل شكستی میره‌.
29
ئه‌وه‌ی دره‌نگ تووڕه‌ بێت باش تێده‌گات،
به‌ڵام ئه‌وه‌ی هه‌ڵه‌شه‌ بێت گێلایه‌تی ده‌رده‌خات.
30
دڵی ئارام ژیان به‌ جه‌سته‌ ده‌به‌خشێت،
به‌ڵام ئیره‌یی ئێسك كلۆر ده‌كات.
31
ئه‌وه‌ی سته‌م له‌ هه‌ژار بكات سووكایه‌تی به‌ دروستكه‌ره‌كه‌ی ده‌كات،
به‌ڵام ئه‌وه‌ی له‌گه‌ڵ نه‌دار میهره‌بانه‌ ڕێز له‌ خودا ده‌گرێت.
32
خراپه‌كار به‌ خراپه‌كانی خۆی ده‌كه‌وێنرێت،
به‌ڵام كه‌سی ڕاستودروست له‌ مردنیشی په‌ناگای هه‌یه‌.
33
دانایی له‌ناو دڵی كه‌سی تێگه‌یشتوو ده‌حه‌سێته‌وه‌،
هه‌روه‌ها گێله‌كان ته‌نانه‌ت ناواخنیشیان ده‌زانرێت.
34
ڕاستودروستی نه‌ته‌وه‌ به‌رز ده‌كاته‌وه‌،
به‌ڵام گوناه شه‌رمه‌زاری گه‌لانه‌.
35
ڕه‌زامه‌ندی پاشا بۆ خزمه‌تكاری وریایه‌،
به‌ڵام تووڕه‌بوونی له‌ خزمه‌تكاری شه‌رمه‌زاره‌.