عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ته‌رازووی لاسه‌نگ له‌لای یه‌زدان قێزه‌ونه‌،
به‌ڵام ئاره‌زووی له‌ كێشی دروسته‌.
2
كه‌ لووتبه‌رزی هات، ڕیسواییش دێت،
به‌ڵام له‌گه‌ڵ بێفیزه‌كان دانایی دێت.
3
ڕاستیی سه‌رڕاسته‌كان ڕێنماییان ده‌كات،
به‌ڵام خواری ناپاكان سه‌ری خۆیان ده‌خوات.
4
بێ سووده‌ سامان له‌ ڕۆژی تووڕه‌یی،
به‌ڵام ڕاستودروستی فریاده‌كه‌وێت له‌ مردن.
5
ڕاستودروستی ڕێگا بۆ كه‌سی بێ كه‌موكوڕی ئاسان ده‌كات،
به‌ڵام به‌دكار به‌ به‌دكاری خۆی ده‌گلێت.
6
ڕاستودروستی سه‌رڕاسته‌كان فریایان ده‌كه‌وێت،
به‌ڵام ناپاكان گرفتاری ئاره‌زووه‌كانیان ده‌بن.
7
به‌ مردنی به‌دكار ئومێدی ده‌بڕێت،
هیوای پاڵه‌وانانیش له‌ناوده‌چێت.
8
كه‌سی ڕاستودروست له‌ ته‌نگانه‌دا ده‌رباز ده‌بێت و
به‌دكار ده‌گرێته‌وه‌.
9
كه‌سی دووڕوو به‌ ده‌می دراوسێكه‌ی له‌ناوده‌بات،
به‌ڵام ڕاستودروستان به‌ زانیاری ده‌رباز ده‌بن.
10
به‌ سه‌ركه‌وتنی ڕاستودروستان شار شادمان ده‌بێت،
به‌ له‌ناوچوونی به‌دكارانیش هاواری خۆشییه‌.
11
به‌ به‌ره‌كه‌تی سه‌رڕاسته‌كان شار به‌رز ده‌بێته‌وه‌،
به‌ڵام به‌ ده‌می به‌دكاران وێران ده‌بێت.
12
ئه‌وه‌ی سووكایه‌تی به‌ دراوسێكه‌ی بكات تێنه‌گه‌یشتووه‌،
به‌ڵام كه‌سی تێگه‌یشتوو بێده‌نگ ده‌بێت.
13
ده‌مشڕ نهێنی ئاشكرا ده‌كات،
به‌ڵام مرۆڤی دڵسۆز شت داده‌پۆشێت.
14
بێ ڕاوێژ گه‌ل ده‌كه‌وێت،
به‌ڵام سه‌ركه‌وتن به‌ زۆری ئامۆژگارانه‌.
15
ئه‌وه‌ی ببێته‌ كه‌فیلی بێگانه‌ بێگومان تووشی خراپه‌ ده‌بێت،
به‌ڵام ئه‌وه‌ی ڕقی له‌ ده‌ست تێكه‌ڵبوون بێت ئاسووده‌یه‌.
16
ئافره‌تی نه‌رمونیان ڕێزی ده‌ست ده‌كه‌وێت،
به‌ڵام كه‌سی زۆردار ته‌نها سامان.
17
مرۆڤی به‌ به‌زه‌یی چاكه‌ له‌گه‌ڵ خۆی ده‌كات،
به‌ڵام دڵڕه‌ق خۆی ماندوو ده‌كات.
18
خراپه‌كار كرێیه‌كه‌ی قه‌ڵبه‌،
به‌ڵام چێنه‌ری ڕاستودروست پاداشتی مسۆگه‌ره‌.
19
وه‌ك چۆن ڕاستودروستی بۆ ژیانه‌،
شوێنكه‌وتنی خراپه‌ش بۆ مردنه‌.
20
قێزی یه‌زدان له‌ دڵخراپانه‌،
ڕه‌زامه‌ندیشی بۆ ڕێ ته‌واوانه‌.
21
بێگومان به‌دكار بێ سزا نابێت،
به‌ڵام نه‌وه‌ی ڕاستودروستان ده‌رباز ده‌بن.
22
وه‌ك خه‌زێمی زێڕه‌ به‌ لووتی به‌رازه‌وه‌،
ئافره‌تی جوانی بێ ئه‌قڵ.
23
ئاره‌زووی ڕاستودروستان ته‌نها چاكه‌یه‌،
به‌ڵام هیوای به‌دكاران له‌ تووڕه‌ییه‌.
24
هه‌یه‌ بڵاو ده‌كاته‌وه‌ و بۆی زیاد ده‌كرێت،
به‌ڵام ئه‌وه‌ی له‌ ڕاده‌به‌ده‌ر ده‌ستی پێوه‌ بگرێت ته‌نها بۆ نه‌دارییه‌.
25
چاوتێر ده‌وڵه‌مه‌ند ده‌بێت،
ئاوگێڕیش ئاوی ده‌درێتێ.
26
ئه‌وه‌ی گه‌نم ئه‌مبار ده‌كات و نایفرۆشێت گه‌ل نه‌فره‌تی لێ ده‌كات،
به‌ڵام به‌ره‌كه‌ت بۆ سه‌ری فرۆشیاره‌.
27
ئه‌وه‌ی په‌رۆشه‌ بۆ چاكه‌ ڕه‌زامه‌ندی ده‌ست ده‌كه‌وێت،
به‌ڵام ئه‌وه‌ی به‌دوای خراپه‌دا بگه‌ڕێت خراپه‌ دێته‌ ڕێی.
28
ئه‌وه‌ی پشت به‌ ده‌وڵه‌مه‌ندی خۆی ببه‌ستێت ده‌كه‌وێت،
ڕاستودروستانیش وه‌ك گه‌ڵا ده‌پشكوێن.
29
ئه‌وه‌ی ماڵی خۆی ماندوو بكات میراتی با ده‌بێت،
گێلیش ده‌بێته‌ نۆكه‌ری دانا.
30
به‌روبوومی كه‌سی ڕاستودروست دره‌ختی ژیانه‌،
ئه‌وه‌ی خه‌ڵك ده‌باته‌وه‌ دانایه‌.
31
ئه‌گه‌ر كه‌سی ڕاستودروست له‌سه‌ر زه‌وی پاداشت ده‌كرێت،
له‌وه‌ش زیاتر خراپه‌كار و گوناهبار!