عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
چه‌ند شارۆچكه‌یه‌ك بۆ لێڤییه‌كان 
1
ئینجا یه‌زدان له‌ ده‌شتی مۆئاب له‌سه‌ر ڕووباری ئوردون به‌رامبه‌ر ئه‌ریحا به‌ موسای فه‌رموو:
2
«فه‌رمان به‌ نه‌وه‌ی ئیسرائیل بكه‌ با له‌ موڵكی میراتیان چه‌ند شارۆچكه‌یه‌ك بۆ نیشته‌جێبوون و له‌وه‌ڕگاش له‌ چوارده‌وری شارۆچكه‌كان به‌ لێڤییه‌كان بده‌ن.
3
ئینجا شارۆچكه‌كان بۆ نیشته‌جێبوونیان ده‌بێت و له‌وه‌ڕگاكانیش بۆ گاوگۆتاڵ و هه‌موو مه‌ڕوماڵاتێكی دیكه‌یان ده‌بێت.
4
«ئه‌و له‌وه‌ڕگایانه‌ش كه‌ ده‌یده‌نه‌ لێڤییه‌كان، له‌ شوورای شارۆچكه‌كانه‌وه‌ به‌لای ده‌ره‌وه‌، هه‌زار باڵ[a] به‌ چوارده‌وریدا ده‌بێت.
5
له‌ ده‌ره‌وه‌ی شار به‌لای ڕۆژهه‌ڵاتدا دوو هه‌زار باڵ[b] ده‌ژمێرن، به‌لای باشووردا دوو هه‌زار باڵ، به‌لای ڕۆژئاوادا دوو هه‌زار باڵ، به‌لای باكووردا دوو هه‌زار باڵ و شارۆچكه‌كه‌ش له‌ناوه‌ڕاست ده‌بێت. ئه‌مه‌ ده‌بێته‌ له‌وه‌ڕگای شارۆچكه‌كان بۆیان.
شاره‌كانی په‌ناگا 
6
«شه‌ش له‌و شارۆچكانه‌ش كه‌ به‌ لێڤییه‌كانی ده‌ده‌ن ده‌بنه‌ شاری په‌ناگا، بۆ ئه‌وه‌ی هه‌ركه‌سێك كه‌سێك بكوژێت بۆ ئه‌وێ هه‌ڵبێت. سه‌رباری ئه‌مانه‌ش چل و دوو شارۆچكه‌ی دیكه‌ ده‌ده‌نه‌ لێڤییه‌كان.
7
هه‌موو ئه‌و شارۆچكانه‌ی ده‌یانده‌نه‌ لێڤییه‌كان، چل و هه‌شت شارۆچكه‌ن به‌ له‌وه‌ڕگاكانیانه‌وه‌.
8
ئه‌و شارۆچكانه‌ش كه‌ له‌ موڵكی نه‌وه‌ی ئیسرائیل ده‌یده‌نه‌ لێڤییه‌كان، هه‌ریه‌كه‌ به‌گوێره‌ی میراتی هه‌ر هۆزێك. له‌و هۆزانه‌ی كه‌ شارۆچكه‌یان زۆره‌، زۆر وه‌رده‌گرن و له‌و هۆزانه‌ش كه‌ كه‌مه‌، كه‌م وه‌رده‌گرن.»
9
هه‌روه‌ها یه‌زدان به‌ موسای فه‌رموو:
10
«له‌گه‌ڵ نه‌وه‌ی ئیسرائیل بدوێ و پێیان بڵێ: ”كاتێك ئێوه‌ له‌ ڕووباری ئوردون ده‌په‌ڕنه‌وه‌ بۆ خاكی كه‌نعان،
11
چه‌ند شارۆچكه‌یه‌ك بۆ خۆتان ده‌ستنیشان ده‌كه‌ن و ده‌بنه‌ شاری په‌ناگا، تاكو ئه‌و كه‌سه‌ی كه‌ به‌بێ ئه‌نقه‌ست كه‌سێك بكوژێت بۆ ئه‌وێ هه‌ڵبێت.
12
ئه‌و شارانه‌ بۆتان ده‌بنه‌ په‌ناگا له‌ ده‌ست خوێنگر، بۆ ئه‌وه‌ی تۆمه‌تباركراو به‌ كوشتن، نه‌كوژرێت هه‌تا له‌به‌رده‌م ئه‌نجومه‌ن ده‌وه‌ستێت بۆ دادوه‌ری.
13
ئه‌و شه‌ش شارۆچكانه‌ش كه‌ ئێوه‌ ده‌یده‌ن ده‌بنه‌ شاری په‌ناگا بۆتان.
14
سێ له‌ شارۆچكه‌كان له‌وبه‌ری ڕووباری ئوردون ده‌ده‌ن و سێ شارۆچكه‌ش له‌ خاكی كه‌نعان ده‌ده‌ن، ده‌بنه‌ شاری په‌ناگا،
15
بۆ نه‌وه‌ی ئیسرائیل و نامۆ و ئه‌وه‌ی له‌نێویاندا نیشته‌جێیه‌. ئه‌م شه‌ش شاره‌ بۆ په‌ناگا ده‌بن، هه‌تا هه‌ركه‌سێك كه‌ به‌بێ ئه‌نقه‌ست كه‌سێك بكوژێت بۆ ئه‌وێ هه‌ڵبێت.
16
«”ئه‌گه‌ر یه‌كێك به‌ ئامرازێكی ئاسن له‌ كه‌سێكی دا و مرد، ئه‌وا به‌ بكوژ داده‌نرێت، بكوژ ده‌بێت بكوژرێته‌وه‌.
17
ئه‌گه‌ر كه‌سێك به‌ردێكی به‌ ده‌سته‌وه‌ بوو كه‌ بكوژێت و به‌و به‌رده‌ له‌ كه‌سێكی دا و مرد، ئه‌وا به‌ بكوژ داده‌نرێت، بكوژ ده‌كوژرێت.
18
یان ئه‌گه‌ر كه‌سێك هه‌ر شتێكی له‌ دار دروستكراوی به‌ ده‌سته‌وه‌ بوو كه‌ بكوژێت، له‌ كه‌سێكی دیكه‌ی دا، ئه‌وا به‌ بكوژ داده‌نرێت، بكوژ ده‌كوژرێت.
19
خوێنگره‌كه‌[c] بكوژ ده‌كوژێت، هه‌ر كاتێك تووشی بێت ده‌یكوژێت.
20
یان ئه‌گه‌ر كه‌سێك به‌ ڕقه‌وه‌ پاڵی به‌ كه‌سێكی دیكه‌وه‌ نا یان به‌ ئه‌نقه‌ست شتێكی بۆ هاویشت و مرد،
21
یان ئه‌گه‌ر به‌ دوژمنایه‌تییه‌وه‌ به‌ مسته‌كۆڵه‌ لێیدا و مرد، ئه‌وا ده‌ستدرێژیكه‌ر ده‌كوژرێت، چونكه‌ بكوژه‌، خوێنگره‌ تۆڵه‌سێنه‌ره‌كه‌ هه‌ر كاتێك تووشی بكوژ بێت ده‌یكوژێت.
22
«”به‌ڵام ئه‌گه‌ر كه‌سێك له‌ناكاو پاڵی به‌ كه‌سێكی دیكه‌وه‌ نا به‌بێ دوژمنایه‌تی یان به‌بێ ئه‌نقه‌ست شتێكی بۆ هاویشت،
23
یان به‌ردێكی به‌سه‌ریدا به‌ردایه‌وه‌ كه‌ بكوژێت بێ ئه‌وه‌ی بیبینێت و مرد، ئه‌گه‌ر چی دوژمنیشی نییه‌ و خراپه‌ی ئه‌وی ناوێت،
24
ئه‌وا ئه‌نجومه‌ن به‌گوێره‌ی ئه‌م یاسایانه‌ دادوه‌ری له‌نێوان تۆمه‌تباركراوه‌كه‌ و خوێنگره‌ تۆڵه‌سێنه‌ره‌كه‌ ده‌كات.
25
ئه‌نجومه‌ن فریای تۆمه‌تباركراوه‌كه‌ ده‌كه‌وێت له‌ ده‌ست خوێنگره‌ تۆڵه‌سێنه‌ره‌كه‌، ئه‌نجومه‌ن ده‌یگه‌ڕێنێته‌وه‌ شاری په‌ناگای كه‌ بۆ ئه‌وێ هه‌ڵاتبوو. له‌وێ ده‌مێنێته‌وه‌ هه‌تا سه‌رۆكی كاهین ده‌مرێت كه‌ به‌ زه‌یتی پیرۆز ده‌ستنیشان كراوه‌.
26
«”به‌ڵام ئه‌گه‌ر تۆمه‌تباركراوه‌كه‌ له‌ سنووری شاری په‌ناگای كه‌ بۆی هه‌ڵاتووه‌، چووه‌ ده‌ره‌وه‌ و
27
خوێنگری تۆڵه‌سێنه‌ر ئه‌وی له‌ ده‌ره‌وه‌ی سنووری شاری په‌ناگا بینییه‌وه‌ و خوێنگره‌ تۆڵه‌سێنه‌ره‌كه‌ تۆمه‌تباركراوه‌كه‌ی كوشت، ئه‌وا مافی تاوانباركردنی خوێنی نییه‌،
28
چونكه‌ ده‌بێت هه‌تا مردنی سه‌رۆكی كاهین ئه‌و كه‌سه‌ له‌ شاری په‌ناگا بێت، به‌ڵام له‌دوای مردنی سه‌رۆكی كاهین، ده‌گه‌ڕێته‌وه‌ موڵكه‌كه‌ی خۆی.
29
«”ئه‌مه‌ بۆتان ده‌بێته‌ فه‌رزێكی یاسایی بۆ نه‌وه‌كانتان له‌ هه‌موو نشینگه‌كانتان.
30
«”هه‌ركه‌سێك یه‌كێك بكوژێت، ئه‌وا له‌سه‌ر ده‌می چه‌ند شایه‌تێك به‌ بكوژ داده‌نرێت و ده‌كوژرێت، یه‌ك شایه‌ت به‌س نییه‌ بۆ شایه‌تیدان له‌سه‌ر كه‌سێك بۆ مردن.
31
«”خوێنبایی وه‌رمه‌گره‌ بۆ بكوژێك كه‌ شایانی سزای مردنه‌، به‌ڵكو ده‌بێت بكوژرێت.
32
«”هه‌روه‌ها خوێنبایی وه‌رمه‌گرن بۆ ئه‌و كه‌سه‌ی بۆ شاری په‌ناگا هه‌ڵبێت، تاوه‌كو پێش مردنی سه‌رۆكی كاهین بگه‌ڕێته‌وه‌ و له‌ زه‌وی خۆی نیشته‌جێ بێت.
33
«”ئه‌و خاكه‌ی ئێوه‌ تێیدان گڵاوی مه‌كه‌ن، چونكه‌ خوێن خاك گڵاو ده‌كات، هیچ شتێك كه‌فاره‌تی ئه‌و خوێنه‌ ناكات كه‌ له‌ خاكه‌كه‌ ڕژاوه‌، ته‌نها خوێنی خوێنڕێژه‌كه‌ نه‌بێت.
34
كه‌واته‌ ئه‌و خاكه‌ی كه‌ ئێوه‌ تێیدا نیشته‌جێن و من له‌ناوه‌ڕاستیدا نیشته‌جێم گڵاوی مه‌كه‌ن، چونكه‌ من كه‌ یه‌زدانم له‌نێو نه‌وه‌ی ئیسرائیلدا نیشته‌جێم.“»
  1. a. 35‏:4 هه‌زار باڵ: نزیكه‌ی 450 مه‌تر.
  2. b. 35‏:5 دوو هه‌زار باڵ: نزیكه‌ی 900 مه‌تر.
  3. c. 35‏:19 ‏خوێنگر: خوێنخوا، نزیكترین پله‌ی كۆمه‌ڵایه‌تی كه‌ مافی هه‌یه‌ داوای تۆڵه‌ی خوێنی بكات.