عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئاوی پاككردنه‌وه‌ 
1
یه‌زدان به‌ موسا و هارونی فه‌رموو:
2
«ئه‌مه‌ فه‌رزی فێركردنه‌كه‌یه‌ كه‌ یه‌زدان فه‌رمانی پێ كردووه‌ و ده‌فه‌رموێت، به‌ نه‌وه‌ی ئیسرائیل بڵێ با نوێنگینێكی[a] سووری ساغت بۆ بهێنن كه‌ كه‌موكوڕی تێدا نه‌بێت و نیری نه‌خرابێته‌ سه‌ر.
3
بدرێته‌ ئه‌لعازاری كاهین و ده‌بردرێته‌ ده‌ره‌وه‌ی ئۆردوگا و له‌به‌رده‌می سه‌رده‌بڕدرێت.
4
ئه‌لعازاری كاهینیش به‌ په‌نجه‌ی له‌ خوێنه‌كه‌ی ده‌بات و به‌ره‌و ڕووی چادری چاوپێكه‌وتن حه‌وت جار ده‌یپرژێنێت.
5
نوێنگینه‌كه‌ش له‌به‌رچاوی ده‌سووتێنرێت، پێستی و گۆشتی و خوێنی و ڕیخی ده‌سووتێنرێت.
6
كاهینیش پارچه‌ دارێكی ئورز و به‌نی سووری ئاڵ و زوفا ده‌بات و هه‌ڵیانده‌داته‌ ناو ئاگری نوێنگینه‌كه‌.
7
ئینجا كاهین جله‌كانی ده‌شوات و خۆی به‌ ئاو ده‌شوات و له‌دوای ئه‌وه‌ دێته‌ ناو ئۆردوگاكه‌وه‌، هه‌تا ئێواره‌ش به‌پێی ڕێوڕه‌سمی ئایینی گڵاو ده‌بێت.
8
ئه‌وه‌ش كه‌ سووتاندی جله‌كانی به‌ ئاو ده‌شوات و خۆی به‌ ئاو ده‌شوات و هه‌تا ئێواره‌ش گڵاو ده‌بێت.
9
«پیاوێكی پاكیش خۆڵه‌مێشی نوێنگینه‌كه‌ كۆده‌كاته‌وه‌ و له‌ ده‌ره‌وه‌ی ئۆردوگاكه‌ له‌ شوێنێكی پاك به‌پێی ڕێوڕه‌سم دایده‌نێت، جا بۆ كۆمه‌ڵی نه‌وه‌ی ئیسرائیل پارێزراو ده‌بێت بۆ ئاوی پاككردنه‌وه‌، چونكه‌ پاكبوونه‌وه‌یه‌ له‌ گوناه.
10
ئه‌وه‌ی خۆڵه‌مێشی نوێنگینه‌كه‌شی كۆكرده‌وه‌ جله‌كانی ده‌شوات و هه‌تا ئێواره‌ گڵاو ده‌بێت، جا بۆ نه‌وه‌ی ئیسرائیل و ئه‌و نامۆیه‌ش كه‌ له‌نێویانه‌، ده‌بێت به‌ فه‌رزێكی هه‌تاهه‌تایی.
11
«ئه‌وه‌ی ده‌ست له‌ لاشه‌ی كه‌سێكی مردوو بدات ئه‌وا حه‌وت ڕۆژ گڵاو ده‌بێت.
12
پێویسته‌ له‌ ڕۆژی سێیه‌مدا خۆی پێ پاك بكاته‌وه‌[b] و له‌ ڕۆژی حه‌وته‌م پاك ده‌بێت، به‌ڵام ئه‌گه‌ر له‌ ڕۆژی سێیه‌مدا خۆی پاك نه‌كاته‌وه‌ ئه‌وا له‌ ڕۆژی حه‌وته‌م پاك نابێت.
13
هه‌ركه‌سێك ده‌ست له‌ لاشه‌ی كه‌سێكی مردوو بدات و خۆی پاك نه‌كاته‌وه‌ ئه‌وا چادری په‌رستنی یه‌زدان گڵاو ده‌كات، ئه‌و كه‌سه‌ له‌ ئیسرائیل ده‌بڕدرێته‌وه‌، چونكه‌ ئاوی پاككردنه‌وه‌ی به‌سه‌ردا نه‌پرژێنراوه‌ و گڵاوه‌، گڵاوییه‌كه‌ی هێشتا تێدا ماوه‌.
14
«ئه‌مه‌ فێركردنه‌كه‌یه‌، ئه‌گه‌ر كه‌سێك له‌ناو چادرێكدا مرد ئه‌وا هه‌ر یه‌كێك بێته‌ ناو چادره‌كه‌ و هه‌موو ئه‌وانه‌ی له‌ناو چادره‌كه‌ بوون حه‌وت ڕۆژ گڵاو ده‌بن،
15
هه‌موو ده‌فرێكی[c] كراوه‌ش كه‌ به‌ باشی سه‌ری دانه‌خرابێت ئه‌وا گڵاوه‌.
16
«هه‌ركه‌سێك له‌ ده‌شتوده‌ر ده‌ست له‌ كوژراوێكی به‌ شمشێر یان مردووێك یان ئێسكی مرۆڤێك یان گۆڕێك بدات، ئه‌وا حه‌وت ڕۆژ گڵاو ده‌بێت.
17
«جا بۆ گڵاو له‌ خۆڵه‌مێشی ئاگری قوربانی پاكبوونه‌وه‌ ده‌به‌ن و له‌ گۆزه‌یه‌كدا ئاوێكی سازگاری به‌سه‌ردا ده‌كه‌ن.
18
پیاوێكی پاكیش به‌پێی ڕێوڕه‌سم زوفایه‌ك ده‌بات و نوقومی ناو ئاوه‌كه‌ی ده‌كات و به‌سه‌ر چادر و هه‌موو شتومه‌كه‌كانیدا ده‌پرژێنێت، به‌سه‌ر ئه‌و كه‌سانه‌شدا ده‌پرژێنێت كه‌ له‌وێ بوون، هه‌روه‌ها ئه‌وه‌ش كه‌ ده‌ستی له‌ ئێسك یان كوژراو یان مردوو یان گۆڕ داوه‌.
19
كه‌سه‌ پاكه‌كه‌ش له‌ ڕۆژی سێیه‌م و ڕۆژی حه‌وته‌م ئاوه‌كه‌ به‌سه‌ر كه‌سه‌ گڵاوه‌كه‌دا ده‌پرژێنێت، له‌ ڕۆژی حه‌وته‌م پاكی ده‌كاته‌وه‌. ئه‌ویش جله‌كانی ده‌شوات و خۆی به‌ ئاو ده‌شوات و بۆ ئێواره‌ پاك ده‌بێت.
20
به‌ڵام ئه‌و كه‌سه‌ی گڵاو ده‌بێت و خۆی پاك ناكاته‌وه‌، ئه‌وا ئه‌و گیانه‌ له‌نێو كۆمه‌ڵدا ده‌بڕدرێته‌وه‌، چونكه‌ پیرۆزگای یه‌زدانی گڵاو كردووه‌، ئاوی پاككردنه‌وه‌ی به‌سه‌ردا نه‌پرژێنراوه‌، گڵاوه‌.
21
جا بۆیان ده‌بێته‌ فه‌رزێكی هه‌تاهه‌تایی.
«ئه‌وه‌ی ئاوی پاككردنه‌وه‌ی پرژاندووه‌ جله‌كانی ده‌شوات، ئه‌وه‌ی ده‌ستی له‌ ئاوی پاككردنه‌وه‌ داوه‌، هه‌تا ئێواره‌ گڵاو ده‌بێت،
22
هه‌رچییه‌ك ئه‌و گڵاوه‌ ده‌ستی لێ بدات گڵاو ده‌بێت و ئه‌و كه‌سه‌ش كه‌ ده‌ستی لێ بدات هه‌تا ئێواره‌ گڵاو ده‌بێت.»
  1. a. 19‏:2 نوێنگین: به‌ گوێره‌كه‌ مێینه‌یه‌ك ده‌گوترێت كاتێك كه‌ له‌ شیر ده‌بڕدرێته‌وه‌، كه‌ ته‌مه‌نی له‌ یه‌ك ساڵ تێبپه‌ڕێنێ.
  2. b. 19‏:12 پێ پاك بكاته‌وه‌: واته‌ به‌ ئاوی پاككردنه‌وه‌، بڕوانه‌ ئایه‌تی 9.
  3. c. 19‏:15 جام یان ده‌وری بۆ پێداویستی خواردن.