عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خزمه‌تی كاهین و لێڤی 
1
یه‌زدان به‌ هارونی فه‌رموو: «تۆ و كوڕه‌كانت و بنه‌ماڵه‌كه‌ت ئۆباڵی ئه‌و گوناهانه‌ هه‌ڵده‌گرن كه‌ له‌ پیرۆزگا ده‌كرێت، تۆ و كوڕه‌كانت ئۆباڵی ئه‌و گوناهانه‌ هه‌ڵده‌گرن كه‌ له‌ كاهینیێتییه‌كه‌تان ده‌كرێت.
2
هه‌روه‌ها براكانت، هۆزی لێڤی، هۆزی باوكت، له‌ خۆت نزیك بكه‌وه‌، ئینجا به‌ تۆوه‌ پابه‌ند ده‌بن و پاڵپشتی تۆ و كوڕه‌كانت ده‌كه‌ن له‌به‌رده‌م چادری په‌یمان.
3
ئه‌وان به‌رده‌ستی خۆت و هه‌موو كاروباری چادره‌كه‌ ده‌كه‌ن، به‌ڵام له‌ قاپوقاچاغی پیرۆزگاكه‌ و له‌ قوربانگاكه‌ نزیك ناكه‌ونه‌وه‌، نه‌وه‌ك ئه‌وان و ئێوه‌ش، هه‌مووتان بمرن.
4
پابه‌ندت ده‌بن و به‌رپرسیاریش ده‌بن له‌ پارێزگاری چادری چاوپێكه‌وتن له‌گه‌ڵ هه‌موو خزمه‌تی چادره‌كه‌، هیچ كه‌سێكی دیكه‌ش لێتان نزیك ناكه‌وێته‌وه‌.
5
«به‌ڵكو ئێوه‌ به‌رپرسیار ده‌بن له‌ پارێزگاری پیرۆزگاكه‌ و قوربانگاكه‌، تاكو جارێكی دیكه‌ تووڕه‌یی نه‌یه‌ته‌ سه‌ر نه‌وه‌ی ئیسرائیل.
6
من خۆم لێڤییه‌كانی براتانم له‌نێو نه‌وه‌ی ئیسرائیل هه‌ڵبژارد و دامه‌وه‌ ئێوه‌، بۆ یه‌زدان ته‌رخانكراون تاكو خزمه‌ته‌كه‌ی چادری چاوپێكه‌وتن به‌جێبگه‌یه‌نن.
7
ته‌نها تۆ و كوڕه‌كانت له‌گه‌ڵت خزمه‌تی كاهینیێتی ده‌كه‌ن، له‌گه‌ڵ هه‌موو ئه‌وه‌ی په‌یوه‌ندی به‌ قوربانگاكه‌ هه‌یه‌ و ئه‌وه‌ی له‌ناو په‌رده‌كه‌یه‌ ده‌پارێزن. كاهینیێتی پێدراوێكی تایبه‌ت به‌ ئێوه‌یه‌ و پێمداون و هه‌ركه‌سێكی دیكه‌ ئه‌وه‌ی له‌ پیرۆزگا نزیك بكه‌وێته‌وه‌ ده‌كوژرێت.»
به‌شی كاهین و لێڤییه‌كان 
8
یه‌زدان به‌ هارونی فه‌رموو: «ئێستا من به‌رپرسیاریێتی پێشكه‌شكراوه‌كان كه‌ بۆ منی به‌رز ده‌كه‌نه‌وه‌ داومه‌ته‌ تۆ، هه‌موو پێشكه‌شكراوه‌ پیرۆزه‌كانی نه‌وه‌ی ئیسرائیل، ده‌یده‌مه‌ خۆت و كوڕه‌كانت وه‌ك به‌شه‌ كاهینیێتیتان و به‌شێكی چه‌سپاوه‌.
9
ئه‌م به‌شه‌ بۆ تۆ ده‌بێت له‌ پێشكه‌شكراوه‌ هه‌ره‌پیرۆزه‌كان ئه‌وه‌ی له‌ ئاگر ده‌پارێزرێت. له‌ هه‌موو قوربانییه‌كانیان و هه‌موو پێشكه‌شكراوه‌كانی دانه‌وێڵه‌یان و هه‌موو قوربانییه‌كانی گوناهیان و هه‌موو قوربانییه‌كانی تاوانیان كه‌ بۆ منی ده‌هێنن، ئه‌و به‌شه‌ هه‌ره‌پیرۆزه‌ بۆ تۆ و بۆ كوڕه‌كانته‌.
10
وه‌ك شتێكی هه‌ره‌پیرۆز ده‌یخۆیت، هه‌موو نێرینه‌یه‌ك لێی ده‌خوات، بۆ تۆ پیرۆز ده‌بێت.
11
«ئه‌وه‌ی له‌ به‌خشین و قوربانی به‌رزكردنه‌وه‌ی ئیسرائیلییه‌كان به‌لاوه‌ده‌نرێت، بۆ تۆیه‌. به‌شێكی چه‌سپاوه‌ داومه‌ته‌ تۆ و كوڕ و كچه‌كانت. ئیتر هه‌موو كه‌سێك له‌ ماڵه‌كه‌ت كه‌ به‌پێی ڕێوڕه‌سم پاكه‌ لێی ده‌خوات.
12
«باشترین زه‌یت و باشترین شه‌راب و باشترین دانه‌وێڵه‌، یه‌كه‌مین به‌رهه‌مه‌كانیان كه‌ به‌ یه‌زدانی ده‌ده‌ن، من هه‌موویم داوه‌ته‌ تۆ،
13
یه‌كه‌مین به‌رهه‌می هه‌موو شتێكی زه‌وییه‌كه‌یان كه‌ بۆ یه‌زدانی پێشكه‌ش ده‌كه‌ن بۆ تۆ ده‌بێت، هه‌موو كه‌سێك له‌ ماڵه‌كه‌ت ئه‌وه‌ی به‌پێی ڕێوڕه‌سم پاكه‌ لێی ده‌خوات.
14
«هه‌موو ته‌رخانكراوێك[a] بۆ یه‌زدان له‌ ئیسرائیل بۆ تۆ ده‌بێت،
15
هه‌ر نۆبه‌ره‌یه‌كی سك كه‌ پێشكه‌شی یه‌زدانی ده‌كه‌ن له‌ مرۆڤ و له‌ ئاژه‌ڵ، بۆ تۆ ده‌بێت، به‌ڵام پێویسته‌ كوڕه‌ نۆبه‌ره‌ی مرۆڤ و نۆبه‌ره‌ نێرینه‌ی ئاژه‌ڵی گڵاویش بكڕیته‌وه‌.
16
پێویسته‌ له‌ ته‌مه‌نی یه‌ك مانگییه‌وه‌ بیانكڕیته‌وه‌، نرخی كڕینه‌وه‌ش پێنج شاقل له‌ زیو به‌گوێره‌ی خه‌مڵاندنی شاقلی پیرۆزگا، كه‌ بیست گێرایه‌[b] .
17
«به‌ڵام پێویسته‌ نۆبه‌ره‌ی مانگا و مه‌ڕ و بزن نه‌كڕیته‌وه‌، ئه‌وان پیرۆزن و خوێنه‌كه‌یان به‌سه‌ر قوربانگاكه‌دا ده‌ڕژێنیت و پیوه‌كه‌یان[c] ده‌سووتێنیت، قوربانی به‌ ئاگره‌، ئه‌و بۆنه‌ی یه‌زدان پێی خۆشه‌.
18
گۆشته‌كه‌شی بۆ تۆ ده‌بێت وه‌ك سنگی قوربانی به‌رزكردنه‌وه‌ و ڕانی ڕاسته‌.
19
هه‌رچییه‌ك كه‌ به‌لاوه‌ ده‌نرێت له‌ پێشكه‌شكراوه‌ پیرۆزه‌كانی نه‌وه‌ی ئیسرائیل كه‌ بۆ یه‌زدانی پێشكه‌ش ده‌كه‌ن وه‌ك به‌شێكی چه‌سپاو داومه‌ به‌ تۆ و كوڕ و كچه‌كانت، ده‌بێته‌ په‌یمانی نمه‌ك بۆ تۆ و نه‌وه‌كه‌ت كه‌ هه‌تاهه‌تایه‌ له‌به‌رده‌م یه‌زدان ده‌چه‌سپێت.»
20
هه‌روه‌ها یه‌زدان به‌ هارونی فه‌رموو: «له‌ زه‌وییه‌كه‌یان هیچ میراتت به‌رناكه‌وێت و له‌نێویان به‌شت نابێت، له‌نێو نه‌وه‌ی ئیسرائیل من به‌ش و میراتی تۆم.
21
«به‌ڵام نه‌وه‌ی لێڤی له‌بری ئه‌و خزمه‌ته‌ی ده‌یكه‌ن، خزمه‌تی چادری چاوپێكه‌وتن، ئه‌وا من له‌ ئیسرائیل وه‌ك میرات هه‌موو ده‌یه‌كێكم پێداون.
22
له‌ ئێستا به‌دواوه‌ نه‌وه‌ی ئیسرائیل له‌ چادری چاوپێكه‌وتن نزیك ناكه‌ونه‌وه‌، هه‌تا گوناهێك هه‌ڵبگرن كه‌ بۆ مردن بێت،
23
به‌ڵكو لێڤییه‌كان خزمه‌تی چادری چاوپێكه‌وتن ده‌كه‌ن، ئه‌وان به‌رپرسیاریێتی هه‌ڵده‌گرن وه‌ك فه‌رزێكی هه‌تاهه‌تایی نه‌وه‌ دوای نه‌وه‌، له‌نێو نه‌وه‌ی ئیسرائیلدا هیچ میراتیان به‌رناكه‌وێت.
24
ده‌یه‌كه‌كانی نه‌وه‌ی ئیسرائیل كه‌ بۆ یه‌زدانی پێشكه‌ش ده‌كه‌ن وه‌ك به‌خشینی به‌رزكراوه‌، من داومه‌ به‌ لێڤییه‌كان، میراتی ئه‌وانه‌، بۆیه‌ پێیانم فه‌رموو كه‌ له‌نێو نه‌وه‌ی ئیسرائیلدا هیچ میراتیان به‌رناكه‌وێت.»
25
یه‌زدان به‌ موسای فه‌رموو:
26
«له‌گه‌ڵ لێڤییه‌كان ده‌دوێیت و پێیان ده‌ڵێیت: ”كاتێك ده‌یه‌كه‌كه‌ وه‌رده‌گرن له‌ نه‌وه‌ی ئیسرائیل كه‌ من وه‌ك میرات به‌ ئێوه‌م داوه‌، به‌خشینی به‌رزكراوه‌ی یه‌زدانی لێ پێشكه‌ش ده‌كه‌ن، ده‌یه‌ك له‌ ده‌یه‌ك.
27
جا به‌ به‌خشینی به‌رزكراوه‌تان داده‌نرێت، وه‌ك دانه‌وێڵه‌ی جۆخین و پڕی به‌رهه‌می گوشه‌ره‌كه‌[d] .
28
به‌م شێوه‌یه‌ ئێوه‌ش به‌خشینی به‌رزكراوه‌ی یه‌زدان له‌ هه‌موو ده‌یه‌كه‌كانتان پێشكه‌ش ده‌كه‌ن كه‌ له‌ نه‌وه‌ی ئیسرائیلی وه‌رده‌گرن، له‌وه‌ به‌خشینی به‌رزكراوه‌ی یه‌زدان به‌ هارونی كاهین ده‌ده‌ن.
29
له‌ هه‌موو به‌خشینه‌كانتان هه‌موو به‌رزكراوه‌یه‌ك بۆ یه‌زدان پێشكه‌ش ده‌كه‌ن كه‌ له‌ هه‌ره‌ باشترین و پیرۆزترین بێت.“
30
«پێیان ده‌ڵێیت: ”كاتێك باشترینه‌كه‌ی پێشكه‌ش ده‌كه‌ن، وه‌ك به‌رهه‌می جۆخین و گوشه‌ر[e] بۆ لێڤییه‌كان هه‌ژمارد ده‌كرێت.
31
ئێوه‌ و ماڵه‌كانتان له‌ هه‌موو شوێنێك ده‌یخۆن، چونكه‌ كرێی ئێوه‌یه‌ له‌بری خزمه‌تتان له‌ چادری چاوپێكه‌وتن.
32
به‌هۆیه‌وه‌ گوناهباریش نابن ئه‌گه‌ر له‌ باشترینه‌كه‌ی پێشكه‌ش بكه‌ن، به‌ڵام پێشكه‌شكراوه‌ پیرۆزه‌كانی نه‌وه‌ی ئیسرائیل گڵاو مه‌كه‌ن نه‌وه‌ك بمرن.“»
  1. a. 18‏:14 له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان.
  2. b. 18‏:16 بیست گێرا: نزیكه‌ی 12 گرام. بڕوانه‌ \+xt ده‌رچوون 30‏:13‏\+xt*‏.
  3. c. 18‏:17 پیوه‌كه‌ی: واته‌ به‌زه‌كه‌ی.
  4. d. 18‏:27 واته‌ ئاوی ترێ.
  5. e. 18‏:30 بڕوانه‌ ئایه‌تی 27.