عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
دژایه‌تییه‌كانی بنیادنانه‌وه‌ 
1
كاتێك سه‌نڤه‌له‌ت بیستییه‌وه‌ كه‌ ئێمه‌ شووراكه‌ بنیاد ده‌نێینه‌وه‌، ڕقی هه‌ستا و زۆر تووڕه‌ بوو، گاڵته‌ی به‌ جوله‌كه‌كان كرد.
2
له‌به‌رده‌م یاوه‌ره‌كانی و سوپای سامیره‌ قسه‌ی كرد و گوتی: «ئه‌و جوله‌كه‌ لاوازانه‌ چی ده‌كه‌ن؟ ئایا شووراكه‌یان چاك ده‌كه‌نه‌وه‌؟ ئایا قوربانی سه‌رده‌بڕن؟ ئایا به‌ ڕۆژێك ته‌واو ده‌بن؟ ئایا به‌رده‌كان كه‌ له‌ناو گرده‌ خۆڵه‌كان سووتێنراون ده‌یانژیێننه‌وه‌؟»
3
تۆڤییای عه‌مۆنیش له‌لایه‌وه‌ بوو و گوتی: «ئه‌وه‌ی ئه‌وان بنیادی ده‌نێنه‌وه‌، ئه‌گه‌ر ڕێوییه‌ك سه‌ربكه‌وێته‌ سه‌ری دیواره‌ به‌رده‌كه‌یان ده‌ڕووخێنێت!»
4
«ئه‌ی خودای ئێمه‌، گوێت لێ بێت، چونكه‌ ئێمه‌ بووینه‌ مایه‌ی سووكایه‌تی، توانجه‌كانیان به‌سه‌ر خۆیاندا بگه‌ڕێنه‌وه‌ و با له‌ خاكی دیلیێتی تاڵان بكرێن.
5
تاوانه‌كانیان دامه‌پۆشه‌ و گوناهه‌كانیان له‌به‌رده‌متدا مه‌سڕه‌وه‌، چونكه‌ ئه‌وان له‌به‌رده‌م بنیادنه‌راندا په‌ستیان كردیت.»
6
جا شووراكه‌مان بنیاد ناوه‌ و هه‌موو شووراكه‌ هه‌تا نیوه‌ی به‌ یه‌ك گه‌یشت. گه‌لیش دڵیان له‌سه‌ر كاره‌كه‌ بوو.
7
ئه‌وه‌ بوو كاتێك سه‌نڤه‌له‌ت و تۆڤییا و عه‌ره‌ب و عه‌مۆنی و ئه‌شدۆدییه‌كان بیستیانه‌وه‌ كه‌ چاككردنه‌وه‌ی شووراكانی ئۆرشه‌لیم به‌ره‌و پێش ده‌چوو، خه‌ریك بوو كه‌لێنه‌كان پڕ ده‌كرێنه‌وه‌، زۆر ڕقیان هه‌ستا.
8
جا هه‌موو پێكه‌وه‌ پیلانیان گێڕا هه‌تا بێن و له‌ دژی ئۆرشه‌لیم بجه‌نگن و كێشه‌ی بۆ بنێنه‌وه‌.
9
ئێمه‌ش نزامان بۆ خودامان كرد، شه‌و و ڕۆژ پاسه‌وانمان بۆ به‌ره‌نگاربوونه‌وه‌ی ئه‌وان ڕاگرت.
10
له‌و كاته‌دا خه‌ڵكی یه‌هودا گوتیان: «كرێكاره‌كان توانایان له‌به‌ر بڕاوه‌، خۆڵه‌كه‌ش زۆره‌ و ئێمه‌ش ناتوانین شووراكه‌ بنیاد بنێینه‌وه‌!»
11
ناحه‌زه‌كانیشمان گوتیان: «پێش ئه‌وه‌ی بزانن و ببینن، ده‌چینه‌ ناویان و ده‌یانكوژین، كاره‌كه‌ ڕاده‌گرین.»
12
ئینجا ئه‌و جوله‌كانه‌ی له‌ نزیكیانه‌وه‌ نیشته‌جێ بوون، هاتن و ده‌ جار پێیان گوتین: «ئێوه‌ ئاوڕ له‌ هه‌ركوێیه‌ك بده‌نه‌وه‌، ئه‌وان له‌سه‌رمان ده‌بن.»
13
ئیتر هه‌ندێك له‌ گه‌له‌كه‌م له‌ خوار شوێنه‌كه‌وه‌، له‌ پشت شووراكه‌، له‌ شوێنه‌ به‌رچاوه‌كان ڕاگرت، به‌گوێره‌ی خێڵه‌كانیان به‌ شمشێر و ڕم و تیروكه‌وانه‌كانیانه‌وه‌ گه‌لم ڕاگرت.
14
ئینجا سه‌یرم كرد و هه‌ستام به‌ پیاوماقوڵ و كاربه‌ده‌ست و پاشماوه‌ی گه‌لم گوت: «لێیان مه‌ترسن، به‌ڵكو په‌روه‌ردگاری گه‌وره‌ و سامناكم بهێننه‌وه‌ بیرتان، له‌ پێناوی برا و كوڕ و كچ و ژن و ماڵه‌كانتان بجه‌نگن.»
15
دوای ئه‌وه‌ی دوژمنه‌كانمان بیستیانه‌وه‌ كه‌ ئێمه‌ زانیومانه‌ و خودا پیلانه‌كه‌یانی پووچ كردووه‌ته‌وه‌، هه‌موو گه‌ڕاینه‌وه‌ بۆ شووراكه‌، هه‌ریه‌كه‌ بۆ سه‌ر كاره‌كه‌ی خۆی.
16
له‌و ڕۆژه‌وه‌ نیوه‌ی خزمه‌تكاره‌كانم كاره‌كه‌یان ده‌كرد و نیوه‌شیان ڕم و قه‌ڵغان و تیروكه‌وانیان هه‌ڵگرتبوو و سپه‌ریان پۆشیبوو، ئه‌فسه‌ره‌كانیش پشتگیری هه‌موو بنه‌ماڵه‌ی یه‌هودایان ده‌كرد.
17
بیناسازه‌كان له‌سه‌ر شووراكه‌ بوون و ئه‌وانه‌ی كه‌ كه‌ره‌سته‌یان ده‌گواسته‌وه‌، به‌ ده‌ستێك كاره‌كه‌یان ده‌كرد و به‌ ده‌سته‌كه‌ی دیكه‌ش چه‌كیان هه‌ڵده‌گرت.
18
بیناسازه‌كانیش هه‌ریه‌كه‌ شمشێره‌كه‌ی به‌ ناوقه‌دیه‌وه‌ به‌ستبوو و بنیادی ده‌نا، ئه‌وه‌ش فووی به‌ كه‌ڕه‌نادا ده‌كرد له‌ته‌نیشتم بوو.
19
ئینجا به‌ پیاوماقوڵ و كاربه‌ده‌ست و پاشماوه‌ی گه‌لم گوت: «ئیشه‌كه‌ زۆره‌ و به‌ربڵاوه‌، ئێمه‌ش په‌رتین له‌سه‌ر شووراكه‌ له‌ یه‌كتر دوورین.
20
له‌به‌ر ئه‌وه‌ له‌و شوێنه‌ی گوێتان له‌ ده‌نگی كه‌ڕه‌ناكه‌ بوو، بگه‌نه‌ لامان بۆ ئه‌وێ، خودامان بۆمان ده‌جه‌نگێت!»
21
ئیتر ئێمه‌ كاره‌كه‌مان ده‌كرد و نیوه‌یان له‌ به‌ره‌به‌یانه‌وه‌ هه‌تا ده‌ركه‌وتنی ئه‌ستێره‌كان ڕمه‌كانیان له‌ده‌ست ده‌گرت.
22
هه‌روه‌ها له‌و كاته‌دا به‌ هه‌موو گه‌لم گوت: «با هه‌ریه‌كه‌ له‌گه‌ڵ خزمه‌تكاره‌كه‌ی له‌ناوه‌ڕاستی ئۆرشه‌لیم بمێنێته‌وه‌، بۆ ئه‌وه‌ی به‌ شه‌و پاسه‌وانمان بن و به‌ ڕۆژیش كار بكه‌ن.»
23
جا نه‌ من و نه‌ براكانم و نه‌ خزمه‌تكاره‌كانم و نه‌ پاسه‌وانه‌كانی دوای من، جله‌كانمان دانه‌كه‌ند، به‌ڵكو هه‌ریه‌كه‌ و به‌ چه‌كه‌كه‌یه‌وه‌ بۆ ئاوكێشان ده‌چووین.