عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
قوڕبه‌سه‌ر نه‌ینه‌وا 
1
ئه‌ی شاری خوێن، قوڕبه‌سه‌رت،
سه‌راپای درۆیه‌،
پڕ له‌ تاڵانه‌،
نێچیری لێ نابڕێت!
2
شریقه‌ی قامچی،
خشه‌خشی چه‌رخ،
غاردانی ئه‌سپ و
هه‌ڵبه‌زینی گالیسكه‌!
3
سواره‌كان پێشده‌كه‌ون،
بڵێسه‌ی شمشێر و
بروسكه‌ی ڕم!
زۆری برینداران و
زۆری كوژراوان،
ته‌رمی بێشومار،
خه‌ڵكی ساتمه‌ له‌ كه‌له‌شه‌كان ده‌كه‌ن.
4
هه‌موو ئه‌مانه‌ له‌به‌ر زۆری داوێنپیسی له‌شفرۆشه‌كه‌یه‌،
ڕوخسار جوان و جادووگه‌ره‌ گه‌وره‌كه‌،
ئه‌وه‌ی به‌ داوێنپیسییه‌كه‌ی نه‌ته‌وه‌كانی كرده‌ كۆیله‌،
به‌ جادووگه‌رییه‌كه‌ی خێڵه‌كان.
5
یه‌زدانی سوپاسالار ده‌فه‌رموێت: «من له‌ دژی تۆم.
دامێنت هه‌ڵده‌بڕم بۆ سه‌ر ڕووت،
ڕووتیت پیشانی نه‌ته‌وه‌كان ده‌ده‌م و
پاشایه‌تییه‌كانیش شه‌رمه‌زاریت ده‌بینن.
6
پیسایی فڕێده‌ده‌مه‌ سه‌رت،
ڕیسوات ده‌كه‌م و
ده‌تكه‌مه‌ دیمه‌نێكی گاڵته‌جاڕی.
7
جا هه‌ركه‌سێك بتبینێت لێت ڕاده‌كات و ده‌ڵێت:
”نه‌ینه‌وا كاول بوو، كێ بۆی ده‌گریێت؟“
له‌كوێ كه‌سێك ببینمه‌وه‌ دڵنه‌واییت بكات؟»
8
ئایا له‌ تیب چاكتریت،
دانیشتووی سه‌ر نیل،
ئاو چوارده‌وری دابوو؟
ئه‌وه‌ی ڕووباره‌كه‌ ده‌یپاراست،
ئاوه‌كان شوورای بوون.
9
كوش[a] و میسر هێزی له‌ ڕاده‌به‌ده‌ری بوون،
پووت و لیبییه‌كان هاوپه‌یمانی بوون.
10
به‌ڵام ئه‌و به‌ دیل گیرا و
ڕاپێچ كرا،
منداڵه‌كانی پارچه‌پارچه‌ كران
له‌سه‌ر سووچی هه‌موو شه‌قامێك.
له‌سه‌ر پیاوماقوڵانی تیروپشك كرا و
هه‌موو گه‌وره‌ پیاوانی كۆت و زنجیر كران.
11
هه‌روه‌ها تۆش سه‌رخۆش ده‌بیت،
خۆت ده‌شاریته‌وه‌ و
له‌ په‌نایه‌ك ده‌گه‌ڕێیت له‌ ده‌ستی دوژمن.
12
هه‌موو قه‌ڵاكانت وه‌ك داری هه‌نجیرن
به‌ یه‌كه‌م به‌ره‌وه‌،
كه‌ بته‌كێن به‌رده‌بنه‌وه‌
بۆ ناو ده‌می ئه‌و كه‌سه‌ی ده‌یخوات.
13
ته‌ماشای سه‌ربازه‌كانت بكه‌،
هه‌موویان وه‌ك ژنن!
ده‌روازه‌كانی خاكه‌كه‌ت
بۆ دوژمنانت ده‌خرێنه‌ سه‌ر پشت،
ئاگر شمشیره‌ی[b] ده‌روازه‌كانت هه‌ڵده‌لووشێت.
14
ئاو بكێشه‌وه‌ بۆ كاتی گه‌مارۆدراویت،
قه‌ڵاكانت به‌هێز بكه‌!
بڕۆ ناو قوڕه‌وه‌،
قوڕ بشێله‌ و
خشتبڕه‌كانت توندوتۆڵ بكه‌!
15
له‌وێدا ئاگر ده‌تخوات،
شمشێر ده‌تبڕێت و
وه‌ك پۆله‌ كولله‌ ده‌تخوات.
وه‌ك پۆله‌ كولله‌ زیادبه‌،
زیادبه‌ وه‌ك پێكوڕه‌!
16
بازرگانه‌كانی خۆت
له‌ ئه‌ستێره‌كانی ئاسمان زۆرتر كرد،
به‌ڵام وه‌ك كولله‌ خاكه‌كه‌ ڕووت ده‌كه‌نه‌وه‌ و ده‌فڕن.
17
پاسه‌وانه‌كانت وه‌ك كولله‌ن،
ئه‌فسه‌ره‌كانت وه‌ك ڕه‌وه‌ كولله‌ن،
كه‌ له‌ ڕۆژێكی سارد له‌سه‌ر دیوار هه‌ڵنیشتوون،
به‌ڵام كه‌ خۆر هه‌ڵهات ده‌فڕن،
كه‌س نازانێ به‌ره‌و كوێ چوون.
18
ئه‌ی پاشای ئاشور، شوانه‌كانت خه‌وتن،
گه‌وره‌ پیاوانت پاڵكه‌وتن پشوو بده‌ن.
گه‌له‌كه‌ت له‌سه‌ر چیاكان په‌رته‌وازه‌ بوون،
كه‌س نییه‌ كۆیان بكاته‌وه‌.
19
شكانه‌كه‌ت ناگیرێته‌وه‌،
برینه‌كه‌ت ساڕێژ نابێت.
هه‌موو ئه‌وانه‌ی هه‌واڵی تۆ ده‌بیستن
له‌ خۆشیدا چه‌پڵه‌ لێ ده‌ده‌ن،
چونكه‌ كێ نه‌یچێشتووه‌
خراپه‌ی به‌رده‌وامی تۆ؟
  1. a. 3‏:9 وڵاتێك بووه‌ له‌ سه‌رووی ڕووباری نیل.
  2. b. 3‏:13 شمشیر، پارچه‌ دارێك بووه‌ له‌ جیاتی قوفڵ له‌ دواوه‌ی ده‌رگا به‌ شێوه‌ی ئاسۆیی دانراوه‌ بۆ داخستنی ده‌رگا.