عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پاشایه‌تی نه‌ینه‌وا ده‌ڕووخێنرێت 
1
ئه‌ی نه‌ینه‌وا، په‌لامارده‌ر له‌ دژی تۆ هات.
قه‌ڵاكه‌ بپارێزه‌،
چاودێری ڕێگاكه‌ بكه‌،
بازووی لێ هه‌ڵبكه‌،
توانای زۆر بخه‌ره‌ گه‌ڕ!
2
یه‌زدان سه‌روه‌ری یاقوب ده‌گه‌ڕێنێته‌وه‌
وه‌ك سه‌روه‌ری ئیسرائیل،
هه‌رچه‌نده‌ تاڵانكه‌ران تاڵانیان كردن و
ڕه‌زه‌مێوه‌كانیان تێكدان.
3
قه‌ڵغانی پاڵه‌وانه‌كانی ئاڵ هه‌ڵگه‌ڕاون،
قاره‌مانه‌كانی له‌ به‌رگی سووردان،
له‌ ڕۆژی خۆ ئاماده‌كردنیاندا
پۆڵای گالیسكه‌كان بریسكه‌ ده‌داته‌وه‌،
ئه‌و ڕمانه‌ی له‌ دار سنه‌وبه‌ر دروستكراون ده‌له‌رنه‌وه‌.
4
گالیسكه‌كان له‌ شه‌قامه‌كان تیژڕه‌ون،
له‌ گۆڕه‌پانه‌كان سه‌ره‌ڕۆن.
دیمه‌نیان وه‌ك مه‌شخه‌ڵه‌،
وه‌ك بروسك غار ده‌ده‌ن.
5
نه‌ینه‌وا پاڵه‌وانه‌كانی بانگ ده‌كات،
به‌ڵام ساتمه‌ ده‌كه‌ن و له‌ ڕۆیشتنیاندا ده‌كه‌ون.
په‌له‌ ده‌كه‌ن بۆ لای شووراكانی و
قه‌ڵغانه‌كان ئاماده‌ كراون.
6
ده‌روازه‌كانی ڕووبار ده‌كرێنه‌وه‌ و
كۆشكه‌كه‌ ده‌ڕمێت.
7
به‌ فه‌رمانی خودا به‌ دیل ده‌گیرێت و
ڕاپێچ ده‌كرێت.
كه‌نیزه‌كانی هه‌روه‌ك كۆتر ده‌گمێنن،
سنگیان ده‌كوتن.
8
نه‌ینه‌وا وه‌ك حه‌وزێكی وشكبووه‌.
هاوار ده‌كه‌ن، «ڕاوه‌ستن! ڕاوه‌ستن!»
به‌ڵام كه‌س ئاوڕ ناداته‌وه‌.
9
«زیو تاڵان بكه‌ن!
زێڕ تاڵان بكه‌ن!
گه‌نجینه‌كانی له‌بن نایه‌ن،
پڕه‌ له‌ گه‌وهه‌ری به‌هادار.»
10
چۆڵ و تاڵانكراو و داماڵراوه‌،
دڵ ده‌توێته‌وه‌ و ئه‌ژنۆكان شلن،
هه‌موویان ده‌له‌رزن، ڕه‌نگیان ده‌په‌ڕێت.
11
كوا لانه‌ی شێره‌كان،
له‌وه‌ڕگای به‌چكه‌ شێران؟
له‌وێدا شێر و شێره‌ مێ ده‌گه‌ڕان
له‌گه‌ڵ به‌چكه‌ شێر، هیچ شتێك نه‌یده‌ترساندن.
12
شێر بۆ پێویستی به‌چكه‌كانی په‌لاماری ده‌دا و
نێچیره‌كه‌ی بۆ شێره‌ مێیه‌كه‌ی ده‌خنكاند،
ئه‌شكه‌وته‌كه‌ی پڕ ده‌كرد له‌ نێچیر،
لانه‌كانیشی له‌وانه‌ی په‌لاماری داون.
13
یه‌زدانی سوپاسالار ده‌فه‌رموێت:
«من له‌ دژی تۆم.
گالیسكه‌كانت ده‌سووتێنم و ده‌بنه‌ دووكه‌ڵ،
به‌چكه‌ شێره‌كانیشت شمشێر ده‌یانخوات و
نێچیرت له‌سه‌ر زه‌وی لێ ده‌بڕم.
ئیتر ده‌نگی نێردراوه‌كانت نابیسترێن.»