عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
سروشێك[a] سه‌باره‌ت به‌ نه‌ینه‌وا، په‌ڕتووكی بینینه‌كه‌ی ناحومی ئه‌لقۆشی:
تووڕه‌یی خودا له‌ دژی نه‌ینه‌وا 
2
یه‌زدان خودایه‌كی ئیره‌دار[b] و تۆڵه‌سێنه‌ره‌،
یه‌زدان تۆڵه‌سێنه‌ر و زۆر تووڕه‌یه‌.
یه‌زدان تۆڵه‌سێنه‌ره‌ له‌ ناحه‌زانی و
هه‌ڵچوونی له‌ دژی دوژمنانی به‌رده‌وامه‌.
3
یه‌زدان پشوودرێژه‌ و توانای مه‌زنه‌،
به‌ڵام چاو له‌ گوناه ناپۆشێت.
ڕێگای یه‌زدان له‌ناو گه‌رده‌لوول و ڕه‌شه‌بادایه‌،
هه‌ور تۆزی پێیه‌كانیه‌تی.
4
ده‌ریا سه‌رزه‌نشت ده‌كات و وشكی ده‌كات،
هه‌موو ڕووباره‌كان بێ ئاو ده‌كات.
باشان و كارمه‌ل سیس ده‌كات،
خونچه‌ی لوبنان سیس ده‌بێت.
5
چیاكان له‌به‌ر ئه‌و ده‌له‌رزن و
گرده‌كان ده‌توێنه‌وه‌.
زه‌وی له‌ ئاماده‌بوونی ئه‌و ده‌هه‌ژێت،
جیهان و هه‌موو دانیشتووانه‌كه‌ی.
6
كێ له‌به‌رده‌م تووڕه‌یی ئه‌و خۆی ڕاده‌گرێت؟
كێ به‌رگه‌ی جۆشی تووڕه‌یی ئه‌و ده‌گرێت؟
هه‌ڵچوونی وه‌ك ئاگر ده‌ڕژێت و
تاشه‌به‌رده‌كان له‌به‌رده‌می ده‌شكێن.
7
یه‌زدان چاكه‌،
له‌ ڕۆژی ته‌نگانه‌ قه‌ڵایه‌.
بایه‌خ به‌وانه‌ ده‌دات كه‌ پشتی پێ ده‌به‌ستن،
8
به‌ڵام به‌ تۆفانێكی گه‌وره‌
به‌ ته‌واوی كۆتایی به‌ نه‌ینه‌وا ده‌هێنێت،
دوژمنه‌كانی به‌ره‌و تاریكی ڕاوده‌نێت.
9
بیر له‌ چی ده‌كه‌نه‌وه‌ له‌ دژی یه‌زدان؟
ئه‌و كۆتایی پێده‌هێنێت،
كاره‌سات دوو جار به‌رپا نابێت.
10
ئه‌وان وه‌ك دڕك لێك ده‌ئاڵێن،
به‌ شه‌رابه‌كه‌یان سه‌رخۆش ده‌بن،
هه‌موویان وه‌ك كای وشك ده‌سووتێن.
11
ئه‌ی نه‌ینه‌وا، یه‌كێك له‌ تۆوه‌ ده‌رده‌كه‌وێت،
ئه‌وه‌ی بیر له‌ خراپه‌ ده‌كاته‌وه‌ له‌ دژی یه‌زدان،
ڕاوێژكاری به‌دكارییه‌.
12
یه‌زدان ئه‌مه‌ ده‌فه‌رموێت:
«هه‌رچه‌نده‌ به‌هێز و زۆریشن،
به‌ڵام ده‌بڕێنه‌وه‌ و به‌سه‌رده‌چن.
ئه‌ی یه‌هودا، هه‌رچه‌نده‌ زه‌لیلم كردیت
به‌ڵام ئیتر زه‌لیلت ناكه‌م.
13
ئێستاش ئه‌و نیره‌ی[c] كه‌ له‌سه‌ر تۆی دایانناوه‌ ده‌یشكێنم،
كۆته‌كانت لێ ده‌كه‌مه‌وه‌.»
14
ئه‌ی نه‌ینه‌وا، یه‌زدان سه‌باره‌ت به‌ تۆ فه‌رمانی داوه‌:
«هیچ نه‌وه‌یه‌ك نامێنێت ناوی تۆی هه‌ڵگرتبێت.
بته‌ داتاشراو و له‌قاڵبدراوه‌كان
له‌ په‌رستگای خوداوه‌نده‌كانت ڕیشه‌كێش ده‌كه‌م.
گۆڕت بۆ هه‌ڵده‌كه‌نم، چونكه‌ تۆ شایانی ژیان نیت.»
15
ئه‌وه‌تا له‌سه‌ر چیاكانه‌
پێیه‌كانی مزگێنیده‌ر،
ئاشتی ڕاده‌گه‌یه‌نێت!
ئه‌ی یه‌هودا، جه‌ژنه‌كانت بگێڕه‌،
نه‌زره‌كانت[d] به‌جێبهێنه‌،
ئیتر به‌دكاران داگیرت ناكه‌ن،
به‌ڵكو به‌ ته‌واوی بنبڕ ده‌بن.
  1. a. 1‏:1 فه‌رمووده‌یه‌كی خودایه‌ كه‌ له‌ ڕێگای ڕۆحی پیرۆزه‌وه‌ بۆ مرۆڤ هاتبێت.
  2. b. 1‏:2 واتای حه‌سوود، ئه‌مه‌ش به‌ مه‌به‌ستێكی باش هاتووه‌، چونكه‌ خودا نایه‌وێت هیچ خودایه‌كی دیكه‌ بپه‌رسترێت.
  3. c. 1‏:13 مه‌به‌ستی له‌ بارگرانییه‌.
  4. d. 1‏:15 نه‌زر: داوا له‌ خودا ده‌كرێت بۆ ئه‌نجامدانی كارێك و پابه‌ند ده‌كرێت به‌ مه‌رجێكه‌وه‌. ئه‌گه‌ر خودا ئه‌و كاره‌ بكات، ئه‌وا ده‌رئه‌نجام ئه‌میش ئه‌و كاره‌ ئه‌نجام ده‌دات كه‌ پێیه‌وه‌ پابه‌ندی كردووه‌. بڕوانه‌ \+xt سه‌رژمێری 21‏:2‏\+xt*‏.