عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ده‌ركه‌وتنی یه‌حیای كوڕی زه‌كه‌ریا 
1
سه‌ره‌تای مزگێنی عیسای مه‌سیحی كوڕی خودا.
2
له‌ په‌ڕتووكی ئیشایای پێغه‌مبه‌ردا نووسراوه‌:
{من نێردراوی خۆم له‌پێشته‌وه‌ ده‌نێرم،
ئه‌وه‌ی ڕێگات بۆ ئاماده‌ ده‌كات،}[a]
3
{كه‌سێك له‌ چۆڵه‌وانی هاوار ده‌كات و ده‌ڵێت:
«ڕێگا بۆ هاتنی یه‌زدان ئاماده‌ بكه‌ن،
ڕێچكه‌كانی بۆ ڕێكبخه‌ن.»}[b]
4
یه‌حیا هات، له‌ چۆڵه‌وانیدا خه‌ڵكی له‌ ئاو هه‌ڵده‌كێشا و جاڕی له‌ئاوهه‌ڵكێشانی[c] تۆبه‌كردنی ده‌دا بۆ گوناه به‌خشین.
5
خه‌ڵكی هه‌موو گونده‌كانی یه‌هودیا و هه‌موو ئۆرشه‌لیم ده‌هاتنه‌ لای یه‌حیا، دانیان به‌ گوناهه‌كانیاندا ده‌نا و له‌ ڕووباری ئوردون له‌لایه‌ن ئه‌وه‌وه‌ له‌ ئاو هه‌ڵده‌كێشران.
6
جلوبه‌رگی یه‌حیا له‌ مووی وشتر بوو، پشتێنێكی چه‌رمیشی له‌ كه‌مه‌ری ده‌به‌ست، كولله‌ و هه‌نگوینی كێوی ده‌خوارد.
7
ئه‌مه‌ په‌یامه‌كه‌ی ئه‌و بوو: «له‌دوای من كه‌سێك دێت كه‌ زۆر له‌ من به‌هێزتره‌ كه‌ ته‌نانه‌ت شایانی ئه‌وه‌ نیم دابنه‌وێمه‌وه‌ و قه‌یتانی پێڵاوه‌كانی بۆ بكه‌مه‌وه‌.
8
من له‌ ئاوتان هه‌ڵده‌كێشم، به‌ڵام ئه‌و له‌ ڕۆحی پیرۆزتان هه‌ڵده‌كێشێت[d]
له‌ئاوهه‌ڵكێشانی عیسا 
9
له‌و ڕۆژانه‌دا عیسا له‌ ناسیره‌وه‌ هات، كه‌ سه‌ر به‌ ناوچه‌ی جه‌لیله‌ و له‌سه‌ر ده‌ستی یه‌حیا له‌ ڕووباری ئوردون له‌ ئاو هه‌ڵكێشرا.
10
هه‌ر كه‌ عیسا له‌ ئاوه‌كه‌ هاته‌ ده‌ره‌وه‌، بینی ئاسمان شه‌قبوو، ڕۆحی پیرۆزیش وه‌ك كۆترێك له‌سه‌ری نیشته‌وه‌.
11
ده‌نگێكیش له‌ ئاسمانه‌وه‌ هات: «تۆ كوڕی خۆشه‌ویستمی، به‌ تۆ زۆر دڵشادم.»
12
ده‌ستبه‌جێ ڕۆحی پیرۆز عیسای به‌ره‌و چۆڵه‌وانی برد.
13
چل ڕۆژ له‌ چۆڵه‌وانیدا له‌نێوان ئاژه‌ڵانی كێویدا بوو، شه‌یتان تاقی ده‌كرده‌وه‌، فریشته‌كانیش خزمه‌تیان ده‌كرد.
هه‌ڵبژاردنی قوتابییه‌كان 
14
دوای ده‌ستگیركردنی یه‌حیا، عیسا هاته‌ جه‌لیل و مزگێنی خودای ڕاده‌گه‌یاند و
15
ده‌یفه‌رموو: «كاته‌كه‌ هاتووه‌ته‌ دی و پاشایه‌تی خودا نزیك بووه‌ته‌وه‌. تۆبه‌ بكه‌ن، باوه‌ڕ به‌م مزگێنییه‌ بهێنن.»
16
كاتێك عیسا له‌ كه‌ناری ده‌ریاچه‌ی جه‌لیل ده‌ڕۆیشت، شیمۆن و ئه‌ندراوسی برای بینی، تۆڕیان فڕێده‌دایه‌ ده‌ریاچه‌كه‌، چونكه‌ ماسیگر بوون.
17
عیسا پێی فه‌رموون: «وه‌رن دوام بكه‌ون، ده‌تانكه‌م به‌ ڕاوكه‌ری مرۆڤ[e]
18
ده‌ستبه‌جێ تۆڕه‌كانیان به‌جێهێشت و دوای كه‌وتن.
19
ئینجا كه‌مێك دووركه‌وته‌وه‌، یاقوبی كوڕی زه‌بدی و یۆحه‌نای برای بینی، له‌ناو به‌له‌مدا تۆڕه‌كه‌ی خۆیان چاكده‌كرده‌وه‌.
20
یه‌كسه‌ر بانگی كردن، ئه‌وانیش زه‌بدی باوكیان له‌گه‌ڵ كرێكاران له‌ناو به‌له‌مه‌كه‌ به‌جێهێشت و دوای كه‌وتن.
ده‌ركردنی ڕۆحی پیس 
21
ئینجا چوونه‌ كه‌فه‌رناحوم. له‌ ڕۆژی شه‌ممه‌دا عیسا چووه‌ كه‌نیشت و ده‌ستی كرد به‌ فێركردنی خه‌ڵك.
22
خه‌ڵكی له‌ فێركردنه‌كه‌ی سه‌رسام بوون، چونكه‌ وه‌ك ده‌سه‌ڵاتدارێك فێری ده‌كردن، نه‌ك وه‌كو مامۆستایانی ته‌ورات[f] .
23
له‌ كه‌نیشته‌كه‌یاندا یه‌كێكی لێبوو ڕۆحی پیسی تێدابوو، له‌پڕ هاواری كرد،
24
گوتی: «عیسای ناسیره‌یی، چیت لێمان ده‌وێت؟ هاتووی له‌ناومان ببه‌یت؟ ده‌زانم تۆ كێیت، پیرۆزه‌كه‌ی خودایت!»
25
عیسا لێی ڕاخوڕی و فه‌رمووی: «بێده‌نگ به‌! لێی وه‌ره‌ ده‌ره‌وه‌!»
26
ڕۆحه‌ پیسه‌كه‌ش فێی له‌ پیاوه‌كه‌ هێنا و به‌ ده‌نگی به‌رز هاواری كرد و لێی هاته‌ ده‌ره‌وه‌.
27
هه‌موو سه‌رسام بوون و كه‌وتنه‌ پرسیار له‌ یه‌كتری: «ئه‌مه‌ چییه‌؟ فێركردنێكی نوێیه‌ به‌ ده‌سه‌ڵاته‌وه‌! فه‌رمان به‌ ڕۆحه‌ پیسه‌كانیش ده‌دات و گوێڕایه‌ڵی ده‌بن.»
28
یه‌كسه‌ر ناوبانگی به‌ هه‌موو ناوچه‌ی ده‌وروبه‌ری جه‌لیلدا بڵاو بووه‌وه‌.
چاككردنه‌وه‌ی خه‌ڵكێكی زۆر 
29
كاتێك عیسا له‌گه‌ڵ یاقوب و یۆحه‌نا كه‌نیشته‌كه‌یان به‌جێهێشت، چوونه‌ ماڵی شیمۆن و ئه‌ندراوس.
30
خه‌سووی شیمۆن له‌ناو جێگا كه‌وتبوو، تای هه‌بوو، خێرا باسی ئه‌ویان بۆ عیسا كرد.
31
ئه‌ویش هات، ده‌ستی گرت و هه‌ڵیستانده‌وه‌. تایه‌كه‌ به‌ریدا و ده‌ستی به‌ خزمه‌تكردنیان كرد.
32
ئه‌و ئێواره‌یه‌ له‌پاش ڕۆژئاوابوون، هه‌موو نه‌خۆش و ئه‌و كه‌سانه‌یان بۆ ده‌هێنا كه‌ ڕۆحی پیسیان تێدابوو.
33
هه‌موو دانیشتووانی شاره‌كه‌ له‌به‌ر ده‌رگا كۆبوونه‌وه‌،
34
عیسا ژماره‌یه‌كی زۆر نه‌خۆشی به‌ جۆره‌ها ده‌رده‌وه‌ چاككرده‌وه‌ و زۆر ڕۆحی پیسیشی ده‌ركرد و نه‌یهێشت ڕۆحه‌ پیسه‌كان بدوێن، چونكه‌ ده‌یانزانی كێیه‌.
مزگێنیدان له‌ ناوچه‌ی جه‌لیل 
35
به‌ره‌به‌یانی ڕۆژی دواتر كه‌ هێشتا تاریك بوو، عیسا هه‌ستا و چووه‌ شوێنێكی چۆڵ و له‌وێ ده‌ستی كرد به‌ نوێژكردن.
36
شیمۆن و هاوڕێكانی به‌ شوێنیدا گه‌ڕان،
37
كه‌ دۆزییانه‌وه‌ پێیان گوت: «هه‌موو خه‌ڵكه‌كه‌ به‌دواتدا ده‌گه‌ڕێن.»
38
عیسا پێی فه‌رموون: «وه‌رن، با بڕۆین بۆ دێیه‌كانی ده‌وروپشت، تاكو له‌وێش په‌یامه‌كه‌م ڕابگه‌یه‌نم، چونكه‌ من بۆ ئه‌مه‌ هاتووم.»
39
ئینجا ڕۆیشت و له‌ هه‌موو جه‌لیلدا له‌ناو كه‌نیشته‌كانیان په‌یامی خودای ڕاده‌گه‌یاند و ڕۆحی پیسی ده‌رده‌كرد.
چاككردنه‌وه‌ی نه‌خۆشی گولی 
40
پیاوێكی گول هاته‌ لای عیسا و لێی پاڕایه‌وه‌، چۆكی دادا و پێی گوت: «ئه‌گه‌ر بته‌وێت، ده‌توانیت پاكم بكه‌یته‌وه‌.»
41
عیسا دڵی پێی سووتا و ده‌ستی بۆ درێژكرد و ده‌ستی لێدا و پێی فه‌رموو: «ده‌مه‌وێت. پاك به‌ره‌وه‌!»
42
ده‌ستبه‌جێ گولییه‌كه‌ی لێبووه‌وه‌ و پاك بووه‌وه‌.
43
دوای ئه‌وه‌ی كه‌ عیسا پیاوه‌كه‌ی به‌ توندی ئاگادار كرده‌وه‌، ده‌ستبه‌جێ به‌ڕێی كرد،
44
پێی فه‌رموو: «ئاگاداربه‌، هیچ شتێك به‌ كه‌س مه‌ڵێ، به‌ڵام بڕۆ خۆت به‌ كاهین[g] پیشان بده‌ و بۆ پاكبوونه‌وه‌كه‌ت ئه‌و قوربانییه‌ی موسا فه‌رمانی كردووه‌ بیكه‌، وه‌ك شایه‌تییه‌ك بۆیان.»
45
به‌ڵام ئه‌و ڕۆیشت و ده‌ستی به‌ جاڕدان و بڵاوكردنه‌وه‌ی ئه‌م هه‌واڵه‌ كرد، له‌به‌ر ئه‌وه‌ عیسا نه‌یتوانی به‌ ئاشكرا بچێته‌ ناو شار، به‌ڵكو له‌ ده‌ره‌وه‌ له‌ شوێنه‌ چۆڵه‌كاندا بوو و خه‌ڵكیش له‌ هه‌موو لایه‌كه‌وه‌ ده‌هاتنه‌ لای.
  1. a. 1‏:2 \+xt مه‌لاخی 3‏:1.‏\+xt*‏
  2. b. 1‏:3 \+xt ئیشایا 40‏:3.‏\+xt*‏
  3. c. 1‏:4 یۆنانی: \+tl باپتسمه‌\+tl*، به‌ واتای شوشتن دێت بۆ پاكبوونه‌وه‌ له‌ گوناه، وه‌ك (بسمیلكردن).
  4. d. 1‏:8 به‌ واتای شوشتن دێت بۆ پاكبوونه‌وه‌ له‌ گوناه به‌هۆی ڕۆحی پیرۆز.
  5. e. 1‏:17 به‌ده‌ستهێنانی خه‌ڵك تاكو ببنه‌ قوتابی مه‌سیح.
  6. f. 1‏:22 مالم.
  7. g. 1‏:44 كاهین: پیاوێكی ئایینی جوله‌كه‌یه‌ كه‌ هه‌ڵده‌ستێ به‌ ئه‌ركی قوربانی كردن له‌ناو په‌رستگا و فێركردنی خه‌ڵك.