عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
په‌یامی یه‌زدان كه‌ له‌ سه‌رده‌می یۆتام و ئاحاز و حه‌زقیای پاشایانی یه‌هودا بۆ میخای مۆره‌شه‌تی هات، ئه‌و بینینه‌ی سه‌باره‌ت به‌ سامیره‌ و ئۆرشه‌لیم بوو:
2
ئه‌ی هه‌موو گه‌لان، گوێ بگرن،
زه‌وی و هه‌موو ئه‌وانه‌ی تێیدان، سه‌رنج بده‌ن:
په‌روه‌ردگار له‌ په‌رستگای پیرۆزیه‌وه‌،
یه‌زدانی باڵاده‌ست ببێته‌ شایه‌ت به‌سه‌رتانه‌وه‌.
حوكمدان به‌سه‌ر سامیره‌ و ئۆرشه‌لیم 
3
ئه‌وه‌تا، یه‌زدان له‌ شوێنی نیشته‌جێبوونی خۆیه‌وه‌ دێته‌ ده‌ره‌وه‌،
داده‌به‌زێت و به‌سه‌ر به‌رزاییه‌كانی زه‌ویدا ده‌ڕوات.
4
چیاكان له‌ ژێری ده‌توێنه‌وه‌ و
دۆڵه‌كان شه‌ق ده‌به‌ن،
وه‌ك مۆم له‌به‌رده‌م ئاگردا،
وه‌ك ئاوی ڕۆیشتوو به‌ لێژاییدا.
5
هه‌موو ئه‌مه‌ له‌به‌ر یاخیبوونی یاقوب،
له‌به‌ر گوناهی بنه‌ماڵه‌ی ئیسرائیل.
چی هۆكاری یاخیبوونی یاقوبه‌؟
ئایا سامیره‌ نییه‌؟
ئه‌ی هۆكاری بتپه‌رستی به‌رزاییه‌كانی یه‌هودا چییه‌؟
ئایا ئۆرشه‌لیم نییه‌؟
6
«له‌به‌ر ئه‌وه‌ سامیره‌ كاول و وێران ده‌كه‌م،
ده‌یكه‌مه‌ كێڵگه‌ی مێو چاندن.
به‌رده‌كانی فڕێده‌ده‌مه‌ ناو دۆڵه‌كه‌وه‌ و
بناغه‌كانی ده‌رده‌خه‌م.
7
هه‌موو بته‌كانی تێكده‌شكێنرێن و
هه‌موو كرێی داوێنپیسییه‌كه‌ی به‌ ئاگر ده‌سووتێنرێت،
هه‌موو بته‌كانی وێران ده‌كه‌م.
له‌به‌ر ئه‌وه‌ی به‌ كرێی له‌شفرۆشی كۆی كردووه‌ته‌وه‌،
ده‌درێته‌وه‌ له‌شفرۆش.»
گریان و شیوه‌ن گێڕان 
8
له‌به‌ر ئه‌وه‌ ده‌لورێنم و ده‌لاوێنمه‌وه‌،
به‌پێی په‌تی و به‌ ڕووتی هاتوچۆ ده‌كه‌م.
وه‌ك چه‌قه‌ڵ ده‌لورێنم و
وه‌ك كونده‌په‌پوو شیوه‌ن ده‌گێڕم.
9
چونكه‌ برینه‌كه‌ی ساڕێژ نابێت،
به‌ڵكو یه‌هوداش تووش بوو،
گه‌یشته‌ ده‌روازه‌ی گه‌له‌كه‌م،
هه‌تا ئۆرشه‌لیم هات.
10
ئه‌وه‌ له‌ گه‌ت ڕامه‌گه‌یه‌نن،
به‌ هیچ شێوه‌یه‌ك مه‌گریێن،
له‌ بێت‌عۆفرادا[a]
خۆت له‌ خۆڵ بگه‌وزێنه‌.
11
ئه‌ی دانیشتووانی شافیر
به‌ ڕووتی و شه‌رمه‌زاری بپه‌ڕنه‌وه‌،
دانیشتووانی چه‌ئه‌نان ده‌رنه‌چن.
بێت‌ئێچه‌ل ده‌گریێت
به‌ڵام ناتانپارێزێت.
12
دانیشتووانی مارۆت به‌ ئازاره‌وه‌ ده‌تلێنه‌وه‌،
به‌ دڵه‌ڕاوكێوه‌ چاره‌سه‌ر چاكه‌ ده‌كه‌ن،
چونكه‌ له‌لایه‌ن یه‌زدانه‌وه‌
به‌ڵا بۆ ده‌روازه‌ی ئۆرشه‌لیم دابه‌زی.
13
ئه‌ی دانیشتووانی لاخیش،
گالیسكه‌ به‌ ئه‌سپه‌وه‌ ببه‌ستن،
ئێوه‌ یه‌كه‌مین شار بوون دوای یاخیبوونه‌كانی ئیسرائیل كه‌وتن،
هه‌روه‌ها سییۆنی كچتان[b] تووشی گوناه كرد.
14
له‌به‌ر ئه‌وه‌ دیاری ماڵئاوایی ده‌ده‌ن
به‌ مۆره‌شه‌ت گه‌ت.
یارمه‌تی له‌ شارۆچكه‌كانی ئه‌كزیڤه‌وه‌[c] جێی متمانه‌ نییه‌
بۆ پاشاكانی ئیسرائیل.
15
داگیركه‌رتان ده‌هێنمه‌ سه‌ر،
ئه‌ی دانیشتووانی مارێشا[d] ،
ئه‌وه‌ی شكۆی ئیسرائیله‌
دێته‌ عه‌دولام.
16
سه‌رتان بتاشن بۆ شیوه‌نگێڕان
له‌سه‌ر منداڵه‌ نازداره‌كانتان،
وه‌ك سیساركه‌ كه‌چه‌ڵ بن و مووتان به‌ سه‌ره‌وه‌ نه‌بێ
چونكه‌ منداڵی ئێوه‌ به‌ دیل گیراوی ڕاپێچ ده‌كه‌ن.
  1. a. 1‏:10 (بێت‌عۆفرا) واته‌ (ماڵی خۆڵ).
  2. b. 1‏:13 ده‌ربڕینێكی خوازه‌یه‌ بۆ پایته‌خت، مه‌به‌ست له‌ هه‌موو دانیشتووانی شاره‌كه‌یه‌.
  3. c. 1‏:14 ئه‌كزیڤ واته‌ هه‌ڵخه‌ڵه‌تاندنه‌.
  4. d. 1‏:15 له‌ زمانی عیبریدا ده‌نگی (مارێشا) نزیكه‌ی وشه‌یه‌كی دیكه‌ كه‌ واته‌ (داگیركه‌ر).