عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ژن هێنان و ته‌ڵاقدان 
1
كاتێك عیسا له‌م قسانه‌ بووه‌وه‌، جه‌لیلی به‌جێهێشت و هاته‌ هه‌رێمی یه‌هودیا، له‌ پشت ڕووباری ئوردون.
2
خه‌ڵكێكی زۆر دوای كه‌وت، ئه‌ویش له‌وێ چاكیكردنه‌وه‌.
3
هه‌ندێك فه‌ریسی هاتنه‌ لای بۆ ئه‌وه‌ی تاقیی بكه‌نه‌وه‌، گوتیان: «ئایا دروسته‌ مێرد له‌به‌ر هه‌ر هۆیه‌ك بێت ژنه‌كه‌ی ته‌ڵاق بدات؟»
4
عیسا وه‌ڵامی دانه‌وه‌: «ئایا نه‌تانخوێندووه‌ته‌وه‌، ئه‌وه‌ی له‌ سه‌ره‌تاوه‌ به‌دیهێناوه‌ {به‌ نێر و مێ به‌دیهێنان}[a] ؟
5
هه‌روه‌ها فه‌رمووی: {له‌به‌ر ئه‌وه‌ پیاو دایك و باوكی خۆی به‌جێده‌هێڵێت و به‌ ژنه‌كه‌یه‌وه‌ ده‌نووسێت، ئیتر هه‌ردووكیان ده‌بنه‌ یه‌ك جه‌سته‌.}[b]
6
كه‌واته‌ چیتر دوو نین به‌ڵكو یه‌ك جه‌سته‌ن. له‌به‌ر ئه‌وه‌ ئه‌وه‌ی خودا به‌ یه‌كتری گه‌یاندووه‌، با مرۆڤ جیای نه‌كاته‌وه‌.»
7
لێیان پرسی: «ئه‌ی بۆچی موسا فه‌رمانی داوه‌ ته‌ڵاقنامه‌ بدرێت و ته‌ڵاق بكه‌وێت؟»
8
پێی فه‌رموون: «له‌به‌ر دڵڕه‌قیتان موسا ڕێی دان ژنه‌كانتان ته‌ڵاق بده‌ن، ئه‌گینا له‌ سه‌ره‌تاوه‌ وا نه‌بوو.
9
به‌ڵام پێتان ده‌ڵێم: ئه‌وه‌ی به‌بێ هۆی داوێنپیسی ژنه‌كه‌ی خۆی ته‌ڵاق بدات و یه‌كێكی دیكه‌ بهێنێت، ئه‌وا داوێنپیسی ده‌كات.»
10
قوتابییه‌كانی پێیان گوت: «ئه‌گه‌ر حاڵی پیاو له‌گه‌ڵ ژن وابێت، باشتره‌ ژن نه‌هێنێت!»
11
به‌ڵام عیسا پێی فه‌رموون: «هه‌موو خه‌ڵكی ناتوانن ئه‌م قسه‌یه‌ په‌سه‌ند بكه‌ن، ته‌نها ئه‌وانه‌ی پێیان دراوه‌.
12
خه‌ساو هه‌ن زگماكن، خه‌ساویش هه‌ن مرۆڤ خه‌ساندویانن[c] ، خه‌ڵكیش هه‌یه‌ بڕیاریان داوه‌ له‌ پێناوی شانشینی ئاسمان وه‌ك خه‌ساو بژین[d] . كێ ده‌توانێت په‌سه‌ندی بكات، با په‌سه‌ندی بكات.»
13
ئینجا خه‌ڵكی منداڵیان هێنایه‌ لای عیسا تاوه‌كو ده‌ستیان له‌سه‌ر دابنێت و نوێژ بكات، كه‌چی قوتابییه‌كان سه‌رزه‌نشتیان كردن.
14
به‌ڵام عیسا فه‌رمووی: «لێگه‌ڕێن منداڵان بێنه‌ لام، ڕێیان لێ مه‌گرن، چونكه‌ شانشینی ئاسمان هی وه‌ك ئه‌مانه‌یه‌.»
15
ده‌ستی له‌سه‌ر دانان و له‌وێ ڕۆیشت.
گه‌نجه‌ ده‌وڵه‌مه‌نده‌كه‌ 
16
ئینجا یه‌كێك هاته‌ لای و گوتی: «مامۆستا، چ چاكه‌یه‌ك بكه‌م تاكو ژیانی هه‌تاهه‌تاییم هه‌بێت؟»
17
عیسا وه‌ڵامی دایه‌وه‌: «بۆچی له‌باره‌ی چاكه‌وه‌ پرسیارم لێ ده‌كه‌یت؟ ته‌نها یه‌كێك چاكه‌. به‌ڵام ئه‌گه‌ر ده‌ته‌وێت بچیته‌ ناو ژیانه‌وه‌، ڕاسپارده‌كان به‌جێبگه‌یه‌نه‌.»
18
پێی گوت: «كامیان؟»
عیساش فه‌رمووی: «{مه‌كوژه‌، داوێنپیسی مه‌كه‌، مه‌دزه‌، شایه‌تی درۆ مه‌ده‌،
19
ڕێزی دایك و باوكت بگره‌،}[e] هه‌روه‌ها {نزیكه‌كه‌ت وه‌ك خۆت خۆشبوێت.}[f] »
20
گه‌نجه‌كه‌ش پێی گوت: «ئه‌مانه‌م هه‌مووی كردووه‌، ئیتر له‌ چیم كه‌مه‌؟»
21
عیسا پێی فه‌رموو: «ئه‌گه‌ر ده‌ته‌وێت ته‌واو بیت، بڕۆ سامانه‌كانت بفرۆشه‌ و بیده‌ هه‌ژاران، ئیتر گه‌نجینه‌یه‌كت له‌ ئاسماندا ده‌بێت و وه‌ره‌ دوام بكه‌وه‌.»
22
به‌ڵام گه‌نجه‌كه‌ كه‌ ئه‌م وشه‌یه‌ی بیست، به‌ دڵته‌نگییه‌وه‌ ڕۆیشت، چونكه‌ سامانێكی زۆری هه‌بوو.
23
عیساش به‌ قوتابییه‌كانی فه‌رموو: «ڕاستیتان پێ ده‌ڵێم: ده‌وڵه‌مه‌ند به‌ سه‌ختی ده‌چێته‌ ناو شانشینی ئاسمانه‌وه‌.
24
دیسان پێتان ده‌ڵێم: ئاسانتره‌ وشترێك به‌ كونی ده‌رزییه‌كه‌وه‌ بچێت له‌وه‌ی ده‌وڵه‌مه‌ندێك بچێته‌ ناو شانشینی خوداوه‌.»
25
قوتابییه‌كان كه‌ گوێیان له‌مه‌ بوو زۆر سه‌رسام بوون، گوتیان: «كه‌واته‌ كێ ده‌توانێت ڕزگاری بێت؟»
26
عیساش سه‌یری كردن و فه‌رمووی: «ئه‌مه‌ بۆ مرۆڤ مه‌حاڵه‌، به‌ڵام له‌لای خودا هه‌موو شتێك ده‌بێت.»
27
ئینجا په‌ترۆس وه‌ڵامی دایه‌وه‌ و پێی گوت: «ئه‌وه‌تا ئێمه‌ وازمان له‌ هه‌موو شتێك هێناوه‌ و دوات كه‌وتووین، ئێمه‌ چیمان بۆ ده‌بێت؟»
28
عیساش پێی فه‌رموون: «ڕاستیتان پێ ده‌ڵێم، له‌ نوێبوونه‌وه‌دا[g] ، كاتێك كوڕی مرۆڤ له‌سه‌ر ته‌ختی شكۆی خۆی داده‌نیشێت، ئێوه‌ش كه‌ دوام كه‌وتوون له‌سه‌ر دوازده‌ ته‌خت داده‌نیشن و دوازده‌ هۆزه‌كه‌ی ئیسرائیل حوكم ده‌ده‌ن.
29
هه‌ركه‌سێكیش له‌به‌ر ناوی من، ماڵ یان برا یان خوشك یان دایك یان باوك یان منداڵ یان كێڵگه‌ی به‌جێهێشتووه‌، سه‌د ئه‌وه‌نده‌ وه‌رده‌گرێته‌وه‌ و ژیانی هه‌تاهه‌تاییش به‌ میرات وه‌رده‌گرێت.
30
به‌ڵام زۆر له‌ یه‌كه‌مینه‌كان ده‌بنه‌ دواهه‌مین و دواهه‌مینه‌كانیش ده‌بنه‌ یه‌كه‌مین.»
  1. a. 19‏:4 \+xt په‌یدابوون 1‏:27.‏\+xt*‏
  2. b. 19‏:5 \+xt په‌یدابوون 2‏:24‏\+xt*‏
  3. c. 19‏:12 له‌و سه‌رده‌مه‌ هه‌ندێك له‌ پیاوه‌ گه‌وره‌كان كۆیله‌كانی خۆیان ده‌خه‌ساند، ته‌نها بۆ كارپێكردن ته‌رخان ده‌كران.
  4. d. 19‏:12 باوه‌ڕدار له‌ پێناوی خزمه‌تكردنی مه‌سیح به‌ ڕه‌به‌نی ده‌مێنێته‌وه‌.
  5. e. 19‏:19 \+xt ده‌رچوون 20‏:12‏-16 و دواوتار 5‏:16‏-20‏\+xt*‏
  6. f. 19‏:19 \+xt لێڤییه‌كان 19‏:18‏\+xt*‏
  7. g. 19‏:28 مه‌به‌ست له‌ كاتی ڕۆژی زیندووبوونه‌وه‌یه‌، كه‌ هه‌موو شتێك سه‌رله‌نوێ دروستده‌كرێته‌وه‌.