عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كوشتنی حه‌زره‌تی یه‌حیا 
1
له‌و كاته‌دا هێرۆدسی ئه‌نتیپاس فه‌رمانڕه‌وای[a] جه‌لیل ناوبانگی عیسای بیست،
2
به‌ پیاوه‌كانی گوت: «ئه‌مه‌ یه‌حیای له‌ئاوهه‌ڵكێشه‌ له‌ناو مردوواندا هه‌ستاوه‌ته‌وه‌، له‌به‌ر ئه‌وه‌ كاری په‌رجوو له‌سه‌ر ده‌ستی ئه‌و ده‌كرێت.»
3
هێرۆدس، له‌به‌ر هێرۆدیای ژنی فیلیپۆسی برای، یه‌حیای گرتبوو و په‌لبه‌ستی كردبوو و خستبوویه‌ زیندانه‌وه‌،
4
چونكه‌ یه‌حیا پێی ده‌گوت: «دروست نییه‌ براژنه‌كه‌ت بخوازیت.»
5
هێرۆدسیش ده‌یویست بیكوژێت، به‌ڵام له‌ خه‌ڵكه‌كه‌ ده‌ترسا، چونكه‌ به‌ پێغه‌مبه‌ریان داده‌نا.
6
له‌ جه‌ژنی له‌دایكبوونی هێرۆدس، كچی هێرۆدیا له‌ناوه‌ڕاستی میواناندا سه‌مای كرد و هێرۆدسی دڵخۆش كرد،
7
ئه‌وه‌ بوو به‌ سوێنده‌وه‌ به‌ڵێنی پێیدا، چی حه‌زی لێ بێت بیداتێ.
8
كچه‌ش به‌ فیتی دایكی، گوتی: «لێره‌ له‌سه‌ر سینییه‌ك سه‌ری یه‌حیای له‌ئاوهه‌ڵكێشم بده‌رێ.»
9
پاشاش دڵگران بوو، به‌ڵام له‌به‌ر سوێنده‌كان و میوانه‌كان، فه‌رمانی دا بیده‌نێ.
10
ئینجا ناردی و له‌ زیندان سه‌ری یه‌حیایان په‌ڕاند و
11
سه‌ره‌كه‌ی له‌سه‌ر سینییه‌ك هێنرا و درایه‌ كچه‌كه‌، ئه‌ویش بردییه‌ لای دایكی.
12
قوتابییه‌كانی هاتن ته‌رمه‌كه‌یان هه‌ڵگرت و ناشتییان. ئینجا هاتن هه‌واڵیان دایه‌ عیسا.
تێربوونی پێنج هه‌زار كه‌س 
13
كه‌ عیسا ئه‌مه‌ی بیست، سواری به‌له‌مێك بوو و به‌ ته‌نها چووه‌ شوێنێكی چۆڵ. كاتێك خه‌ڵك بیستیان، له‌ شاره‌كانه‌وه‌ به‌ پێیان دوای كه‌وتن.
14
كاتێك عیسا له‌ به‌له‌م دابه‌زی و خه‌ڵكێكی له‌ ڕاده‌به‌ده‌ر زۆری بینی، دڵی پێیان سووتا و نه‌خۆشه‌كانی ئه‌وانی چاككرده‌وه‌.
15
كاتێك ئێواره‌ داهات، قوتابییه‌كانی هاتنه‌ لای، گوتیان: «ئه‌م شوێنه‌ چۆڵه‌ و كاتیش دره‌نگه‌. خه‌ڵكه‌كه‌ به‌ڕێبكه‌ با بڕۆنه‌ گونده‌كان و خواردن بۆ خۆیان بكڕن.»
16
به‌ڵام عیسا پێی فه‌رموون: «پێویست ناكات بڕۆن. ئێوه‌ شتێكیان بده‌نێ با بیخۆن.»
17
ئه‌وانیش وه‌ڵامیان دایه‌وه‌: «لێره‌ له‌ پێنج نان و دوو ماسی زیاترمان نییه‌.»
18
ئه‌ویش فه‌رمووی: «بۆمی بهێننه‌ ئێره‌.»
19
فه‌رمانی به‌ خه‌ڵكه‌كه‌ دا له‌سه‌ر گیاكه‌ دانیشن. ئینجا پێنج نانه‌كه‌ و دوو ماسییه‌كه‌ی هه‌ڵگرت و ته‌ماشای ئاسمانی كرد، سوپاسی خودای كرد و نانه‌كانی له‌تكرد، ئینجا دایه‌ قوتابییه‌كان و ئه‌وانیش دایانه‌ خه‌ڵكه‌كه‌.
20
هه‌موو خواردیان و تێر بوون، پاشان له‌و په‌لكه‌نانه‌ی مایه‌وه‌ دوازده‌ سه‌به‌ته‌ی پڕیان هه‌ڵگرته‌وه‌.
21
نانخۆران نزیكه‌ی پێنج هه‌زار پیاو بوون، بێجگه‌ له‌ ژن و منداڵ.
عیسا به‌سه‌ر ئاودا ده‌ڕوات 
22
ده‌ستبه‌جێ قوتابییه‌كانی ناچار كرد سواری به‌له‌مه‌كه‌ بن و پێش خۆی بڕۆنه‌ ئه‌وبه‌ر، تاكو خه‌ڵكه‌كه‌ به‌ڕێ ده‌كات.
23
كاتێك خه‌ڵكه‌كه‌ی به‌ڕێكرد، به‌ ته‌نها چووه‌ سه‌ر شاخ تاكو نوێژ بكات. كه‌ ئێواره‌ داهات به‌ ته‌نها له‌وێ بوو،
24
به‌له‌مه‌كه‌ش ماوه‌یه‌كی زۆر له‌ وشكانییه‌وه‌ دوور كه‌وتبووه‌وه‌، شه‌پۆله‌كانیش پێیاندا ده‌كێشا، چونكه‌ بایه‌كه‌ پێچه‌وانه‌ بوو.
25
پێش خۆرهه‌ڵاتن عیسا هاته‌ لایان و به‌سه‌ر ده‌ریاچه‌كه‌دا ده‌ڕۆیشت.
26
كاتێك قوتابییه‌كان بینییان له‌سه‌ر ده‌ریاچه‌كه‌ ده‌ڕوات، شێوان و گوتیان: «ئه‌مه‌ دێوه‌زمه‌یه‌!» له‌ ترسانیشدا هاواریان كرد.
27
ده‌ستبه‌جێ عیسا قسه‌ی له‌گه‌ڵ كردن: «وره‌تان به‌رز بێ! منم. مه‌ترسن.»
28
په‌ترۆس وه‌ڵامی دایه‌وه‌: «گه‌وره‌م، ئه‌گه‌ر تۆی، فه‌رمانم پێبده‌ به‌سه‌ر ئاوه‌كه‌دا بێمه‌ لات.»
29
فه‌رمووی: «وه‌ره‌.» په‌ترۆس له‌ به‌له‌مه‌كه‌ دابه‌زی و به‌سه‌ر ئاوه‌كه‌دا ڕۆیشت و به‌ره‌و لای عیسا به‌ڕێكه‌وت.
30
به‌ڵام كاتێك بینی ڕه‌شه‌بایه‌، ترسا و خه‌ریك بوو نوقوم ده‌بوو، هاواری كرد: «گه‌وره‌م، ڕزگارم بكه‌!»
31
عیساش یه‌كسه‌ر ده‌ستی درێژكرد و گرتییه‌وه‌ و پێی فه‌رموو: «كه‌م باوه‌ڕ، بۆچی گومانت كرد؟»
32
كه‌ سه‌ركه‌وتنه‌ ناو به‌له‌مه‌كه‌، بایه‌كه‌ وه‌ستا.
33
ئه‌وانه‌ی له‌ناو به‌له‌مه‌كه‌دا بوون، كڕنۆشیان بۆ برد و گوتیان: «به‌ڕاستی تۆ كوڕی خودای.»
34
كاتێك په‌ڕینه‌وه‌، هاتنه‌ خاكی جه‌نیساره‌ت.
35
خه‌ڵكی ئاوایی عیسایان ناسییه‌وه‌، هه‌واڵیان دا به‌ ناوچه‌كانی ده‌وروبه‌ر و هه‌موو نه‌خۆشه‌كانیان بۆی هێنا.
36
لێی ده‌پاڕانه‌وه‌ كه‌ ته‌نها ده‌ست له‌ چمكی كراسه‌كه‌ی بده‌ن. جا هه‌موو ئه‌وانه‌ی ده‌ستیان لێیدا چاكبوونه‌وه‌.
  1. a. 14‏:1 یۆنانی: \+tl تیترارك\+tl*: فه‌رمانڕه‌وای هه‌رێمێك له‌ ئیمپڕاتۆریه‌تی ڕۆمانی.