عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
«من نێردراوی خۆم ده‌نێرم، ئه‌وه‌ی ڕێگاكه‌ی پێشم بۆ ئاماده‌ ده‌كات. له‌ناكاو ئه‌و په‌روه‌ردگاره‌ی كه‌ ئێوه‌ داوای ده‌كه‌ن، دێته‌ ناو په‌رستگاكه‌ی؛ بێگومان نێردراوه‌كه‌ی په‌یمانیش دێت كه‌ دڵتان پێی خۆشه‌.» ئه‌مه‌ فه‌رمایشتی یه‌زدانی سوپاسالاره‌.
2
«به‌ڵام كێ به‌رگه‌ی ڕۆژی هاتنی ده‌گرێت؟ كێ خۆی ڕاده‌گرێت له‌ ده‌ركه‌وتنی؟ چونكه‌ ئه‌و وه‌ك ئاگری پاڵاوگه‌ و وه‌ك سابوونی جل شوشتنه‌.
3
وه‌ك پاڵێوه‌ر و بێگه‌ردكاری زیو داده‌نیشێت، نه‌وه‌ی لێڤی پاك ده‌كاته‌وه‌ و وه‌ك زێڕ و زیو ده‌یپاڵێوێت. ئینجا یه‌زدان خه‌ڵكێكی ده‌بێت كه‌ به‌ ڕاستودروستی قوربانی پێشكه‌ش ده‌كه‌ن.
4
ئیتر قوربانی یه‌هودا و ئۆرشه‌لیم له‌لای یه‌زدان قبوڵ ده‌بێت، هه‌روه‌ك ڕۆژانی دێرین، ساڵانی ڕابردوو.
5
«ئینجا بۆ دادگاییكردن دێمه‌ لاتان. خێرا ده‌بمه‌ شایه‌ت له‌سه‌ر سیحرباز و داوێنپیسان، له‌سه‌ر ئه‌وانه‌ی به‌ درۆ سوێند ده‌خۆن، له‌سه‌ر ئه‌وانه‌ی پاره‌ی كرێكار ده‌خۆن، له‌سه‌ر ئه‌وانه‌ی مافی بێوه‌ژن و هه‌تیو زه‌وت ده‌كه‌ن، له‌سه‌ر ئه‌وانه‌ی ده‌ست به‌ ڕووی كه‌سی نامۆوه‌ ده‌نێن و له‌ من ناترسن.» ئه‌مه‌ فه‌رمایشتی یه‌زدانی سوپاسالاره‌.
تاڵانكردنی خودا 
6
«من یه‌زدانم، ناگۆڕێم، ئیتر ئه‌ی نه‌وه‌ی یاقوب، ئێوه‌ له‌ناو نه‌چوون.
7
له‌ سه‌رده‌می باوباپیرانتانه‌وه‌ له‌ فه‌رزه‌كانم لاتان داوه‌ و به‌جێتان نه‌هێناوه‌. بگه‌ڕێنه‌وه‌ لام، منیش ده‌گه‌ڕێمه‌وه‌ لاتان.» ئه‌مه‌ فه‌رمایشتی یه‌زدانی سوپاسالاره‌.
«به‌ڵام ئێوه‌ ده‌پرسن: ”چۆن بگه‌ڕێینه‌وه‌؟“
8
«ئایا مرۆڤ خودا تاڵان ده‌كات؟ چونكه‌ ئێوه‌ تاڵانتان كردم!
«به‌ڵام ئێوه‌ گوتتان: ”چۆن تاڵانمان كردی؟“
«له‌ ده‌یه‌ك و قوربانییه‌كان تاڵانتان كردم.
9
ئێوه‌، هه‌موو ئه‌م نه‌ته‌وانه‌، به‌ نه‌فره‌ت نه‌فره‌تتان لێكراوه‌، چونكه‌ تاڵانم ده‌كه‌ن.»
10
یه‌زدانی سوپاسالار ده‌فه‌رموێت: «تاقیم بكه‌نه‌وه‌: هه‌موو ده‌یه‌كه‌كان بۆ ماڵی خه‌زینه‌ بهێنن، تاكو له‌ په‌رستگاكه‌م خواردن هه‌بێت. ئینجا بزانن چۆن په‌نجه‌ره‌كانی ئاسمانتان بۆ ده‌كه‌مه‌وه‌ و به‌ره‌كه‌ت به‌سه‌رتاندا ده‌بارێنم، هه‌تا جێ نه‌بێت تێی بكه‌ن.
11
له‌به‌ر ئێوه‌ ڕێ له‌ مێروو ده‌گرم، هه‌تا به‌روبوومی زه‌وییه‌كه‌تان تێكنه‌دات، دار مێوتان له‌ كێڵگه‌ بێ به‌ر نه‌بێت.» ئه‌مه‌ فه‌رمایشتی یه‌زدانی سوپاسالاره‌.
12
«ئینجا هه‌موو نه‌ته‌وه‌كان خۆزگه‌تان پێ ده‌خوازن، چونكه‌ خاكه‌كه‌تان ده‌بێته‌ خاكی شادی.» ئه‌مه‌ فه‌رمایشتی یه‌زدانی سوپاسالاره‌.
13
یه‌زدان ده‌فه‌رموێت: «قسه‌كانتان له‌سه‌ر من ڕه‌ق بوون.»
«ئێوه‌ش ده‌پرسن: ”چیمان له‌سه‌ر تۆ گوتووه‌؟“
14
«ئێوه‌ گوتتان: ”به‌ندایه‌تی خودا بێهووده‌یه‌. چ سوودێكی هه‌بوو كه‌ فه‌رمانه‌كانی ئه‌ومان پاراستووه‌ و به‌ خه‌مبارییه‌وه‌ له‌به‌رده‌م یه‌زدانی سوپاسالار ژیانمان گوزه‌راندووه‌؟
15
به‌ڵام ئێستا ئێمه‌ خۆزگه‌ به‌ لووتبه‌رزان ده‌خوازین. هه‌روه‌ها به‌دكاران سه‌ركه‌وتوون، ته‌نانه‌ت ئه‌وانه‌ی خودا تاقی ده‌كه‌نه‌وه‌، ده‌رباز ده‌بن.“»
16
ئینجا ئه‌وانه‌ی له‌ یه‌زدان ده‌ترسان قسه‌یان له‌گه‌ڵ یه‌كتری كرد، یه‌زدانیش گوێی شل كرد و گوێی لێبوو. له‌به‌رده‌میدا له‌ پێچراوه‌یه‌ك تۆمار كرا، بۆ ئه‌وه‌ی ببێته‌ یاده‌وه‌رییه‌ك بۆ ئه‌وانه‌ی له‌ یه‌زدان ده‌ترسن و ڕێز له‌ ناوه‌كه‌ی ده‌گرن.
17
یه‌زدانی سوپاسالار ده‌فه‌رموێت: «ئه‌وانه‌ ده‌بنه‌ هی من، له‌و ڕۆژه‌ ده‌بنه‌ گه‌نجینه‌یه‌كی تایبه‌تی من. به‌زه‌ییم پێیاندا دێته‌وه‌ وه‌ك چۆن پیاو به‌زه‌یی به‌ كوڕه‌كه‌ی دێته‌وه‌ كه‌ خزمه‌تی ده‌كات.
18
ئینجا دیسان جیاوازی له‌نێوان ڕاستودروستان و خراپه‌كاراندا ده‌بینن، له‌نێوان ئه‌وانه‌ی به‌ندایه‌تی خودا ده‌كه‌ن و ئه‌وانه‌ی نایكه‌ن.»