عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ئاگاداركردنه‌وه‌ بۆ كاهینه‌كان 
1
«ئێستاش، ئه‌ی كاهینه‌كان، ئه‌م ئاگاداركردنه‌وه‌یه‌ بۆ ئێوه‌یه‌:
2
ئه‌گه‌ر گوێ نه‌گرن و ئه‌گه‌ر مكوڕ نه‌بوون له‌سه‌ر ئه‌وه‌ی ڕێز له‌ ناوه‌كه‌م بگرن، نه‌فره‌ت ده‌نێرمه‌ سه‌رتان و نه‌فره‌ت له‌ به‌ره‌كه‌ته‌كانتان ده‌كه‌م. به‌ڵكو له‌ڕاستیدا نه‌فره‌تم لێكردوون، چونكه‌ مكوڕ نین له‌سه‌ر ئه‌وه‌ی ڕێز له‌ ناوی من بگرن.» ئه‌مه‌ فه‌رمایشتی یه‌زدانی سوپاسالاره‌.
3
«له‌ به‌ر ئێوه‌ نه‌وه‌كانتان سه‌رزه‌نشت ده‌كه‌م، ڕیخی قوربانی جه‌ژنه‌كانتان به‌ ده‌موچاوتاندا ده‌كه‌م، جا له‌گه‌ڵیدا فڕێده‌درێن.
4
ئینجا ده‌زانن كه‌ من ئه‌م ئاگاداركردنه‌وه‌یه‌م بۆ ئێوه‌ نارد، بۆ ئه‌وه‌ی په‌یمانه‌كه‌م له‌گه‌ڵ لێڤی به‌رده‌وام بێت.» ئه‌مه‌ فه‌رمایشتی یه‌زدانی سوپاسالاره‌.
5
«په‌یمانه‌كه‌م له‌گه‌ڵی بۆ ژیان و ئاشتی بوو، جا هه‌ردووكیانم پێدا، بۆ ئه‌وه‌ی ڕێزم لێ بگرێت. ڕێزی لێم گرت و له‌ ناوه‌كه‌م ترسا.
6
فێركردنی ڕاست له‌سه‌ر زاری بوو، ناڕه‌وایی له‌سه‌ر لێوه‌كانی نه‌بوو. به‌ ئاشتی و به‌ ڕێكی دۆستایه‌تی له‌گه‌ڵم كرد و خه‌ڵكێكی زۆریشی له‌ خراپه‌ گه‌ڕانده‌وه‌.
7
«له‌به‌ر ئه‌وه‌ی ده‌بێت لێوه‌كانی كاهین زانین بپارێزن، خه‌ڵك دێنه‌ لای بۆ ئه‌وه‌ی له‌ ده‌می ئه‌و فێركردنه‌كه‌ بزانن، چونكه‌ ئه‌و نێردراوی یه‌زدانی سوپاسالاره‌.
8
به‌ڵام ئێوه‌ له‌ ڕێگاكه‌ لاتاندا و فێركردنه‌كانتان بۆ زۆر كه‌س بووه‌ كۆسپ، په‌یمانی لێڤیشتان شكاند.» ئه‌مه‌ فه‌رمایشتی یه‌زدانی سوپاسالاره‌.
9
«له‌به‌ر ئه‌وه‌ من له‌لای هه‌موو گه‌له‌كه‌ ڕیسوام كردن و سووكایه‌تیم پێكردن، چونكه‌ ڕێگاكانی منتان نه‌گرته‌به‌ر و لایه‌نگریتان كرد له‌ جێبه‌جێكردنی فێركردنه‌كه‌.»
ناپاكی یه‌هودا 
10
ئایا هه‌موومان یه‌ك باوكمان نییه‌؟ ئایا یه‌ك خودا به‌دیی نه‌هێناوین؟ ئیتر بۆچی به‌ ناپاكی له‌گه‌ڵ یه‌كتری په‌یمانی باوباپیرانمان ده‌شكێنین؟
11
یه‌هودا ناپاكی كرد. شتێكی قێزه‌ون له‌ ئیسرائیل و له‌ ئۆرشه‌لیم ئه‌نجام درا: ژنیان هێنا له‌و ژنانه‌ی كه‌ خوداوه‌ندێكی بێگانه‌ ده‌په‌رستن، به‌م شێوه‌یه‌ یه‌هودا په‌رستگای یه‌زدانی گڵاوكرد، ئه‌وه‌ی خۆشی ده‌ویست.
12
هه‌ركه‌سێك كه‌ ئه‌مه‌ ده‌كات با یه‌زدانی سوپاسالار هیچ نه‌وه‌یه‌كی له‌ چادره‌كانی یاقوب بۆ نه‌هێڵێته‌وه‌، ته‌نانه‌ت ئه‌گه‌ر قوربانیش پێشكه‌ش به‌ یه‌زدان بكات.
13
شتێكی دیكه‌ كه‌ ده‌یكه‌ن: به‌ فرمێسك قوربانگای یه‌زدان داده‌پۆشن، به‌ گریان و هاوار، چونكه‌ وه‌ك جاران قوربانی ئێوه‌ جێی ڕه‌زامه‌ندی یه‌زدان نییه‌ و به‌ په‌سه‌ند له‌ ده‌ستتان وه‌رناگرێت.
14
ئێوه‌ لێم ده‌پرسن: «له‌به‌ر چی؟» له‌به‌ر ئه‌وه‌ی یه‌زدان شایه‌ته‌ له‌نێوان تۆ و ژنه‌كه‌ی ته‌مه‌نی گه‌نجیت، كه‌ ناپاكیت له‌گه‌ڵی كرد، هه‌رچه‌نده‌ ئه‌و هاوسه‌رته‌ و ئه‌و ژنه‌یه‌ كه‌ په‌یمانی هاوسه‌رگیریت له‌گه‌ڵی هه‌یه‌.
15
ئایا خودا نه‌یكردنه‌ یه‌ك؟ ئێوه‌ به‌ جه‌سته‌ و به‌ ڕۆح هی خودان. ئیتر خودا داوای چی ده‌كات؟ نه‌وه‌ی له‌خواترستان هه‌بێت. له‌به‌ر ئه‌وه‌ به‌ ڕۆح ئاگاداری خۆتان بن و ناپاكی له‌ ژنی ته‌مه‌نی گه‌نجیه‌تیتان مه‌كه‌ن.
16
یه‌زدانی په‌روه‌ردگاری ئیسرائیل ده‌فه‌رموێت: «ڕقم له‌ ته‌ڵاقه‌، هه‌روه‌ها ڕقم له‌وه‌یه‌ كه‌ توندوتیژی له‌ دژی ژنه‌كه‌ی ده‌كات.» ئه‌مه‌ فه‌رمایشتی یه‌زدانی سوپاسالاره‌.
ئینجا به‌ ڕۆح ئاگاداری خۆتان بن و ناپاكی مه‌كه‌ن.
ڕۆژی حوكمدان 
17
به‌ قسه‌كانتان یه‌زدانتان ماندوو كرد.
ئێوه‌ ده‌پرسن: «به‌ چی ماندوومان كرد؟»
به‌وه‌ی كه‌ گوتتان: «ئه‌وه‌ی خراپه‌ بكات، له‌به‌رچاوی یه‌زدان چاكه‌، ئه‌و به‌وان دڵخۆشه‌،» یان «خودای دادپه‌روه‌ری له‌كوێیه‌؟»