عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
نموونه‌ی جوتیارێك 
1
دوای ئه‌مه‌ عیسا به‌ هه‌موو شار و گوندێكدا ده‌گه‌ڕا، وتار و مزگێنی پاشایه‌تی خودای ده‌دا، دوازده‌كه‌شی له‌گه‌ڵ بوو.
2
چه‌ند ئافره‌تێكیش كه‌ له‌ ڕۆحی پیس و نه‌خۆشی چاكببوونه‌وه‌: مریه‌م كه‌ به‌ مه‌جده‌لی ناوده‌بردرا و حه‌وت ڕۆحی پیسی لێ ده‌ركردبوو،
3
یوه‌نای ژنی خوزای بریكاری هێرۆدس، سه‌وسه‌ن و زۆری دیكه‌ش، به‌ ماڵی خۆیان یارمه‌تییان ده‌دان.
4
كاتێك خه‌ڵكێكی ئێجگار زۆر له‌ هه‌موو شاره‌كانه‌وه‌ هاتن بۆ لای عیسا و كۆبوونه‌وه‌، به‌ نموونه‌ قسه‌ی بۆ كردن:
5
«جوتیارێك چووه‌ ده‌ره‌وه‌ تۆو بكات. كه‌ تۆوی ده‌وه‌شاند، هه‌ندێكی كه‌وتنه‌ سه‌ر ڕێگا و پێشێل بوون، باڵنده‌ی ئاسمان خواردیانن.
6
هه‌ندێكیش كه‌وتنه‌ سه‌ر زه‌وییه‌كی به‌رده‌ڵان، سه‌ریان ده‌ركرد و وشك بوون، چونكه‌ خاكه‌كه‌ شێی نه‌بوو.
7
هه‌ندێكیش كه‌وتنه‌ نێو دڕكان، دڕكه‌كان له‌گه‌ڵیان گه‌شه‌یان كرد و خنكاندیانن.
8
هه‌ندێكیش كه‌وتنه‌ سه‌ر زه‌وییه‌كی باش، ڕوان و سه‌د ئه‌وه‌نده‌ به‌رهه‌میان دا.» ئه‌مانه‌ی فه‌رموو و هاواری كرد: «ئه‌وه‌ی گوێی بیستنی هه‌یه‌، با ببیستێت!»
ڕوونكردنه‌وه‌ی نموونه‌ی جوتیاره‌كه‌ 
9
قوتابییه‌كانی لێیان پرسی كه‌ مه‌به‌ست له‌م نموونه‌یه‌ چی بوو؟
10
ئه‌ویش فه‌رمووی: «به‌ ئێوه‌ دراوه‌ نهێنی شانشینی خودا بزانن، به‌ڵام به‌ نموونه‌ قسه‌ بۆ خه‌ڵك ده‌كه‌م بۆ ئه‌وه‌ی
«{سه‌یر بكه‌ن، به‌ڵام نه‌بینن و
گوێ بگرن، به‌ڵام تێنه‌گه‌ن.}[a]
11
«ئه‌مه‌ مه‌به‌ستی نموونه‌كه‌یه‌: تۆوه‌كه‌ په‌یامی خودایه‌.
12
ئه‌وانه‌ی سه‌ر ڕێگاكه‌ ئه‌وانه‌ن كه‌ گوێیان لێبوو، ئینجا ئیبلیس دێت و په‌یامه‌كه‌ له‌ دڵیان ده‌بات، نه‌وه‌ك باوه‌ڕ بهێنن و ڕزگاریان بێت.
13
ئه‌وانه‌ش كه‌ كه‌وتنه‌ سه‌ر زه‌وییه‌ به‌رده‌ڵانه‌كه‌، ئه‌وانه‌ن كه‌ په‌یامه‌كه‌ به‌ خۆشییه‌وه‌ وه‌رده‌گرن كاتێك ده‌یبیستن، به‌ڵام ڕه‌گیان نییه‌ و تاكو ماوه‌یه‌ك باوه‌ڕ ده‌هێنن، به‌ڵام كاتێك تاقی ده‌كرێنه‌وه‌، ده‌كه‌ون.
14
ئه‌وانه‌ی كه‌وتنه‌ ناو دڕكه‌كان، ئه‌وانه‌ن كه‌ ده‌یبیستن، به‌ خه‌فه‌ت و سامان و خۆشییه‌كانی ژیان ده‌خنكێن، به‌رهه‌می پێگه‌یشتوو ناده‌ن.
15
به‌ڵام ئه‌وانه‌ی كه‌وتنه‌ سه‌ر زه‌وییه‌ چاكه‌كه‌، ئه‌وانه‌ن كه‌ به‌ دڵێكی چاك و باشه‌وه‌ ده‌بیستن، په‌یامه‌كه‌ له‌ دڵیاندا ده‌پارێزن و به‌ خۆڕاگرییه‌وه‌ به‌رهه‌م ده‌ده‌ن.
ئاگاداربن چۆن گوێ ده‌گرن 
16
«كه‌س چرا هه‌ڵناكات و به‌ ته‌شت دایپۆشێت، یان له‌ژێر نوێن دابنێت، به‌ڵكو له‌سه‌ر چرادانی داده‌نێت، تاكو ئه‌وانه‌ی دێنه‌ ژووره‌وه‌ ڕووناكییه‌كه‌ ببینن،
17
چونكه‌ شاردراوه‌ نییه‌ ئاشكرا نه‌بێت و نهێنی نییه‌ ده‌رنه‌كه‌وێت.
18
كه‌واته‌ ئاگاداربن چۆن گوێ ده‌گرن، چونكه‌ ئه‌وه‌ی هه‌یه‌تی پێی ده‌درێت، ئه‌وه‌ش كه‌ نییه‌تی، ته‌نانه‌ت ئه‌وه‌شی كه‌ ئه‌و به‌ هی خۆی ده‌زانێت لێی ده‌سه‌نرێته‌وه‌.»
19
ئینجا دایك و براكانی عیسا هاتنه‌ لای، به‌ڵام له‌به‌ر خه‌ڵكه‌كه‌ نه‌یانتوانی بگه‌نه‌ لای.
20
پێی گوترا: «دایك و براكانت له‌ ده‌ره‌وه‌ ڕاوه‌ستاون، ده‌یانه‌وێ بتبینن.»
21
وه‌ڵامی دانه‌وه‌: «دایك و براكانم ئه‌وانه‌ن كه‌ گوێ له‌ په‌یامی خودا ده‌گرن و كاری پێده‌كه‌ن.»
عیسا ڕه‌شه‌با هێمن ده‌كاته‌وه‌ 
22
ڕۆژێكیان عیسا له‌گه‌ڵ قوتابییه‌كانی سواری به‌له‌مێك بوو، پێی فه‌رموون: «با بپه‌ڕینه‌وه‌ ئه‌وبه‌ری ده‌ریاچه‌كه‌.» جا به‌ڕێ كه‌وتن.
23
كاتێك ده‌ڕۆیشتن ئه‌و نوست. ڕه‌شه‌بایه‌كیش هه‌ڵیكرده‌ سه‌ر ده‌ریاچه‌كه‌، به‌له‌مه‌كه‌ خه‌ریك بوو پڕده‌بوو له‌ ئاو و كه‌وتنه‌ مه‌ترسییه‌وه‌.
24
جا هاتنه‌ لای، خه‌به‌ریان كرده‌وه‌ و گوتیان: «گه‌وره‌م، گه‌وره‌م، وا له‌ناوده‌چین!»
ئه‌ویش هه‌ستا، له‌ ڕه‌شه‌با و شه‌پۆله‌كانی ڕاخوڕی، كۆتاییان هات و هێمن بوونه‌وه‌.
25
ئینجا پێی فه‌رموون: «كوا باوه‌ڕتان؟»
ئه‌وانیش سه‌رسام بوون و ترسان، به‌ یه‌كتریان ده‌گوت: «باشه‌ ئه‌مه‌ كێیه‌؟ فه‌رمان به‌ با و ئاویش ده‌كات و گوێرایه‌ڵی ده‌بن.»
ده‌ركردنی ڕۆحی پیس 
26
ئینجا به‌ره‌و هه‌رێمی گه‌راسین ڕۆیشتن، كه‌ به‌رامبه‌ر جه‌لیله‌.
27
كاتێك عیسا دابه‌زیه‌ سه‌ر وشكانی، پیاوێكی ئه‌و شاره‌ی تووشبوو ڕۆحی پیسی تێدابوو، ده‌مێك بوو جلی له‌به‌ر نه‌ده‌كرد و له‌ ماڵ نه‌ده‌ژیا، به‌ڵكو له‌ گۆڕستان.
28
كه‌ عیسای بینی، هاواری كرد و له‌به‌رده‌می كه‌وت، به‌ ده‌نگی به‌رز گوتی: «چیت له‌ من ده‌وێ عیسای كوڕی خودای هه‌ره‌به‌رز؟ لێت ده‌پاڕێمه‌وه‌ ئه‌شكه‌نجه‌م نه‌ده‌ی!»
29
چونكه‌ عیسا فه‌رمانی به‌ ڕۆحه‌ پیسه‌كه‌ دابوو له‌ پیاوه‌كه‌ بێته‌ ده‌ره‌وه‌. زۆر جار ڕۆحه‌ پیسه‌كه‌ ده‌یگرت، هه‌رچه‌نده‌ به‌ كۆت و زنجیر ده‌به‌سترایه‌وه‌ و چاودێری ده‌كرا، به‌ڵام كۆته‌كانی ده‌شكاند و ڕۆحی پیس به‌ره‌و چۆڵه‌وانی ده‌یبرد.
30
عیسا لێی پرسی: «ناوت چییه‌؟»
گوتی «لێگیۆن[b] » چونكه‌ زۆر ڕۆحی پیسی تێچووبوو.
31
لێی ده‌پاڕانه‌وه‌ نه‌وه‌ك فه‌رمانیان پێ بكات به‌ره‌و بیری بێ بن[c] بڕۆن.
32
له‌وێ ڕانه‌ به‌رازێكی زۆر له‌ شاخ ده‌له‌وه‌ڕان، لێی پاڕانه‌وه‌ كه‌ ڕێیان بدات بچنه‌ ناویانه‌وه‌، ئه‌ویش ڕێی پێدان.
33
ڕۆحه‌ پیسه‌كان له‌ پیاوه‌كه‌ هاتنه‌ ده‌ره‌وه‌ و چوونه‌ ناو به‌رازه‌كانه‌وه‌، ڕانه‌كه‌ش له‌ قه‌راغی شاخه‌كه‌وه‌ بۆ ناو ده‌ریاچه‌كه‌ هه‌ڵدێران و خنكان.
34
كاتێك شوانه‌كان ئه‌م ڕووداوه‌یان بینی، ڕایانكرد و هه‌واڵیان دا به‌ شار و كێڵگه‌كان.
35
ئینجا خه‌ڵكه‌كه‌ چوون تاكو ئه‌وه‌ی ڕوویداوه‌ بیبینن، هاتنه‌ لای عیسا و بینییان ئه‌و پیاوه‌ی ڕۆحه‌ پیسه‌كانی لێ ده‌رچوو بوو پۆشته‌یه‌ و ئاقڵه‌، له‌به‌رپێی عیسا دانیشتووه‌، ئیتر ترسان.
36
ئه‌وانه‌ی بینیبوویان بۆ خه‌ڵكه‌كه‌یان گێڕایه‌وه‌، چۆن ئه‌وه‌ی ڕۆحی پیسی تێدابوو چاك بووه‌ته‌وه‌.
37
هه‌موو كۆمه‌ڵانی هه‌رێمی گه‌راسین داوایان له‌ عیسا كرد له‌لایان بڕوات، چونكه‌ ترسێكی زۆریان لێ نیشتبوو، ئه‌ویش سواری به‌له‌مه‌كه‌ بوو و گه‌ڕایه‌وه‌.
38
ئه‌و پیاوه‌ی ڕۆحه‌ پیسه‌كانی لێ ده‌ركرا بوو، لێی ده‌پاڕایه‌وه‌ كه‌ له‌گه‌ڵی بێت، به‌ڵام عیسا ڕه‌وانه‌ی كرد و فه‌رمووی:
39
«بۆ ماڵی خۆت بگه‌ڕێوه‌ و ئه‌وه‌ی خودا بۆی كردی، بیگێڕه‌وه‌.» ئه‌ویش ڕۆیشت و به‌ هه‌موو شاره‌كه‌ی ڕاگه‌یاند كه‌ عیسا چی بۆ كردبوو.
كچێكی مردوو و ژنێكی نه‌خۆش 
40
كاتێك عیسا گه‌ڕایه‌وه‌ خه‌ڵكه‌كه‌ پێشوازییان لێكرد، چونكه‌ هه‌موو چاوه‌ڕێیان ده‌كرد.
41
پیاوێك كه‌ ناوی یایرۆس و پێشه‌وای كه‌نیشت بوو، هات و له‌به‌رپێی عیسادا كه‌وت، لێی پاڕایه‌وه‌ تاكو بچێته‌ ماڵه‌كه‌ی،
42
چونكه‌ كچه‌ تاقانه‌كه‌ی كه‌ ته‌مه‌نی نزیكه‌ی دوازده‌ ساڵ بوو له‌ سه‌ره‌مه‌رگدا بوو.
كاتێك عیسا ده‌ڕۆیشت خه‌ڵكه‌كه‌ پاڵه‌په‌ستۆیان ده‌كرد.
43
ژنێك دوازده‌ ساڵ خوێنبه‌ربوونی هه‌بوو، هه‌موو ئه‌وه‌ی هه‌یبوو دابووی به‌ پزیشك، كه‌سیش نه‌یتوانی چاكی بكاته‌وه‌.
44
جا له‌ دواوه‌ هات و ده‌ستی له‌ چمكی كراسه‌كه‌ی عیسا دا، ده‌ستبه‌جێ خوێنبه‌ربوونه‌كه‌ی وه‌ستا.
45
عیسا فه‌رمووی: «كێ بوو ده‌ستی لێدام؟»
كه‌ هه‌موو نكۆڵییان كرد، په‌ترۆس گوتی: «گه‌وره‌م، خه‌ڵكه‌كه‌ له‌ ده‌وروپشتتن و پاڵه‌په‌ستۆ ده‌كه‌ن.»
46
به‌ڵام عیسا فه‌رمووی: «یه‌كێك ده‌ستی لێدام، چونكه‌ هه‌ستم به‌ هێزێك كرد لێم چووه‌ ده‌ره‌وه‌.»
47
ژنه‌كه‌ بینی ئه‌وه‌ی كردی ناشاردرێته‌وه‌، به‌ له‌رزه‌وه‌ هات و كه‌وته‌ به‌رپێی، له‌به‌رچاوی هه‌مووان ڕایگه‌یاند كه‌ بۆچی ده‌ستی لێداوه‌ و چۆن ده‌ستبه‌جێ چاك بووه‌ته‌وه‌.
48
عیساش پێی فه‌رموو: «كچم، باوه‌ڕه‌كه‌ت تۆی چاككرده‌وه‌، بڕۆ به‌ سه‌لامه‌ت.»
49
هێشتا عیسا قسه‌ی ده‌كرد، یه‌كێك له‌ ماڵی پێشه‌وای كه‌نیشته‌وه‌ هات و گوتی: «كچه‌كه‌ت مرد، ئیتر ئه‌زیه‌ت مه‌خه‌ره‌ به‌ر مامۆستا.»
50
عیساش ئه‌مه‌ی بیست و وه‌ڵامی دایه‌وه‌: «مه‌ترسه‌، ته‌نها باوه‌ڕت هه‌بێت ئه‌و چاكده‌بێته‌وه‌.»
51
گه‌یشته‌ ماڵه‌كه‌ و نه‌یهێشت كه‌س له‌گه‌ڵی بچێته‌ ژووره‌وه‌، په‌ترۆس و یۆحه‌نا و یاقوب و دایك و باوكی منداڵه‌كه‌ نه‌بێت.
52
هه‌موو ده‌گریان و شینیان بۆ ده‌گێڕا، ئه‌ویش فه‌رمووی: «مه‌گریێن نه‌مردووه‌، به‌ڵكو نوستووه‌.»
53
خه‌ڵكه‌كه‌ پێی پێكه‌نین، چونكه‌ ده‌یانزانی مردووه‌.
54
به‌ڵام ده‌ستی كچه‌كه‌ی گرت، بانگی كرد و فه‌رمووی: «كیژۆڵه‌، هه‌سته‌!»
55
ئیتر ڕۆحی هاته‌وه‌ به‌ر و ده‌ستبه‌جێ هه‌ستا، ئه‌وسا فه‌رمانی دا نانی بده‌نێ.
56
دایك و باوكی سه‌ریان سوڕما، به‌ڵام ڕایسپاردن ئه‌وه‌ی ڕوویداوه‌ به‌ كه‌سی نه‌ڵێن.
  1. a. 8‏:10 \+xt ئیشایا 6‏:9‏\+xt*‏
  2. b. 8‏:30 لێگیۆن: له‌شكر
  3. c. 8‏:31 یۆنانی: \+tl ئه‌بیسۆس\+tl*. شوێنێكی زۆر قووڵه‌، ڕۆحی پیس و مردووانی تێدا به‌ند ده‌كرێت.