عیسای گوت
ئەرد و ئەسمان دێ پویچ بن، بەلێ چ جاران پەیڤا من پویچ نابیت.

عیسای بەرسڤا وی دا:
«.... ژ بەر هندێ ئەزێ ژ دایك بوویم، و ژ بەر ڤێ ئەزێ هاتیمە جیهانێ داكو شاهدەیێ
بۆ راستیێ بدەم.هەر كەسێ ژ راستیێ بیت دێ گوهێ خۆ دەتە دەنگێ من.»

په‌رتوکا پیرۆز
1
پشتی هنگی ل باژێڕ و گوندان دگەڕیا، مزگینیا پاشایەتیا خودێ ددا و خەلك پێ ئاگەهدار دكر. دوازدە شاگردێن وی د گەل دا بوون،
2
هندەك ژنك ژی ل گەل بوون، ئەوێن ل سەر دەستێ وی ژ نەساخی و گیانێن پیس ساخ بووین. ئەو ژی ئەڤە بوون: مەریەم ئەوا ب مەجدەلی دهاتە بناڤكرن، یا كو حەفت ئەجنە ژ وێ دەرئێخستین،
3
یووەننا هەڤژینا حوزایێ بریكارێ هێرودێسی، سۆسن و گەلەكێن دی یێن ب مالێ خۆ هاریكاریا وی دكرن.
نموونەیا تۆڤچینی 
4
دەمێ گەلەك خەلك ژ هەمی باژێڕان لێ خڕڤەبووین، نموونەیەك بۆ وان ئینا:
5
«تۆڤچین دەركەفت دا تۆڤێ خۆ بهاڤێژیت. دەمێ وی تۆڤ دهاڤێت، هندەك ژێ كەفتە سەر رێكێ، ئینا پێ لێ هاتە دانان و باڵندەیێن ئەسمانی خوار.
6
هندەك ژی كەفتە سەر كەڤری و پشتی شین بووی، هشك بوو، چنكو یێ بێ شهـ بوو.
7
هندەك ژی كەفتە ناڤ ستریان و ل گەل ئێك شین بوون، ئینا ستریان ئەو فەتساند.
8
هندەك ژی كەفتە ئەردەكێ باش و دەمێ شین بووی، بەرهەمەكێ سەد جاركی دا.» ئەڤ چەندە گۆت و گازی كر: «ئەوێ گوهـ بۆ بهیستنێ هەبن، بلا ببهیسیت.»
ئارمانجا نموونەیان 
9
شاگردێن وی پرسیار ژێ كر: «مەبەستا ڤێ نموونەیێ چیە؟»
10
ئینا گۆت: «تێگەهشتنا نهێنیێن پاشایەتیا خودێ بۆ هەوە یا هاتیە دان، لێ بۆ مرۆڤێن دی ئەز ب نموونەیان دئاخڤم، داكو لێ ‹بنێڕن و نەبینن، ببهیسن و تێنەگەهن›[a] .
شڕۆڤەكرنا نموونەیا تۆڤچینی 
11
ئەڤەیە مەبەستا نموونەیێ: تۆڤ پەیڤا خودێیە.
12
ئەو تۆڤێ كەفتیە سەر رێكێ، ئەو كەسن یێن گوهـ ل پەیڤێ دبن، پاشی ئبلیس دهێت و پەیڤێ ژ دلێ وان دڕەڤینیت، نەكو باوەریێ بینن و قورتال ببن.
13
ئەو تۆڤێ كەفتیە سەر كەڤری، ئەو كەسن یێن دەمێ گوهـ ل پەیڤێ دبن ب دلخۆشی وەردگرن و ئەو كەس د بێ رەهن، دەمەكێ كورت باوەریێ دئینن و د دەمێ تاقیكرنێ دا دەست ژ پەیڤێ بەرددەن.
14
ئەو تۆڤێ كەفتیە د ناڤ ستریان دا، ئەو كەسن یێن پەیڤێ دبهیسن، لێ ئەو ب خەم و دەولەمەندی و خۆشیێن ژیانێ ڤە مژویل دبن و پێ دهێنە فەتساندن و بەرهەمێ گەهشتی نادەن.
15
لێ ئەو تۆڤێ كەفتیە سەر ئەردێ باش، ئەو كەسن یێن پەیڤێ دبهیسن و د دلەكێ باش و راست دا ڤەدشێرن و ب خۆڕاگریێ بەرهەمی ددەن.
نموونەیا چرای 
16
كەسەك چرایەكی هەلناكەت و ب ئامانەكی بنخێڤیت، یان ژی دانیتە دبن تەختی ڤە، لێ ددانیتە سەر چرادانكێ، داكو ئەوێن دهێنە د ژۆرڤە رۆناهیێ ببینن.
17
چ ڤەشارتی نینن ئاشكرا نەبن و چ نهێنی نینن كو نەهێنە زانین و نەكەڤنە بەر رۆناهیێ.
18
ئەڤجا هایدار بن كا چەوا گوهداریێ دكەن، چنكو ئەوێ هەیی دێ پتر بۆ وی هێتە دان و ئەوێ نەیی، خۆ یێ هزر بكەت یێ ویە ژی، دێ ژێ هێتە ستاندن.»
دایك و برایێن عیسای 
19
د وی دەمی دا، دایك و برایێن وی هاتن و دڤیان بچنە نك، لێ ژ بەر قەرەبالغا مرۆڤان نەشیان بگەهنێ.
20
ئینا گۆتنێ: «دایكا تە و برایێن تە ژ دەرڤە د راوەستیاینە، دڤێن تە ببینن.»
21
لێ وی بەرسڤا وان دا و گۆت: «دایكا من و برایێن من ئەون یێن گوهـ ل پەیڤا خودێ دگرن و پێ دكەن.»
عیسا باڕۆڤەیێ ئارام دكەت 
22
رۆژەكێ ئەو و شاگردێن خۆ ل بەلەمەكێ سیار بوون و گۆتە وان: «دا دەرباز بینە رەخێ دی یێ دەریاكێ» و هاژوتن.
23
ئەو یێ د دەریاكێ دا بەلەمێ دهاژون و عیسا نڤست. ژ نشكەكێ ڤە باڕۆڤەیەكێ ب سەر دەریاكێ دا گرت و بەلەم تژی ئاڤ دكر و كەفتنە د مەترسیێ دا.
24
ئینا چوونە نك عیسای و هشیار كرن و گۆتنێ: «مامۆستا، مامۆستا ئەم دێ ژناڤچین!» عیسا ژ خەو رابوو و ل با و پێلێن ئاڤێ حەیتاند، ئینا د جهـ دا راوەستیان و ئارامی پەیدا بوو.
25
پاشی گۆتە وان: «كا باوەریا هەوە؟» ئینا ترسیان و گوهشین و گۆتنە ئێكودوو: «ئەڤە كیە؟ ئەو فەرمانێ ل بای و ئاڤێ ژی دكەت و گوهێ خۆ ددەنێ!»
ساخكرنا زەڵامەكێ گەلەك ئەجنە تێدا 
26
پاشی گەهشتنە دەڤەرا جەراسینیان، كو دكەڤیتە بەرامبەری دەڤەرا جەلیل.
27
دەمێ عیسا پەیا بووی و گەهشتیە هشكاتیێ، زەڵامەكێ خەلكێ وی باژێڕی كەفتە بەرسینگێ وی، كو ئەجنە تێدا ئاكنجی ببوون. ئەوی زەڵامی ژمێژە جلك نەكربوونە بەر خۆ و د خانیان ڤە نەدژیا، لێ هەر ل ناڤ گۆڕستانان بوو.
28
دەمێ چاڤێ وی ب عیسای كەفتی، كرە هەوار و كەفتە بەر پێیێن وی و ب دەنگەكێ بلند گۆت: «تە چ ژ من دڤێت، عیسایێ كوڕێ خودایێ هەری بلند؟ ئەز هیڤیێ ژ تە دكەم من ئەشكەنجە نەدەی.»
29
چنكو عیسای فەرمان دابوو گیانێ پیس ژ وی مرۆڤی دەركەڤیت. ئەو گیان گەلەك جاران ل سەر وی زاڵ دبوو، هندی ب بەند و زنجیران گرێ دابا و زێرەڤانی لێ كربا، ئەو دا بەندێن خۆ شكێنیت و ئەجنەی ئەو دڕەڤاندە چۆلی.
30
ئینا عیسای پرسیار ژێ كر: «ناڤێ تە چیە؟» گۆت: «لەشكەر»ە، چنكو گەلەك ئەجنە چووبوونە د ناڤ وی دا.
31
ئەجنەیان هیڤی ژ عیسای كرن، كو بەرێ وان نەدەتە چاڵا بێ بن.[b]
32
ل وێرێ، ل قونتارا چیای، رەڤدەیەكا مەزن یا بەرازان دچەری، ئینا ئەجنەیان هیڤی ژ عیسای كرن، كو دەستویریێ بدەتێ داكو بچنە د بەرازان دا، ئینا رێ دایێ.
33
ئەڤجا ئەجنە ژ وی مرۆڤی دەركەفتن و چوونە د بەرازان دا، ئینا رەڤدە ژ وێ قونتارا رك بەرەڤ دەریاكێ بەزی و خۆ هاڤێتە تێدا و خەندقی.
34
دەمێ گاڤانان ئەڤ رویدانە دیتی، رەڤین و ل باژێڕی و گوندان راگەهاند.
35
خەلك دەركەفتن داكو وێ رویدانێ ببینن و هاتنە نك عیسای و دیت ئەو مرۆڤێ ئەجنە ژێ دەركەفتین، ل بەر پێیێن عیسای یێ روینشتیە و جلكێن ل بەر و یێ ل سەر هشێن خۆ، ئینا ترسیان.
36
ئەوێن ئەڤ رویدانە ژی دیتی و كا چەوا ئەو مرۆڤێ ئەجنە تێدا ئاكنجی ساخ بوو، بۆ خەلكی ڤەگێڕا.
37
ئینا هەمی خەلكێ دەڤەرا جەراسینیان داخواز ژ عیسای كر كو ژ نك وان بچیت، چنكو ترسەكا مەزن ب سەر وان دا هات، ئینا عیسا ل بەلەمێ سیار بوو و ڤەگەڕیا ڤە.
38
ئەوێ ئەجنە ژێ دەركەفتین، هیڤی ژ عیسای كرن كو بهێلیت ل گەل وی بیت، لێ عیسای ڤەگەڕاندەڤە و گۆتێ:
39
«هەڕە مالا خۆ و كا خودێ چەند بۆ تە كر، بۆ خەلكی دیار كە.» ئینا ئەو چوو و ل هەمی باژێڕی دگەڕیا و كا عیسای چەند بۆ كربوو رادگەهاند.
ساخكرنا ژنكەكێ و زیندیكرنا كچەكێ 
40
دەمێ عیسا ڤەگەڕیایە ڤە، جەماوەرەكی پێشوازیا وی كر، چنكو هەمی ب ژڤانێ هاتنا وی بوون.
41
وەسا چێبوو زەڵامەكی دگۆتنێ یائیرۆس، سەرۆكەكێ كنیشتەیێ بوو، هات و خۆ هاڤێتە بەر پێیێن عیسای و هیڤی ژێ كرن، ل گەل بچیتە مالا وی.
42
چنكو كچەكا ئێكانە هەبوو، ژیێ وێ نێزیكی دوازدە ساڵان بوو، ل بەر مرنێ بوو. دەمێ عیسا ب رێ دچوو، جەماوەری د ناڤ خۆ دا ئاسێ دكر.
43
ژنكەك ل وێرێ هەبوو، ئەو دوازدە ساڵ بوو خوین ژ بەر دچوو[c] و چ مالێ هەی دابوو نۆژداران، لێ ل سەر دەستێ چ ژ وان ساخ نەببوو.
44
ئەو هاتە نك و ژ پشتێ ڤە دەستێ خۆ كرە ریشالۆكەكا[d] كراسێ وی و د جهـ دا خوین ژ بەر چوونا وێ راوەستیا.
45
عیسای گۆت: «كێ دەستێ خۆ كرە من؟» دەمێ هەمیان ماندەل[e] كری، پەترۆسی گۆت: «مامۆستا، خەلكی دەوروبەرێن تە یێن تەنگ كرین و تە پال ددەن.»
46
لێ عیسای گۆت: «كەسەكی دەستێ خۆ كرە من، چنكو من هەست پێ كر هێزەك ژ من دەركەفت.»
47
دەمێ ژنكێ دیتی ئەو نەهاتە ڤەشارتن، هات و دلەرزی و خۆ هاڤێتە بەر پێیێن عیسای و ل پێش چاڤێن هەمیان گۆت كا ژ بەر چ وێ دەست هاڤێتە عیسای و كا چەوا د جهـ دا ساخ بوو.
48
عیسای گۆتێ: «كچا من، باوەریا تە تۆ ساخ كری، ب ئاشتی هەڕە.»
49
هێشتا ئەو دئاخفت، كەسەك ژ مالا سەرۆكێ كنیشتەیێ هات و گۆتێ: «كچا تە مر، ئەڤجا پتر زەحمەتێ بۆ مامۆستای چێنەكە.»
50
لێ دەمێ عیسای ئەڤ چەندە بهیستی، گۆتێ: «نەترسە، ب تنێ باوەریێ بینە و كچا تە دێ ساخ بیت.»
51
دەمێ گەهشتیە مال، نەهێلا كەسەك ژبلی پەترۆسی و یوحەننای و یەعقوبی و دایك و بابێن كچكێ ل گەل بچیتە ژۆر.
52
هەمیان بۆ دكرە گری و سینگێ خۆ ڤەدقوتا، ئینا گۆت: نەكەنە گری! ئەو نە مریە، لێ یا نڤستیە.
53
ئینا ئەو پێ كەنین، چنكو وان دزانی یا مری.
54
دەستێ وێ گرت و گازی كرێ و گۆت: «كچكێ، رابە.»
55
گیانێ وێ ڤەگەڕیاڤە و ئێكسەر رابوو، عیسای فەرمان دا وان كو خوارنێ بدەنێ.
56
دایك و بابێن وێ گوهشین، لێ وی ئەو راسپاردن كو ڤێ رویدانێ نە بێژنە كەسێ.
  1. a. 8‏:10 ئیشایا 6‏:9
  2. b. 8‏:31 q چاڵا بێ بن: ب یونانی دبێژنێ ‹ئەبیسۆس›. ل فەرهەنگۆكێ بنێڕە.
  3. c. 8‏:43 ل گۆر دەستوورێ مووسای، خوینژبەرچوونێ ئەو كەس دهەڕماند. ل فەرهەنگۆكێ بنێڕە خوینژبەرچوون*.
  4. d. 8‏:44 q ریشالۆك: ل فەرهەنگۆكێ بنێڕە.
  5. e. 8‏:45 q ماندەل: ئینكار