عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
كڕینه‌وه‌ی ئه‌وه‌ی هی یه‌زدانه‌ 
1
هه‌روه‌ها یه‌زدان به‌ موسای فه‌رموو
2
«له‌گه‌ڵ نه‌وه‌ی ئیسرائیل بدوێ و پێیان بڵێ: ”ئه‌گه‌ر كه‌سێك كه‌سێكی بۆ یه‌زدان نه‌زر كرد، ئه‌وا ئاوای ده‌خه‌مڵێنێت،
3
ئه‌گه‌ر خه‌مڵاندنه‌كه‌ت بۆ نێرێكی ته‌مه‌ن بیست هه‌تا شه‌ست ساڵ بوو، ئه‌وا خه‌مڵاندنه‌كه‌ت په‌نجا شاقل[a] زیو به‌گوێره‌ی شاقلی پیرۆزگا ده‌بێت.
4
ئه‌گه‌ر مێینه‌ش بوو، ئه‌وا خه‌مڵاندنه‌كه‌ت سی شاقل ده‌بێت.
5
ئه‌گه‌ر ته‌مه‌نی پێنج هه‌تا بیست ساڵ بوو، ئه‌وا خه‌مڵاندنه‌كه‌ت بیست شاقل بۆ نێر و ده‌ شاقل بۆ مێ ده‌بێت.
6
ئه‌گه‌ر ته‌مه‌نی مانگێك هه‌تا پێنج ساڵ بوو، ئه‌وا خه‌مڵاندنه‌كه‌ت پێنج شاقل زیو بۆ نێر و سێ شاقل زیو بۆ مێ ده‌بێت.
7
ئه‌گه‌ر ته‌مه‌نی شه‌ست ساڵ و به‌ره‌و سه‌ره‌وه‌ بوو، ئه‌وا خه‌مڵاندنه‌كه‌ت پازده‌ شاقل بۆ نێر و ده‌ شاقل بۆ مێ ده‌بێت.
8
ئه‌گه‌ر كه‌سێك نه‌زری كرد و ئه‌و كه‌سه‌ هه‌ژار بوو و ئه‌و خه‌مڵاندنه‌ی له‌ توانادا نه‌بوو، ئه‌وا نه‌زره‌كه‌ ده‌هێنێته‌ به‌رده‌م كاهین و كاهینه‌كه‌ش بۆی ده‌خه‌مڵێنێت. به‌گوێره‌ی توانای ئه‌و كه‌سه‌ی نه‌زره‌كه‌ی كردووه‌ كاهینه‌كه‌ بۆی ده‌خه‌مڵێنێت.
9
«”ئه‌گه‌ر نه‌زره‌كه‌ ئاژه‌ڵ بێت، له‌وانه‌ی په‌سه‌نده‌ وه‌ك قوربانی بۆ یه‌زدان، ئه‌وا هه‌موو ئه‌وه‌ی لێی ده‌درێت به‌ یه‌زدان، پیرۆز ده‌بێت.
10
پێویسته‌ نه‌یگۆڕێت و ئاڵوگۆڕی پێ نه‌كات، باش به‌ خراپ یان خراپ به‌ باش، ئه‌گه‌ر ئاژه‌ڵێكی به‌ ئاژه‌ڵێكی دیكه‌ ئاڵوگۆڕ كرد، ئه‌وا هه‌ردوو ئاژه‌ڵه‌كه‌ پیرۆز ده‌بن.
11
ئه‌گه‌ر نه‌زره‌كه‌ به‌پێی ڕێوڕه‌سم ئاژه‌ڵێكی گڵاو بوو، له‌وانه‌ی كه‌ قبوڵ نییه‌ وه‌ك قوربانی بۆ یه‌زدان، ئه‌وا پێویسته‌ ئاژه‌ڵه‌كه‌ بهێنرێته‌ به‌رده‌م كاهین.
12
جا نرخه‌كه‌ی ده‌خه‌مڵێنێت، هه‌ر چۆنێك باش بێت یان خراپ، ئه‌و نرخه‌ی كاهین ده‌یخه‌مڵێنێت، هه‌ر ئه‌وه‌ ده‌بێت.
13
جا ئه‌گه‌ر خاوه‌نه‌كه‌ی ویستی ئاژه‌ڵه‌كه‌ بكڕێته‌وه‌، ئه‌وا پێویسته‌ پێنج یه‌ك بخاته‌ سه‌ر خه‌مڵاندنه‌كه‌.
14
«”ئه‌گه‌ر یه‌كێك ماڵه‌كه‌ی ته‌رخان كرد هه‌تا بۆ یه‌زدان پیرۆزكراو بێت، ئه‌وا كاهینه‌كه‌ ده‌یخه‌مڵێنێت باش بێت یان خراپ، كاهینه‌كه‌ چۆنی بخه‌مڵێنێت ئاوا ده‌بێت.
15
ئه‌گه‌ر ئه‌و كه‌سه‌ ویستی ماڵه‌ ته‌رخانكراوه‌كه‌ی بكڕێته‌وه‌ ئه‌وا پێنج یه‌كی نرخی خه‌مڵاندنه‌كه‌ ده‌خاته‌ سه‌ری و ده‌بێته‌وه‌ هی خۆی.
16
«”ئه‌گه‌ر كه‌سێك به‌شێكی له‌ كێڵگه‌كه‌ی موڵكی خێزانی خۆی بۆ یه‌زدان ته‌رخان كرد، ئه‌وا خه‌مڵاندنه‌كه‌ به‌گوێره‌ی تۆوكردن تێیدا ده‌بێت، جێی حۆمه‌رێك[b] تۆوی جۆ به‌ په‌نجا شاقل زیو ده‌بێت.
17
ئه‌گه‌ر له‌ ساڵی یۆبیلدا[c] كێڵگه‌كه‌ی ته‌رخان كرد، ئه‌وا به‌گوێره‌ی ئه‌و خه‌مڵاندنه‌ی كه‌ دانراوه‌ ده‌مێنێته‌وه‌.
18
به‌ڵام ئه‌گه‌ر له‌دوای ساڵی یۆبیل كێڵگه‌كه‌ی ته‌رخان كرد، ئه‌وا كاهینه‌كه‌ به‌گوێره‌ی ئه‌و ساڵانه‌ی ماوه‌ته‌وه‌ بۆ ساڵی ئاینده‌ی یۆبیل، نرخه‌كه‌ی بۆ ده‌ژمێرێت. له‌ خه‌مڵاندنه‌كه‌ كه‌م ده‌كاته‌وه‌.
19
ئه‌گه‌ر ئه‌و كه‌سه‌ی كێڵگه‌كه‌ی ته‌رخان كردووه‌ ویستی كێڵگه‌كه‌ بكڕێته‌وه‌، ئه‌وا پێنج یه‌كی نرخی خه‌مڵاندنه‌كه‌ ده‌خاته‌ سه‌ری و كێڵگه‌كه‌ بۆ ئه‌و ده‌بێت.
20
به‌ڵام ئه‌گه‌ر كێڵگه‌كه‌ی نه‌كڕییه‌وه‌ یان كێڵگه‌كه‌ی به‌ كه‌سێكی دیكه‌ فرۆشت، ئه‌وا ئیتر ناكڕدرێته‌وه‌،
21
به‌ڵكو كێڵگه‌كه‌ له‌ ساڵی یۆبیل ئازاد ده‌كرێت، پیرۆز ده‌بێت، وه‌ك كێڵگه‌ی ڕاگیراو[d] بۆ یه‌زدان. ئه‌و كاته‌ ده‌بێته‌ موڵكی كاهینه‌كان.
22
«”ئه‌گه‌ر كێڵگه‌یه‌كی كڕاوی بۆ یه‌زدان ته‌رخان كرد، كه‌ له‌ كێڵگه‌كانی موڵكی خێزانی نه‌بوو،
23
ئه‌وا كاهینه‌كه‌ بڕی خه‌مڵاندنه‌كه‌ی بۆ ده‌ژمێرێت هه‌تا ساڵی یۆبیل، جا كه‌سه‌كه‌ له‌و ڕۆژه‌ نرخی خه‌مڵاندنه‌كه‌ ده‌دات، وه‌ك ته‌رخانكراوی پیرۆز بۆ یه‌زدان.
24
له‌ ساڵی یۆبیلیش كێڵگه‌كه‌ ده‌گه‌ڕێته‌وه‌ بۆ ئه‌وه‌ی لێی كڕیوه‌، بۆ خاوه‌نی ڕه‌سه‌نی زه‌وییه‌كه‌.
25
هه‌موو خه‌مڵاندنه‌كه‌ش به‌پێی شاقلی پیرۆزگا ده‌بێت، هه‌ر شاقلێك بیست گیره‌ ده‌بێت.
26
«”به‌ڵام هه‌ر نۆبه‌ره‌یه‌كی ئاژه‌ڵ كه‌ وه‌ك نۆبه‌ره‌ بۆ یه‌زدان جیا ده‌كرێته‌وه‌، با كه‌س ته‌رخانی نه‌كات، گا[e] بێت یان به‌ران ئه‌وا بۆ یه‌زدانه‌؛
27
ئه‌گه‌ر له‌ ئاژه‌ڵه‌ گڵاوه‌كان بوو، ئه‌وا به‌گوێره‌ی خه‌مڵاندنه‌كه‌ ده‌یكڕێته‌وه‌ و پێنج یه‌كیشی ده‌خاته‌ سه‌ر. ئه‌گه‌ر نه‌یكڕییه‌وه‌ ئه‌وا به‌گوێره‌ی خه‌مڵاندنه‌كه‌ ده‌فرۆشرێت.
28
«”به‌ڵام هه‌موو ڕاگیراوێك[f] كه‌ مرۆڤ بۆ یه‌زدانی ته‌رخان ده‌كات له‌ هه‌موو ئه‌وانه‌ی هه‌یه‌تی، له‌ خه‌ڵك و ئاژه‌ڵ و كێڵگه‌كانی موڵكی خۆی، ئه‌وا نافرۆشرێت و ناكڕدرێته‌وه‌، هه‌موو ڕاگیراوێك هه‌ره‌پیرۆزه‌ بۆ یه‌زدان.
29
«”هه‌ركه‌سێك ته‌رخانكراو بێت بۆ قڕكردن[g] به‌ بارمته‌ ناكڕدرێته‌وه‌، ده‌بێت بكوژرێت.
30
«”هه‌موو ده‌یه‌كی زه‌وی له‌ دانه‌وێڵه‌ی زه‌وی و به‌روبوومی دره‌خته‌كان بۆ یه‌زدانه‌، پیرۆزه‌ بۆ یه‌زدان.
31
ئه‌گه‌ر كه‌سێك هه‌ندێك له‌ ده‌یه‌كه‌كه‌ی خۆی كڕییه‌وه‌، ئه‌وا پێنجیه‌كی ده‌خاته‌ سه‌ر،
32
به‌ڵام گاگه‌ل و مێگه‌ل ده‌یه‌می هه‌ر ئاژه‌ڵێك به‌ژێر گۆچانی شواندا تێبپه‌ڕێت، ئه‌وا پیرۆز ده‌بێت بۆ یه‌زدان.
33
نابێت ته‌ماشا بكرێت ئاخۆ باشه‌ یان خراپ و ئاڵوگۆڕی پێ ناكات، ئه‌گه‌ر ئاڵوگۆڕی پێكرد، ئه‌وا هه‌ردوو ئاژه‌ڵه‌كه‌ و ئالۆگۆڕكراوه‌كه‌ پیرۆز ده‌بن بۆ یه‌زدان، ناكڕدرێنه‌وه‌.“»
34
ئه‌مه‌ فه‌رمانه‌كانن كه‌ یه‌زدان فه‌رمانی به‌ موسا كرد بۆ نه‌وه‌ی ئیسرائیل له‌ شاخی سینا.
  1. a. 27‏:3 هه‌ر شاقلێك یازده‌ گرام و نیوه‌.
  2. b. 27‏:16 (حۆمه‌ر) نزیكه‌ی 135 كیلۆگرامی تۆوی جۆ. بڕوانه‌ پاشكۆی كتێبه‌كه‌.
  3. c. 27‏:17 له‌ ساڵی یۆبیلدا: بڕوانه‌ 25‏:8 هتد.
  4. d. 27‏:21 به‌ واتای وه‌ستێنراویش دێت، هه‌ر موڵكێك و هه‌ر گیانله‌به‌رێك ئاژه‌ڵ بێت یان مرۆڤ كه‌ جیا كرایه‌وه‌ بۆ خزمه‌تی خودا، ئیتر هه‌رگیز گه‌ڕانه‌وه‌ی بۆ نابێت و كڕین و فرۆشتنی له‌سه‌ر ناكرێت. لێره‌ و له‌ ئایه‌تی 28.
  5. e. 27‏:26 له‌ زمانی عیبری ده‌شێت ئه‌م وشه‌یه‌ بۆ نێر و مێ (چێڵ و گا) به‌كاربهێنرێت.
  6. f. 27‏:28 له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان.
  7. g. 27‏:29 له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت.