عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
پاكبوونه‌وه‌ له‌ نه‌خۆشی گواستراوه‌ی پێست 
1
هه‌روه‌ها یه‌زدان به‌ موسای فه‌رموو:
2
«ئه‌مانه‌ ڕێنماییه‌كانن ده‌رباره‌ی ڕێوڕه‌سمی[a] پاكبوونه‌وه‌. كاتێك نه‌خۆشه‌كه‌ ده‌هێنرێته‌ لای كاهین،
3
كاهینه‌كه‌ش ده‌چێته‌ ده‌ره‌وه‌ی ئۆردوگاكه‌، جا ئه‌گه‌ر كاهینه‌كه‌ پشكنی كه‌سه‌كه‌ چاك بووه‌ته‌وه‌ له‌ نه‌خۆشی گواستراوه‌ی پێست،
4
كاهینه‌كه‌ فه‌رمان ده‌دات كه‌ دوو چۆله‌كه‌ی زیندووی پاك بۆ ئه‌و كه‌سه‌ی كه‌ پاك ده‌بێته‌وه‌ ببه‌ن له‌گه‌ڵ پارچه‌ دارێكی ئورز و به‌نی سووری ئاڵ و زوفا.
5
ئینجا كاهینه‌كه‌ فه‌رمان ده‌دات كه‌ یه‌كێك له‌ چۆله‌كه‌كان له‌ گۆزه‌یه‌كی گڵین له‌سه‌ر ئاوێكی سازگار سه‌رببڕدرێت.
6
به‌ڵام چۆله‌كه‌ زیندووه‌كه‌ له‌گه‌ڵ پارچه‌ داره‌ ئورزه‌كه‌ و به‌نه‌ سووره‌ ئاڵه‌كه‌ و زوفاكه‌ ده‌بات و ده‌یانخاته‌ ناو خوێنی چۆله‌كه‌ سه‌ربڕدراوه‌كه‌ی سه‌ر ئاوه‌ سازگاره‌كه‌.
7
حه‌وت جار به‌سه‌ر ئه‌و كه‌سه‌دا ده‌یپرژێنێت كه‌ له‌ نه‌خۆشییه‌ گواستراوه‌كه‌ پاك ده‌بێته‌وه‌ و پاكی ده‌كاته‌وه‌، ئینجا چۆله‌كه‌ زیندووه‌كه‌ ڕووه‌و ده‌شتوده‌ر به‌ڕه‌ڵا ده‌كات.
8
«جا ئه‌و كه‌سه‌ی كه‌ پاك ده‌بێته‌وه‌ پێویسته‌ جله‌كانی بشوات و هه‌موو مووی له‌شی بتاشێت و به‌ ئاو خۆی بشوات. ئه‌و كاته‌ به‌پێی ڕێوڕه‌سم پاك ده‌بێته‌وه‌، ئینجا دێته‌ ناو ئۆردوگاكه‌وه‌، به‌ڵام حه‌وت ڕۆژ له‌ ده‌ره‌وه‌ی چادره‌كه‌ی نیشته‌جێ ده‌بێت.
9
له‌ ڕۆژی حه‌وته‌م سه‌ری و ڕیشی و برۆكانی و هه‌موو مووه‌كانی ده‌تاشێت، پێویسته‌ جله‌كانیشی بشوات و خۆی به‌ ئاو بشوات، جا پاك ده‌بێته‌وه‌.
10
«ئینجا له‌ ڕۆژی هه‌شته‌مدا دوو به‌رخی نێری ساغ و به‌رخێكی مێیه‌ی یه‌ك ساڵه‌ی ساغ ده‌هێنێت، له‌گه‌ڵ سێ له‌ ده‌ی ئێفه‌یه‌ك[b] له‌ باشترین ئاردی پێشكه‌شكراوی دانه‌وێڵه‌ كه‌ به‌ زه‌یت شێلرابێت و هه‌روه‌ها لۆگێك[c] زه‌یت.
11
جا ئه‌و كاهینه‌ی به‌ پاككردنه‌وه‌كه‌ هه‌ڵده‌ستێت، كه‌سه‌ پاكبووه‌وه‌كه‌ له‌گه‌ڵ قوربانی و پێشكه‌شكراوه‌كانی له‌به‌رده‌م یه‌زدان، له‌لای ده‌روازه‌ی چادری چاوپێكه‌وتن ڕاده‌گرێت.
12
«ئینجا كاهینه‌كه‌ یه‌كێك له‌ به‌رخه‌ نێره‌كان ده‌بات و وه‌ك قوربانی تاوان پێشكه‌شی ده‌كات له‌گه‌ڵ لۆگه‌ زه‌یته‌كه‌، له‌به‌رده‌م یه‌زدان به‌رزی ده‌كاته‌وه‌، وه‌ك قوربانی به‌رزكردنه‌وه‌.
13
به‌رخه‌كه‌ش له‌و شوێنه‌ سه‌رده‌بڕێت كه‌ قوربانی گوناه و قوربانی سووتاندنی تێدا سه‌رده‌بڕدرێت، له‌ پیرۆزگا، چونكه‌ قوربانی تاوان وه‌ك قوربانی گوناه بۆ كاهینه‌ و هه‌ره‌پیرۆزه‌.
14
ئینجا كاهینه‌كه‌ له‌ خوێنی قوربانییه‌كه‌ی تاوان ده‌بات و له‌ شلكه‌ی گوێی ڕاسته‌ و په‌نجه‌ گه‌وره‌ی ده‌ستی ڕاست و په‌نجه‌ گه‌وره‌ی پێی ڕاسته‌ی ئه‌و كه‌سه‌ی ده‌دات كه‌ پاك ده‌بێته‌وه‌.
15
پاشان كاهینه‌كه‌ له‌ لۆگه‌ زه‌یته‌كه‌ هه‌ندێك ده‌بات و ده‌یكاته‌ ناو له‌پی ده‌ستی چه‌پی خۆی،
16
ئینجا كاهینه‌كه‌ په‌نجه‌یه‌كی ده‌ستی ڕاستی ده‌كاته‌ ناو ئه‌و زه‌یته‌ی ناو له‌پی ده‌ستی چه‌پییه‌تی و حه‌وت جار به‌ په‌نجه‌ی زه‌یته‌كه‌ له‌به‌رده‌م یه‌زدان ده‌پرژێنێت.
17
ئه‌وه‌ی ده‌مێنێته‌وه‌ له‌و زه‌یته‌ی ناو له‌پی ده‌ستی، كاهینه‌كه‌ له‌ شلكه‌ی گوێی ڕاسته‌ و په‌نجه‌ گه‌وره‌ی ده‌ستی ڕاست و په‌نجه‌ گه‌وره‌ی پێی ڕاستی ئه‌و كه‌سه‌ی ده‌دات كه‌ پاك ده‌بێته‌وه‌، له‌سه‌ر خوێنه‌كه‌ی قوربانی تاوان.
18
ئه‌وه‌ی ده‌شمێنێته‌وه‌ له‌و زه‌یته‌ی ناو له‌پی ده‌ستی، ده‌یكات به‌سه‌ر سه‌ری ئه‌و كه‌سه‌ی كه‌ پاك ده‌بێته‌وه‌ و كاهینه‌كه‌ له‌به‌رده‌م یه‌زدان كه‌فاره‌تی بۆ ده‌كات.
19
«ئینجا كاهینه‌كه‌ قوربانی گوناه ده‌كات و بۆ ئه‌و كه‌سه‌ی كه‌ له‌ گڵاوییه‌كه‌ی پاك ده‌بێته‌وه‌ كه‌فاره‌ت ده‌كات و پاشان قوربانی سووتاندنه‌كه‌ سه‌رده‌بڕێت.
20
دواتر كاهینه‌كه‌ قوربانی سووتاندنه‌كه‌ و پێشكه‌شكراوی دانه‌وێڵه‌ بۆ سه‌ر قوربانگاكه‌ سه‌رده‌خات و كه‌فاره‌تی بۆ ده‌كات، جا پاك ده‌بێته‌وه‌.
21
«به‌ڵام ئه‌گه‌ر هه‌ژار و ده‌ستكورت بوو، ئه‌وا یه‌ك به‌رخی نێر ده‌بات وه‌ك قوربانی تاوان ڕاده‌وه‌شێنرێت، بۆ كه‌فاره‌تكردن بۆی، له‌گه‌ڵ ده‌یه‌كێكی ئێفه‌یه‌ك[d] له‌ باشترین ئاردی به‌ زه‌یت شێلراو بۆ پێشكه‌شكراوی دانه‌وێڵه‌ و لۆگێك زه‌یت،
22
هه‌روه‌ها دوو كوكوختی یان دوو بێچووه‌ كۆتر، به‌پێی توانای ده‌ستی، جا یه‌كێكیان ده‌بێته‌ قوربانی گوناه و ئه‌وه‌ی دیكه‌ قوربانی سووتاندن.
23
«له‌ ڕۆژی هه‌شته‌مدا ده‌یهێنێته‌ لای كاهینه‌كه‌ بۆ پاكبوونه‌وه‌ی، بۆ لای ده‌روازه‌ی چادری چاوپێكه‌وتن له‌به‌رده‌م یه‌زدان.
24
جا كاهینه‌كه‌ به‌رخه‌كه‌ی بۆ قوربانی تاوان و لۆگه‌ زه‌یته‌كه‌ ده‌بات و له‌به‌رده‌م یه‌زدان به‌رزی ده‌كاته‌وه‌ وه‌ك قوربانی به‌رزكردنه‌وه‌.
25
ئینجا به‌رخه‌كه‌ بۆ قوربانی تاوان سه‌رده‌بڕێت و كاهینه‌كه‌ له‌ خوێنی قوربانییه‌كه‌ی تاوان له‌ شلكه‌ی گوێی ڕاسته‌ و په‌نجه‌ گه‌وره‌ی ده‌ستی ڕاست و په‌نجه‌ گه‌وره‌ی پێی ڕاستی ئه‌و كه‌سه‌ی ده‌دات كه‌ پاك ده‌بێته‌وه‌.
26
ئینجا كاهینه‌كه‌ هه‌ندێك له‌ زه‌یته‌كه‌ له‌ناو له‌پی ده‌ستی چه‌پی خۆی ده‌كات،
27
كاهینه‌كه‌ به‌ په‌نجه‌یه‌كی ده‌سته‌ ڕاستی له‌و زه‌یته‌ی له‌ له‌پی ده‌ستی چه‌پیدایه‌ حه‌وت جار له‌به‌رده‌م یه‌زدان ده‌یپرژێنێت.
28
هه‌روه‌ها كاهینه‌كه‌ له‌و زه‌یته‌ی له‌ناو له‌پیه‌تی، له‌ شلكه‌ی گوێی ڕاست و په‌نجه‌ گه‌وره‌ی ده‌ستی ڕاست و په‌نجه‌ گه‌وره‌ی پێی ڕاستی ئه‌و كه‌سه‌ی ده‌دات كه‌ پاك ده‌بێته‌وه‌، له‌ شوێنی خوێنه‌كه‌ی قوربانی تاوان.
29
ئه‌وه‌ی ده‌مێنێته‌وه‌ له‌و زه‌یته‌ی ناو له‌پی كاهینه‌كه‌، به‌سه‌ر سه‌ری ئه‌و كه‌سه‌ی داده‌كات كه‌ پاك ده‌بێته‌وه‌ بۆ كه‌فاره‌تكردن بۆی له‌به‌رده‌م یه‌زدان.
30
ئینجا یه‌كێك له‌ دوو كوكوختییه‌كه‌ یان یه‌كێك له‌ دوو بێچووه‌ كۆتره‌كان، ئه‌وه‌ی له‌ توانای ده‌ستییه‌تی،
31
یه‌كێكیان ده‌كاته‌ قوربانی گوناه و ئه‌وی دیكه‌ قوربانی سووتاندن له‌گه‌ڵ پێشكه‌شكراوه‌كه‌ی دانه‌وێڵه‌، كاهینه‌كه‌ له‌به‌رده‌م یه‌زدان كه‌فاره‌ت بۆ ئه‌و كه‌سه‌ ده‌كات كه‌ پاك ده‌بێته‌وه‌.»
32
ئه‌وه‌ ڕێنماییه‌ بۆ ئه‌و كه‌سه‌ی نه‌خۆشی گواستراوه‌ی پێستی هه‌بێت، ئه‌وه‌ی ده‌ستكورت بێت بۆ پاكبوونه‌وه‌كه‌ی.
پاكبوونه‌وه‌ له‌ كه‌ڕوو 
33
هه‌روه‌ها یه‌زدان به‌ موسا و هارونی فه‌رموو:
34
«له‌و كاته‌ی كه‌ ده‌چنه‌ خاكی كه‌نعان، كه‌ من ده‌تانده‌مێ وه‌ك موڵكی خۆتان، وام كرد ماڵێك له‌و خاكه‌ تووشی كه‌ڕوو بێت،
35
ئه‌وه‌ی خاوه‌نی ماڵه‌كه‌یه‌ ده‌چێت و به‌ كاهینه‌كه‌ ده‌ڵێت: ”وابزانم كه‌ڕوو له‌ ماڵه‌كه‌ی داوم.“
36
كاهینه‌كه‌ش فه‌رمان ده‌دات ماڵه‌كه‌ چۆڵ بكرێت، پێش چوونه‌ ژووره‌وه‌ی كاهینه‌كه‌ بۆ پشكنینی لێدانه‌كه‌، نه‌وه‌ك هه‌موو شته‌كانی ماڵه‌كه‌ گڵاو بێت، پاش ئه‌وه‌ كاهینه‌كه‌ بۆ پشكنینی ماڵه‌كه‌ ده‌چێته‌ ژووره‌وه‌.
37
جا ئه‌گه‌ر پشكنی لێدانه‌كه‌ له‌ دیواره‌كانی ماڵه‌كه‌یه‌ و هه‌ڵكراوێكی سه‌وزباو یان سوورباوه‌، له‌ دیواره‌كه‌ش قووڵتره‌،
38
ئه‌وا كاهینه‌كه‌ له‌ ماڵه‌كه‌ دێته‌ ده‌ره‌وه‌ و بۆ حه‌وت ڕۆژ ماڵه‌كه‌ داده‌خات.
39
ئه‌گه‌ر كاهینه‌كه‌ له‌ ڕۆژی حه‌وته‌م گه‌ڕایه‌وه‌ و پشكنی وا لێدانه‌كه‌ له‌ دیواره‌كانی ماڵه‌كه‌ بڵاوبووه‌ته‌وه‌،
40
كاهینه‌كه‌ فه‌رمان ده‌دات، ئه‌و به‌ردانه‌ ده‌ربهێنن كه‌ لێدانه‌كه‌ی تێدایه‌ و فڕێیانبده‌نه‌ ده‌ره‌وه‌ی شارۆچكه‌كه‌ له‌ شوێنێكی گڵاو.
41
ماڵه‌كه‌ش له‌ هه‌ر چوارده‌وری دیوی ژووره‌وه‌ ده‌ڕنن، ئه‌و خۆڵه‌ش كه‌ ده‌یڕننه‌وه‌، فڕێیده‌ده‌نه‌ ده‌ره‌وه‌ی شارۆچكه‌كه‌ له‌ شوێنێكی گڵاو.
42
به‌ردی دیكه‌ ده‌هێنن و له‌ شوێنی به‌رده‌كان دایانده‌نێن و خۆڵی دیكه‌ دێنن و ماڵه‌كه‌ی پێ سواخ ده‌ده‌نه‌وه‌.
43
«جا ئه‌گه‌ر لێدانه‌كه‌ گه‌ڕایه‌وه‌ و له‌ ماڵه‌كه‌ بڵاو بووه‌وه‌، له‌دوای ده‌رهێنانی به‌رده‌كان و ڕنینی ماڵه‌كه‌ و سواخدانه‌وه‌ی،
44
كاهینه‌كه‌ هات و پشكنی وا لێدانه‌كه‌ له‌ ماڵه‌كه‌دا بڵاوبووه‌ته‌وه‌، ئه‌وا كه‌ڕووێكی گه‌نده‌ڵه‌ له‌ ماڵه‌كه‌، ئه‌وه‌ گڵاوه‌.
45
جا ماڵه‌كه‌ تێكده‌دات، به‌رد و داره‌كانی و هه‌موو خۆڵی ماڵه‌كه‌ ده‌باته‌ ده‌ره‌وه‌ی شارۆچكه‌كه‌ بۆ شوێنێكی گڵاو.
46
«ئه‌وه‌ی له‌ هه‌موو ڕۆژانی داخستنی ماڵه‌كه‌ بچێته‌ ناوی، ئه‌وا هه‌تا ئێواره‌ گڵاو ده‌بێت،
47
ئه‌وه‌ی له‌ ماڵه‌كه‌ خه‌وتبێت، ئه‌وا ده‌بێت جله‌كانی بشوات و ئه‌وه‌ی له‌ ماڵه‌كه‌ نانی خواردبێت ئه‌وا ده‌بێت جله‌كانی بشوات.
48
«به‌ڵام ئه‌گه‌ر كاهینه‌كه‌ هات و پشكنی لێدانه‌كه‌ له‌ ماڵه‌كه‌ بڵاو نه‌بووه‌ته‌وه‌ دوای سواخدانه‌وه‌كه‌ی، ئه‌وا كاهینه‌كه‌ ڕایده‌گه‌یه‌نێت ماڵه‌كه‌ پاكه‌، چونكه‌ لێدانه‌كه‌ نه‌ماوه‌.
49
بۆ پاكبوونه‌وه‌ی ماڵه‌كه‌ دوو چۆله‌كه‌ له‌گه‌ڵ پارچه‌ دارێكی ئورز و به‌نی سووری ئاڵ و زوفا ده‌بات.
50
یه‌كێك له‌ چۆله‌كه‌كان له‌ گۆزه‌یه‌كی گڵین سه‌ر ده‌بڕێت، له‌سه‌ر ئاوێكی سازگار.
51
ئینجا پارچه‌ داره‌ ئورزه‌كه‌ و زوفاكه‌ و به‌نه‌ سووره‌ ئاڵه‌كه‌ و چۆله‌كه‌ زیندووه‌كه‌ ده‌بات و ده‌یخاته‌ ناو خوێنی چۆله‌كه‌ سه‌ربڕدراوه‌كه‌ و ئاوه‌ سازگاره‌كه‌، حه‌وت جار به‌سه‌ر ماڵه‌كه‌دا ده‌یپرژێنێت.
52
ئینجا به‌ خوێنی چۆله‌كه‌كه‌ و ئاوه‌ سازگاره‌كه‌ و چۆله‌كه‌ زیندووه‌كه‌ و پارچه‌ داره‌ ئورزه‌كه‌ و زوفاكه‌ و به‌نه‌ سووره‌ ئاڵه‌كه‌ ماڵه‌كه‌ پاك ده‌كاته‌وه‌.
53
ئینجا چۆله‌كه‌ زیندووه‌كه‌ بۆ ده‌ره‌وه‌ی شارۆچكه‌كه‌ ڕووه‌و ده‌شتوده‌ر به‌ڕه‌ڵای ده‌كات و كه‌فاره‌ت بۆ ماڵه‌كه‌ ده‌كات، ئیتر پاك ده‌بێته‌وه‌.»
54
ئه‌وه‌ ڕێنماییه‌ بۆ هه‌موو جۆره‌ نه‌خۆشییه‌كی گواستراوه‌ی پێست و كه‌چه‌ڵی،
55
كه‌ڕووی جلوبه‌رگ و ماڵ،
56
ئاوسان و لیر و له‌كه‌ی بریقه‌دار،
57
بۆ یه‌كلاییكردنه‌وه‌ی شتێك كه‌ پاك بێت یان گڵاو.
ئه‌وه‌ ڕێنماییه‌ بۆ نه‌خۆشی گواستراوه‌ی پێست و كه‌ڕوو.
  1. a. 14‏:2 ڕێوڕه‌سم: مه‌به‌ست له‌ ڕێوڕه‌سم یان مه‌راسیمی ئایینی.
  2. b. 14‏:10 نزیكه‌ی شه‌ش لیتر و نیو.
  3. c. 14‏:10 نزیكه‌ی 0,3 لیتر.
  4. d. 14‏:21 نزیكه‌ی دوو لیتر.