عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ئه‌ریحاش به‌هۆی نه‌وه‌ی ئیسرائیله‌وه‌ به‌ ته‌واوی داخرابوو، نه‌ كه‌س ده‌چووه‌ ده‌ره‌وه‌ و نه‌ كه‌سیش ده‌هاته‌ ژووره‌وه‌.
2
جا یه‌زدان به‌ یه‌شوعی فه‌رموو: «بڕوانه‌ من ئه‌ریحا و پاشاكه‌ی و پاڵه‌وانه‌ شه‌ڕكه‌ره‌كانی ئه‌وم داوه‌ته‌ ده‌ست تۆ.
3
ئێوه‌ش هه‌موو جه‌نگاوه‌ره‌كان بۆ ماوه‌ی شه‌ش ڕۆژ، ڕۆژی جارێك به‌ چوارده‌وری شاره‌كه‌دا ده‌سووڕێنه‌وه‌.
4
حه‌وت كاهین حه‌وت كه‌ڕه‌نای قۆچه‌ به‌ران له‌به‌رده‌م سندوقه‌كه‌دا هه‌ڵده‌گرن و له‌ ڕۆژی حه‌وته‌م حه‌وت جار به‌ چوارده‌وری شاره‌كه‌دا ده‌سووڕێنه‌وه‌ و كاهینه‌كان كه‌ڕه‌ناكان لێده‌ده‌ن.
5
كاتێك گوێتان له‌ ده‌نگی كه‌ڕه‌ناكان ده‌بێت، له‌گه‌ڵ درێژبوونه‌وه‌ی فووكردن به‌ قۆچه‌ به‌رانه‌كاندا، هه‌موو گه‌ل به‌ یه‌ك ده‌نگ هاوارێكی به‌رز ده‌كه‌ن؛ ئیتر شوورای شاره‌كه‌ ده‌ڕمێت و هه‌موو گه‌ل هه‌ریه‌كه‌ و له‌لای خۆیه‌وه‌ به‌سه‌ریدا ده‌ده‌ن.»
6
جا یه‌شوعی كوڕی نون كاهینه‌كانی بانگكرد و پێی گوتن: «سندوقی په‌یمان هه‌ڵبگرن و با حه‌وت كاهینیش حه‌وت كه‌ڕه‌نای قۆچه‌ به‌ران له‌پێش سندوقی یه‌زدان هه‌ڵبگرن.»
7
ئینجا به‌ گه‌لی گوت: «پێش بكه‌ون و به‌ چوارده‌وری شاره‌كه‌دا بسووڕێنه‌وه‌، با ئه‌وه‌ی چه‌ك به‌ ده‌سته‌ له‌پێش سندوقی یه‌زدانه‌وه‌ بڕوات.»
8
هه‌روه‌ك چۆن یه‌شوع فه‌رمانی به‌ گه‌ل كرد، حه‌وت كاهینه‌كه‌ی هه‌ڵگرانی حه‌وت كه‌ڕه‌نا قۆچه‌ به‌رانه‌كان، له‌به‌رده‌م یه‌زدانه‌وه‌ به‌ كه‌ڕه‌نا لێدانه‌وه‌ به‌ره‌و پێش چوون و سندوقی په‌یمانیش له‌ دوایانه‌وه‌ ده‌ڕۆیشت.
9
هه‌موو چه‌ك به‌ده‌سته‌كانیش له‌پێش كاهینه‌ كه‌ڕه‌نا لێده‌ره‌كان ده‌ڕۆیشتن، له‌پاشه‌وه‌ پاسه‌وانه‌كانیش له‌دوای سندوقه‌كه‌وه‌ ده‌ڕۆیشتن. به‌رده‌وام كه‌ڕه‌نا ده‌نگی ده‌هات.
10
به‌ڵام یه‌شوع فه‌رمانی به‌ گه‌ل كردبوو و پێی گوتبوون: «هاوار مه‌كه‌ن و ده‌نگتان نه‌بیسترێت و یه‌ك وشه‌ له‌ ده‌متان نه‌یه‌ته‌ ده‌ره‌وه‌، هه‌تا ئه‌و ڕۆژه‌ی پێتان ده‌ڵێم هاوار بكه‌ن، جا هاوار ده‌كه‌ن!»
11
له‌به‌ر ئه‌مه‌ سندوقی یه‌زدان یه‌ك جار به‌ چوارده‌وری شاره‌كه‌دا سووڕایه‌وه‌ و پاشان هاتنه‌وه‌ بۆ ناو ئۆردوگاكه‌ و له‌ ئۆردوگاكه‌ مانه‌وه‌.
12
به‌یانی زوو یه‌شوع له‌ خه‌و هه‌ستا و كاهینه‌كانیش سندوقی یه‌زدانیان هه‌ڵگرت و
13
حه‌وت كاهینه‌كه‌ی هه‌ڵگرانی حه‌وت كه‌ڕه‌ناكه‌ش له‌پێش سندوقی یه‌زدانه‌وه‌ ده‌ڕۆیشتن و كه‌ڕه‌نایان لێده‌دا و چه‌ك به‌ده‌سته‌كانیش له‌پێشیانه‌وه‌ ده‌ڕۆیشتن و له‌پاشه‌وه‌ پاسه‌وانه‌كانیش له‌دوای سندوقی یه‌زدانه‌وه‌ ده‌ڕۆیشتن، كاتێك كه‌ڕه‌نا ده‌نگی ده‌هات.
14
ئینجا له‌ ڕۆژی دووه‌م یه‌ك جار به‌ده‌وری شاره‌كه‌دا سوڕانه‌وه‌ و پاشان هاتنه‌وه‌ بۆ ناو ئۆردوگاكه‌. شه‌ش ڕۆژ ئاوایان كرد.
15
ئه‌وه‌ بوو له‌ ڕۆژی حه‌وته‌م به‌ره‌به‌یان زوو له‌ خه‌و هه‌ستان و حه‌وت جار به‌و شێوه‌یه‌ به‌ چوارده‌وری شاره‌كه‌دا سووڕانه‌وه‌. ته‌نها له‌و ڕۆژه‌دا حه‌وت جار به‌ چوارده‌وری شاره‌كه‌دا سووڕانه‌وه‌،
16
ئه‌وه‌ بوو له‌ جاری حه‌وته‌م كاتێك كاهینه‌كان كه‌ڕه‌ناكانیان لێدا، یه‌شوع به‌ گه‌لی گوت: «هاوار بكه‌ن! چونكه‌ یه‌زدان شاره‌كه‌ی داوه‌ته‌ ده‌ست ئێوه‌!
17
ده‌بێت شاره‌كه‌ و هه‌رچی تێیدایه‌ بۆ یه‌زدان ته‌رخان بكرێت تاكو قڕ بكرێت[a] ، ته‌نها ڕاحابی له‌شفرۆش و هه‌موو ئه‌وانه‌ی له‌ ماڵه‌كه‌ له‌گه‌ڵین ده‌یانهێڵنه‌وه‌، چونكه‌ ئه‌و دوو نێردراوه‌ی شارده‌وه‌، كه‌ ناردمانن.
18
به‌ڵام ئێوه‌ خۆتان به‌ دوور بگرن له‌ شته‌ ته‌رخانكراوه‌كان نه‌وه‌ك قڕ بكرێن و ئۆردوگای ئیسرائیل تووشی قڕبوون و تێكدان بكه‌ن.
19
هه‌موو ئه‌و زێڕ و زیو و قاپه‌ بڕۆنز و ئاسنانه‌ بۆ یه‌زدان ته‌رخانكراون و ده‌چنه‌ ناو گه‌نجینه‌ی یه‌زدانه‌وه‌.»
20
كاتێك گه‌ل هاواری كرد و كه‌ڕه‌نایان لێدا، گه‌ل گوێیان له‌ ده‌نگی كه‌ڕه‌نا بوو، هاوارێكی به‌رزیان كرد و شووراكه‌ داڕما و گه‌ل چوونه‌ ناو شاره‌كه‌وه‌، هه‌ریه‌كه‌ و له‌لای خۆیه‌وه‌ و به‌سه‌ریاندا دا و شاره‌كه‌یان گرت.
21
شاره‌كه‌یان بۆ یه‌زدان ته‌رخان كرد و هه‌رچی تێیدابوو له‌ پیاو و ژن و منداڵ و پیر، هه‌تا گا و مه‌ڕ و گوێدرێژه‌كانیشیان به‌ زه‌بری شمشێر قڕ كرد.
22
یه‌شوعیش به‌و دوو پیاوه‌ی گوت كه‌ سیخوڕی خاكه‌كه‌یان كردبوو: «بچنه‌ ناو ماڵی ژنه‌ له‌شفرۆشه‌كه‌وه‌، هه‌روه‌ك سوێندتان بۆی خوارد، خۆی و هه‌موو ئه‌وه‌ی هی ئه‌وه‌ بیانهێننه‌ ده‌ره‌وه‌.»
23
جا دوو گه‌نجه‌ سیخوڕه‌كه‌ چوونه‌ ژووره‌وه‌ و ڕاحاب و دایك و باوك و براكانی و هه‌رچی هه‌یبوو و هه‌موو كه‌سوكاره‌كه‌یان هێنایه‌ ده‌ره‌وه‌ و له‌ ده‌ره‌وه‌ی ئۆردوگای ئیسرائیل دایاننان.
24
شاره‌كه‌شیان سووتاند و له‌گه‌ڵ هه‌موو ئه‌و شتانه‌ی تێیدا بوو، به‌ڵام زێڕ و زیو و قاپه‌ بڕۆنز و ئاسنه‌كانیان خسته‌ ناو گه‌نجینه‌ی ماڵی یه‌زدانه‌وه‌.
25
به‌ڵام یه‌شوع ڕاحابی له‌شفرۆش و ماڵی باوكی و هه‌رچی هه‌یبوو به‌ زیندووێتی هێشتنییه‌وه‌، ئه‌ویش هه‌تا ئه‌مڕۆش له‌نێو ئیسرائیلدا نیشته‌جێیه‌، چونكه‌ ئه‌و دوو نێردراوه‌ی شارده‌وه‌ كه‌ یه‌شوع بۆ سیخوڕی ئه‌ریحا ناردبوونی.
26
له‌و كاته‌دا یه‌شوع سوێندی خوارد و گوتی: «له‌به‌رده‌م یه‌زدان نه‌فره‌ت لێكراوه‌ ئه‌و كه‌سه‌ی هه‌ڵده‌ستێت و ئه‌م شاری ئه‌ریحایه‌ بنیاد ده‌نێته‌وه‌:
«به‌ مه‌رگی كوڕه‌ نۆبه‌ره‌كه‌ی
بناغه‌كانی داده‌نێت و
به‌ مه‌رگی بچووكه‌كه‌ی
ده‌رگاكانی داده‌مه‌زرێنێت.»
27
یه‌زدانیش له‌گه‌ڵ یه‌شوع بوو و ناوبانگی به‌ هه‌موو خاكه‌كه‌دا بڵاو بووه‌وه‌.
  1. a. 6‏:17 له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان. له‌ كاتی شه‌ڕدا ده‌ستكه‌وته‌كه‌ دابه‌ش ناكرێت و به‌خشینه‌كه‌ ده‌رئه‌نجامه‌كه‌ی له‌ناوبردنی ته‌واوه‌.