عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خۆر به‌سه‌ر گبعۆنه‌وه‌ به‌رده‌وامه‌ 
1
ئینجا كاتێك ئه‌دۆنی سه‌ده‌قی پاشای ئۆرشه‌لیم بیستییه‌وه‌ كه‌ یه‌شوع شاری عایی گرتووه‌ و به‌ ته‌واوی قڕی كردووه‌[a] ، ئه‌وه‌ی به‌ ئه‌ریحا و پاشاكه‌ی كرد، هه‌مان شتی به‌ عای و پاشاكه‌ی كردووه‌، دانیشتووانی گبعۆنیش په‌یمانی ئاشتییان له‌گه‌ڵ ئیسرائیلدا به‌ستووه‌ و له‌ نزیكیان ده‌ژین؛
2
زۆر ترسا، چونكه‌ گبعۆن شارێكی گه‌وره‌ بوو، وه‌ك یه‌كێك له‌ شاره‌ پاشانشینه‌كان و له‌ عای گه‌وره‌تر بوو، هه‌موو پیاوه‌كانیشی پاڵه‌وان بوون.
3
ئینجا ئه‌دۆنی سه‌ده‌قی پاشای ئۆرشه‌لیم به‌دوای هۆهامی پاشای حه‌برۆن و پیرامی پاشای یه‌رموت و یافیعی پاشای لاخیش و ده‌ڤیری پاشای عه‌گلۆنیدا نارد و گوتی:
4
«سه‌ربكه‌ون بۆ لام و یارمه‌تیم بده‌ن، له‌ گبعۆن ده‌ده‌ین، چونكه‌ په‌یمانی ئاشتی له‌گه‌ڵ یه‌شوع و نه‌وه‌ی ئیسرائیلدا به‌ستووه‌.»
5
ئینجا هه‌ر پێنج پاشای ئه‌مورییه‌كان كۆبوونه‌وه‌، پاشای ئۆرشه‌لیم و حه‌برۆن و یه‌رموت و لاخیش و عه‌گلۆن، خۆیان و هه‌موو سوپاكانیان سه‌ركه‌وتن و چادریان هه‌ڵدا له‌ دژی گبعۆن و جه‌نگیان له‌ دژی به‌رپا كرد.
6
جا دانیشتووانی گبعۆن به‌دوای یه‌شوعدا ناردیان بۆ ئۆردوگاكه‌ له‌ گلگال، پێیان گوت: «ده‌ست له‌ خزمه‌تكاره‌كانت به‌رمه‌ده‌. به‌ په‌له‌ سه‌ربكه‌وه‌ بۆ لامان، ڕزگارمان بكه‌ و یارمه‌تیمان بده‌، چونكه‌ هه‌موو پاشاكانی ئه‌مورییه‌كان ئه‌وانه‌ی له‌ ناوچه‌ی شاخاویدا نیشته‌جێن له‌ دژمان گه‌له‌كۆمه‌یان لێكردووین.»
7
بۆیه‌ یه‌شوع له‌ گلگاله‌وه‌ له‌گه‌ڵ هه‌موو سوپاكه‌ و جه‌نگاوه‌ره‌ قاره‌مانه‌كان سه‌ركه‌وتن.
8
یه‌زدانیش به‌ یه‌شوعی فه‌رموو: «لێیان مه‌ترسه‌، چونكه‌ ئه‌وانه‌م داوه‌ته‌ ده‌ست تۆ، كه‌سیان ناتوانێت له‌به‌رده‌مت ڕابوه‌ستێت.»
9
یه‌شوع به‌ درێژایی ئه‌و شه‌وه‌ له‌ گلگاله‌وه‌ سه‌ركه‌وت و له‌ناكاو بۆیان هات.
10
یه‌زدانیش له‌به‌رده‌م ئیسرائیلدا سه‌ری لێ شێواندن، له‌ گبعۆن لێدانێكی گه‌وره‌ی لێدان و به‌ ڕێگای هه‌ورازی بێت‌حۆرۆندا ڕاوی نان، هه‌تا عه‌زێقا و مه‌قێدا لێیدان.
11
هه‌روه‌ها كاتێك له‌به‌رده‌م ئیسرائیلدا هه‌ڵده‌هاتن و له‌ نشێوه‌كه‌ی بێت‌حۆرۆن بوون، یه‌زدان له‌ ئاسمانه‌وه‌ به‌ ته‌رزه‌ی گه‌وره‌ لێیدان هه‌تا گه‌یشتنه‌ عه‌زێقا و مردن. ئه‌وانه‌ی كه‌ به‌ ته‌رزه‌ مردن زیاتر بوون له‌وانه‌ی كه‌ نه‌وه‌ی ئیسرائیل به‌ شمشێر كوشتیانن.
12
له‌و ڕۆژه‌دا كه‌ یه‌زدان ئه‌مورییه‌كانی دایه‌ ده‌ست نه‌وه‌ی ئیسرائیل، یه‌شوع له‌گه‌ڵ یه‌زداندا دوا، له‌به‌رچاوی ئیسرائیلدا گوتی:
«ئه‌ی خۆر به‌سه‌ر گبعۆنه‌وه‌ ڕابوه‌سته‌ و
ئه‌ی مانگ به‌سه‌ر دۆڵی ئه‌یالۆنه‌وه‌.
13
جا خۆر ڕاوه‌ستا و
مانگیش وه‌ستا
هه‌تا گه‌ل تۆڵه‌یان له‌ دوژمنه‌كانیان سه‌نده‌وه‌.»
ئایا ئه‌مه‌ له‌ په‌ڕتووكی یاشاردا[b] نه‌نووسراوه‌؟
جا خۆر له‌ناو جه‌رگه‌ی ئاسماندا ڕاوه‌ستا و بۆ ماوه‌ی یه‌ك ڕۆژی ته‌واو له‌ ئاوابوون په‌له‌ی نه‌كرد.
14
وه‌ك ئه‌و ڕۆژه‌ قه‌ت نه‌بووه‌، نه‌ له‌پێشی و نه‌ له‌پاشی كه‌ یه‌زدان ئاوا گوێ له‌ ده‌نگی كه‌سێك بگرێت، چونكه‌ یه‌زدان بۆ پاڵپشتی ئیسرائیل ده‌جه‌نگا!
15
ئینجا یه‌شوع و هه‌موو ئیسرائیل گه‌ڕانه‌وه‌ بۆ ئۆردوگاكه‌ له‌ گلگال.
پێنج پاشاكه‌ كوژران 
16
پێنج پاشاكه‌ش هه‌ڵاتن و له‌ ئه‌شكه‌وتێكدا له‌ مه‌قێدا خۆیان شارده‌وه‌.
17
جا به‌ یه‌شوع ڕاگه‌یه‌نرا و گوترا كه‌ پێنج پاشاكه‌ له‌ ئه‌شكه‌وتێكدا له‌ مه‌قێدا خۆیان شاردووه‌ته‌وه‌،
18
یه‌شوعیش گوتی: «به‌ردی گه‌وره‌ بۆ سه‌ر ده‌می ئه‌شكه‌وته‌كه‌ تل بكه‌نه‌وه‌ و چه‌ند پیاوێكی به‌دیاره‌وه‌ دابنێن بۆ چاودێرییان.
19
ئێوه‌ش مه‌وه‌ستن، به‌ڵكو دوای دوژمنه‌كانتان بكه‌ون و له‌ پشته‌وه‌ لێیان بده‌ن، مه‌هێڵن بچنه‌ ناو شاره‌كانیانه‌وه‌، چونكه‌ یه‌زدانی په‌روه‌ردگارتان ئه‌وانی داوه‌ته‌ ده‌ستتان.»
20
ئینجا كه‌ یه‌شوع و نه‌وه‌ی ئیسرائیل ته‌واو بوون له‌ لێدانیان به‌ گورزێكی جه‌رگبڕ هه‌تا له‌ناوچوون و ئه‌وانه‌ی لێیان هه‌ڵاتن چوونه‌ ناو شاره‌ قه‌ڵابه‌نده‌كانه‌وه‌،
21
هه‌موو سوپا به‌ سه‌لامه‌تی گه‌ڕانه‌وه‌ بۆ لای یه‌شوع بۆ ئۆردوگاكه‌ له‌ مه‌قێدا. كه‌س نه‌بوو له‌ دژی نه‌وه‌ی ئیسرائیل زمان درێژ بكات.
22
ئینجا یه‌شوع گوتی: «ده‌می ئه‌شكه‌وته‌كه‌ بكه‌نه‌وه‌ و ئه‌و پێنج پاشایه‌م له‌ ئه‌شكه‌وته‌كه‌وه‌ بۆ بهێنه‌ ده‌ره‌وه‌.»
23
ئه‌وانیش به‌م جۆره‌یان كرد و ئه‌و پێنج پاشایه‌یان له‌ ئه‌شكه‌وته‌كه‌وه‌ بۆ هێنایه‌ ده‌ره‌وه‌، پاشای ئۆرشه‌لیم و حه‌برۆن و یه‌رموت و لاخیش و عه‌گلۆن.
24
جا كه‌ پاشاكانیان بۆ یه‌شوع هێنایه‌ ده‌ره‌وه‌، یه‌شوع هه‌موو پیاوانی ئیسرائیلی بانگكرد و به‌ فه‌رمانده‌كانی سوپای گوت، ئه‌وانه‌ی كه‌ له‌گه‌ڵیدا ڕۆیشتبوون، «وه‌رنه‌ پێشه‌وه‌ و قاچتان له‌سه‌ر ملی ئه‌م پاشایانه‌ دابنێن.» ئه‌وانیش چوونه‌ پێش و قاچیان له‌سه‌ر ملیان دانا.
25
ئینجا یه‌شوع پێی گوتن: «مه‌ترسن و وره‌ به‌رمه‌ده‌ن، به‌هێز و ئازا بن، چونكه‌ یه‌زدان ئاوا له‌ هه‌موو دوژمنه‌كانتان ده‌كات، كه‌ ئێوه‌ له‌ دژیان ده‌جه‌نگن.»
26
ئینجا یه‌شوع لێیدان و كوشتنی، هه‌ر پێنجیانی له‌سه‌ر پێنج دار هه‌ڵواسی، هه‌تا ئێواره‌ به‌ هه‌ڵواسراوی له‌سه‌ر داره‌كان مانه‌وه‌.
27
پاشان له‌ كاتی ئاوابوونی خۆر یه‌شوع فه‌رمانی دا، ئینجا له‌ داره‌كان دایانگرتن و فڕێیان دانه‌ ئه‌و ئه‌شكه‌وته‌ی خۆیان تێیدا شاردبووه‌وه‌، چه‌ند به‌ردێكی گه‌وره‌شیان خسته‌ سه‌ر ده‌می ئه‌شكه‌وته‌كه‌، هه‌تا ئه‌مڕۆش له‌وێن.
28
هه‌ر له‌و ڕۆژه‌دا یه‌شوع[c] مه‌قێدای گرت و دایه‌ به‌ر زه‌بری شمشێر، پاشاكه‌ی و هه‌موو گیانێكی تێدا به‌ ته‌واوی قڕكرد. كه‌سی لێیان نه‌هێشت، ئه‌وه‌ی به‌ پاشای مه‌قێدا كرد كه‌ به‌ پاشای ئه‌ریحای كردبوو.
گرتنی زۆربه‌ی شاره‌كانی باشوور 
29
ئینجا یه‌شوع له‌گه‌ڵ هه‌موو ئیسرائیل له‌ مه‌قێداوه‌ تێپه‌ڕین بۆ لیڤنا، له‌ دژی لیڤنا جه‌نگان.
30
یه‌زدان شاره‌كه‌ی له‌گه‌ڵ پاشاكه‌ی دایه‌ ده‌ست ئیسرائیل و به‌ شمشێر لێیدا، له‌ خۆی و هه‌موو گیانێك كه‌ تێیدا بوو. كه‌سی لێیان نه‌هێشت، ئه‌وه‌ی به‌ پاشاكه‌ی كرد كه‌ به‌ پاشای ئه‌ریحای كردبوو.
31
پاشان یه‌شوع له‌گه‌ڵ هه‌موو ئیسرائیلدا له‌ لیڤنایه‌وه‌ تێپه‌ڕین بۆ لاخیش، گه‌مارۆیان دا و له‌ دژی جه‌نگان.
32
یه‌زدان لاخیشی دایه‌ ده‌ست ئیسرائیل، له‌ ڕۆژی دووه‌مدا یه‌شوع گرتی و دایه‌ به‌ر زه‌بری شمشێر، له‌گه‌ڵ هه‌ر گیانێكی زیندوو كه‌ تێیدا بوو، هه‌روه‌ك چۆن یه‌شوع به‌ لیڤنای كردبوو.
33
له‌و كاته‌دا هۆرامی پاشای گه‌زه‌ر بۆ پاڵپشتیكردنی لاخیش سه‌ركه‌وتبوو، به‌ڵام یه‌شوع له‌ خۆی و له‌شكره‌كه‌ی دا و كه‌سی لێیان نه‌هێشت.
34
ئینجا یه‌شوع و هه‌موو ئیسرائیل له‌ لاخیشه‌وه‌ تێپه‌ڕین بۆ عه‌گلۆن، گه‌مارۆیان دا و له‌ دژی جه‌نگان.
35
هه‌ر له‌و ڕۆژه‌دا گرتیان و دایانه‌ به‌ر زه‌بری شمشێر، هه‌ر له‌و ڕۆژه‌دا هه‌موو گیانێكی زیندوویان تێدا به‌ ته‌واوی قڕكرد، به‌ ده‌ردی لاخیشیان برد.
36
ئینجا یه‌شوع و هه‌موو ئیسرائیل له‌ عه‌گلۆنه‌وه‌ سه‌ركه‌وتن بۆ حه‌برۆن و له‌ دژی جه‌نگان،
37
گرتیان و دایانه‌ به‌ر زه‌بری شمشێر، له‌گه‌ڵ پاشاكه‌ی و هه‌موو شارۆچكه‌كانی و هه‌موو گیانێكی زیندوو كه‌ تێیدا بوو، كه‌سی لێیان نه‌هێشت، به‌ ده‌ردی عه‌گلۆنیان برد، جا خۆی و هه‌موو گیانێكی زیندووی به‌ ته‌واوی قڕكرد كه‌ تێیدا بوو.
38
ئینجا یه‌شوع و هه‌موو ئیسرائیل گه‌ڕانه‌وه‌ بۆ ده‌ڤیر و له‌ دژی جه‌نگان و
39
گرتیان، خۆی و پاشاكه‌ی و هه‌موو شارۆچكه‌كانی و دایانه‌ به‌ر زه‌بری شمشێر و هه‌رچی گیانی زیندووی تێدابوو به‌ ته‌واوی قڕیان كرد، كه‌سی لێیان نه‌هێشت، ده‌ڤیر و پاشاكه‌ی به‌ ده‌ردی حه‌برۆن و پاشاكه‌ی برد، هه‌روه‌ك چی به‌ لیڤنا و پاشاكه‌ی كردبوو.
40
جا یه‌شوع هه‌موو خاكی ناوچه‌ شاخاوییه‌كه‌ و نه‌قه‌ب و زوورگه‌كانی خۆرئاوا و قه‌دپاڵه‌كانی له‌گه‌ڵ هه‌موو پاشاكانیانی خسته‌ ژێر ڕكێفی خۆی و كه‌سی لێیان نه‌هێشت، به‌ڵكو به‌ ته‌واوی هه‌موو هه‌ناسه‌دانێكی لێ بڕی، هه‌روه‌ك یه‌زدانی په‌روه‌ردگاری ئیسرائیل فه‌رمانی دابوو.
41
یه‌شوع هه‌ر له‌ قادێش به‌رنێعه‌وه‌ هه‌تا غه‌زه‌ لێیدان، له‌ هه‌موو ناوچه‌ی گۆشه‌ن هه‌تا گبعۆن.
42
یه‌شوع هه‌موو ئه‌و پاشایانه‌ و خاكه‌كه‌یانی به‌ یه‌ك جار گرت، چونكه‌ یه‌زدانی په‌روه‌ردگاری ئیسرائیل بۆ پاڵپشتی ئیسرائیل جه‌نگا.
43
ئینجا یه‌شوع له‌گه‌ڵ هه‌موو ئیسرائیلدا گه‌ڕایه‌وه‌ بۆ ئۆردوگاكه‌ له‌ گلگال.
  1. a. 10‏:1 قڕی كردووه‌: له‌ زمانی عیبری ئه‌م زاراوه‌یه‌ ده‌گه‌ڕێته‌وه‌ بۆ شتێك یان كه‌سێك كه‌ ده‌به‌خشرێت به‌ یه‌زدان، زۆر جار به‌خشینه‌كه‌ به‌ ته‌واوی له‌ ناوده‌بردرێت، لێره‌ و له‌ ئایه‌ته‌كانی 28، 35، 37، 39، 40.
  2. b. 10‏:13 په‌ڕتووكی یاشار: ده‌شێت كۆكراوه‌ی هه‌ڵبه‌سته‌ جه‌نگییه‌كان بووبێت، هه‌روه‌ها له‌ \+xt دووه‌م ساموئێل 1‏:18‏\+xt*‏ ده‌قێكی دیكه‌ له‌م په‌ڕتووكه‌ وه‌رگێڕاوه‌.
  3. c. 10‏:28 یه‌شوع: واته‌ یه‌شوع له‌گه‌ڵ هه‌موو جه‌نگاوه‌ره‌كانی ئیسرائیل.