عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
فه‌رمانی یه‌زدان بۆ یه‌شوع 
1
ئه‌وه‌ بوو پاش مردنی موسای به‌نده‌ی یه‌زدان، یه‌زدان به‌ یه‌شوعی كوڕی نونی خزمه‌تكاری موسای فه‌رموو:
2
«موسای به‌نده‌م مرد، ئێستا هه‌سته‌، خۆت و هه‌موو ئه‌م گه‌له‌ له‌ ڕووباری ئوردونه‌وه‌ بپه‌ڕنه‌وه‌ بۆ ئه‌و خاكه‌ی پێیان ده‌ده‌م، واته‌ به‌ نه‌وه‌ی ئیسرائیل.
3
هه‌ر شوێنێك پێی لێ بنێن، به‌ ئێوه‌ی ده‌ده‌م، هه‌روه‌ك به‌ موسام فه‌رموو،
4
له‌ چۆڵه‌وانییه‌وه‌ و له‌م لوبنانه‌وه‌ هه‌تا ڕووباری گه‌وره‌، ڕووباری فورات، هه‌موو خاكی حیتییه‌كان و هه‌تا ده‌ریای سپی ناوه‌ڕاست[a] به‌ره‌و ڕۆژئاوا ده‌بێت به‌ سنوورتان.
5
له‌ هه‌موو ڕۆژانی ژیانت كه‌س به‌ره‌و ڕووت ناوه‌ستێت. هه‌روه‌ك له‌گه‌ڵ موسادا بووم، له‌گه‌ڵ تۆش ده‌بم و فه‌رامۆشت ناكه‌م و به‌جێت ناهێڵم.
6
«به‌هێزبه‌ و ئازابه‌، چونكه‌ ئه‌و خاكه‌ بۆ ئه‌م گه‌له‌ ده‌كه‌یت به‌ میرات كه‌ سوێندم بۆ باوباپیرانیان خواردووه‌ كه‌ پێیانی بده‌م.
7
ته‌نها به‌هێزبه‌ و زۆر ئازابه‌، بۆ ئه‌وه‌ی هۆشیار بیت بۆ كاركردن به‌پێی هه‌موو ئه‌و فێركردنه‌ی كه‌ موسای به‌نده‌م فه‌رمانی پێ كردوویت. نه‌ به‌لای ڕاست و نه‌ به‌لای چه‌پ لێی لامه‌ده‌، بۆ ئه‌وه‌ی بۆ هه‌ركوێیه‌ك بچیت سه‌ركه‌وتوو بیت.
8
په‌ڕتووكی ئه‌م فێركردنه‌ له‌ ده‌مت جیا نه‌بێته‌وه‌، به‌ڵكو به‌ شه‌و و به‌ ڕۆژ لێی وردبه‌ره‌وه‌، بۆ ئه‌وه‌ی وریابیت بۆ كاركردن به‌پێی هه‌موو ئه‌و شتانه‌ی تێیدا نووسراوه‌، ئه‌و كاته‌ ژیانت ڕاسته‌ڕێ ده‌بێت و سه‌رده‌كه‌ویت.
9
ئایا من فه‌رمانم به‌ تۆ نه‌كرد؟ جا به‌هێزبه‌ و ئازابه‌، مه‌تۆقه‌ و وره‌ به‌رمه‌ده‌، چونكه‌ یه‌زدانی په‌روه‌ردگارت له‌گه‌ڵته‌ بۆ هه‌ركوێ بچیت.»
10
ئیتر یه‌شوع فه‌رمانی به‌ كوێخاكانی گه‌ل كرد و پێی گوتن:
11
«به‌ناو ئۆردوگاكه‌دا تێبپه‌ڕن و فه‌رمان به‌ گه‌ل بكه‌ن و بڵێن: ”ئازووقه‌ بۆ خۆتان ئاماده‌ بكه‌ن، چونكه‌ پاش سێ ڕۆژی دیكه‌ له‌ ڕووباری ئوردونه‌وه‌ ده‌په‌ڕنه‌وه‌ هه‌تا بچنه‌ ناوه‌وه‌ و ده‌ست به‌سه‌ر ئه‌و خاكه‌دا بگرن كه‌ یه‌زدانی په‌روه‌ردگارتان ده‌تانداتێ هه‌تا ببنه‌ خاوه‌نی.“»
12
پاشان یه‌شوع به‌ ڕه‌ئوبێنی و گادییه‌كان و نیوه‌ی هۆزی مه‌نه‌شه‌ی[b] گوت:
13
«ئه‌و وشه‌یه‌ی موسای به‌نده‌ی یه‌زدان فه‌رمانی پێ كردن، به‌بیری خۆتانی بهێننه‌وه‌، كه‌ پێی ڕاگه‌یاندن یه‌زدانی په‌روه‌ردگارتان، ئێوه‌ی حه‌سانده‌وه‌ و ئه‌م خاكه‌ی پێدان.
14
ژن و منداڵ و ئاژه‌ڵی ماڵیتان له‌م خاكه‌دا ده‌مێننه‌وه‌ كه‌ موسا پێیدان، له‌م به‌ری ڕووباری ئوردون به‌لای ڕۆژهه‌ڵات، به‌ڵام هه‌موو جه‌نگاوه‌ره‌ قاره‌مانه‌كان به‌ چه‌كه‌وه‌ له‌پێش براكانتانه‌وه‌ ده‌په‌ڕنه‌وه‌. یارمه‌تی براكانتان ده‌ده‌ن
15
هه‌تا یه‌زدان وه‌ك ئێوه‌ براكانتان ده‌حه‌سێنێته‌وه‌ و ئه‌وانیش ده‌ست به‌سه‌ر ئه‌و خاكه‌دا ده‌گرن كه‌ یه‌زدانی په‌روه‌ردگارتان ده‌یانداتێ. دوای ئه‌وه‌ ده‌گه‌ڕێنه‌وه‌ بۆ خاكه‌كه‌ی میراتیتان و داگیری ده‌كه‌ن، ئه‌وه‌ی موسای به‌نده‌ی یه‌زدان له‌ به‌ری ڕۆژهه‌ڵاتی ڕووباری ئوردون به‌ره‌و خۆر هه‌ڵاتن پێیدان.»
16
ئه‌وانیش وه‌ڵامی یه‌شوعیان دایه‌وه‌ و گوتیان: «هه‌موو ئه‌و شتانه‌ی فه‌رمانت پێ كردین جێبه‌جێی ده‌كه‌ین و بۆ هه‌ر شوێنێكمان بنێریت ده‌چین،
17
به‌پێی هه‌موو ئه‌وه‌ی گوێڕایه‌ڵی موسا بووین ئاوا گوێڕایه‌ڵی تۆش ده‌بین. با یه‌زدانی په‌روه‌ردگارت له‌گه‌ڵت بێت وه‌ك چۆن له‌گه‌ڵ موسا بوو.
18
هه‌ركه‌سێك یاخی بێت له‌ فه‌رمانه‌كانت و گوێڕایه‌ڵی وشه‌كانت نه‌بێت له‌ هه‌موو ئه‌وه‌ی فه‌رمانی پێ ده‌كه‌یت، ده‌كوژرێت، به‌ڵام ته‌نها به‌هێز و ئازابه‌!»
  1. a. 1‏:4 ده‌ریای سپی ناوه‌ڕاست: عیبری ده‌ریای مه‌زن.
  2. b. 1‏:12 هۆزی مه‌نه‌شه‌ دابه‌ش ببوون بۆ سه‌ر دوو به‌ش، هه‌ریه‌كه‌یان كه‌وتبووه‌ لایه‌كی ڕووباری ئوردون.