عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
په‌یامی یه‌زدان كه‌ بۆ یۆئێلی كوڕی په‌توئێل هات:
هێرشی كولله‌ 
2
ئه‌ی پیران، گوێ له‌مه‌ بگرن،
ئه‌ی هه‌موو دانیشتووانی خاكه‌كه‌، گوێ شل بكه‌ن.
ئایا ئه‌مه‌ له‌ سه‌رده‌می ئێوه‌
یان له‌ سه‌رده‌می باوباپیرانتان ڕوویداوه‌؟
3
ئه‌مه‌ بۆ كوڕه‌كانتان بگێڕنه‌وه‌،
كوڕه‌كانیشتان بۆ كوڕه‌كانیان،
كوڕه‌كانیشیان بۆ نه‌وه‌ی دوای خۆیان.
4
ئه‌وه‌ی له‌به‌ر كولله‌ی قرتێنه‌ر مایه‌وه‌
كولله‌ی گه‌وره‌ لووشیان دا،
ئه‌وه‌ی له‌به‌ر كولله‌ی گه‌وره‌ مایه‌وه‌
پێكوڕه‌ لووشیان دا،
ئه‌وه‌ش كه‌ له‌به‌ر پێكوڕه‌ مایه‌وه‌
ورده‌ كولله‌ی لووشیان دا.
5
ئه‌ی سه‌رخۆشه‌كان، به‌ئاگا بێن و بگریێن!
ئه‌ی هه‌موو ئه‌وانه‌ی شه‌راب ده‌خۆنه‌وه‌،
واوه‌یلا بۆ شه‌رابی شیرین بكه‌ن،
چونكه‌ له‌ ده‌متان بڕاوه‌.
6
نه‌ته‌وه‌یه‌ك په‌لاماری خاكه‌كه‌می دا،
به‌هێز و بێشوماره‌،
ددانه‌كانی ددانی نه‌ڕه‌ شێره‌ و
كه‌ڵبه‌ی شێره‌ مێی هه‌یه‌.
7
دار مێوه‌كه‌می وێران كردووه‌ و
دار هه‌نجیره‌كه‌می تێكشكاندووه‌،
توێكڵه‌كه‌ی داتاشیوه‌ و فڕێیداوه‌،
لقه‌كانی سپی بوونه‌وه‌.
8
شین بگێڕه‌ وه‌ك پاكیزه‌یه‌كی جلوبه‌رگی گوش[a] پۆشیو،
بۆ مێردی گه‌نجییه‌تی كه‌ نه‌ماوه‌.
9
پێشكه‌شكراوی دانه‌وێڵه‌ و شه‌راب
له‌ ماڵی یه‌زدان بڕایه‌وه‌،
كاهینه‌كان ده‌لاوێننه‌وه‌،
ئه‌وانه‌ی خزمه‌تكاری یه‌زدانن.
10
كێڵگه‌كان وێران بوون،
خاك شیوه‌نی گێڕا،
چونكه‌ دانه‌وێڵه‌ فه‌وتا،
شه‌رابی نوێ نه‌ما،
ڕۆن له‌ هیزه‌ بڕا.
11
ئه‌ی جوتیاره‌كان، نائومێد بن،
ڕه‌زه‌وانه‌كان، واوه‌یلا بكه‌ن،
بۆ گه‌نم و جۆ،
چونكه‌ دروێنه‌ی كێڵگه‌ له‌ناوچوو.
12
دار مێو وشك هه‌ڵگه‌ڕا و
دار هه‌نجیر سیس بوو،
دار هه‌نار و خورما و سێو،
هه‌موو دره‌خته‌كانی كێڵگه‌ وشك هه‌ڵگه‌ڕان.
به‌ دڵنیاییه‌وه‌ شادی و خۆشی بۆ گه‌ل نه‌ما.
بانگه‌وازی تۆبه‌كردن 
13
ئه‌ی كاهینه‌كان، گوش بپۆشن و بلاوێننه‌وه‌،
ئه‌ی خزمه‌تكارانی قوربانگا، واوه‌یلا بكه‌ن.
ئه‌ی خزمه‌تكارانی خوداكه‌م،
وه‌رن و شه‌و به‌ به‌رگی ماته‌مه‌وه‌ بمێننه‌وه‌،
چونكه‌ پێشكه‌شكراوی دانه‌وێڵه‌ و شه‌راب
له‌ ماڵی خوداتان ڕاگیراوه‌.
14
ڕۆژووگرتنێك ڕابگه‌یه‌نن،
بۆ كۆبوونه‌وه‌یه‌كی پیرۆز بانگیان بكه‌ن،
پیران كۆبكه‌نه‌وه‌،
هه‌موو دانیشتووانی خاكه‌كه‌ش
بێنه‌ ماڵی یه‌زدانی په‌روه‌ردگارتان،
هاوار بكه‌ن بۆ یه‌زدان.
15
ئای بۆ ئه‌و ڕۆژه‌!
چونكه‌ ڕۆژی یه‌زدان[b] نزیك بووه‌ته‌وه‌،
وه‌ك وێرانبوون له‌لایه‌ن خودای هه‌ره‌ به‌ تواناوه‌ دێت.
16
ئایا له‌به‌رچاومان خواردن نه‌بڕاوه‌؟
ئایا له‌ ماڵی خودامان خۆشی و شادی ماوه‌؟
17
تۆوی دانه‌وێڵه‌كان
له‌ژێر باڕستی خاكدا ڕزین،
كۆگاكان چۆڵ كران،
ئه‌مباره‌كان وێران كران،
چونكه‌ دانه‌وێڵه‌ وشك بوو.
18
ماڵاته‌كان چۆن ده‌ناڵێنن!
مێگه‌له‌كان به‌ڕه‌ڵا بوون،
چونكه‌ له‌وه‌ڕگایان نییه‌،
ته‌نانه‌ت ڕانه‌ مه‌ڕه‌كانیش ماندوون.
19
ئه‌ی یه‌زدان، هاوار بۆ تۆ ده‌كه‌م،
چونكه‌ ئاگر له‌وه‌ڕگاكانی ده‌شتوده‌ری خوارد،
گڕێك هه‌موو دره‌خته‌كانی كێڵگه‌ی سووتاند.
20
ته‌نانه‌ت ئاژه‌ڵه‌ كێوییه‌كانیش چاویان له‌ ده‌ستی تۆیه‌،
چونكه‌ جۆگه‌له‌ ئاوه‌كان وشكیان كردووه‌ و
ئاگر له‌وه‌ڕگاكانی ده‌شتوده‌ری خواردووه‌.
  1. a. 1‏:8 له‌ كاتی ماته‌مگێڕان و تۆبه‌كردندا جلوبه‌رگی له‌ گوش دروستكراویان له‌به‌ركردووه‌ كه‌ ئه‌زیه‌تی پێستیانی داوه‌.
  2. b. 1‏:15 لێره‌دا مه‌به‌ست له‌ ڕووداوێكه‌ كه‌ ده‌بێته‌ سزای ئیسرائیل له‌لایه‌ن خوداوه‌ له‌سه‌ر سته‌مكاری و خراپه‌كارییان.