عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
قسه‌ی سێیه‌می ئه‌یوب 
1
ئه‌یوبیش وه‌ڵامی دایه‌وه‌:
2
«ڕاسته‌، ده‌زانم كه‌ وایه‌.
جا چۆن مرۆڤ له‌به‌رچاوی خودا ڕاستودروست ده‌بێت؟
3
ئه‌گه‌ر بیه‌وێت مشتومڕی له‌گه‌ڵ بكات،
ناتوانێت وه‌ڵامی یه‌ك له‌ هه‌زار بداته‌وه‌.
4
خودا گه‌وره‌یه‌ به‌ دانایی و له‌ توانادا زۆر به‌هێزه‌.
كێ هه‌یه‌ دژایه‌تی كردبێت و به‌ سه‌لامه‌تی ده‌رچووبێت؟
5
هه‌ژێنه‌ری چیاكانه‌ بێ ئه‌وه‌ی به‌خۆیان بزانن،
ئه‌وه‌ی له‌ كاتی تووڕه‌ییدا سه‌ره‌وژێریان ده‌كات.
6
زه‌وی له‌ جێی خۆی له‌ق ده‌كات،
جا كۆڵه‌كه‌كانی ده‌خاته‌ بوومه‌له‌رزه‌.
7
فه‌رمان به‌ خۆر ده‌دات، كه‌ هه‌ڵنه‌یه‌ت،
به‌ ئه‌ستێره‌كانیش كه‌ نه‌دره‌وشێنه‌وه‌.
8
خۆی به‌ ته‌نها ئاسمانی لێك كردووه‌ته‌وه‌،
به‌سه‌ر شه‌پۆله‌كانی ده‌ریادا ڕۆیشتووه‌.
9
دروستكه‌ری كه‌لووه‌كانی[a] ورچ و ڕاوچی و
حه‌وته‌وانه‌[b] و ئه‌و كه‌لووانه‌ی كه‌ له‌ باشووری زه‌وی ده‌بینرێن.
10
كاری مه‌زنی به‌م جۆره‌ی كردووه‌ كه‌ له‌ سه‌رووی بیركردنه‌وه‌ن،
هێنده‌ په‌رجوو[c] كه‌ له‌ ژماردن نایه‌ن.
11
كاتێك به‌سه‌رمدا ده‌ڕوات نایبینم،
كاتێك تێده‌په‌ڕێت هه‌ستی پێ ناكه‌م!
12
ئه‌گه‌ر شتێكمان لێ بستێنێت كێ ده‌توانێت به‌ره‌نگاری بێته‌وه‌؟
كێ پێی ده‌ڵێت: ”ئه‌وه‌ چی ده‌كه‌یت؟“
13
خودا تووڕه‌یی خۆی ناگێڕێته‌وه‌،
یارمه‌تیده‌رانی ڕه‌هه‌ڤ[d] له‌ ژێریدا ده‌چه‌مێنه‌وه‌.
14
«ئیتر من چۆن وه‌ڵامی بده‌مه‌وه‌ و
چۆن وشه‌ هه‌ڵبژێرم بۆ وه‌ڵامدانه‌وه‌ی؟
15
چونكه‌ ئه‌گه‌ر ڕاستودروستیش بم، ناتوانم وه‌ڵامی بده‌مه‌وه‌،
به‌ڵكو داوای به‌زه‌یی له‌ دادوه‌رم ده‌كه‌م.
16
ئه‌گه‌ر بانگی بكه‌م، ئه‌ویش وه‌ڵامم بداته‌وه‌،
باوه‌ڕ ناكه‌م كه‌ گوێی بۆ ده‌نگم شل بكات،
17
به‌ڵكو ئه‌و به‌ زریان تێكمده‌شكێنێت و
به‌بێ هۆ برینه‌كانم زۆر ده‌كات.
18
ناهێڵێت هه‌ناسه‌ بده‌م،
به‌ڵام له‌ تاڵی تێرم ده‌كات.
19
ئه‌گه‌ر تاقیكردنه‌وه‌ی هێز بێت، ئه‌و به‌هێزترینه‌!
ئه‌گه‌ر كێشه‌ی دادگا بێت، كێ ده‌توانێت بانگی بكات؟
20
ئه‌گه‌ر بێتاوان بم ده‌مم تاوانبارم ده‌كات،
ئه‌گه‌ر بێ كه‌موكوڕیش بم، ده‌یسه‌لمێنێت تاوانبارم.
21
«هه‌رچه‌نده‌ من بێ كه‌موكوڕیم،
به‌ڵام بایه‌خ به‌ ژیانی خۆم ناده‌م؛
ڕقم له‌ ژیانم ده‌بێته‌وه‌.
22
”خودا كۆتایی به‌ چاك و به‌ خراپ ده‌هێنێت.“
له‌به‌ر ئه‌وه‌ گوتم: به‌لامه‌وه‌ هه‌ردووكیان وه‌ك یه‌كن،
23
ئه‌گه‌ر كاره‌ساتی له‌ناكاو مردن بهێنێت،
به‌ نائومێدی بێتاوان پێده‌كه‌نێت.
24
كه‌ خاكێك درابێت به‌ ده‌ست به‌دكاره‌وه‌،
ئه‌وا په‌رده‌ به‌سه‌ر ڕووی دادوه‌ره‌كانی داده‌ت،
ئه‌گه‌ر ئه‌و نه‌بێت، ئه‌ی كێیه‌؟
25
«ڕۆژگارم خێراتره‌ له‌ كه‌سێك كه‌ ڕاده‌كات،
گوزه‌ر ده‌كات و چێژی لێ نابینم.
26
وه‌ك چۆن كه‌شتی زه‌ل ڕووبار ده‌بڕێت
هه‌روه‌ك هه‌ڵۆیه‌ك كه‌ ده‌نیشێته‌ سه‌ر نێچیره‌كه‌ی.
27
ئه‌گه‌ر بڵێم: ”سكاڵاكه‌ی خۆم فه‌رامۆش ده‌كه‌م و
واز له‌ ڕووگرژی ده‌هێنم و زه‌رده‌خه‌نه‌ ده‌خه‌مه‌ سه‌ر لێوه‌كانم،“
28
له‌گه‌ڵ ئه‌وه‌شدا له‌ هه‌موو ئازاره‌كانم ده‌ترسم،
چونكه‌ ده‌زانم بێتاوانم ناكه‌یت.
29
من تاوانبار ده‌كرێم،
ئیتر بۆچی به‌خۆڕایی خۆم ماندوو بكه‌م؟
30
ئه‌گه‌ر به‌ به‌فراو خۆم بشۆم و
ده‌سته‌كانم به‌ ئه‌سپۆن پاك بكه‌مه‌وه‌،
31
له‌ناو چاڵێك ڕیخ نوقومم ده‌كه‌یت،
ته‌نانه‌ت جلوبه‌رگه‌كه‌م قێزم لێ ده‌كه‌نه‌وه‌.
32
«چونكه‌ ئه‌و وه‌ك من مرۆڤ نییه‌ هه‌تا وه‌ڵامی بده‌مه‌وه‌ و
له‌ دادگا ڕووبه‌ڕووی یه‌ك ببینه‌وه‌.
33
خۆزگه‌ ناوبژیوانێك له‌نێوانمان ده‌بوو،
ده‌ستی له‌سه‌ر هه‌ردووكمان داده‌نا،
34
تاوه‌كو كوته‌كه‌كه‌ی خودام له‌سه‌ر هه‌ڵبگرێت و
ترسه‌كه‌ی نه‌متۆقێنێت.
35
ئه‌و كاته‌ قسه‌م ده‌كرد و لێی نه‌ده‌ترسام،
چونكه‌ من به‌و شێوه‌یه‌ نیم كه‌ ئه‌و لێم تێگه‌یشتووه‌.»
  1. a. 9‏:9 مه‌به‌ستی بورجه‌كانه‌، هه‌ریه‌ك له‌مانه‌ له‌ چه‌ند ئه‌ستێره‌یه‌ك پێكدێن.
  2. b. 9‏:9 یه‌كێك له‌ كه‌لووه‌كانه‌.
  3. c. 9‏:10 په‌رجوو: موعجیزه‌.
  4. d. 9‏:13 هێمایه‌ بۆ میسر