عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
«ئایا ده‌توانیت لیڤیاتان[a] به‌ قولاپ ڕاو بكه‌یت،
یان زمانی به‌ گوریس ببه‌ستیته‌وه‌؟
2
ئایا ده‌توانیت ئه‌ڵقه‌ بخه‌یته‌ لووتی
یان شه‌ویلاكی به‌ لووته‌وانه‌ بسمیت؟
3
ئایا زۆر لێت ده‌پاڕێته‌وه‌
یان به‌ نه‌رمی قسه‌ت له‌گه‌ڵ ده‌كات؟
4
ئایا په‌یمانت له‌گه‌ڵ ده‌به‌ستێت
كه‌ به‌ درێژایی ژیانی بیكه‌یت به‌ كۆیله‌ی خۆت؟
5
ئایا وه‌ك چۆله‌كه‌ یاری له‌گه‌ڵ ده‌كه‌یت
یان بۆ كچه‌ منداڵه‌كانت ده‌یبه‌ستیته‌وه‌؟
6
ئایا ڕاوچییه‌كان كڕین و فرۆشتنی له‌سه‌ر ده‌كه‌ن
یان له‌نێو بازرگانه‌كان دابه‌شی ده‌كه‌ن؟
7
ئایا پێستی پڕ ده‌كه‌یت له‌ ڕم و
سه‌ریشی پڕ له‌ تیر؟
8
ده‌ستت له‌سه‌ری دانێ و بیر له‌ جه‌نگ بكه‌ره‌وه‌،
جارێكی دیكه‌ دووباره‌ی ناكه‌یته‌وه‌!
9
هیوابوون به‌ گرتنی خه‌ون بینینه‌،
هه‌ر به‌ بینینی ده‌تۆقیت.
10
كه‌سێك نییه‌ ئه‌وه‌نده‌ ئازا بێت به‌خه‌به‌ری بهێنێت،
ئیتر كێ هه‌یه‌ له‌ ڕووی مندا بوه‌ستێت؟
11
كێ شتێكی پێم به‌خشیوه‌ تاكو من بیده‌مه‌وه‌؟
ئه‌وه‌ی له‌ژێر هه‌موو ئاسمانه‌ هی منه‌.
12
«بێده‌نگ نابم له‌ باسكردنی ئه‌ندامه‌كانی جه‌سته‌ی لیڤیاتان و
له‌ ڕاگه‌یاندنی هێزی و له‌ جوانی ئاكاری جه‌سته‌ی.
13
كێ ده‌توانێت پێسته‌كه‌ی دابماڵێت؟
كێ ده‌توانێت هه‌ردوو لای سپه‌ره‌كه‌ی ببڕێت؟
14
كێ دوو شه‌ویلاكی ده‌می ده‌كاته‌وه‌؟
ڕیزی ددانه‌كانی ترسێنه‌ره‌.
15
پشتی به‌ ڕیزێك قه‌ڵغان داپۆشراوه‌،
به‌ پته‌وی به‌یه‌كه‌وه‌ به‌ستراوه‌؛
16
به‌ شێوه‌یه‌ك پێكه‌وه‌ نووساون كه‌
ته‌نانه‌ت با به‌ نێوانیاندا ناڕوات.
17
هه‌ریه‌كه‌یان به‌وی ته‌نیشتیه‌وه‌ نووساوه‌؛
پێكه‌وه‌ به‌ستراون لێك نابنه‌وه‌.
18
كه‌ ده‌حیلێنێت بروسكه‌ی ڕووناكی ده‌دات؛
چاوه‌كانی وه‌ك گزنگی به‌یانن.
19
له‌ ده‌میه‌وه‌ بڵێسه‌ی ئاگر دێته‌ ده‌ره‌وه‌،
پریشكی ئاگری لێ ده‌بێته‌وه‌.
20
له‌ كونه‌ لووتییه‌وه‌ دووكه‌ڵ هه‌ڵده‌ستێت،
هه‌روه‌ك سووتانی قامیش له‌بن مه‌نجه‌ڵێكی له‌ كوڵ.
21
هه‌ناسه‌ی خه‌ڵووز داده‌گیرسێنێت،
گڕیش له‌ ده‌میه‌وه‌ ده‌ڕژێت.
22
هێزه‌كه‌ی له‌ ملیدایه‌،
له‌به‌رده‌می هه‌ڵوه‌سته‌ی لێ ده‌كه‌ن.
23
گۆشته‌كه‌ی قه‌دقه‌د پێكه‌وه‌ نووساوه‌،
به‌سه‌ر له‌شیدا داڕێژراوه‌ و ناجوڵێته‌وه‌.
24
سه‌رسه‌خته‌،
به‌ جه‌رگ و چاونه‌وترسه‌.
25
كه‌ هه‌ڵده‌ستێت به‌هێزان ده‌تۆقن،
له‌ ترسی خۆڕاته‌كاندنه‌كه‌ی په‌نا ده‌گرن.
26
شمشێری به‌ر ده‌كه‌وێت به‌ڵام نایپێكێت،
نه‌ ڕم و نه‌ تیر.
27
ئاسن له‌لای وه‌ك كا وایه‌،
بڕۆنزیش وه‌ك داری كلۆر.
28
تیری كه‌وانه‌كان نایبه‌زێنن؛
به‌ردی به‌رده‌قانییه‌كان به‌لایه‌وه‌ وه‌ك پووشن.
29
گورز له‌لای وه‌ك كایه‌؛
به‌ ڕاوه‌شاندنی ڕم پێده‌كه‌نێت.
30
ژێری پارچه‌ گۆزه‌ی تیژه‌،
جه‌نجه‌ڕ به‌سه‌ر قوڕدا ڕاده‌كێشێت.
31
وا ده‌كات قووڵایی وه‌ك مه‌نجه‌ڵ بكوڵێت،
ده‌ریا وه‌ك هیزه‌ی زه‌یت لێ ده‌كات.
32
له‌دوای خۆی هێڵێكی سپی دره‌وشاوه‌ به‌جێده‌هێڵێت،
شه‌پۆله‌كان وه‌ك پرچی سپی لێ ده‌كات.
33
له‌سه‌ر زه‌وی هاوشێوه‌ی نییه‌،
بۆ نه‌ترسان دروستكراوه‌.
34
به‌ سووكییه‌وه‌ ته‌ماشای لووتبه‌رزه‌كان ده‌كات؛
پاشای هه‌موو له‌خۆباییه‌كانه‌.»
  1. a. 41‏:1 گیانله‌به‌رێكی گه‌وره‌یه‌ له‌ناو ده‌ریا ده‌ژیێت.