عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
وه‌ڵامی یه‌كه‌می ئه‌لیفاز 
1
ئینجا ئه‌لیفازی تێمانی وه‌ڵامی دایه‌وه‌:
2
«ئه‌گه‌ر یه‌كێك قسه‌یه‌ك بكات دڵگران ده‌بیت؟
به‌ڵام كێ ده‌توانێت له‌ قسه‌كردن ڕابوه‌ستێت؟
3
له‌ یادت بێ تۆ ڕێنمایی زۆر كه‌ست كردووه‌ و
ده‌سته‌ شلبووه‌كانت توند كردووه‌.
4
قسه‌كانت ئه‌وانه‌ی هه‌ستانده‌وه‌ كه‌ كه‌وتوون و
ئه‌ژنۆ له‌رزۆكه‌كانت چه‌سپاند.
5
به‌ڵام ئێستا كه‌ خۆت تووشی ته‌نگانه‌ بوویت، وره‌ت به‌رداوه‌،
له‌وه‌ی كه‌ به‌سه‌ر خۆت هاتووه‌، په‌رێشان بوویت.
6
ئایا پشت به‌ له‌خواترسییه‌كه‌ت نابه‌ستیت؟
ئایا بێ كه‌موكوڕییه‌كه‌ت هیوابه‌خش نییه‌؟
7
«به‌بیر خۆتی بهێنه‌ره‌وه‌، بێتاوانێكت بینیوه‌ فه‌وتابێت،
یاخود كه‌سه‌ سه‌رڕاسته‌كان له‌ناوچووبن؟
8
وه‌ك بینیوته‌، ئه‌وانه‌ی خراپه‌ ده‌كێڵن و
چه‌رمه‌سه‌ری ده‌چێنن، خۆیان دروێنه‌ی ده‌كه‌ن.
9
به‌ هه‌ناسه‌ی خودا له‌ناوده‌چن و
به‌ بای تووڕه‌ییه‌كه‌ی نامێنن.
10
مڕه‌مڕی شێر و ده‌نگی نه‌ڕه‌ی و
كه‌ڵبه‌ی شێره‌كان شكێنران.
11
شێر ده‌فه‌وتێت له‌به‌ر نه‌بوونی نێچیر و
به‌چكه‌ی شێره‌كه‌ په‌رته‌وازه‌ ده‌بن.
12
«وشه‌یه‌ك بۆ لای من دزه‌ی كرد،
گوێم چرپه‌یه‌كی بیست.
13
له‌ مۆته‌كه‌ی[a] شه‌ومدا
كاتێك مرۆڤ خه‌وێكی قووڵ ده‌یباته‌وه‌،
14
ترس و تۆقینێك منی داگرت و
هه‌موو ئێسكه‌كانم له‌رزین.
15
ڕۆحێك به‌ به‌رده‌ممدا تێپه‌ڕی و
مووه‌كانی له‌شم مووچڕكه‌یان پێدا هات.
16
ڕاوه‌ستا،
به‌ڵام نه‌مزانی چی بوو،
شێوه‌یه‌ك له‌به‌رچاوم بوو،
چرپه‌یه‌ك و ده‌نگێكم بیست:
17
”ئایا مرۆڤ له‌ خودا ڕاستودروستتره‌،
یان پیاو له‌ به‌دیهێنه‌ره‌كه‌ی بێگه‌ردتر ده‌بێت؟
18
ئه‌گه‌ر خودا متمانه‌ به‌ خزمه‌تكاره‌كانی نه‌كات و
گومڕایی بخاته‌ پاڵ فریشته‌كانی،
19
ئه‌ی چه‌ند زیاتر متمانه‌ به‌ دانیشتووانی ناو خانووی قوڕ ناكات،
ئه‌وانه‌ی بنه‌چه‌یان له‌ خۆڵه‌وه‌یه‌ و
وه‌ك مۆرانه‌ پان ده‌كرێنه‌وه‌.
20
له‌نێوان به‌یانی و ئێواره‌دا تێكده‌شكێنرێن،
بێ ئه‌وه‌ی كه‌س ئاگای لێیان بێت بۆ هه‌تاهه‌تایه‌ له‌ناوده‌چن.
21
ئایا گوریسی ڕه‌شماڵه‌كانیان هه‌ڵنه‌كێشراوه‌،
تاكو به‌بێ دانایی بمرن؟“
  1. a. 4‏:13 خه‌ونێكی ناخۆش.