عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
«په‌یمانم له‌گه‌ڵ چاوه‌كانم به‌ست،
ئیتر چۆن ته‌ماشای پاكیزه‌یه‌ك بكه‌م؟
2
چونكه‌ به‌شی ئێمه‌ له‌ خودا له‌ سه‌ره‌وه‌ چییه‌،
چ میراتێكمان هه‌یه‌ له‌ تواناداره‌كه‌ی ئاسمان؟
3
ئایا كاره‌سات بۆ به‌دكار و
به‌ڵا بۆ خراپه‌كار نییه‌؟
4
ئایا ئه‌و ته‌ماشای ڕێگای من ناكات و
هه‌موو هه‌نگاوه‌كانم ناژمێرێت؟
5
«ئه‌گه‌ر له‌گه‌ڵ درۆ ملی ڕێم گرتبێته‌به‌ر
یان پێیه‌كانم په‌له‌یان كردبێت به‌ره‌و فێڵ،
6
با خودا له‌ ته‌رازووی ڕاستودروستیدا بمكێشێت و
با بێ كه‌موكوڕییه‌كه‌م بزانێت.
7
ئه‌گه‌ر هه‌نگاوه‌كانم له‌ ڕێچكه‌ لایانداوه‌،
ئه‌گه‌ر دڵم به‌دوای چاوم كه‌وتووه‌،
یان ئه‌گه‌ر كرده‌وه‌كانم ده‌سته‌كانی منیان گڵاو كردووه‌،
8
ئه‌وا ئه‌وه‌ی من چاندم با كه‌سانی دیكه‌ بیخۆن،
با لقه‌كانم ڕیشه‌كێش بكرێن.
9
«ئه‌گه‌ر دڵم به‌لای ژنێكدا فریوی خواردووه‌،
یان له‌ به‌رده‌رگای دراوسێكه‌م بۆسه‌م داناوه‌،
10
با ژنه‌كه‌م دانه‌وێڵه‌ی پیاوێكی دیكه‌ بهاڕێت و
با خه‌ڵكانی دیكه‌ به‌سه‌ریدا بچه‌مێنه‌وه‌.
11
چونكه‌ ئه‌مه‌ بێ ناموسییه‌،
تاوانه‌ و پێویسته‌ دادگایی بكرێت.
12
چونكه‌ ئاگرێكه‌ هه‌تا له‌ناوچوون[a] ده‌خوات و
هه‌موو دروێنه‌كه‌م ڕیشه‌كێش ده‌كات.
13
«ئه‌گه‌ر مافی خزمه‌تكار و كاره‌كه‌ره‌كه‌م ڕه‌ت كردووه‌ته‌وه‌
كاتێك له‌ دژی من سكاڵایان كردووه‌،
14
ئه‌و كاته‌ چی بكه‌م له‌ كاتی ڕووبه‌ڕووبوونه‌وه‌م له‌گه‌ڵ خودا؟
ئه‌گه‌ر لێكۆڵینه‌وه‌م له‌گه‌ڵ بكرێت به‌ چی وه‌ڵامی بده‌مه‌وه‌؟
15
ئایا دروستكه‌ری من له‌ سكدا دروستكه‌ری ئه‌وانیش نییه‌؟
ئایا شێوه‌كێشمان له‌ سكی دایك یه‌ك نییه‌؟
16
«ئه‌گه‌ر هه‌ژارانم له‌ مرازی خۆیان قه‌ده‌غه‌ كردبێت
یان چاوی بێوه‌ژنم فه‌وتاندبێت،
17
یان پارووه‌كه‌ی خۆم به‌ ته‌نها خواردبێت،
كه‌ هه‌تیو لێی نه‌خواردبێت،
18
به‌ڵكو له‌ گه‌نجیمه‌وه‌ وه‌ك باوك به‌ هه‌تیوی به‌خێوم كردووه‌ و
له‌ سكی دایكمه‌وه‌ ڕێنمایی بێوه‌ژنم كردووه‌.
19
ئه‌گه‌ر فه‌وتاوێكم بینیبێت له‌به‌ر نه‌بوونی جل
یان نه‌دارێكی بێ به‌رگ،
20
كه‌ به‌ كه‌وڵی مه‌ڕه‌كه‌م خۆیان گه‌رم نه‌كردووه‌ته‌وه‌
ئیتر له‌ دڵیانه‌وه‌ داوای به‌ره‌كه‌تیان بۆ نه‌كردووم،
21
ئه‌گه‌ر په‌یوه‌ندیم له‌گه‌ڵ كاربه‌ده‌ستانم به‌كارهێناوه‌
بۆ ئه‌وه‌ی ده‌ستدرێژی بكه‌مه‌ سه‌ر هه‌تیو،
22
با شانم له‌ ئه‌ستۆم به‌ربێته‌وه‌ و
با قۆڵم له‌ جومگه‌كه‌یه‌وه‌ بشكێت.
23
چونكه‌ كاره‌سات له‌ خوداوه‌ به‌لامه‌وه‌ تۆقێنه‌ره‌ و
له‌ ترسی شكۆیه‌كه‌ی نه‌متوانی شتی وا بكه‌م.
24
«ئه‌گه‌ر پشتم به‌ زێڕی خۆم به‌ستووه‌ و
ئه‌گه‌ر به‌ زێڕی بێگه‌ردم گوت: ”تۆ پاڵپشتی منی،“
25
ئه‌گه‌ر دڵخۆش بووم كه‌ سامانه‌كه‌م زۆر بوو و
له‌به‌ر ئه‌وه‌ی زۆریان به‌ده‌ستهێناوه‌،
26
ئه‌گه‌ر ته‌ماشای ڕووناكی خۆرم كردووه‌ كاتێك دره‌وشاوه‌ته‌وه‌،
یان مانگ كاتێك به‌ جوانییه‌وه‌ ده‌ڕوات
27
تاوه‌كو دڵم به‌ نهێنی فریودراو و
ده‌ستم ده‌می داپۆشی،[b]
28
ئه‌وا ئه‌مانه‌ش تاوان ده‌بن و ده‌درێن به‌ دادگا،
چونكه‌ ئه‌گه‌ر شتی وام بكردایه‌ ناپاك ده‌بووم به‌رامبه‌ر به‌ خودا له‌ سه‌ره‌وه‌.
29
«ئه‌گه‌ر به‌ به‌ڵای ناحه‌زه‌كه‌م دڵخۆش بووم
یان بزه‌م گرت كه‌ تووشی خراپه‌ بوو،
30
به‌ڵكو نه‌مهێشت مه‌ڵاشووم گوناه بكات
به‌وه‌ی كه‌ به‌ نه‌فره‌ته‌وه‌ داوای ژیانی ئه‌و بكات؛
31
ئه‌گه‌ر كه‌سانی ناو چادره‌كه‌م هه‌رگیز نه‌یانگوتایه‌،
”كێ یه‌كێك ده‌هێنێت له‌ خواردنه‌كه‌ی ئه‌یوب تێری نه‌خواردبێت؟“
32
ئاواره‌یه‌ك له‌ ده‌ره‌وه‌ شه‌وی به‌سه‌رنه‌برد،
ده‌رگای ماڵه‌كه‌م بۆ ڕێبوار كرده‌وه‌.
33
ئه‌گه‌ر وه‌ك خه‌ڵكی دیكه‌ یاخیبوونی خۆم داپۆشیوه‌،
به‌ شاردنه‌وه‌ی تاوانه‌كانم له‌ باوه‌شی خۆم،
34
به‌هۆی ئه‌وه‌ی له‌ قسه‌ی خه‌ڵك ترساوم،
له‌ سووكایه‌تی پێكردنی خێڵه‌كان تۆقیوم،
له‌به‌ر ئه‌وه‌یه‌ كه‌ بێده‌نگم و له‌ ماڵه‌وه‌ دانیشتووم.
35
«خۆزگه‌ یه‌كێك ده‌بوو گوێی لێم ده‌گرت!
ئه‌وه‌تا مۆری من، با خودای هه‌ره‌ به‌ توانا وه‌ڵامم پێ بداته‌وه‌؛
ئه‌وه‌ی سكاڵا له‌ من ده‌كات با سكاڵانامه‌كه‌ی پێشكه‌ش بكات.
36
بێگومان له‌سه‌ر شانم هه‌ڵمده‌گرت،
ده‌مبه‌ست وه‌ك تاج به‌سه‌رمه‌وه‌.
37
ژماره‌ی هه‌نگاوه‌كانی خۆم پێی ده‌گوت،
پێشكه‌شیشم ده‌كرد وه‌ك بۆ فه‌رمانڕه‌وایه‌ك.
38
«ئه‌گه‌ر زه‌وییه‌كه‌م هاواری كردووه‌ له‌ دژی من و
هه‌موو هێڵی جووته‌كانی به‌ فرمێسك ته‌ڕ ده‌بێت،
39
ئه‌گه‌ر به‌روبوومه‌كه‌ی ئه‌وم به‌بێ پاره‌ خواردووه‌
یان گیانی كرێچییه‌كانیم كوژاندووه‌ته‌وه‌،
40
با له‌ جێی گه‌نم دڕك بڕووێت و
له‌ جێی جۆ زیوان.»
وشه‌كانی ئه‌یوب ته‌واو بوون.
  1. a. 31‏:12 \+xt بڕوانه‌ 26‏:6‏\+xt*.
  2. b. 31‏:27 مه‌به‌ست له‌ په‌رستنی خۆر و مانگ.