عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌رگری كۆتایی ئه‌یوب 
1
ئه‌یوب سه‌رله‌نوێ ده‌ستی به‌ قسه‌ كرده‌وه‌ و گوتی:
2
«خۆزگه‌م به‌ مانگه‌كانی ڕابردوو،
به‌و ڕۆژانه‌ی كه‌ خودا منی پاراست،
3
كاتێك چراكه‌ی خۆی له‌ سه‌رم هه‌ڵكرد و
به‌ ڕووناكی ئه‌و به‌ناو تاریكیدا ده‌ڕۆیشتم!
4
خۆزگه‌ به‌و ڕۆژانه‌ی كه‌ له‌ هه‌ڕه‌تی هێز و توانادا بووم،
هاوڕێیه‌تییه‌ گیانی به‌گیانییه‌كه‌م له‌گه‌ڵ خودا چادره‌كه‌ی منی به‌ره‌كه‌تدار كردبوو،
5
خودای هه‌ره‌ به‌ توانا هێشتا له‌گه‌ڵم بوو و
منداڵه‌كانیشم له‌ چوارده‌ورم بوون،
6
كاتێك پێیه‌كانم به‌ شیر ده‌شوشت،
تاشه‌به‌ردیش جۆگه‌كانی زه‌یتی بۆ هه‌ڵده‌قوڵاندم.
7
«كاتێك بۆ لای ده‌روازه‌ی شاره‌كه‌ ده‌چووم و
له‌ گۆڕه‌پانه‌كه‌دا دیوه‌خانی خۆم ئاماده‌ ده‌كرد،
8
گه‌نجه‌كان كه‌ منیان بینی خۆیان ده‌شارده‌وه‌،
پیرانیش له‌به‌رم هه‌ڵده‌ستان و ڕاده‌وه‌ستان؛
9
پیاوه‌ گه‌وره‌كان نه‌یانده‌ویست قسه‌ بكه‌ن،
ده‌ستیان ده‌خسته‌ سه‌ر ده‌می خۆیان؛
10
پیاوماقوڵان ده‌نگیان لێ ده‌بڕا و
زمانیان به‌ مه‌ڵاشوویانه‌وه‌ ده‌نووسا.
11
ئه‌وه‌ی گوێی لێم ده‌بوو ستایشی ده‌كردم،
ئه‌و چاوه‌ی كه‌ ده‌یبینی شایه‌تی بۆ ده‌دام،
12
چونكه‌ ئه‌و هه‌ژارانه‌ی كه‌ هاواریان بۆ ده‌هێنام و
ئه‌و هه‌تیوانه‌ی كه‌ بێكه‌س بوون ڕزگارم ده‌كردن.
13
ئه‌وانه‌ی له‌ سه‌ره‌مه‌رگدا بوون به‌ره‌كه‌تیان ده‌دامێ و
دڵی بێوه‌ژنم ده‌هێنایه‌ قریوه‌.
14
ڕاستودروستیم له‌به‌ركرد و پۆشیم؛
دادپه‌روه‌ری وه‌ك كه‌وا و مێزه‌ره‌كه‌م بوو.
15
بووم به‌ چاو بۆ نابینایان و
به‌ قاچ بۆ شه‌لان.
16
من بۆ نه‌داران باوكێك ده‌بووم و
به‌رگریم له‌ كه‌سێك ده‌كرد كه‌ پێی ئاشنا نه‌بووم.
17
كه‌ڵبه‌ی سته‌مكارم وردوخاش ده‌كرد و
له‌نێو ددانه‌كانی نێچیرم ده‌ڕفاند.
18
«جا گوتم: ”له‌ناو لانه‌كه‌ی خۆم ڕۆح به‌ده‌سته‌وه‌ ده‌ده‌م و
وه‌ك لم ڕۆژگارم زۆر ده‌بێت.
19
ڕه‌گم به‌ره‌و ئاوه‌كان درێژ ده‌بێته‌وه‌،
به‌ درێژایی شه‌و شه‌ونم به‌سه‌ر چڵه‌كانمه‌وه‌ ده‌بێت.
20
شكۆمه‌ندیم به‌ هه‌میشه‌یی له‌گه‌ڵم ده‌بێت،
كه‌وانه‌كه‌م له‌ ده‌ستم نوێ ده‌بێته‌وه‌.“
21
«گوێیان له‌ من ده‌گرت و چاوه‌ڕێیان ده‌كرد
له‌ كاتی ڕاوێژكردنم گوێیان بۆم شل ده‌كرد.
22
له‌دوای قسه‌كانم هیچیان له‌ ده‌م نه‌ده‌هاته‌ ده‌ره‌وه‌؛
قسه‌كانم دڵۆپه‌ی به‌سه‌ریاندا كرد.
23
چاوه‌ڕێیان ده‌كردم وه‌ك چاوه‌ڕێی نمه‌ باران بكه‌ن و
ده‌میان ده‌كرده‌وه‌ وه‌ك بۆ بارانی به‌هار.
24
كاتێك له‌گه‌ڵیان ڕووخۆش ده‌بووم، باوه‌ڕیان نه‌ده‌كرد؛
كاتێك ڕازامه‌ندیم پیشان ده‌دا، چاوه‌ڕێ ئه‌وه‌یان نه‌ده‌كرد.
25
ڕێگام بۆیان هه‌ڵده‌بژارد و وه‌ك سه‌رۆك داده‌نیشتم؛
وه‌ك پاشایه‌ك له‌ناو سوپا نیشته‌جێ ده‌بووم،
وه‌ك ئه‌وه‌ی دڵنه‌وایی شیوه‌نگێڕان ده‌داته‌وه‌.