عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
وه‌ڵامی دووه‌می چۆفه‌ر 
1
چۆفه‌ری نه‌عماتیش وه‌ڵامی دایه‌وه‌:
2
«له‌به‌ر جۆشانی ناخم،
بیركردنه‌وه‌كانم هانم ده‌ده‌ن وه‌ڵام بده‌مه‌وه‌.
3
گوێم له‌ سه‌رزه‌نشته‌كانی تۆ ده‌بێت كه‌ سووكایه‌تیم پێ ده‌كه‌یت،
ڕۆحی تێگه‌یشتنم وام لێ ده‌كات وه‌ڵام بده‌مه‌وه‌.
4
«ئایا له‌ كۆنه‌وه‌ ئه‌مه‌ت نه‌زانیوه‌،
له‌و كاته‌وه‌ی مرۆڤ له‌سه‌ر زه‌وی دانراوه‌؟
5
هاواری خۆشی خراپه‌كاران كورته‌ و
خۆشی خوانه‌ناس بۆ ساتێكه‌.
6
هه‌رچه‌نده‌ لووتبه‌رزی خوانه‌ناس بگاته‌ ئاسمان و
سه‌ریشی له‌ هه‌ور بدات،
7
به‌ڵام وه‌ك ته‌پاڵه‌ خۆی بۆ هه‌تاهه‌تایه‌ له‌ناوده‌چێت و
ئه‌وانه‌ی بینیویانه‌ ده‌ڵێن: ”كوا؟“
8
وه‌ك خه‌ون ده‌فڕێت و ئیتر نامێنێت،
وه‌ك مۆته‌كه‌یه‌ك ده‌رده‌كرێت.
9
چاوێك كه‌ بینیویه‌تی دیسان نایبینێته‌وه‌،
جارێكی دیكه‌ شوێنه‌كه‌شی نابینرێت.
10
كوڕه‌كانی هه‌وڵ ده‌ده‌ن هه‌ژاران ڕازی بكه‌ن؛
ده‌سته‌كانی سامانه‌كه‌ی ده‌ده‌نه‌وه‌.
11
ئێسكه‌كانی پڕ له‌ گه‌نجیێتین،
به‌ڵام ئه‌و گه‌نجیێتییه‌ له‌گه‌ڵیدا له‌ناو خاك ڕاده‌كشێت.
12
«كه‌ خراپه‌ له‌ناو ده‌می شیرین بێت و
له‌ژێر زمانی بیشارێته‌وه‌،
13
دڵی پێی سووتاو و به‌جێی نه‌هێشت،
به‌ڵكو له‌ناو گه‌رویدا به‌ندی كرد،
14
به‌ڵام نانه‌كه‌ی له‌ناو ڕیخۆڵه‌كانی ده‌گۆڕێت،
ده‌بێته‌ تاڵی ژه‌هری مار له‌ناو سكی.
15
سامانێكی قووت دا و ده‌یڕشێنێته‌وه‌؛
خودا له‌ناو سكی وه‌ده‌ری ده‌نێت.
16
ژه‌هری مار ده‌مژێت؛
زمانی مار ده‌یكوژێت.
17
جۆگه‌كان نابینێت،
ڕووباره‌ ڕۆیشتووه‌كانی هه‌نگوین و قه‌یماغ.
18
به‌ری ماندووبوونه‌كه‌ی دێنێته‌وه‌ و قووتی نادات،
له‌ قازانجی بازرگانییه‌كه‌ی خۆشی نابینێت.
19
چونكه‌ هه‌ژارانی وردوخاش كرد و به‌جێی هێشتن؛
ده‌ستی به‌سه‌ر ماڵێكدا گرت كه‌ بنیادی نه‌نابوو.
20
«بێگومان له‌ ناخیدا نه‌یزانی به‌س چییه‌؛
ئه‌وه‌ی ئاره‌زووی ده‌كات ده‌ربازی ناكات.
21
خواردنه‌كه‌ی پاشماوه‌ی نییه‌؛
ئیتر خێروخۆشییه‌كه‌ی به‌رده‌وام نابێت.
22
له‌وپه‌ڕی سه‌ڵته‌نه‌تیدا تووشی ته‌نگانه‌ ده‌بێت،
ده‌ستی هه‌موو ڕه‌نجده‌رێكی دێته‌ سه‌ر.
23
له‌ كاتێكدا سكی خۆی پڕ ده‌كات،
خودا گڕی تووڕه‌یی خۆی بۆ ده‌نێرێت و
وه‌كو باران به‌سه‌ریدا ده‌یبارێنێت.
24
له‌ چه‌كی ئاسنه‌وه‌ ڕاده‌كات و
تیری بڕۆنز ده‌یبڕێت.
25
تیره‌كه‌ی ڕاكێشا و له‌ پشتییه‌وه‌ هاته‌ ده‌ره‌وه‌،
نووكی بریسكه‌دار زراوی بڕی.
ترسی به‌سه‌ره‌وه‌یه‌؛
26
هه‌موو تاریكییه‌ك بۆ گه‌نجینه‌كانی شاردراوه‌ته‌وه‌.
ئاگرێك ده‌یخوات فووی لێ نه‌كراوه‌،
ئه‌وه‌ی له‌ چادره‌كه‌ی مابێته‌وه‌ لووشی ده‌دات.
27
ئاسمان تاوانه‌كه‌ی ئاشكرا ده‌كات،
زه‌وی لێی ڕاده‌په‌ڕێت.
28
له‌و ڕۆژه‌ی كه‌ خودا تووڕه‌ییه‌كه‌ی ده‌بارێنێت،
لافاوێك ماڵه‌كه‌ی ده‌بات.
29
ئه‌مه‌ به‌شی كه‌سی خراپه‌ له‌ خوداوه‌،
میراتی دیاریكراوه‌ له‌ خوداوه‌.»