عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
دووه‌م تاقیكردنه‌وه‌ی ئه‌یوب 
1
ئه‌وه‌ بوو ڕۆژێكیان فریشته‌كان هاتن بۆ ئه‌وه‌ی له‌به‌رده‌م یه‌زدان بوه‌ستن، شه‌یتانیش له‌گه‌ڵیان هات.
2
یه‌زدان به‌ شه‌یتانی فه‌رموو: «له‌كوێوه‌ هاتیت؟»
شه‌یتانیش وه‌ڵامی یه‌زدانی دایه‌وه‌: «له‌ گه‌ڕان له‌سه‌ر زه‌وی و هاتوچۆكردن تێیدا.»
3
جا یه‌زدان به‌ شه‌یتانی فه‌رموو: «خۆ چاوت نه‌بڕیوه‌ته‌ سه‌ر ئه‌یوبی به‌نده‌م؟ چونكه‌ له‌ زه‌ویدا كه‌س نییه‌ وه‌ك ئه‌و، كه‌سێكی وا ڕاست و بێ كه‌موكوڕی، له‌خواترسه‌ و له‌ خراپه‌ لاده‌دات. هه‌تا ئێستاش پابه‌نده‌ به‌وه‌ی كه‌سێكی دروست بێت، هه‌رچه‌نده‌ هانت دام بۆ ئه‌وه‌ی به‌بێ هۆ لووشی بده‌م.»
4
شه‌یتانیش وه‌ڵامی یه‌زدانی دایه‌وه‌: «پێست به‌ پێست! مرۆڤ هه‌رچی هه‌بێت بۆ ڕزگاركردنی ژیانی خۆی ده‌یدات.
5
به‌ڵام ئێستا ده‌ست درێژبكه‌ و له‌ ئێسك و گۆشتی خۆی بده‌، بزانه‌ چۆن به‌ره‌و ڕوو نه‌فره‌تت لێ ده‌كات.»
6
یه‌زدانیش به‌ شه‌یتانی فه‌رموو: «ئه‌وه‌تا له‌به‌رده‌ستی خۆتدایه‌، به‌ڵام ژیانی بپارێزه‌.»
7
ئیتر شه‌یتان له‌به‌رده‌م یه‌زدان چووه‌ ده‌ره‌وه‌ و ئه‌یوبی تووشی برینی پیس كرد، له‌ بنی پێیه‌وه‌ هه‌تا ته‌پڵی سه‌ری.
8
ئه‌ویش پارچه‌ گۆزه‌یه‌كی بۆ خۆخوراندن له‌ده‌ست گرت و له‌ناو خۆڵه‌مێش دانیشتبوو.
9
ژنه‌كه‌ی پێی گوت: «ئایا هه‌تا ئێستاش هه‌ر پابه‌ندیت به‌ دروستییه‌كه‌ته‌وه‌؟ نه‌فره‌تی له‌ خودا بكه‌ و بمره‌!»
10
ئه‌ویش پێی گوت: «وه‌ك نه‌زانێك قسه‌ ده‌كه‌یت، ئایا چاكه‌ی خودا قبوڵ بكه‌ین، به‌ڵام نه‌هامه‌تی قبوڵ نه‌كه‌ین؟»
له‌ هه‌موو ئه‌مه‌دا ئه‌یوب گوناهی به‌سه‌ر لێودا نه‌هات.
سێ هاوڕێكه‌ی ئه‌یوب 
11
سێ هاوڕێكه‌ی ئه‌یوب هه‌موو ئه‌و نه‌هامه‌تییانه‌یان بیست كه‌ به‌سه‌ر ئه‌یوب هاتووه‌، جا هه‌ریه‌كه‌ له‌ جێی خۆیه‌وه‌ هات، ئه‌لیفازی تێمانی و بیلده‌دی شوحی و چۆفه‌ری نه‌عماتی، ڕێككه‌وتن له‌سه‌ر ئه‌وه‌ی بێن و دڵنه‌وایی بكه‌ن و دڵی بده‌نه‌وه‌.
12
كاتێك له‌ دووره‌وه‌ چاویان هه‌ڵبڕی، نه‌ده‌ناسرایه‌وه‌. ده‌نگیان به‌رزكرده‌وه‌ و گریان، هه‌ریه‌كه‌ كه‌واكه‌ی خۆی دادڕی و به‌ره‌و ئاسمان خۆڵیان به‌سه‌ر خۆیاندا كرد.
13
له‌سه‌ر زه‌وی له‌گه‌ڵی دانیشتن، حه‌وت ڕۆژ و حه‌وت شه‌و، كه‌سیش به‌ وشه‌یه‌ك نه‌یدوواند، چونكه‌ بینییان خه‌مۆكیه‌كه‌ی له‌ ڕاده‌به‌ده‌ره‌.