عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
ڕۆحم شكا،
ڕۆژگارم كوژایه‌وه‌،
گۆڕ چاوه‌ڕێی منه‌.
2
بێگومان گاڵته‌جاڕان له‌ ده‌ورمدان و
ناچار چاودێری كێشمه‌كێشیان بكه‌م.
3
«تكایه‌ له‌لای خۆت ببه‌ پشتگیرم،
بێجگه‌ له‌ تۆ كێ هه‌یه‌ ببێته‌ كه‌فیلم؟
4
تێگه‌یشتنت له‌ مێشكیان شاردووه‌ته‌وه‌،
له‌به‌ر ئه‌وه‌ به‌رزیان ناكه‌یته‌وه‌.
5
ئه‌وه‌ی له‌ پێناوی پاره‌ په‌نجه‌ی تاوان بۆ هاوڕێیه‌كانی ڕاده‌كێشێت،
نه‌بوونی چاوی منداڵه‌كانی ده‌پوكێنێته‌وه‌.
6
«منی كرده‌ په‌ندی گه‌لان و
بووم به‌وه‌ی تف له‌ ڕووم بكرێت.
7
چاوه‌كانم له‌به‌ر خه‌م كز بوون،
هه‌موو ئه‌ندامه‌كانم زۆر لاواز بوون.
8
ئه‌وانه‌ی ڕاستن به‌مه‌ سه‌رسام ده‌بن و
بێتاوان به‌سه‌ر خوانه‌ناسدا ڕاده‌په‌ڕێت.
9
كه‌سی ڕاستودروست ڕێگای خۆی ده‌گرێت و
ئه‌وه‌ی ده‌ست پاكه‌ هێزی بۆ زیاد ده‌كرێت.
10
«ئێستا وه‌رنه‌وه‌، دووباره‌ هه‌وڵ بده‌ن،
به‌ڵام من هیچ دانایه‌كتان تێدا نادۆزمه‌وه‌.
11
ڕۆژگارم به‌سه‌رچوو، مه‌به‌سته‌كانم هه‌ڵكه‌نران.
له‌گه‌ڵ ئه‌وه‌شدا ئاره‌زووه‌كانی دڵم
12
شه‌و ده‌كه‌ن به‌ ڕۆژ،
له‌ تاریكیدا ڕووناكی به‌ نزیك ده‌بینن.
13
ئه‌گه‌ر هیوا بخوازم جیهانی مردووان ببێت به‌ ماڵم و
له‌ تاریكیدا نوێنه‌كه‌م ڕابخه‌م،
14
ئه‌گه‌ر به‌ گۆڕم گوت: ”تۆ باوكی منیت،“
به‌ كرمیش: ”تۆ دایكی منیت“ یان ”خوشكی منیت،“
15
ئیتر ئومێدم كوا؟
كێ ته‌ماشای ئومێدم ده‌كات؟
16
ئایا به‌ره‌و قووڵایی جیهانی مردووان ده‌چێته‌ خواره‌وه‌؟
ئایا پێكه‌وه‌ له‌ناو خۆڵ شۆڕده‌بینه‌وه‌؟»