عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
وه‌ڵامی یه‌كه‌می چۆفه‌ر 
1
چۆفه‌ری نه‌عماتیش وه‌ڵامی دایه‌وه‌:
2
«ئایا ئه‌م هه‌موو قسانه‌ شایانی وه‌ڵام نین،
یاخود پیاوی زۆربڵێ ئه‌ستۆ پاك ده‌بێت؟
3
ئایا قسه‌ پووچه‌كانت خه‌ڵكی بێده‌نگ ده‌كات،
یان گاڵته‌ ده‌كه‌یت و كه‌س نییه‌ شه‌رمه‌زارت بكات؟
4
به‌ خودا ده‌ڵێیت ”باوه‌ڕم بێگه‌رده‌ و
من له‌به‌رچاوی تۆدا پاكم،“
5
به‌ڵام خۆزگه‌ خودا ده‌دوا و
لێوه‌كانی به‌رامبه‌ر به‌ تۆ ده‌كرده‌وه‌ و
6
نهێنییه‌كانی دانایی بۆت ئاشكرا ده‌كرد،
چونكه‌ دانایی لایه‌كی ئاشكرا و لایه‌كی شاردراوه‌شی هه‌یه‌،
جا ده‌تزانی كه‌ خودا له‌ تاوانه‌كه‌ی خۆت كه‌متر سزای داویت.
7
«ئایا ده‌توانیت له‌ نهێنییه‌كانی خودا بگه‌یت؟
ئایا ده‌توانیت بگه‌یته‌ سنووری خودای هه‌ره‌ به‌ توانا؟
8
ئه‌و له‌ ئاسمان به‌رزتره‌، ئیتر تۆ چی ده‌كه‌یت،
له‌ جیهانی مردووان قووڵتره‌، ئیتر تۆ چی ده‌زانیت؟
9
پێوانه‌كه‌ی له‌ زه‌وی درێژتره‌ و
له‌ ده‌ریاش پانتره‌.
10
«ئه‌گه‌ر هات و تۆی خسته‌ به‌ندیخانه‌وه‌ و
تۆی برده‌ دادگا، كێ ڕێی لێ ده‌گرێت؟
11
چونكه‌ ئه‌و ده‌زانێت خراپه‌كاران كێن و
خراپه‌كاری ده‌بینێت، وا ده‌زانیت ئاگای لێ نییه‌؟
12
به‌ڵام پیاوێكی بێ ئه‌قڵ نابێته‌ تێگه‌یشتوو
هه‌تا جاشكی كه‌ره‌كێوی وه‌ك مرۆڤ له‌دایك نه‌بێت.
13
«ئه‌گه‌ر تۆ دڵی خۆت ئاماده‌ بكه‌یت و
ده‌ستی خۆتی بۆ پان بكه‌یته‌وه‌،
14
ئه‌گه‌ر ئه‌و خراپه‌یه‌ی له‌ناو ده‌ستته‌ دووری بخه‌یته‌وه‌ و
نه‌هێڵیت سته‌م له‌ناو چادره‌كه‌ت نیشته‌جێ بێت،
15
ئه‌و كاته‌ به‌بێ كه‌موكوڕی شه‌رم ناكه‌یت و
چه‌سپاو ده‌بیت و ناترسیت.
16
چه‌رمه‌سه‌ری له‌بیر ده‌كه‌یت و
وه‌ك ئاوێكی تێپه‌ڕیوو یادی ده‌كه‌یته‌وه‌.
17
ژیانت له‌ نیوه‌ڕۆ ڕۆشنتر ده‌بێت و
تاریكی وه‌ك ڕووناكی به‌یانی لێدێت.
18
دڵنیا ده‌بیت چونكه‌ ئومێدت هه‌یه‌،
ده‌وروبه‌ره‌كه‌ت ده‌پشكنیت و به‌ ئاسووده‌ییه‌وه‌ پشوو ده‌ده‌یت.
19
خۆت مات ده‌كه‌یت و كه‌س نییه‌ هه‌راسانت بكات و
زۆر كه‌س له‌ ڕووی تۆ ده‌پاڕێنه‌وه‌.
20
به‌ڵام چاوی به‌دكاران كوێر ده‌بن و
په‌ناگا نامێنێت بۆ ده‌ربازبوون؛
ئاواتیان ڕۆح سپاردنه‌.»