عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .
کتێبی پیرۆز
- ده‌ركه‌وتنی عیسا له‌سه‌ر ده‌ریاچه
- 1
- دوای ئه‌مه دیسان عیسا له ده‌ریاچه‌ی جه‌لیل[a] خۆی بۆ قوتابییه‌كان ده‌رخست. به‌م شێوه‌یه خۆی ده‌رخست:
- 2
- شیمۆن په‌ترۆس و تۆماس كه به دیدمۆس ناسراوه، له‌گه‌ڵ ناتانئیل كه خه‌ڵكی قانای جه‌لیل بوو، هه‌روه‌ها كوڕه‌كانی زه‌بدی و دوو قوتابی دیكه‌ی ئه‌و پێكه‌وه بوون.
- 3
- شیمۆن په‌ترۆس پێی گوتن: «بۆ ڕاو ده‌چم.» پێیان گوت: «ئێمه‌ش له‌گه‌ڵت دێین.» ئینجا ڕۆیشتن و سواری به‌له‌م بوون، به‌ڵام له‌و شه‌وه‌دا هیچیان نه‌گرت.
- 4
- كاتی به‌ره‌به‌یان، عیسا له‌سه‌ر كه‌ناره‌كه وه‌ستا، به‌ڵام قوتابییه‌كان نه‌یانزانی ئه‌وه عیسایه.
- 5
- عیسا پێی فه‌رموون: «كوڕینه، هیچ ماسیتان پێنییه؟» وه‌ڵامیان دایه‌وه: «نه‌خێر.»
- 6
- پێی فه‌رموون: «تۆڕه‌كه هه‌ڵبده‌نه لای ڕاستی به‌له‌مه‌كه، ماسی ده‌بیننه‌وه.» جا هه‌ڵیاندا و ئیتر له‌به‌ر زۆری ئه‌و ماسییانه‌ی تێیدا بوو نه‌یانتوانی تۆڕه‌كه ڕابكێشنه ناو به‌له‌مه‌كه.
- 7
- ئه‌و قوتابییه‌ی عیسا خۆشی ده‌ویست به په‌ترۆسی گوت: «ئه‌وه عیسای خاوه‌ن شكۆیه!» كاتێك په‌ترۆس بیستی «ئه‌وه عیسای خاوه‌ن شكۆیه،» خۆی به جله‌كانی داپۆشی چونكه ڕووت بوو، خۆی هه‌ڵدایه ناو ئاوه‌كه‌وه.
- 8
- قوتابییه‌كانی دیكه به به‌له‌مه‌كه هاتن و تۆڕی ماسییه‌كه‌یان ڕاده‌كێشا، چونكه له وشكانی دوور نه‌بوون، ته‌نها دوو سه‌د باڵ[b] .
- 9
- كاتێك دابه‌زینه وشكانی، بینییان وا خه‌ڵووز ئاماده كراوه و ماسی خراوه‌ته سه‌ری و نان دانراوه.
- 10
- عیسا پێی فه‌رموون: «له‌و ماسییانه بهێنن كه ئێستا گرتتان.»
- 11
- شیمۆن په‌ترۆسیش سه‌ركه‌وت و تۆڕه‌كه‌ی ڕاكێشایه سه‌ر وشكانی، سه‌د و په‌نجا و سێ ماسی گه‌وره‌ی تێدابوو، له‌گه‌ڵ زۆریه‌كه‌شی تۆڕه‌كه نه‌دڕا.
- 12
- عیسا پێی فه‌رموون: «وه‌رن بخۆن.» هیچ كام له قوتابییه‌كان نه‌یانوێرا پرسیاری لێ بكه‌ن: «تۆ كێیت؟» زانییان عیسای خاوه‌ن شكۆیه.
- 13
- عیسا هات، نانه‌كه‌ی هه‌ڵگرت و پێیدان، ماسییه‌كه‌ش به هه‌مان شێوه.
- 14
- ئه‌مه سێیه‌م جاره عیسا بۆ قوتابییه‌كان ده‌ربكه‌وێت پاش هه‌ستانه‌وه‌ی له‌نێو مردوواندا.
- گه‌ڕانه‌وه‌ی په‌ترۆس بۆ خزمه‌ت
- 15
- دوای ئه‌وه‌ی نانیان خوارد عیسا به شیمۆن په‌ترۆسی فه‌رموو: «شیمۆنی یۆنا، منت له‌وانه خۆشتر ده‌وێت؟»
پێی گوت: «به‌ڵێ گه‌وره‌م، ده‌زانیت كه تۆم خۆشده‌وێت.»
پێی فه‌رموو: «به‌رخه‌كانم بله‌وه‌ڕێنه.» - 16
- دیسان پێی فه‌رمووه‌وه: «شیمۆنی یۆنا، منت خۆشده‌وێت؟»
پێی گوت: «به‌ڵێ گه‌وره‌م، ده‌زانیت خۆشمده‌وێیت.»
پێی فه‌رموو: «ببه به شوانی مه‌ڕه‌كانم.» - 17
- سێیه‌م جار پێی فه‌رموو: «شیمۆنی یۆنا، منت خۆشده‌وێت؟»
په‌ترۆس دڵگران بوو، چونكه سێ جار پێی فه‌رموو: «منت خۆشده‌وێت؟» پێی گوت: «ئه‌ی گه‌وره‌م، هه‌موو شتێك ده‌زانیت. ده‌زانیت كه خۆشمده‌وێیت.»
عیسا پێی فه‌رموو: «مه‌ڕه‌كانم بله‌وه‌ڕێنه. - 18
- ڕاستی ڕاستیت پێ ده‌ڵێم، كاتێك گه‌نج بوویت پشتێنه‌كه‌تت ده‌به‌ست و بۆ هه‌ركوێ ده‌تویست، ده‌چوویت. به‌ڵام كاتێك پیر ده‌بیت ده‌ستت درێژ ده‌كه‌یت و یه‌كێكی دیكه پشتێنه‌كه‌ت ده‌به‌ستێت و ده‌تباته شوێنێك كه ناته‌وێت.»
- 19
- ئه‌مه‌ی گوت وه‌ك ئاماژه‌كردنێك بۆ مردنی په‌ترۆس كه به هۆیه‌وه شكۆداریی خودا ده‌رده‌خات. له‌دوای ئه‌مه پێی فه‌رموو: «دوام بكه‌وه!»
- 20
- په‌ترۆس ئاوڕی دایه‌وه و بینی كه ئه‌و قوتابییه‌ی كه عیسا خۆشی ده‌ویست دوایان كه‌وتووه، ئه‌وه‌ی له كاتی نانی ئێواره‌دا شانی به سنگی عیساوه نابوو، پێی گوت: «گه‌وره‌م، كێیه ئه‌وه‌ی به گرتنت ده‌دات؟»
- 21
- كاتێك په‌ترۆس ئه‌مه‌ی بینی به عیسای گوت: «گه‌وره‌م، ئه‌ی ئه‌مه چی لێدێت؟»
- 22
- عیساش پێی فه‌رموو: «ئه‌گه‌ر بمه‌وێت ده‌مێنێته‌وه هه‌تا دێمه‌وه، به تۆ چی؟ تۆ دوام بكه‌وه.»
- 23
- ئیتر ئه‌م قسه‌یه له‌نێو برایان وا بڵاو بووه‌وه كه ئه‌و قوتابییه نامرێت. به‌ڵام عیسا پێی نه‌فه‌رموو كه نامرێت، به‌ڵكو «ئه‌گه‌ر بمه‌وێت ده‌مێنێته‌وه هه‌تا دێمه‌وه، به تۆ چی؟»
- 24
- ئه‌مه‌ش ئه‌و قوتابییه‌یه كه ده‌رباره‌ی ئه‌م شتانه شایه‌تی ده‌دات و ئه‌م شتانه‌ی نووسیوه. ئێمه‌ش ده‌زانین شایه‌تییه‌كه‌ی ڕاسته.
- 25
- زۆر شتی دیكه هه‌یه عیسا كردوویه‌تی، ئه‌گه‌ر یه‌ك له‌دوای یه‌ك بنووسرایه‌ته‌وه، وابزانم خودی جیهان جێگای ئه‌و په‌ڕتووكه نووسراوانه‌ی تێدا نه‌ده‌بووه‌وه.
