عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
به‌ڵێنی گه‌ڕانه‌وه‌ 
1
یه‌رمیا كه‌ هێشتا له‌ حه‌وشه‌ی پاسه‌وانه‌كان به‌ند كرابوو، دووباره‌ فه‌رمایشتی یه‌زدانی بۆ هاته‌وه‌:
2
«یه‌زدانی دروستكه‌ری زه‌وی كه‌ شێوه‌ی كێشاوه‌ هه‌تا بیچه‌سپێنێت، ناوی یه‌زدانه‌، ئه‌مه‌ ده‌فه‌رموێت:
3
”بانگم بكه‌، وه‌ڵامت ده‌ده‌مه‌وه‌ و شته‌ مه‌زنه‌كانت پێ ڕاده‌گه‌یه‌نم، شته‌ په‌ی پێ نه‌براوه‌كان كه‌ نایانزانیت.“
4
چونكه‌ یه‌زدانی په‌روه‌ردگاری ئیسرائیل سه‌باره‌ت به‌ خانووه‌كانی ئه‌م شاره‌ و كۆشكه‌كانی پاشاكانی یه‌هودا، ئه‌وانه‌ی تێكدران بۆ به‌ره‌نگاربوونه‌وه‌ی مه‌ته‌رێز و شمشێر
5
له‌ جه‌نگی دژی بابلییه‌كان، یه‌زدان ئه‌مه‌ ده‌فه‌رموێت: ”پڕ بكرێن له‌ لاشه‌ی ئه‌و كه‌سانه‌ی به‌ تووڕه‌یی و به‌ جۆشی خۆم لێم دان، ئه‌وانه‌ی له‌به‌ر هه‌موو خراپه‌كانی ئه‌وان ڕووی خۆم له‌م شاره‌ وه‌رگێڕا.
6
«”له‌گه‌ڵ ئه‌وه‌شدا من ته‌ندروستی و چاكبوونه‌وه‌ی بۆ دێنم، گه‌له‌كه‌م چاك ده‌كه‌مه‌وه‌، ئاشتی و ئارامییه‌كی فراوانیان بۆ فه‌راهه‌م ده‌كه‌م.
7
یه‌هودا و ئیسرائیل له‌ ڕاپێچكراوی ده‌هێنمه‌وه‌ و وه‌ك پێشوویان بنیادیان ده‌نێمه‌وه‌.
8
پاكیان ده‌كه‌مه‌وه‌ له‌ هه‌موو گوناهه‌كانیان كه‌ له‌ دژی من كردوویانه‌، له‌ هه‌موو گوناه و یاخیبوونه‌كانیان خۆشده‌بم كه‌ له‌ دژی من كردوویانه‌.
9
جا ئه‌م شاره‌ بۆم ده‌بێته‌ ناوبانگ و شادی، ستایشكردن و شانازی، له‌لای هه‌موو نه‌ته‌وه‌كانی سه‌ر زه‌وی كه‌ ئه‌م هه‌موو چاكه‌یه‌ ده‌بیستنه‌وه‌ من بۆی ده‌كه‌م. جا ده‌ترسن و له‌رز ده‌یانگرێت، له‌به‌ر هه‌موو ئه‌و چاكه‌یه‌ و هه‌موو ئه‌و ئاشتییه‌ی كه‌ من بۆی فه‌راهه‌م ده‌كه‌م.“
10
«یه‌زدان ئه‌مه‌ ده‌فه‌رموێت: ”سه‌باره‌ت به‌م شوێنه‌ی ئێوه‌ ده‌ڵێن، ’وێرانه‌، بێ مرۆڤ و بێ ئاژه‌ڵه‌.‘ به‌ڵام شارۆچكه‌كانی یه‌هودا و شه‌قامه‌كانی ئۆرشه‌لیم وێرانن، بێ مرۆڤ و بێ دانیشتووان و بێ ئاژه‌ڵن،
11
ده‌نگی شادی و ده‌نگی خۆشی ده‌بیسترێت، ده‌نگی زاوا و ده‌نگی بووك، ده‌نگی ئه‌وانه‌ی قوربانی سوپاسگوزاری ده‌هێننه‌ ناو ماڵی یه‌زدان، كه‌ ده‌ڵێن:
«”’ستایشی یه‌زدانی سوپاسالار بكه‌ن،
چونكه‌ یه‌زدان چاكه‌،
خۆشه‌ویستییه‌ نه‌گۆڕه‌كه‌ی هه‌تاهه‌تاییه‌.‘
یه‌زدان ده‌فه‌رموێت، ڕاپێچكراوی خاكه‌كه‌ ده‌گه‌ڕێنمه‌وه‌ و وه‌ك پێشتریان لێده‌كه‌مه‌وه‌.“
12
«یه‌زدانی سوپاسالار ئه‌مه‌ ده‌فه‌رموێت: ”له‌م شوێنه‌ وێرانه‌دا كه‌ بێ مرۆڤ و بێ ئاژه‌ڵه‌، جارێكی دیكه‌ له‌ هه‌موو شارۆچكه‌كانی جێی شه‌وینی شوانه‌كان و مانه‌وه‌ی مه‌ڕه‌كانی لێ ده‌بێت.
13
له‌ شارۆچكه‌كانی ناوچه‌ شاخاوییه‌كان و زوورگه‌كانی خۆرئاوا و نه‌قه‌ب و خاكی بنیامین، ده‌وروبه‌ری ئۆرشه‌لیم و شارۆچكه‌كانی یه‌هودا، جارێكی دیكه‌ مه‌ڕ به‌ژێر ده‌ستی ئه‌وه‌دا تێده‌په‌ڕێت كه‌ ده‌یانژمێرێت.[a] “ ئه‌وه‌ فه‌رمایشتی یه‌زدانه‌.»
14
یه‌زدان ده‌فه‌رموێت: «”ڕۆژێك دێت، ئه‌و به‌ڵێنه‌ چاكه‌ ده‌هێنمه‌ دی كه‌ سه‌باره‌ت به‌ بنه‌ماڵه‌ی ئیسرائیل و بنه‌ماڵه‌ی یه‌هودا فه‌رمووبووم.
15
«”له‌و سه‌رده‌مه‌دا و له‌و كاته‌دا
لقێكی ڕاستودروست بۆ داود ده‌رده‌كه‌م،
جا ڕاستودروستی و دادپه‌روه‌ری له‌سه‌ر زه‌وی په‌یڕه‌و ده‌كات.
16
له‌و ڕۆژانه‌دا یه‌هودا ڕزگار ده‌بێت،
ئۆرشه‌لیم به‌ ئاسووده‌یی نیشته‌جێ ده‌بێت.
ئه‌و ناوه‌ی كه‌ پێی ده‌ناسرێت:
یه‌زدان ڕاستودروستیمانه‌.“»
17
«چونكه‌ یه‌زدان ئه‌مه‌ ده‌فه‌رموێت: ”پیاو له‌ داود نابڕێت بۆ دانیشتن له‌سه‌ر ته‌ختی بنه‌ماڵه‌ی ئیسرائیل.
18
له‌ كاهینه‌ لێڤییه‌كانیش پیاو نابڕێت له‌به‌رده‌مم بۆ به‌رده‌وامیدان به‌ پێشكه‌شكردنی قوربانی سووتاندن، سووتاندنی پێشكه‌شكراوی دانه‌وێڵه‌ و ئاماده‌كردنی قوربانی سه‌ربڕاو.“»
19
هه‌روه‌ها فه‌رمایشتی یه‌زدان بۆ یه‌رمیا هات:
20
«یه‌زدان ئه‌مه‌ ده‌فه‌رموێت: ”ئه‌گه‌ر بتوانن په‌یمانه‌كه‌م له‌گه‌ڵ ڕۆژ و له‌گه‌ڵ شه‌ودا بشكێنن، تاكو ئیتر ڕۆژ و شه‌و له‌ كاتی خۆیاندا نه‌بن،
21
ئه‌وسا ده‌كرێ په‌یمانه‌كه‌م له‌گه‌ڵ داودی به‌نده‌م بشكێنرێت و كوڕی نه‌بێت بۆ ئه‌وه‌ی له‌سه‌ر ته‌خته‌كه‌ی ببێته‌ پاشا، هه‌روه‌ها له‌گه‌ڵ لێڤییه‌ كاهینه‌كانی خزمه‌تكارانم.
22
هه‌روه‌ك چۆن ئه‌ستێره‌كانی ئاسمان ناژمێردرێن و لمی ده‌ریا ئامار ناكرێت، ئاوا نه‌وه‌ی داودی به‌نده‌م و لێڤییه‌ خزمه‌تكاره‌كانم زیاد ده‌كه‌م.“»
23
ئینجا فه‌رمایشتی یه‌زدان بۆ یه‌رمیا هات:
24
«نه‌تبینیوه‌ ئه‌م گه‌له‌ باسی چی ده‌كه‌ن و ده‌ڵێن: ”ئه‌و دوو خێڵه‌ی[b] یه‌زدان هه‌ڵیبژاردن، ڕه‌تی كردنه‌وه‌.“ ئینجا سووكایه‌تییان به‌ گه‌له‌كه‌م كرد، وه‌ك ئه‌وه‌ی ئیتر نه‌ته‌وه‌ نه‌بێت له‌به‌رده‌میان.
25
یه‌زدان ئه‌مه‌ ده‌فه‌رموێت: ”ئه‌گه‌ر په‌یمانی خۆمم له‌گه‌ڵ ڕۆژ و شه‌و و فه‌رزه‌كانی ئاسمان و زه‌وی نه‌به‌ست،
26
ئه‌وسا نه‌وه‌ی یاقوب و داودی به‌نده‌م ڕه‌ت ده‌كه‌مه‌وه‌ و له‌ نه‌وه‌كه‌ی ئه‌و فه‌رمانڕه‌وایان به‌سه‌ر نه‌وه‌ی ئیبراهیم و ئیسحاق و یاقوبه‌وه‌ دانانێم، چونكه‌ من ڕاپێچكراوه‌كانیان ده‌گه‌ڕێنمه‌وه‌ و به‌زه‌ییم پێیاندا دێته‌وه‌.“»
  1. a. 33‏:13 نیشانه‌یه‌ بۆ هه‌بوونی ئاشتی و گه‌شه‌سه‌ندنی خاكه‌كه‌.
  2. b. 33‏:24 مه‌به‌ستی له‌ نه‌وه‌كانی یاقوب و داوده‌، بڕوانه‌ ئایه‌تی 26.