عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
یه‌رمیا كێڵگه‌یه‌ك ده‌كڕێت 
1
ئه‌مه‌ ئه‌و په‌یامه‌یه‌ كه‌ له‌لایه‌ن یه‌زدانه‌وه‌ بۆ یه‌رمیا هات، له‌ ساڵی ده‌یه‌می سدقیای پاشای یه‌هودا كه‌ ده‌كاته‌ ساڵی هه‌ژده‌مینی نه‌بوخودنه‌سر.
2
ئه‌و كاته‌ له‌شكری پاشای بابل گه‌مارۆی ئۆرشه‌لیمی دابوو، یه‌رمیای پێغه‌مبه‌ریش له‌ حه‌وشه‌ی پاسه‌وانه‌كانی كۆشكی پاشای یه‌هودا به‌ند كرابوو.
3
سدقیای پاشای یه‌هودا یه‌رمیای به‌ند كردبوو، پێی گوت: «بۆچی به‌م په‌یامه‌ پێشبینیت كرد؟ گوتت: ”یه‌زدان ئه‌مه‌ ده‌فه‌رموێت: خه‌ریكم ئه‌م شاره‌ ده‌ده‌مه‌ ده‌ست پاشای بابل و ده‌یگرێت.
4
سدقیای پاشای یه‌هوداش له‌ ده‌ست بابلییه‌كان ده‌رباز نابێت، به‌ڵكو ده‌درێته‌ ده‌ست پاشای بابله‌وه‌، ڕووبه‌ڕوو قسه‌ی له‌گه‌ڵ ده‌كات، چاوه‌كانی ئه‌و ده‌بینێت.
5
سدقیا ده‌باته‌ بابل، له‌وێ ده‌مێنێته‌وه‌ هه‌تا سزاكه‌ی ته‌واو وه‌رده‌گرێت. ئه‌گه‌ر له‌گه‌ڵ بابلییه‌كان بجه‌نگن سه‌ر ناكه‌ون. ئه‌وه‌ فه‌رمایشتی یه‌زدانه‌.“»
6
ئینجا یه‌رمیا گوتی: «فه‌رمایشتی یه‌زدانم بۆ هات:
7
حه‌نه‌مێلی كوڕی شه‌لومی مامت دێته‌ لات و پێت ده‌ڵێت: ”ئه‌و كێڵگه‌یه‌ی له‌ عه‌ناتۆت هه‌مه‌ بۆ خۆتی بكڕه‌، چونكه‌ ماف و ئه‌ركی تۆیه‌ بیكڕیته‌وه‌[a] .“
8
«جا به‌پێی فه‌رمایشتی یه‌زدان حه‌نه‌مێلی كوڕی مامم هاته‌ لام بۆ حه‌وشه‌ی پاسه‌وانه‌كان و پێی گوتم: ”كێڵگه‌كه‌م بكڕه‌، ئه‌وه‌ی له‌ عه‌ناتۆته‌ له‌ خاكی بنیامین، چونكه‌ مافی كڕینه‌وه‌ و خاوه‌نداریێتیت هه‌یه‌، بۆ خۆت بیكڕه‌.“
«جا زانیم ئه‌وه‌ فه‌رمایشتی یه‌زدانه‌.
9
منیش كێڵگه‌كه‌م له‌ حه‌نه‌مێلی كوڕی مامم كڕی، ئه‌وه‌ی له‌ عه‌ناتۆته‌، زیوه‌كه‌شم بۆی كێشا، حه‌ڤده‌ شاقل زیو.
10
گرێبه‌ستم له‌ كاغه‌زێك نووسی و مۆرم كرد و چه‌ند كه‌سێكم لێكرد به‌ شایه‌ت، زیوه‌كه‌شم به‌ ته‌رازوو كێشا.
11
گرێبه‌ستی كڕینه‌كه‌م له‌ دوو وێنه‌دا برد، وێنه‌یه‌كی داخراو كه‌ مه‌رج و به‌نده‌كانی تێدابوو، له‌گه‌ڵ وێنه‌یه‌كی كراوه‌،
12
گرێبه‌ستی كڕینه‌كه‌م دایه‌ باروخی كوڕی نێرییا كوڕی مه‌حسێیا، له‌به‌رچاوی حه‌نه‌مێلی ئامۆزام و ئه‌و شایه‌تانه‌ی له‌ گرێبه‌ستی كڕینه‌كه‌ نووسرابوون، هه‌روه‌ها له‌به‌رچاوی هه‌موو ئه‌و جوله‌كانه‌ی له‌ حه‌وشه‌ی پاسه‌وانه‌كان دانیشتبوون.
13
«له‌به‌رچاویان باروخم ڕاسپارد و گوتم:
14
”یه‌زدانی سوپاسالار، خودای ئیسرائیل ده‌فه‌رموێت: ئه‌م گرێبه‌ستانه‌ هه‌ڵبگره‌، گرێبه‌سته‌ مۆركراوه‌كه‌ی كڕین و ئه‌م له‌به‌رگیراوه‌یه‌ی گرێبه‌سته‌كه‌ له‌ناو گۆزه‌یه‌كی گڵین دابنێ، تاوه‌كو بۆ ماوه‌یه‌كی درێژ بمێنێته‌وه‌،
15
چونكه‌ یه‌زدانی سوپاسالار، خودای ئیسرائیل ئه‌مه‌ ده‌فه‌رموێت: جارێكی دیكه‌ دیسان له‌م خاكه‌دا خانوو و كێڵگه‌ و ڕه‌ز ده‌كڕدرێته‌وه‌.“
16
«دوای ئه‌وه‌ی گرێبه‌سته‌كه‌ی كڕینم دایه‌ باروخی كوڕی نێرییا، نوێژم بۆ یه‌زدان كرد و گوتم:
17
«ئای، ئه‌ی یه‌زدانی باڵاده‌ست، ئه‌وه‌تا تۆ به‌ توانای مه‌زن و ده‌ستی به‌هێزه‌وه‌ ئاسمان و زه‌ویت دروستكردووه‌ و هیچ شتێك له‌لای تۆ قورس نییه‌.
18
خۆشه‌ویستی نه‌گۆڕ بۆ هه‌زاران به‌ده‌رده‌خه‌یت، به‌ڵام تۆ سزای كوڕ ده‌ده‌یت له‌سه‌ر ئه‌و تاوانه‌ی باوكی له‌پێش ئه‌و كردوویه‌تی. ئه‌ی خودای گه‌وره‌ و پاڵه‌وان، ئه‌وه‌ی ناوت یه‌زدانی سوپاسالاره‌،
19
له‌ پلاندانان مه‌زنی، له‌ كاركردندا به‌ توانای، چاوه‌كانت له‌سه‌ر هه‌موو ڕه‌فتاره‌كانی ئاده‌میزاد كراوه‌ن، هه‌تا هه‌ریه‌كه‌ و پاداشتی شایسته‌ی ڕه‌فتار و كرده‌وه‌كانی بده‌یته‌وه‌.
20
تۆ نیشانه‌ و په‌رجووه‌كانت[b] له‌ خاكی میسردا نواند، به‌رده‌وام هه‌تا ئه‌مڕۆش له‌ ئیسرائیل و له‌نێو هه‌موو مرۆڤایه‌تیدا ده‌یاننوێنیت، به‌مه‌ش ناوێكت به‌ده‌ستهێناوه‌ كه‌ هێشتا ماوه‌.
21
به‌ نیشانه‌ و په‌رجوو، به‌ ده‌ستێكی پۆڵایین و بازووێكی به‌هێز، به‌ ترسێكی گه‌وره‌وه‌، ئیسرائیلی گه‌لی خۆتت له‌ خاكی میسر ده‌رهێنا.
22
ئه‌م خاكه‌ت پێدان كه‌ سوێندت خواردبوو بیده‌یته‌ باوباپیرانیان، خاكێك شیر و هه‌نگوینی لێ ده‌ڕژێت.
23
جا هاتن و بوونه‌ خاوه‌نی، به‌ڵام گوێیان له‌ تۆ نه‌گرت، فێركردنی تۆیان په‌یڕه‌و نه‌كرد، ئه‌وانه‌یان نه‌كرد كه‌ تۆ فه‌رمانت پێكردن بیانكه‌ن. جا هه‌موو ئه‌م خراپه‌یه‌ت به‌سه‌ریاندا هێنا.
24
«ئه‌وه‌تا مه‌ته‌رێز بۆ ده‌ست به‌سه‌رداگرتنی شاره‌كه‌ لێدراوه‌. شاره‌كه‌ به‌هۆی شمشێر و قاتوقڕی و ده‌رده‌وه‌ ڕاده‌ستی بابلییه‌كان ده‌كرێت كه‌ له‌ دژی ده‌جه‌نگن. هه‌روه‌ك ده‌یبینیت، ئه‌وه‌ی تۆ فه‌رمووت ڕوویدا.
25
ئه‌ی یه‌زدانی باڵاده‌ست، تۆ خۆت پێت فه‌رمووم: ”به‌ شایه‌تی چه‌ند شایه‌تێك كێڵگه‌كه‌ به‌ زیو بۆ خۆت بكڕه‌،“ كه‌چی شاره‌كه‌ت داوه‌ته‌ ده‌ست بابلییه‌كان.»
26
ئینجا فه‌رمایشتی یه‌زدان بۆ یه‌رمیا هات:
27
«من یه‌زدانم، خودای هه‌موو ئاده‌میزاد، ئایا هیچ شتێك هه‌یه‌ بۆ من قورس بێت؟
28
له‌به‌ر ئه‌وه‌ یه‌زدان ئه‌مه‌ ده‌فه‌رموێت: من خه‌ریكم ئه‌م شاره‌ بده‌مه‌ ده‌ست بابلییه‌كان و ده‌ست نه‌بوخودنه‌سری پاشای بابل و بیگرێت.
29
جا بابلییه‌كان كه‌ له‌ دژی ئه‌و شار ده‌جه‌نگن، دێنه‌ ناوی به‌ ئاگر گڕی تێبه‌رده‌ده‌ن، ئه‌و ماڵانه‌ش ده‌سووتێنن كه‌ له‌ سه‌ربانه‌كانیان بخووریان بۆ به‌عل سووتاند و شه‌رابی پێشكه‌شكراویان پێشكه‌شی خوداوه‌نده‌كانی دیكه‌ كرد بۆ ئه‌وه‌ی په‌ستم بكه‌ن.»
30
یه‌زدان ده‌فه‌رموێت: «نه‌وه‌ی ئیسرائیل و نه‌وه‌ی یه‌هودا هه‌ر له‌ گه‌نجیێتییانه‌وه‌ ته‌نها خراپه‌یان له‌به‌رچاوم كردووه‌، چونكه‌ نه‌وه‌ی ئیسرائیل به‌ دروستكراوه‌كانی ده‌ستیان ته‌نها په‌ستیان كردم.
31
له‌و ڕۆژه‌وه‌ی ئه‌م شاره‌یان بنیادیان ناوه‌ هه‌تا ئه‌مڕۆ، بۆ من بووه‌ته‌ مایه‌ی تووڕه‌بوون و هه‌ڵچوونم، كه‌ ده‌بێت له‌به‌رده‌مم ڕایماڵم.
32
نه‌وه‌ی ئیسرائیل و نه‌وه‌ی یه‌هودا په‌ستیان كردم، به‌ هه‌موو ئه‌و خراپانه‌ی كردیان، ئه‌وان و پاشا و سه‌ركرده‌ و كاهین و پێغه‌مبه‌ره‌كانیان، پیاوانی یه‌هودا و خه‌ڵكی ئۆرشه‌لیم.
33
جا پشتیان تێكردم نه‌ك ڕوو، له‌ كاتێكدا من به‌رده‌وام فێرم ده‌كردن، به‌ڵام نه‌ گوێیانگرت و نه‌ ته‌مبێ بوون.
34
به‌ڵكو بته‌ قێزه‌ونه‌كانیان له‌و ماڵه‌ دانا كه‌ ناوی منی هه‌ڵگرتووه‌ و گڵاویان كرد.
35
هه‌روه‌ها نزرگه‌ی به‌علیان له‌سه‌ر به‌رزاییه‌كان بنیاد نا، كه‌ له‌ دۆڵی به‌ن‌هینۆمه‌، تاوه‌كو كوڕ و كچه‌كانیان وه‌ك قوربانی بۆ مۆله‌خ[c] بسووتێنن، ئه‌و شته‌ قێزه‌ونانه‌یان كرد و وایانكرد یه‌هودا گوناه بكات، كه‌ من نه‌ فه‌رمانم پێكردووه‌ و نه‌ به‌ خه‌یاڵیشمدا هاتووه‌.
36
«ئێوه‌ ده‌رباره‌ی ئه‌و شاره‌ ده‌ڵێن: ”به‌ شمشێر و قاتوقڕی و ده‌رد دراوه‌ته‌ ده‌ست پاشای بابل.“ به‌ڵام یه‌زدانی په‌روه‌ردگاری ئیسرائیل ده‌فه‌رموێت:
37
ئه‌وه‌تا من كۆیان ده‌كه‌مه‌وه‌، له‌ هه‌موو ئه‌و خاكانه‌ی كه‌ به‌ تووڕه‌یی و هه‌ڵچوونمه‌وه‌ و به‌ په‌ستییه‌كی مه‌زنه‌وه‌ ده‌رمكردن بۆیان، ده‌یانگه‌ڕێنمه‌وه‌ ئه‌م شوێنه‌ و به‌ ئاسووده‌یی نیشته‌جێیان ده‌كه‌م.
38
ئه‌وان ده‌بن به‌ گه‌لی من و منیش ده‌بم به‌ خودای ئه‌وان.
39
یه‌ك دڵ و یه‌ك ڕێبازیان پێده‌ده‌م، بۆ ئه‌وه‌ی هه‌رده‌م لێم بترسن، بۆ چاكه‌ی خۆیان و چاكه‌ی كوڕه‌كانیان له‌پاش خۆیان.
40
په‌یمانێكی هه‌تاهه‌تاییان له‌گه‌ڵدا ده‌به‌ستم، كه‌ خۆمیان لێ نه‌كێشمه‌وه‌ و به‌رده‌وام چاكه‌یان له‌گه‌ڵدا بكه‌م، ترسی خۆم بخه‌مه‌ دڵیان، بۆ ئه‌وه‌ی لێم لانه‌ده‌ن.
41
پێیان شاد ده‌بم كه‌ چاكه‌یان له‌گه‌ڵدا بكه‌م، به‌ دڵنیاییه‌وه‌، به‌ هه‌موو دڵم و له‌ ناخمه‌وه‌، له‌م خاكه‌دا ده‌یانڕوێنم.
42
«یه‌زدان ئه‌مه‌ ده‌فه‌رموێت: هه‌روه‌ك هه‌موو ئه‌م خراپه‌ گه‌ورانه‌م به‌سه‌ر ئه‌م گه‌له‌دا هێنا، ئاواش من هه‌موو ئه‌و چاكه‌یه‌یان به‌سه‌ردا ده‌هێنم كه‌ به‌ڵێنم پێیان دا.
43
جا كێڵگه‌ ده‌كڕدرێته‌وه‌ له‌م خاكه‌ی كه‌ ده‌ڵێن: ”وێرانه‌، نه‌ مرۆڤ و نه‌ ئاژه‌ڵی تێدا نییه‌، دراوه‌ته‌ ده‌ست بابلییه‌كان.“
44
به‌ شایه‌تی چه‌ند شایه‌تێك به‌ زیو كێڵگه‌ ده‌كڕن، گرێبه‌ست له‌ كاغه‌زێك ده‌نووسن و مۆری ده‌كه‌ن، له‌ خاكی بنیامین و ده‌وروبه‌ری ئۆرشه‌لیم، له‌ شارۆچكه‌كانی یه‌هودا، له‌ شارۆچكه‌كانی ناوچه‌ شاخاوییه‌كان، له‌ زوورگه‌كانی خۆرئاوا و نه‌قه‌ب، چونكه‌ من ڕاپێچكراوه‌كانیان ده‌گه‌ڕێنمه‌وه‌.» ئه‌وه‌ فه‌رمایشتی یه‌زدانه‌.
  1. a. 32‏:7 له‌ سه‌رده‌می په‌یمانی كۆن كه‌سێك كه‌ پارچه‌ زه‌وییه‌كی ده‌فرۆشت، ئه‌وا نزیكترین كه‌سی بنه‌ماڵه‌ و تیره‌كه‌ی خۆی مافی له‌ پێشینه‌یی هه‌بوو بۆ كڕینی، بڕوانه‌\+xt لێڤییه‌كان 25‏:25 و ڕائووس 4‏:3‏،4‏\+xt*‏.
  2. b. 32‏:20 په‌رجوو: موعجیزه‌.
  3. c. 32‏:35 خوداوه‌ندێكی كه‌نعانییه‌ بتپه‌رسته‌كان بووه‌، بۆ په‌رستنی هه‌ستاون به‌ تێپه‌ڕاندنی منداڵه‌كانیان به‌ناو ئاگردا. بڕوانه‌ \+xt دووه‌م پوخته‌ی مێژوو 28‏:3‏\+xt*.