عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
حه‌نه‌نیای پێغه‌مبه‌ری درۆزن 
1
ئه‌وه‌ بوو له‌ هه‌مان ساڵ، له‌ مانگی پێنجی ساڵی چواره‌می سه‌ره‌تای پاشایه‌تی سدقیای پاشای یه‌هودا، حه‌نه‌نیای پێغه‌مبه‌ر كوڕی عازوور كه‌ خه‌ڵكی گبعۆنه‌، له‌ ماڵی یه‌زدان له‌به‌رچاوی كاهینه‌كان و هه‌موو گه‌ل پێی گوتم:
2
«یه‌زدانی سوپاسالار، خودای ئیسرائیل ئه‌مه‌ ده‌فه‌رموێت: ”نیری پاشای بابل ده‌شكێنم.
3
له‌ ماوه‌ی دوو ساڵدا من هه‌موو قاپوقاچاغه‌كانی ماڵی یه‌زدان ده‌گه‌ڕێنمه‌وه‌، ئه‌وانه‌ی نه‌بوخودنه‌سری پاشای بابل له‌م شوێنه‌وه‌ بردییه‌ بابل.
4
یه‌هۆیاكینی كوڕی یه‌هۆیاقیمی پاشای یه‌هودا ده‌گه‌ڕێنمه‌وه‌ ئه‌م شوێنه‌، هه‌روه‌ها هه‌موو ئه‌وانه‌ش كه‌ له‌گه‌ڵی بۆ بابل ڕاپێچ كرابوون، چونكه‌ نیری پاشای بابل ده‌شكێنم.“ ئه‌وه‌ فه‌رمایشتی یه‌زدانه‌.»
5
یه‌رمیای پێغه‌مبه‌ریش له‌به‌رده‌می كاهینه‌كان و هه‌موو گه‌ل ئه‌وانه‌ی له‌ ماڵی یه‌زدان وه‌ستابوون وه‌ڵامی حه‌نه‌نیای پێغه‌مبه‌ری دایه‌وه‌،
6
گوتی: «ئامین! با یه‌زدان ئاوا بكات! با یه‌زدان قسه‌كانت بهێنێته‌ دی كه‌ پێشبینیت كرد، قاپوقاچاغه‌كه‌ی ماڵی یه‌زدان و هه‌موو ئه‌و كه‌سانه‌ی ڕاپێچ كرابوون له‌ بابله‌وه‌ بگه‌ڕێنێته‌وه‌ بۆ ئێره‌.
7
به‌ڵام گوێ له‌م قسه‌یه‌ بگره‌ كه‌ من به‌ تۆ و به‌ هه‌موو گه‌لی ده‌ڵێم:
8
له‌ كۆنه‌وه‌، له‌پێش من و تۆوه‌ پێغه‌مبه‌ران سه‌باره‌ت به‌ زۆر گه‌لان و پاشایه‌تییه‌ گه‌وره‌كان پێشبینی جه‌نگ و به‌ڵا و ده‌ردیان كردووه‌.
9
به‌ڵام ئه‌و پێغه‌مبه‌ره‌ی پێشبینی ئاشتی بكات، به‌ هاتنه‌ دی پێشبینییه‌كه‌ی، ده‌زانرێت كه‌ به‌ڕاستی یه‌زدان ئه‌و پێغه‌مبه‌ره‌ی ناردووه‌.»
10
حه‌نه‌نیای پێغه‌مبه‌ریش نیره‌كه‌ی له‌سه‌ر ملی یه‌رمیا هه‌ڵگرت و شكاندی.
11
حه‌نه‌نیا له‌به‌رده‌می هه‌موو گه‌ل گوتی: «یه‌زدان ئه‌مه‌ ده‌فه‌رموێت: ”له‌ ماوه‌ی دوو ساڵدا، ئاوا نیری نه‌بوخودنه‌سری پاشای بابل له‌ ملی هه‌موو نه‌ته‌وه‌كان ده‌شكێنم.“» یه‌رمیای پێغه‌مبه‌ریش به‌ ڕێگای خۆیدا ڕۆیشت.
12
دوای ئه‌وه‌ی حه‌نه‌نیای پێغه‌مبه‌ر نیره‌كه‌ی سه‌ر ملی یه‌رمیای شكاند، فه‌رمایشتی یه‌زدان بۆ یه‌رمیا هات:
13
«بڕۆ و به‌ حه‌نه‌نیا بڵێ: ”یه‌زدان ئه‌مه‌ ده‌فه‌رموێت: تۆ نیرێكی دارینت شكاند، به‌ڵام تۆ له‌جێی ئه‌وه‌ نیرێكی ئاسنینت ده‌خرێته‌ سه‌ر،
14
چونكه‌ یه‌زدانی سوپاسالار، خودای ئیسرائیل ئه‌مه‌ ده‌فه‌رموێت: نیری ئاسنین ده‌خه‌مه‌ سه‌ر ملی هه‌موو ئه‌م نه‌ته‌وانه‌ بۆ ئه‌وه‌ی خزمه‌تی نه‌بوخودنه‌سری پاشای بابل بكه‌ن، ده‌بنه‌ كۆیله‌ی ئه‌و. ته‌نانه‌ت ده‌سه‌ڵاتم به‌سه‌ر ئاژه‌ڵه‌ كێوییه‌كانیش داوه‌تێ.“»
15
ئینجا یه‌رمیا پێغه‌مبه‌ر به‌ حه‌نه‌نیا پێغه‌مبه‌ری گوت: «حه‌نه‌نیا گوێ بگره‌! یه‌زدان تۆی نه‌ناردووه‌، تۆش وات كردووه‌ ئه‌م گه‌له‌ پشت به‌ درۆ ببه‌ستێت.
16
له‌به‌ر ئه‌وه‌ یه‌زدان ئه‌مه‌ ده‌فه‌رموێت: ”خه‌ریكم له‌سه‌ر ڕووی زه‌وی ده‌رتده‌كه‌م، تۆ ئه‌م ساڵ ده‌مریت، چونكه‌ تۆ جاڕی یاخیبوونت دا له‌ دژی یه‌زدان.“»
17
جا حه‌نه‌نیای پێغه‌مبه‌ر له‌ مانگی حه‌وتی ئه‌و ساڵه‌دا[a] مرد.
  1. a. 28‏:17 به‌ دوو مانگ له‌دوای پێشبینییه‌كه‌ی یه‌رمیا.