عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
حوكمدان له‌سه‌ر پاشا خراپه‌كاره‌كان 
1
یه‌زدان ئه‌مه‌ ده‌فه‌رموێت: «دابه‌زه‌ بۆ كۆشكی پاشای یه‌هودا و له‌وێ ئه‌و په‌یامه‌ ڕابگه‌یه‌نه‌،
2
بڵێ: ”ئه‌ی پاشای یه‌هودا، ئه‌وه‌ی له‌سه‌ر ته‌ختی داود دانیشتووی، گوێ له‌ فه‌رمایشتی یه‌زدان بگره‌؛ تۆ و خزمه‌تكاره‌كانت و گه‌له‌كه‌ت، ئه‌وانه‌ی له‌م ده‌روازانه‌وه‌ دێنه‌ ژووره‌وه‌.
3
یه‌زدان ئه‌مه‌ ده‌فه‌رموێت: ’ڕاستودروستی و دادپه‌روه‌ری په‌یڕه‌و بكه‌ن. تاڵانكراو له‌ ده‌ستی زۆردار ده‌رباز بكه‌ن. نامۆ و هه‌تیو و بێوه‌ژن مه‌چه‌وسێننه‌وه‌، سته‌م مه‌كه‌ن، له‌م شوێنه‌دا خوێنی بێتاوان مه‌ڕێژن.‘
4
چونكه‌ ئه‌گه‌ر به‌ گرنگییه‌وه‌ ئه‌م فه‌رمانه‌ په‌یڕه‌و بكه‌ن، ئه‌وا ئه‌و پاشایانه‌ی له‌سه‌ر ته‌ختی داود دانیشتوون له‌ ده‌روازه‌كانی ئه‌م كۆشكه‌وه‌ دێنه‌ ژووره‌وه‌، به‌ سواری گالیسكه‌ و ئه‌سپه‌وه‌ له‌گه‌ڵ خزمه‌تكاران و گه‌له‌كه‌ی.
5
به‌ڵام ئه‌گه‌ر گوێ له‌م فه‌رمانه‌ نه‌گرن، سوێند به‌ گیانی خۆم ده‌خۆم، كه‌ ئه‌م كۆشكه‌ وێران ده‌بێت.“» ئه‌وه‌ فه‌رمایشتی یه‌زدانه‌.
6
یه‌زدان سه‌باره‌ت به‌ كۆشكی پاشای یه‌هودا ئه‌مه‌ش ده‌فه‌رموێت:
«هه‌رچه‌نده‌ تۆ بۆ من وه‌ك گلعادی،
وه‌ك لووتكه‌ی لوبنانی،
به‌ڵام وه‌ك چۆڵه‌وانیت لێ ده‌كه‌م،
وه‌ك شاری بێ دانیشتووان.
7
تێكده‌رانت بۆ ته‌رخان ده‌كه‌م،
هه‌ریه‌كه‌ و به‌ ئامێره‌كه‌یه‌وه‌،
جا باشترین داری ئورزت ده‌بڕنه‌وه‌ و
فڕێیده‌ده‌نه‌ ناو ئاگره‌وه‌.
8
«خه‌ڵكی زۆر نه‌ته‌وه‌ به‌ كه‌ناری ئه‌م شاره‌دا تێده‌په‌ڕن و له‌ یه‌كتری ده‌پرسن: ”له‌سه‌ر چی یه‌زدان وای له‌م شاره‌ گه‌وره‌یه‌ كرد؟“
9
جا ده‌ڵێن: ”له‌سه‌ر ئه‌وه‌ی وازیان له‌ په‌یمانی یه‌زدانی په‌روه‌ردگاریان هێنا و خوداوه‌نده‌كانی دیكه‌یان په‌رست و كڕنۆشیان بۆ بردن.“»
10
بۆ پاشا مردووه‌كه‌[a] مه‌گریێن و شینی بۆ مه‌گێڕن،
به‌ڵكو به‌كوڵ بگریێن بۆ ئه‌وه‌ی به‌ دیل ده‌بردرێت،
چونكه‌ جارێكی دیكه‌ ناگه‌ڕێته‌وه‌
بۆ ئه‌وه‌ی ئه‌و خاكه‌ ببینێت كه‌ لێی له‌دایك بووه‌.
11
چونكه‌ سه‌باره‌ت به‌ شه‌لومی[b] كوڕی یۆشیای پاشای یه‌هودا، ئه‌وه‌ی له‌ جێی باوكی بوو به‌ پاشا، ئه‌وه‌ی له‌م شوێنه‌ ڕۆیشت، یه‌زدان ده‌فه‌رموێت: «جارێكی دیكه‌ ناگه‌ڕێیته‌وه‌ ئێره‌،
12
به‌ڵكو له‌و شوێنه‌ی ڕاپێچیان كردووه‌ بۆی هه‌ر له‌وێ ده‌مرێت، جارێكی دیكه‌ ئه‌م خاكه‌ نابینێته‌وه‌.»
13
«قوڕبه‌سه‌ر ئه‌وه‌ی كۆشكه‌كه‌ی به‌ ناڕه‌وایی بنیاد ده‌نێت و
ژووره‌كانی سه‌ره‌وه‌شی به‌ سته‌مكاری،
ئه‌وه‌ی به‌ به‌بێ كرێ كار به‌ هاوڵاتییان ده‌كات،
هه‌قی ماندووبوونه‌كه‌یان ناداتێ.
14
ده‌ڵێت: ”كۆشكێكی فراوان بۆ خۆم بنیاد ده‌نێم،
ژووره‌كانی سه‌ره‌وه‌ی پانوبه‌رین.“
په‌نجه‌ره‌ی گه‌وره‌ی بۆ ده‌كاته‌وه‌،
دیواره‌كانی به‌ ته‌خته‌ی دار ئورز داده‌پۆشێت،
به‌ ڕه‌نگی سوور بۆیاخی ده‌كات.
15
«ئایا ئه‌وه‌ ده‌تكاته‌ پاشا،
كه‌ دار ئورزی زۆرت هه‌بێت؟
ئایا باوكت نه‌یخوارد و نه‌یخوارده‌وه‌؟
ڕاستودروستی و دادپه‌روه‌ری په‌یڕه‌و كرد،
جا سه‌ركه‌وتوو بوو.
16
به‌ ته‌واوی پاڵپشتی له‌ مافی هه‌ژار و نه‌دار كرد،
جا سه‌ركه‌وتوو بوو.
ئایا ئه‌مه‌ واتای ئه‌وه‌ نییه‌ من ده‌ناسێت؟»
ئه‌وه‌ فه‌رمایشتی یه‌زدانه‌.
17
«به‌ڵام چاو و دڵی تۆ ته‌نها
له‌سه‌ر ده‌ستكه‌وتی ناڕه‌وایه‌،
له‌سه‌ر ڕشتنی خوێنی بێتاوانه‌،
له‌سه‌ر سته‌م و ده‌ستدرێژییه‌.»
18
له‌به‌ر ئه‌وه‌ یه‌زدان له‌باره‌ی یه‌هۆیاقیمی كوڕی یۆشیای پاشای یه‌هوداوه‌ ئه‌مه‌ ده‌فه‌رموێت:
«بۆی نالاوێننه‌وه‌،
”براڕۆ! خوشكه‌ڕۆ!“
بۆی نالاوێننه‌وه‌،
”گه‌وره‌ڕۆ! شكۆی ڕۆ!“
19
به‌ڵكو وه‌ك گوێدرێژ ده‌نێژرێت،
ڕاده‌كێشرێت و فڕێده‌درێت
دوور له‌ ده‌روازه‌كانی ئۆرشه‌لیم.»
20
«ئه‌ی ئۆرشه‌لیم، بڕۆ سه‌ر لوبنان و هاوار بكه‌،
با له‌ باشان ده‌نگت ببیسترێت،
له‌ عه‌ڤاریمه‌وه‌ هاوار بكه‌،
چونكه‌ هه‌موو هاوپه‌یمانه‌كانت وردوخاش كران.
21
له‌ ئاسووده‌ییت ئاگادارم كردیته‌وه‌،
به‌ڵام گوتت: ”گوێ ناگرم.“
له‌ گه‌نجییه‌وه‌ له‌مه‌ لێڕاهاتوویت،
كه‌ گوێڕایه‌ڵی من نابیت.
22
هه‌موو شوانه‌كانت[c] با به‌ڕێوه‌یان ده‌بات و
هاوپه‌یمانه‌كانت ڕاپێچ ده‌كرێن،
ئه‌وسا ڕیسوا و شه‌رمه‌زار ده‌بیت
له‌به‌ر هه‌موو خراپه‌كانت.
23
ئه‌ی نیشته‌جێی ”لوبنان“[d] ،
ئه‌ی ئه‌وه‌ی له‌ناو دار ئورزه‌كان هێلانه‌ت كردووه‌،
چه‌ند ده‌ناڵێنیت كه‌ ژان ده‌تگرێت،
وه‌ك ژنێك كه‌ منداڵی ده‌بێت!»
24
یه‌زدان ده‌فه‌رموێت: «به‌ گیانی خۆم، ئه‌ی یه‌هۆیاكینی كوڕی یه‌هۆیاقیمی پاشای یه‌هودا، ته‌نانه‌ت ئه‌گه‌ر ئه‌نگوستیله‌یه‌ك بیت له‌ ده‌ستی ڕاستم، له‌ په‌نجه‌ی خۆمت ده‌كه‌مه‌وه‌ و
25
ده‌تده‌مه‌ ده‌ستی ئه‌وانه‌ی ده‌یانه‌وێ له‌ناوت ببه‌ن، ده‌ستی ئه‌وانه‌ی تۆ لێیان ده‌ترسیت، نه‌بوخودنه‌سری پاشای بابل و بابلییه‌كان.
26
خۆت و دایكت، ئه‌وه‌ی تۆی بووه‌ فڕێتانده‌ده‌مه‌ سه‌ر خاكێكی دیكه‌، كه‌ له‌وێ له‌دایك نه‌بوونه‌، جا له‌وێ ده‌مرن.
27
هه‌رگیز ناگه‌ڕێنه‌وه‌ ئه‌و خاكه‌ی بۆی په‌رۆشن.»
28
ئایا ئه‌م پیاوه‌، یه‌هۆیاكین، قاپێكی ڕیسوا و شكاوه‌؟
ئایا شتێكه‌ كه‌س نایه‌وێت؟
بۆچی خۆی و نه‌وه‌كانی فڕێدران،
تێهه‌ڵدرانه‌ خاكێك كه‌ نایناسن؟
29
ئه‌ی خاك! ئه‌ی خاك! ئه‌ی خاك!
گوێ له‌ فه‌رمایشتی یه‌زدان بگره‌!
30
یه‌زدان ئه‌مه‌ ده‌فه‌رموێت:
«ئه‌م پیاوه‌ به‌ وه‌جاخكوێر بنووسن،
پیاوێك كه‌ له‌ ماوه‌ی ژیانی خۆی سه‌ركه‌وتوو نابێت،
كه‌س له‌ نه‌وه‌ی ئه‌و سه‌ركه‌وتوو نابێت،
كه‌سیان له‌سه‌ر ته‌ختی داود دانانیشن و
جارێكی دیكه‌ فه‌رمانڕه‌وایه‌تی یه‌هودا ناكه‌ن.»
  1. a. 22‏:10 مه‌به‌ستی له‌ یۆشیا پاشایه‌.
  2. b. 22‏:11 شه‌لوم: به‌ یه‌هۆئاحازیش ناوده‌بردرێت.
  3. c. 22‏:22 شوانه‌كانت مه‌به‌ست له‌ ڕابه‌ره‌كانه‌.
  4. d. 22‏:23 مه‌به‌ستی له‌ كۆشكی شاهانه‌ی ئۆرشه‌لیمه‌. بڕوانه‌ ئایه‌تی 6، 7، 15، هه‌روه‌ها \+xt یه‌كه‌م پاشایان 7‏:2‏\+xt*‏.