عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خودا داوای سدقیا ڕه‌ت ده‌كاته‌وه‌ 
1
ئه‌و په‌یامه‌ی له‌لایه‌ن یه‌زدانه‌وه‌ بۆ یه‌رمیا هات، كاتێك سدقیای پاشا په‌شحوری كوڕی مه‌لكیا و سه‌فه‌نیای كوڕی مه‌عسێیاهوی كاهینی نارده‌ لای و گوتی:
2
«تكایه‌ له‌ پێناوی ئێمه‌ داوا له‌ یه‌زدان بكه‌، چونكه‌ نه‌بوخودنه‌سری پاشای بابل هێرشمان ده‌كاته‌ سه‌ر، به‌ڵكو یه‌زدان وه‌ك ڕابردوو كاری سه‌رسوڕهێنه‌رمان له‌گه‌ڵ ده‌كات هه‌تا نه‌بوخودنه‌سر له‌لای ئێمه‌ بكشێته‌وه‌.»
3
به‌ڵام یه‌رمیا وه‌ڵامی دانه‌وه‌: «به‌ سدقیا بڵێن،
4
”یه‌زدانی په‌روه‌ردگاری ئیسرائیل ئه‌مه‌ ده‌فه‌رموێت: ئه‌و چه‌كانه‌ی له‌ ده‌ستتانه‌ كه‌ له‌گه‌ڵ پاشای بابل و بابلییه‌كان شه‌ڕی پێ ده‌كه‌ن كه‌ له‌ ده‌ره‌وه‌ی شوورای شاره‌كان گه‌مارۆیان داون، من خه‌ریكم ئه‌و چه‌كانه‌ له‌ دژتان به‌كارده‌هێنم، له‌ ناوه‌ڕاستی شار كۆیان ده‌كه‌مه‌وه‌.
5
من خۆم به‌ ده‌ستێكی پۆڵایین و بازووێكی به‌هێز، به‌ تووڕه‌یی و هه‌ڵچوونێكی به‌ جۆشی گه‌وره‌وه‌ له‌ دژتان ده‌جه‌نگم.
6
دانیشتووانی ئه‌و شاره‌ ده‌كوژم، مرۆڤ و ئاژه‌ڵ پێكه‌وه‌، به‌ ده‌ردێكی گه‌وره‌وه‌ ده‌مرن.
7
پاش ئه‌مه‌ش، سدقیای پاشای یه‌هودا و خزمه‌تكاره‌كانی و ئه‌وه‌ی له‌م گه‌له‌ له‌ شاره‌كه‌دا ماونه‌ته‌وه‌، له‌دوای ده‌رد و شمشێر و قاتوقڕییه‌كه‌، ده‌یانده‌مه‌ ده‌ست نه‌بوخودنه‌سری پاشای بابل و دوژمنه‌كانیان و ئه‌وانه‌ی ده‌یانه‌وێت له‌ناویان ببه‌ن. ئه‌وانیش ده‌یانده‌نه‌ به‌ر شمشێر و له‌گه‌ڵیان میهره‌بان نابن و دڵیان پێیان ناسووتێت و به‌زه‌ییان پێیاندا نایه‌ته‌وه‌.“» ئه‌وه‌ فه‌رمایشتی یه‌زدانه‌.
8
«به‌م گه‌له‌ش ده‌ڵێیت: ”یه‌زدان ئه‌مه‌ ده‌فه‌رموێت: ئێستا من ڕێگای ژیان و ڕێگای مردنتان له‌پێش داده‌نێم.
9
ئه‌وه‌ی له‌م شاره‌دا بمێنێته‌وه‌ به‌ شمشێر و قاتوقڕی و ده‌رد له‌ناوده‌چێت، ئه‌وه‌ش ده‌چێته‌ ده‌ره‌وه‌ و ڕوو له‌ بابلییه‌كان بكات، ئه‌وانه‌ی گه‌مارۆیان داون، ده‌ژیێت و ژیانی خۆی ده‌رباز ده‌كات.
10
له‌به‌ر ئه‌وه‌ی مكوڕم له‌سه‌ر ئه‌وه‌ی خراپه‌ به‌سه‌ر ئه‌و شاره‌ بهێنم نه‌ك باشه‌. ده‌درێته‌ ده‌ست پاشای بابل و به‌ ئاگر ده‌یسووتێنێت.“» ئه‌وه‌ فه‌رمایشتی یه‌زدانه‌.
11
«به‌ بنه‌ماڵه‌ی پاشای یه‌هودا بڵێ: ”گوێ له‌ فه‌رمایشتی یه‌زدان بگرن.
12
ئه‌ی بنه‌ماڵه‌ی داود، یه‌زدان ئه‌مه‌ ده‌فه‌رموێت:
«”هه‌موو به‌یانییه‌ك به‌ دادپه‌روه‌ری حوكم بده‌ن،
تاڵانكراو له‌ ده‌ستی زۆردار ڕزگار بكه‌ن،
نه‌وه‌ك تووڕه‌ییم وه‌ك ئاگر بته‌قێته‌وه‌،
له‌به‌ر ئه‌و خراپانه‌ی كردووتانه‌،
جا بسووتێنێت و كه‌س نه‌بێت بكوژێنێته‌وه‌.
13
ئه‌ی ئۆرشه‌لیم، ئه‌وه‌ی نیشته‌جێی له‌سه‌ر دۆڵه‌كه‌،
به‌سه‌ر ده‌شتی به‌رده‌ڵانی به‌رز،
ئه‌وه‌تا من له‌ دژی تۆم.
ئه‌وه‌ فه‌رمایشتی یه‌زدانه‌.
ئێوه‌ ده‌ڵێن: ’كێ به‌سه‌رماندا ده‌دات؟
كێ دێته‌ ناو نشینگه‌كانمانه‌وه‌؟‘
14
به‌ڵام من سزای شایسته‌ی كرداره‌كانتان ده‌ده‌م،
ئاگر به‌رده‌ده‌مه‌ دارستانه‌كه‌ی و
هه‌موو ده‌وروبه‌ره‌كه‌ی ده‌خوات.“»
ئه‌وه‌ فه‌رمایشتی یه‌زدانه‌.