عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ڕۆژی لێقه‌ومان 
1
ئینجا فه‌رمایشتی یه‌زدانم بۆ هات، پێی فه‌رمووم:
2
«ژن مه‌هێنه‌ و له‌م شوێنه‌دا كوڕ و كچت نه‌بێت.»
3
چونكه‌ یه‌زدان سه‌باره‌ت به‌و كوڕ و كچانه‌ی له‌م شوێنه‌دا له‌دایك بوون و سه‌باره‌ت به‌ دایكانیان كه‌ ئه‌وانیان بووه‌ و سه‌باره‌ت به‌ باوكانیان كه‌ له‌م خاكه‌دا ئه‌وانیان خستووه‌ته‌وه‌ ئه‌مه‌ ده‌فه‌رموێت:
4
«به‌ نه‌خۆشی كوشنده‌ ده‌مرن، شینیان بۆ ناگێڕدرێت و نانێژرێن، به‌ڵكو ده‌بن به‌ زبڵ له‌سه‌ر ڕووی خاكه‌كه‌. ئه‌وانه‌ به‌ شمشێر و قاتوقڕی له‌ناوده‌چن، ته‌رمیان ده‌بێته‌ خۆراكی باڵنده‌ ئاژه‌ڵی كێوی.»
5
یه‌زدان ئه‌مه‌ش ده‌فه‌رموێت: «مه‌چۆ بۆ ماڵی پرسه‌گێڕ و مه‌ڕۆ بۆ شینگێڕان و سه‌ره‌خۆشییان لێ مه‌كه‌، چونكه‌ ئاشتی خۆم، خۆشه‌ویستی نه‌گۆڕ و به‌زه‌ییم له‌م گه‌له‌ داماڵیوه‌.
6
گه‌وره‌ و بچووك له‌م خاكه‌ ده‌مرن، نانێژرێن و شینیان بۆ ناگێڕدرێت و كه‌س له‌ خه‌می ئه‌وان له‌ خۆی نادات و قژی ناڕنێته‌وه‌.
7
له‌ ماته‌م كه‌س شیوه‌غه‌ریبه‌یان بۆ نابات بۆ ئه‌وه‌ی سه‌ره‌خۆشییان لێ بكات، سه‌باره‌ت به‌ نه‌ریتی مردوو كه‌س جامی سه‌ره‌خۆشی پێشكه‌ش ناكات، ته‌نانه‌ت له‌به‌ر دایك و باوكیشیان.» ئه‌وه‌ فه‌رمایشتی یه‌زدانه‌.
8
«هه‌روه‌ها مه‌چووه‌ ماڵێك داوه‌تی هه‌بێت، بۆ ئه‌وه‌ی له‌گه‌ڵیان دابنیشیت و بخۆیت و بخۆیته‌وه‌،
9
چونكه‌ یه‌زدانی سوپاسالار، خودای ئیسرائیل ئه‌مه‌ ده‌فه‌رموێت: ئه‌وه‌تا من له‌م شوێنه‌دا و له‌ سه‌رده‌می ئێوه‌ و له‌به‌رچاوی ئێوه‌ ده‌نگی شادی و ده‌نگی خۆشی و ده‌نگی زاوا و ده‌نگی بووك ڕاده‌گرم.
10
«جا كاتێك هه‌موو ئه‌م قسانه‌ت به‌م گه‌له‌ ڕاگه‌یاند لێت ده‌پرسن: ”بۆچی یه‌زدان هه‌موو ئه‌م به‌ڵا گه‌وره‌یه‌ی سه‌باره‌ت به‌ ئێمه‌ فه‌رمووه‌؟ تاوانمان چییه‌ و گوناهمان چییه‌ كه‌ ده‌رهه‌ق به‌ یه‌زدانی په‌روه‌ردگارمان ئه‌نجاممان داوه‌؟“
11
تۆش پێیان ده‌ڵێیت، یه‌زدان ده‌فه‌رموێت: ”له‌سه‌ر ئه‌وه‌ی باوباپیرانتان وازیان له‌ من هێنا، دوای خوداكانی دیكه‌ كه‌وتن و ئه‌وانیان په‌رست و كڕنۆشیان بۆ بردن. وازیان له‌ من هێنا و گوێڕایه‌ڵی فێركردنه‌كانی من نه‌بوون.
12
ئێوه‌ش له‌ باوباپیرانتان زیاتر خراپه‌تان كرد، ئه‌وه‌تا هه‌ریه‌كه‌ به‌دوای كه‌لله‌ڕه‌قییه‌ خراپه‌كه‌ی خۆی كه‌وتووه‌، له‌ جیاتی ئه‌وه‌ی گوێڕایه‌ڵی من بن.
13
له‌به‌ر ئه‌وه‌ له‌م خاكه‌ فڕێتانده‌ده‌مه‌ ده‌ره‌وه‌ بۆ خاكێك كه‌ نه‌ ئێوه‌ و نه‌ باوباپیرانتان نه‌تانناسیوه‌. له‌وێ به‌ شه‌و و ڕۆژ خوداكانی دیكه‌ ده‌په‌رستن، چونكه‌ من له‌گه‌ڵتان میهره‌بان نابم.“»
14
هه‌روه‌ها یه‌زدان ده‌فه‌رموێت: «له‌به‌ر ئه‌وه‌ سه‌رده‌مێك دێت، چیتر ناڵێن: ”به‌ یه‌زدانی زیندوو، ئه‌وه‌ی نه‌وه‌ی ئیسرائیلی له‌ خاكی میسره‌وه‌ ده‌رهێنا،“
15
به‌ڵكو ده‌ڵێن: ”به‌ یه‌زدانی زیندوو، ئه‌وه‌ی نه‌وه‌ی ئیسرائیلی له‌ خاكی باكووره‌وه‌ ده‌رهێنا و هه‌روه‌ها له‌ هه‌موو ئه‌و خاكانه‌ی بۆ ئه‌وێ ده‌ریكردن.“ چونكه‌ ده‌یانگه‌ڕێنمه‌وه‌ بۆ خاكه‌كه‌یان، ئه‌وه‌ی دام به‌ باوباپیرانیان.»
16
یه‌زدان ده‌فه‌رموێت: «به‌ڵام ئێستا ده‌نێرم به‌دوای زۆرێك له‌ ماسیگران، جا وه‌ك ماسی ده‌یانگرن. پاش ئه‌مه‌ ده‌نێرم به‌دوای زۆرێك له‌ ڕاوچییان و له‌سه‌ر هه‌موو كێوێك و هه‌موو گردێك و له‌ كون و كه‌له‌به‌ری به‌رده‌كان ڕاویان ده‌كه‌ن،
17
چونكه‌ چاوم له‌ هه‌موو ڕێگاكانیانه‌، ڕێگاكانیان له‌به‌رده‌م من شاردراوه‌ نین و تاوانه‌كه‌یان له‌به‌رچاوم بزر نه‌بووه‌.
18
دوو ئه‌وه‌نده‌ سزایان ده‌ده‌م له‌سه‌ر تاوان و گوناهه‌كانیان، له‌سه‌ر ئه‌وه‌ی خاكی منیان به‌ كه‌لاكی بته‌كانیان گڵاو كردووه‌ و میراته‌كه‌ی منیان پڕكردووه‌ له‌ قێزه‌ونه‌كانیان.»
19
ئه‌ی یه‌زدان، ئه‌ی هێز و قه‌ڵای من،
ئه‌ی په‌ناگای من له‌ ڕۆژی ته‌نگانه‌،
نه‌ته‌وه‌كان له‌وپه‌ڕی زه‌وییه‌وه‌
بۆ لای تۆ دێن و ده‌ڵێن:
«باوباپیرانمان ته‌نها خوداوه‌ندی درۆیینیان به‌ میرات بۆ مایه‌وه‌،
بتی پووچی بێ كه‌ڵك.
20
ئایا مرۆڤ به‌ خۆی خوداوه‌ند دروستده‌كات؟
به‌ڵێ، به‌ڵام خودا نین!»
21
«له‌به‌ر ئه‌وه‌ ئه‌وه‌تا پێیان ده‌ناسێنم،
ئه‌م جاره‌ ده‌سه‌ڵات و هێزی خۆمیان
پێ ده‌ناسێنم.
ئینجا ئه‌وان ده‌زانن
كه‌ ناوم یه‌زدانه‌.