عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
وشكه‌ساڵی و برسیێتی و شمشێر 
1
ئه‌مه‌ فه‌رمایشتی یه‌زدانه‌ بۆ یه‌رمیا سه‌باره‌ت به‌ وشكه‌ساڵییه‌كه‌:
2
«یه‌هودا شیوه‌ن ده‌گێڕێت و
شاره‌كانی داده‌ڕزێن،
بۆ خاكه‌كه‌ ماته‌م ده‌گێڕن،
هاواری ئۆرشه‌لیمیش به‌رزبووه‌وه‌.
3
گه‌وره‌كان خزمه‌تكاره‌كانی خۆیان بۆ ئاو نارد،
هاتنه‌ سه‌ر ئه‌مباراوه‌كان،
به‌ڵام ئاویان نه‌دۆزییه‌وه‌.
به‌ گۆزه‌ی به‌تاڵه‌وه‌ گه‌ڕانه‌وه‌،
شه‌رمه‌زار و ڕیسوا بوون،
سه‌ری خۆیان شۆڕكرد.
4
له‌به‌ر ئه‌وه‌ی خاكه‌كه‌ شه‌قار شه‌قار بووه‌،
چونكه‌ باران له‌ زه‌وییه‌كه‌ نه‌باری،
جوتیاران شه‌رمه‌زاربوون،
سه‌ری خۆیان شۆڕكرد.
5
ته‌نانه‌ت مامزیش له‌ كێڵگه‌دا
به‌چكه‌ی بوو و وازی لێی هێنا،
چونكه‌ گیا نه‌بوو.
6
كه‌ره‌كێوییه‌كان له‌سه‌ر گردۆڵكه‌كان ڕاوه‌ستان،
وه‌ك چه‌قه‌ڵ بایان هه‌ڵمژی،
چاویان شل بوو،
چونكه‌ گیاوگۆڵ نییه‌.»
7
له‌گه‌ڵ ئه‌وه‌ی تاوانه‌كانمان شایه‌تیمان له‌سه‌ر ده‌ده‌ن،
ئه‌ی یه‌زدان، له‌به‌ر خاتری ناوی خۆت شتێك بكه‌،
چونكه‌ هه‌ڵگه‌ڕانه‌وه‌كانمان زۆر بوون،
ده‌رهه‌ق به‌ تۆ گوناهمان كرد.
8
ئه‌ی هیوای ئیسرائیل،
ئه‌ی ڕزگاركه‌ره‌كه‌ی كاتی ته‌نگانه‌،
بۆچی له‌ خاكه‌كه‌ وه‌ك نامۆ ده‌بیت،
وه‌ك ڕێبوارێك بۆ ته‌نها شه‌وێك بمێنێته‌وه‌؟
9
بۆچی وه‌ك پیاوێكی حه‌په‌ساو ده‌بیت،
وه‌ك پاڵه‌وانێك توانای ڕزگاركردنی نه‌بێت؟
ئه‌ی یه‌زدان، تۆ له‌ناوه‌ڕاستمانی و
ئێمه‌ ناوی تۆ هه‌ڵده‌گرین،
به‌جێمان مه‌هێڵه‌!
10
یه‌زدان ئاوا به‌م گه‌له‌ ده‌فه‌رموێت:
«به‌ڕاستی حه‌زیان له‌ گه‌ڕان كرد،
خۆیان لێ نه‌پاراست.
جا یه‌زدانیش په‌سه‌ندی نه‌كردن،
ئێستا تاوانه‌كانیان به‌بیر خۆی ده‌هێنێته‌وه‌ و
له‌سه‌ر گوناهه‌كانیان سزایان ده‌دات.»
11
هه‌روه‌ها یه‌زدان پێی فه‌رمووم: «نوێژ بۆ چاكه‌ی ئه‌م گه‌له‌ مه‌كه‌.
12
هه‌رچه‌نده‌ به‌ڕۆژووش بن گوێ له‌ هاواریان ناگرم، كاتێك قوربانی سووتاندن و پێشكه‌شكراوی دانه‌وێڵه‌ پێشكه‌ش بكه‌ن قبوڵی ناكه‌م، به‌ڵكو من به‌ شمشێر و قاتوقڕی و ده‌رد كۆتاییان پێ ده‌هێنم.»
13
منیش گوتم: «ئای، ئه‌ی یه‌زدانی باڵاده‌ست، ئه‌وه‌تا پێغه‌مبه‌ره‌كان پێیان ده‌ڵێن: ”تووشی شمشێر و قاتوقڕی نابن، به‌ڵكو له‌م شوێنه‌دا ئاشتی چه‌سپاوتان ده‌ده‌مێ.“»
14
یه‌زدانیش پێی فه‌رمووم: «ئه‌و پێغه‌مبه‌رانه‌ به‌ درۆ به‌ ناوی منه‌وه‌ پێشبینی ده‌كه‌ن. من نه‌مناردوون و ده‌ستنیشانم نه‌كردوون و قسه‌م له‌گه‌ڵ نه‌كردوون. ئه‌وان به‌ بینینی درۆ و فاڵگرتنه‌وه‌ و پڕوپووچی و خه‌یاڵی بیری خۆیان پێشبینیتان بۆ ده‌كه‌ن.»
15
له‌به‌ر ئه‌وه‌ یه‌زدان له‌باره‌ی ئه‌و پێغه‌مبه‌رانه‌وه‌ ده‌فه‌رموێت: «به‌ ناوی منه‌وه‌ پێشبینی ده‌كه‌ن و منیش نه‌مناردوون، ئه‌وان ده‌ڵێن: ”شمشێر و قاتوقڕی له‌م خاكه‌ نابێت.“ ئه‌و پێغه‌مبه‌رانه‌ خۆیان به‌ شمشێر و قاتوقڕی له‌ناوده‌چن.
16
ئه‌و گه‌له‌ش كه‌ ئه‌وان پێشبینی بۆ ده‌كه‌ن، له‌به‌ر قاتوقڕی و شمشێر له‌ شه‌قامه‌كانی ئۆرشه‌لیم فڕێده‌درێن. كه‌سیش نییه‌ بیاننێژێت، خۆیان و ژن و كوڕ و كچیان. خراپه‌ی شایسته‌ی خۆیان به‌سه‌ر سه‌ریاندا ده‌ڕێژم.»
17
«ئه‌م قسه‌یه‌یان پێ ده‌ڵێیت:
«”با چاوه‌كانم فرمێسك بڕێژن
به‌ شه‌و و به‌ ڕۆژ به‌بێ وه‌ستان،
چونكه‌ گه‌له‌كه‌م، كچه‌ پاكیزه‌كه‌م،
برینێكی ترسناكی هه‌یه‌،
لێدانێكی جه‌رگبڕ.
18
ئه‌گه‌ر بچمه‌ ده‌ره‌وه‌ بۆ كێڵگه‌،
به‌ شمشێر كوژراوان ده‌بینم.
ئه‌گه‌ر بێمه‌ ناو شار،
نه‌خۆشه‌كانی قاتوقڕی ده‌بینم،
چونكه‌ پێغه‌مبه‌ر و كاهینیش
به‌ناو زه‌وییه‌كدا ده‌گه‌ڕێن و نازانن چی ده‌كه‌ن.“»
19
«ئایا به‌ ته‌واوی یه‌هودات ڕه‌تكردووه‌ته‌وه‌؟
ئایا بێزت له‌ سییۆن ده‌بێته‌وه‌؟
بۆچی وا تووشی به‌ڵات كردین
كه‌ چاكبوونه‌وه‌مان نه‌بێت؟
چاوه‌ڕێی ئاشتی بووین،
به‌ڵام چاكه‌ نه‌هات،
هه‌روه‌ها كاتی چاكبوونه‌وه‌،
به‌ڵام ئه‌وه‌تا ترس.
20
ئه‌ی یه‌زدان، دان ده‌نێین به‌ یاخیبوونی خۆمان و
تاوانی باوباپیرانمان،
گوناهمان ده‌رهه‌ق به‌ تۆ كرد.
21
له‌ پێناوی ناوی خۆت، ڕه‌تمان مه‌كه‌وه‌،
ته‌ختی شكۆی خۆت ڕیسوا مه‌كه‌،
په‌یمانه‌كه‌ی خۆت له‌گه‌ڵ ئێمه‌ به‌بیر بێته‌وه‌،
مه‌یشكێنه‌.
22
ئایا له‌ناو بته‌ پووچه‌كانی نه‌ته‌وه‌كان هه‌یه‌ باران ببارێنێت؟
یان ئایا ئاسمان خۆی ڕه‌هێڵ ده‌بارێنێت؟
ئه‌ی تۆ یه‌زدانی په‌روه‌ردگارمان نیت؟
جا هیوامان به‌ تۆیه‌،
چونكه‌ تۆ ئه‌وه‌ی كه‌ هه‌موو ئه‌مانه‌ت كردووه‌.»