عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
خودا و بته‌كان 
1
ئه‌ی بنه‌ماڵه‌ی ئیسرائیل، گوێ بگرن یه‌زدان چی به‌ ئێوه‌ ده‌فه‌رموێت.
2
یه‌زدان ئه‌مه‌ ده‌فه‌رموێت:
«ئێوه‌ نه‌ریتی نه‌ته‌وه‌كان فێر مه‌بن و
له‌ نیشانه‌كانی ئاسمان مه‌تۆقن،
هه‌رچه‌نده‌ نه‌ته‌وه‌كان له‌م شتانه‌ ده‌تۆقن.
3
چونكه‌ نه‌ریتی نه‌ته‌وه‌كان مایه‌پووچه‌:
دره‌ختی بڕاوه‌ی دارستانن،
دارتاش به‌ ئه‌سكه‌نه‌ دروستیان ده‌كات،
4
به‌ زێڕ و زیو ده‌یڕازێننه‌وه‌ و
به‌ مێخ و چه‌كوش توندیان ده‌كه‌ن
بۆ ئه‌وه‌ی نه‌له‌قن.
5
وه‌ك داوه‌ڵی[a] له‌ بێستانی خه‌یاردان،
بته‌كانیان قسه‌ ناكه‌ن،
به‌ هه‌ڵگرتن هه‌ڵده‌گیرێن،
چونكه‌ هه‌نگاو نانێن،
لێیان مه‌ترسن، چونكه‌ زیان نابه‌خشن،
هه‌روه‌ها ناتوانن هیچ سوود بگه‌یه‌نن.»
6
ئه‌ی یه‌زدان، كه‌س وه‌ك تۆ نییه‌،
تۆ مه‌زنیت،
له‌ پاڵه‌وانیێتی ناوت گه‌وره‌یه‌.
7
كێ لێت ناترسێت،
ئه‌ی پاشای نه‌ته‌وه‌كان؟
چونكه‌ له‌ تۆ ده‌وه‌شێته‌وه‌.
له‌ناو هه‌موو دانایانی نه‌ته‌وه‌كان و
له‌ هه‌موو شانشینه‌كانیان،
كه‌س هاوتای تۆ نییه‌.
8
تێكڕا ده‌به‌نگ و گێل بوون،
شتی پووچ له‌ بتی دارین فێر ده‌بن.
9
زیوی كوتراوه‌ له‌ ته‌رشیشه‌وه‌ ده‌هێنن و
زێڕ له‌ ئوفازه‌وه‌.
ده‌ستكردی پیشه‌وه‌ره‌ و ده‌ستی زێڕنگه‌ره‌،
به‌رگیان مۆر و ئه‌رخه‌وانییه‌،
هه‌مووی ده‌ستكردی وه‌ستایانن.
10
به‌ڵام ته‌نها یه‌زدان په‌روه‌ردگاری ڕاستییه‌،
ئه‌و خودای زیندوو و پاشای هه‌تاهه‌تاییه‌،
زه‌وی له‌به‌ر تووڕه‌یی ئه‌و ده‌له‌رزێت و
نه‌ته‌وه‌كان به‌رگه‌ی هه‌ڵچوونی ئه‌و ناگرن.
11
«ئاوایان پێ ده‌ڵێن: ”ئه‌و خوداوه‌ندانه‌ی ئاسمان و زه‌وییان دروستنه‌كردووه‌، له‌سه‌ر زه‌وی و له‌ژێر ئه‌م ئاسمانه‌ له‌ناوده‌چن.“»
12
به‌ڵام یه‌زدان به‌ هێزی خۆی زه‌وی دروستكردووه‌،
به‌ دانایی خۆی جیهانی دامه‌زراندووه‌،
به‌ تێگه‌یشتنی خۆی ئاسمانی ڕاخستووه‌.
13
كاتێك ده‌نگ هه‌ڵده‌بڕێت، ئاوه‌كانی ئاسمان هاژه‌یان دێت،
هه‌ڵمه‌كان له‌وپه‌ڕی زه‌وییه‌وه‌ به‌رز ده‌كاته‌وه‌،
بروسكه‌ بۆ باران دروستده‌كات،
با له‌ ئه‌مباری خۆی ده‌رده‌هێنێت.
14
هه‌موو كه‌سێك بێ زانیارییه‌ و ده‌به‌نگه‌،
هه‌موو زێڕنگه‌رێك به‌ په‌یكه‌ره‌كه‌ی[b] شه‌رمه‌زاره‌،
چونكه‌ داڕێژراوی درۆن و
ڕۆحیان تێدا نییه‌.
15
ئه‌وان پووچن، مایه‌ی گاڵته‌جاڕین،
له‌ كاتی سزادانیان له‌ناوده‌چن.
16
به‌ڵام خودا، ئه‌وه‌ی به‌شی یاقوبه‌ وه‌ك ئه‌مانه‌ نییه‌،
چونكه‌ ئه‌و دروستكه‌ری هه‌موو شتێكه‌،
ئیسرائیل هۆزی میراتی ئه‌ویشی داناوه‌،
یه‌زدانی سوپاسالار، ئه‌مه‌ ناوی ئه‌وه‌.
هاتنی وێرانی 
17
له‌م خاكه‌ بوخچه‌كه‌ت بپێچه‌وه‌،
ئه‌ی دانیشتووی ژێر ئابڵوقه‌!
18
چونكه‌ یه‌زدان ئه‌مه‌ ده‌فه‌رموێت:
«ئه‌م جاره‌ دانیشتووانی ئه‌م خاكه‌
ده‌رده‌كه‌مه‌ ده‌ره‌وه‌،
ته‌نگیان پێ هه‌ڵده‌چنم هه‌تا ئه‌وه‌ی هه‌ستی پێده‌كه‌ن.»
19
وه‌ی له‌ حاڵم له‌به‌ر وردوخاشبوونم!
برینه‌كه‌م بێ چاره‌یه‌!
به‌ڵام به‌ خۆمم گوت: «بێگومان ئه‌مه‌ ده‌ردی منه‌ و
ده‌بێ به‌رگه‌ی بگرم.»
20
چادره‌كه‌م تێكدراوه‌،
هه‌موو گوریسه‌كانی پساون.
كوڕه‌كانم به‌جێیان هێشتووم و نه‌ماون،
ئیتر كه‌س نییه‌ بۆ ئه‌وه‌ی چادره‌كه‌م هه‌ڵبدات و
پڵاسه‌كانی چادره‌كه‌م ڕابگرێت.
21
شوانه‌كان ده‌به‌نگ بوون و
داوای یه‌زدانیان نه‌كرد،
له‌به‌ر ئه‌وه‌ سه‌رنه‌كه‌وتن و
هه‌موو مێگه‌له‌كه‌یان په‌رته‌وازه‌ بوو.
22
گوێ بگرن! ده‌نگی هه‌واڵ دێت،
هه‌راوهۆریای گه‌وره‌ له‌ خاكی باكووره‌وه‌،
تاوه‌كو شارۆچكه‌كانی یه‌هودا وێران بكرێن،
بكرێنه‌ داڵده‌ی چه‌قه‌ڵ.
نزاكردنی یه‌رمیا 
23
ئه‌ی یه‌زدان، زانیم كه‌ مرۆڤ خاوه‌نی ڕێگای خۆی نییه‌،
كه‌س ناتوانێت ڕێڕه‌وه‌كانی خۆی ئاراسته‌ بكات.
24
ئه‌ی یه‌زدان، ته‌مبێم بكه‌،
به‌ڵام به‌ دادپه‌روه‌ری، نه‌ك به‌ تووڕه‌ییت،
نه‌وه‌ك له‌ناوم ببه‌یت.
25
تووڕه‌ییت به‌سه‌ر ئه‌و نه‌ته‌وانه‌دا ببارێنه‌
كه‌ دانت پێدا نانێن و
به‌سه‌ر ئه‌و گه‌لانه‌ی كه‌ به‌ ناوی تۆوه‌ نزا ناكه‌ن،
چونكه‌ یاقوبیان خوارد،
به‌ ته‌واوی خواردیان و
نشینگه‌كه‌یان وێران كرد.
  1. a. 10‏:5 له‌ دار و په‌ڕۆ له‌ شێوه‌ی مرۆڤ دروستده‌كرێت بۆ ڕه‌وینه‌وه‌ی په‌له‌وه‌ڕ، بۆ ئه‌وه‌ی زیان به‌ كێڵگه‌ نه‌گه‌یه‌نن.
  2. b. 10‏:14 تاشینی په‌یكه‌ر، به‌ مه‌به‌ستی په‌رستن وه‌ك بت.