عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
گدعۆن 
1
نه‌وه‌ی ئیسرائیل له‌به‌رچاوی یه‌زدان خراپه‌كارییان كرد، یه‌زدانیش حه‌وت ساڵ ژێر ده‌سته‌ی میدیانییه‌كانی كردن.
2
جا ده‌سه‌ڵاتی مییدیانییه‌كان به‌سه‌ر ئیسرائیلدا زاڵ بوو، له‌به‌ر میدیانییه‌كان نه‌وه‌ی ئیسرائیل بۆ خۆیان په‌ناگایان له‌ناو كونه‌ شاخ و ئه‌شكه‌وت و قه‌ڵای چیاكان دروستكرد.
3
هه‌ر جارێك ئیسرائیلییه‌كان تۆویان ده‌چاند میدیانییه‌كان بۆیان سه‌رده‌كه‌وتن و عه‌مالێقییه‌كان و كوڕانی ڕۆژهه‌ڵات ده‌هاتنه‌ سه‌ریان.
4
له‌ دژیان چادریان هه‌ڵده‌دا و به‌روبوومی زه‌وی و زاریان له‌ناو ده‌برد تاكو ده‌گه‌یشتنه‌ غه‌زه‌، هیچ شتێكی زیندوویان بۆ نه‌وه‌ی ئیسرائیل نه‌ده‌هێشت[a] ، نه‌ له‌ مه‌ڕ و نه‌ له‌ مانگا و نه‌ له‌ گوێدرێژ.
5
له‌به‌ر ئه‌وه‌ی كه‌ سه‌رده‌كه‌وتن به‌ ئاژه‌ڵی ماڵی و چادره‌كانیانه‌وه‌ ده‌هاتن و وه‌ك كۆمه‌ڵه‌ كولله‌ له‌ زۆریدا، خۆیان و وشتره‌كانیان بێشومار بوون، ده‌چوونه‌ ناو خاكه‌كه‌وه‌ بۆ ئه‌وه‌ی وێرانی بكه‌ن.
6
ئیتر ئیسرائیلییه‌كان به‌ده‌ست میدیانییه‌كانه‌وه‌ زۆر هه‌ژار بوون و نه‌وه‌ی ئیسرائیل هاواریان بۆ یه‌زدان كرد.
7
كاتێك نه‌وه‌ی ئیسرائیل هاواریان بۆ یه‌زدان كرد به‌هۆی میدیانییه‌كانه‌وه‌،
8
یه‌زدان پێغه‌مبه‌رێكی بۆ نه‌وه‌ی ئیسرائیل نارد، ئه‌وه‌ی پێ گوتن: «یه‌زدانی په‌روه‌ردگاری ئیسرائیل ئه‌مه‌ ده‌فه‌رموێت: من له‌ میسره‌وه‌ سه‌رم خستن و له‌ خاكی كۆیلایه‌تی ده‌رمهێنان و
9
له‌ ده‌ستی میسرییه‌كان و له‌ ده‌ستی هه‌موو ئه‌وانه‌ی ده‌یانچه‌وساندنه‌وه‌ ده‌ربازم كردن، له‌به‌رده‌متاندا ده‌رمكردن و خاكه‌كه‌یانم پێدان.
10
پێم فه‌رموون: ”من یه‌زدانی په‌روه‌ردگاری ئێوه‌م. خوداوه‌نده‌كانی ئه‌مورییه‌كان مه‌په‌رستن، ئه‌وانه‌ی ئێوه‌ له‌ خاكیاندا نیشته‌جێن،“ به‌ڵام گوێتان لێ نه‌گرتم.»
11
ئینجا فریشته‌ی یه‌زدان هات و له‌ژێر دار به‌ڕووه‌كه‌ی عۆفرا كه‌ هی یۆئاشی ئه‌ڤیعه‌زه‌ری بوو دانیشت. گدعۆنی كوڕی یۆئاشیش له‌ گوشه‌ره‌كه‌ گه‌نمی ده‌كوتا بۆ ئه‌وه‌ی له‌ میدیانییه‌كانی بشارێته‌وه‌.
12
جا فریشته‌ی یه‌زدان بۆ گدعۆن ده‌ركه‌وت و پێی فه‌رموو: «ئه‌ی جه‌نگاوه‌ری به‌هێز، یه‌زدانت له‌گه‌ڵه‌.»
13
گدعۆنیش پێی گوت: «گه‌وره‌م لێت ده‌پرسم، ئه‌گه‌ر یه‌زدان له‌گه‌ڵماندایه‌، ئه‌ی بۆچی ئه‌م هه‌موو كاره‌ساته‌مان به‌سه‌رهات؟ كوا هه‌موو كاره‌ سه‌رسوڕهێنه‌ره‌كانی كه‌ باوكانمان پێیان ڕاگه‌یاندین و گوتیان: ”ئایا یه‌زدان نه‌بوو له‌ میسره‌وه‌ ده‌ریهێناین؟“ ئێستاش یه‌زدان وازی لێ هێناوین و ژێرده‌سته‌ی میدیانی كردووین.»
14
ئینجا یه‌زدان ئاوڕی لێدایه‌وه‌ و گوتی: «به‌م توانایه‌ته‌وه‌ بڕۆ و ئیسرائیل له‌ ده‌ستی میدیان ڕزگار بكه‌. من تۆ ده‌نێرم.»
15
گدعۆنیش لێی پرسی: «ئای گه‌وره‌م! ئیسرائیل به‌ چی ڕزگار بكه‌م؟ ئه‌وه‌تا خێڵه‌كه‌م بێهێزترین خێڵی مه‌نه‌شه‌یه‌ و منیش له‌ ماڵی باوكم له‌ هه‌موویان بچووكترم.»
16
یه‌زدانیش وه‌ڵامی دایه‌وه‌: «من له‌گه‌ڵت ده‌بم و له‌ هه‌موو میدیانییه‌كان ده‌ده‌ی وه‌ك ئه‌وه‌ی له‌ ته‌نها پیاوێك بده‌ی.»
17
گدعۆنیش پێی گوت: «ئه‌گه‌ر جێی ڕه‌زامه‌ندی تۆم، نیشانه‌یه‌كم بده‌رێ كه‌ تۆ خۆتی قسه‌م له‌گه‌ڵ ده‌كه‌یت.
18
تكایه‌ ئێره‌ به‌جێمه‌هێڵه‌ هه‌تا دێمه‌وه‌ بۆ لات و پێشكه‌شكراوه‌كه‌م ده‌رده‌هێنم و له‌به‌رده‌متدا دای ده‌نێم.»
یه‌زدانیش فه‌رمووی: «ده‌مێنمه‌وه‌ هه‌تا ده‌گه‌ڕێیته‌وه‌.»
19
گدعۆنیش چووه‌ ژووره‌وه‌ و كاره‌بزنێكی سه‌ربڕی و ئاماده‌ی كرد له‌گه‌ڵ ئێفه‌یه‌ك ئارد[b] كه‌ نانی فه‌تیره‌ی لێ دروستكرد. گۆشته‌كه‌ی له‌ناو سه‌به‌ته‌یه‌ك دانا و گۆشتاوه‌كه‌شی[c] كرده‌ مه‌نجه‌ڵێكه‌وه‌ و بردیه‌ ده‌ره‌وه‌ بۆی بۆ ژێر دار به‌ڕووه‌كه‌ و پێشكه‌شی كرد.
20
فریشته‌ی خوداش پێی فه‌رموو: «گۆشت و نانه‌ فه‌تیره‌كه‌ ببه‌ و له‌سه‌ر ئه‌و تاته‌به‌رده‌ دایانبنێ و گۆشتاوه‌كه‌ بڕێژه‌.» گدعۆنیش به‌م جۆره‌ی كرد.
21
ئینجا فریشته‌كه‌ی یه‌زدان سه‌ری گۆچانه‌كه‌ی كه‌ به‌ ده‌ستیه‌وه‌ بوو درێژی كرد و له‌ گۆشت و نانه‌ فه‌تیره‌كه‌ی دا و ئاگرێك له‌ به‌رده‌كه‌وه‌ به‌رزبووه‌وه‌ و گۆشت و نانه‌ فه‌تیره‌كه‌ی خوارد. ئینجا فریشته‌كه‌ی یه‌زدان له‌به‌رچاوی نه‌ما.
22
ئیتر گدعۆن زانی كه‌ فریشته‌ی یه‌زدان بوو، بۆیه‌ گوتی: «ئای ئه‌ی یه‌زدانی باڵاده‌ست! چونكه‌ من فریشته‌ی یه‌زدانم ڕووبه‌ڕوو بینی.»
23
یه‌زدانیش پێی فه‌رموو: «ئاشتی بۆ تۆ، مه‌ترسه‌، نامریت.»
24
ئیتر گدعۆن له‌وێ قوربانگایه‌كی بۆ یه‌زدان دروستكرد و ناوی لێنا «یه‌زدان ئاشتییه‌.» هه‌تا ئه‌مڕۆ له‌ عۆفرای ئه‌ڤیعه‌زه‌رییه‌كانه‌.
25
ئینجا له‌و شه‌وه‌دا یه‌زدان پێی فه‌رموو: «دووه‌مین گای باوكت كه‌ حه‌وت ساڵانه‌، بیبه‌ بۆ قوربانگاكه‌ی به‌عل كه‌ هی باوكته‌، قوربانگاكه‌ تێكبده‌ و ئه‌و ستوونه‌ ئه‌شێرایه‌ی[d] له‌ته‌نیشتییه‌تی بیبڕه‌وه‌.
26
ئینجا قوربانگایه‌ك بۆ یه‌زدانی په‌روه‌ردگارت له‌سه‌ر ئه‌و قه‌ڵا به‌رزه‌ به‌ ڕێكوپێكی دروستبكه‌ و دووه‌مین گا سه‌ربخه‌ و بیكه‌ قوربانی سووتاندن له‌سه‌ر ته‌خته‌ داره‌كانی ئه‌و ستوونه‌ ئه‌شێرایه‌ی كه‌ ده‌یبڕیته‌وه‌.»
27
گدعۆنیش ده‌ پیاوی له‌ خزمه‌تكاره‌كانی برد و ئه‌وه‌ی كرد كه‌ یه‌زدان پێی گوت. له‌به‌ر ئه‌وه‌ی له‌ ماڵی باوكی و خه‌ڵكی شارۆچكه‌كه‌ ده‌ترسا ئه‌و كاره‌ به‌ ڕۆژ ئه‌نجام بدات، بۆیه‌ به‌ شه‌و كردی.
28
بۆ سبه‌ینێ خه‌ڵكی شارۆچكه‌كه‌ هه‌ستان و بینییان قوربانگاكه‌ی به‌عل ڕووخێنراوه‌ و ستوونه‌ ئه‌شێراكه‌ی ته‌نیشتی بڕاوه‌ته‌وه‌، دووه‌مین گا كراوه‌ به‌ قوربانی له‌سه‌ر قوربانگاكه‌ی كه‌ تازه‌ دروستكرابوو.
29
ئیتر به‌ یه‌كتریان ده‌گوت: «كێ ئه‌مه‌ی كردووه‌؟»
دوای پرسیاركردن و گه‌ڕان، گوتیان «گدعۆنی كوڕی یۆئاش ئه‌مه‌ی كردووه‌.»
30
جا خه‌ڵكی شارۆچكه‌كه‌ به‌ یۆئاشیان گوت: «كوڕه‌كه‌ت بهێنه‌ ده‌ره‌وه‌، ده‌بێت بكوژرێت، چونكه‌ قوربانگاكه‌ی به‌علی ڕووخاندووه‌ و ستوونه‌ ئه‌شێراكه‌ی ته‌نیشتی بڕیوه‌ته‌وه‌.»
31
به‌ڵام یۆئاش به‌ هه‌موو ئه‌وانه‌ی گوت كه‌ لێی هه‌ستابوون: «ئایا ئێوه‌ داكۆكی له‌ به‌عل ده‌كه‌ن، یان ڕزگاری ده‌كه‌ن؟ ئه‌وه‌ی داكۆكی له‌ به‌عل بكات له‌م به‌یانییه‌دا ده‌كوژرێت! ئه‌گه‌ر به‌ڕاستی خودایه‌ با خۆی داكۆكی له‌ خۆی بكات، چونكه‌ قوربانگاكه‌ی ڕووخێنراوه‌.»
32
ئیتر له‌و ڕۆژه‌دا گدعۆنیان ناونا یه‌روبه‌عل و گوتیان: «با به‌عل له‌ دژی شه‌ڕ بكات،» چونكه‌ قوربانگاكه‌ی ڕووخاندووه‌.
33
ئینجا هه‌موو میدیانییه‌كان و عه‌مالێقییه‌كان و كوڕانی ڕۆژهه‌ڵات پێكه‌وه‌ كۆبوونه‌وه‌ و له‌ ڕووباری ئوردون په‌ڕینه‌وه‌ و له‌ دۆڵی یه‌زره‌عیل چادریان هه‌ڵدا.
34
ڕۆحی یه‌زدان هاته‌ سه‌ر گدعۆن و كه‌ڕه‌نای لێدا و ئه‌ڤیعه‌زه‌رییه‌كان شوێنی كه‌وتن.
35
ئینجا نێردراوی نارد بۆ هه‌موو مه‌نه‌شه‌ و ئه‌وانیش به‌ ده‌نگییه‌وه‌ هاتن، هه‌روه‌ها نێردراوی نارد بۆ ئاشێر و زه‌بولون و نه‌فتالی، ئه‌وانیش سه‌ركه‌وتن بۆ ئه‌وه‌ی پێیان بگه‌ن.
36
ئینجا گدعۆن به‌ خودای گوت: «ئه‌گه‌ر به‌ ده‌ستی من ئیسرائیل ڕزگار ده‌كه‌یت وه‌ك فه‌رمووت،
37
ئه‌وه‌تا من كه‌وڵی مه‌ڕ له‌سه‌ر جۆخینه‌كه‌[e] داده‌نێم، جا ئه‌گه‌ر ته‌نها كه‌وڵه‌كه‌ شه‌ونمی له‌سه‌ر بوو و زه‌وی هه‌مووی وشك بوو، ئه‌وا ده‌زانم كه‌ تۆ به‌ ده‌ستی من ئیسرائیل ڕزگار ده‌كه‌یت وه‌ك گوتت.»
38
ئیتر ئاوا بوو. به‌یانی گدعۆن زوو هه‌ستا و كه‌وڵه‌كه‌ی گوشی و پڕ ته‌شتێك شه‌ونمی له‌ كه‌وڵه‌كه‌ گوشی.
39
ئینجا گدعۆن به‌ خودای گوت: «لێم تووڕه‌ مه‌به‌ هه‌ر ئه‌م جاره‌ داوا ده‌كه‌م. ته‌نها ئه‌م جاره‌ به‌ كه‌وڵه‌كه‌ تاقی ده‌كه‌مه‌وه‌. با به‌س كه‌وڵه‌كه‌ وشك بێت و له‌سه‌ر هه‌موو زه‌وی شه‌ونمی لێ بێت.»
40
خوداش له‌و شه‌وه‌دا به‌م جۆره‌ی كرد. به‌ ته‌نها كه‌وڵه‌كه‌ وشك بوو و له‌سه‌ر هه‌موو زه‌وییه‌كه‌ شه‌ونم هه‌بوو.
  1. a. 6‏:4 هیچ شتێكی زیندوو: بڕوانه‌ \+xt دواوتار 28‏:31‏\+xt*.
  2. b. 6‏:19 ‏نزیكه‌ی شازده‌ كیلۆ.
  3. c. 6‏:19 گۆشتاو: چه‌لاو.
  4. d. 6‏:25 ستوونه‌ ئه‌شێرا: هێمای خواژنه‌. بڕوانه‌ \+xt یه‌كه‌م پاشایان 11‏:5‏\+xt*‏.
  5. e. 6‏:37 جۆخین یان سه‌رخه‌رمان ئه‌و زه‌وییه‌ ته‌رخانكراوه‌یه‌ كه‌ له‌لایه‌ن وه‌رزێر و جوتیاره‌وه‌ به‌كارهێنراوه‌ بۆ كوتانی دانه‌وێڵه‌ له‌سه‌ری له‌دوای كۆكردنه‌وه‌ی له‌ كێڵگه‌.