عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
ده‌ڤۆرا 
1
له‌دوای مردنی ئێهود نه‌وه‌ی ئیسرائیل له‌به‌رچاوی یه‌زدان گه‌ڕانه‌وه‌ بۆ خراپه‌كاری،
2
یه‌زدانیش ڕاده‌ستی یاڤینی پاشای كه‌نعانی كردن، ئه‌وه‌ی له‌ حاچۆر فه‌رمانڕه‌وا بوو. سیسرا فه‌رمانده‌ی گشتی سوپاكه‌ی بوو كه‌ له‌ حه‌رۆشه‌ت هه‌گۆیم ده‌ژیا.
3
له‌به‌ر ئه‌وه‌ی نۆ سه‌د گالیسكه‌ی ئاسنی هه‌بوو، بۆ ماوه‌ی بیست ساڵ به‌ توندی سته‌می له‌ نه‌وه‌ی ئیسرائیل ده‌كرد، هه‌ر بۆیه‌ نه‌وه‌ی ئیسرائیل هاواریان كرد بۆ یه‌زدان.
4
ده‌ڤۆراش پێغه‌مبه‌رێكی ژن بوو، ژنی له‌پیدۆت بوو كه‌ له‌و كاته‌دا ڕابه‌رایه‌تی ئیسرائیلی ده‌كرد.
5
بۆ دادپرسی له‌ژێر دار خورمای ده‌ڤۆرا داده‌نیشت كه‌ له‌نێوان ڕامه‌ و بێت‌ئێل له‌ ناوچه‌ شاخاوییه‌كانی ئه‌فرایم بوو، نه‌وه‌ی ئیسرائیل بۆ دادگه‌ری ده‌هاتنه‌ لای.
6
ناردی به‌دوای باراكی كوڕی ئه‌ڤینۆعه‌م كه‌ له‌ قه‌ده‌شی نه‌فتالی بوو، پێی گوت: «ئایا یه‌زدانی په‌روه‌ردگاری ئیسرائیل فه‌رمانی پێ نه‌كردوویت: ”به‌ره‌و پێش بڕۆ بۆ كێوی تاڤۆر؟ ده‌ هه‌زار پیاو له‌ نه‌وه‌ی نه‌فتالی و زه‌بولون له‌گه‌ڵ خۆت ببه‌.
7
ئیتر سیسرای فه‌رمانده‌ی گشتی له‌شكری یاڤین و گالیسكه‌ و له‌شكره‌كه‌ی به‌ره‌و ڕووباری قیشۆن ده‌به‌م و ده‌یخه‌مه‌ ژێر ده‌ستته‌وه‌.“»
8
باراكیش پێی گوت: «ئه‌گه‌ر له‌گه‌ڵم بێیت ده‌چم، به‌ڵام ئه‌گه‌ر له‌گه‌ڵم نه‌یێیت ئه‌وا ناچم.»
9
ده‌ڤۆراش گوتی: «بێگومان له‌گه‌ڵت دێم، به‌ڵام ئه‌و ڕێگایه‌ی پێیدا ده‌ڕۆیت بۆت نابێته‌ مایه‌ی شانازی، چونكه‌ یه‌زدان سیسرا ده‌داته‌ ده‌ستی ژنێك.» ئیتر ده‌ڤۆرا هه‌ستا و له‌گه‌ڵ باراك چوو بۆ قه‌ده‌ش،
10
له‌وێ باراك زه‌بولونی و نه‌فتالییه‌كانی بانگكرد. ده‌ هه‌زار پیاو دوای كه‌وتن، هه‌روه‌ها ده‌ڤۆراش له‌گه‌ڵی چوو.
11
حه‌ڤه‌ری قێنی خۆی له‌ قێنییه‌كان جیا كردبووه‌وه‌ كه‌ نه‌وه‌ی حۆڤاڤ بوون، كه‌ حۆڤاڤ ژن برای[a] موسا بوو، چادره‌كه‌ی له‌لای دار به‌ڕووێكی گه‌وره‌ له‌ چه‌عه‌نه‌نیم نزیكی قه‌ده‌ش هه‌ڵدابوو.
12
ئه‌وه‌ بوو به‌ سیسرایان گوت كه‌ باراكی كوڕی ئه‌ڤینۆعه‌م سه‌ركه‌وتووه‌ بۆ كێوی تاڤۆر.
13
سیسراش هه‌موو گالیسكه‌كانی واته‌ نۆ سه‌د گالیسكه‌ی ئاسن و هه‌موو ئه‌و پیاوانه‌ی كه‌ له‌گه‌ڵیدا بوون له‌ حه‌رۆشه‌ت هه‌گۆیمه‌وه‌ هه‌تا ڕووباری قیشۆن كۆكرده‌وه‌.
14
ده‌ڤۆرا به‌ باراكی گوت: «هه‌سته‌، چونكه‌ ئه‌مه‌ ئه‌و ڕۆژه‌یه‌ كه‌ یه‌زدان سیسرای تێیدا خستووه‌ته‌ ژێر ده‌ستت. ئایا یه‌زدان پێشت نه‌كه‌وتووه‌؟» ئیتر باراكیش له‌ كێوی تاڤۆره‌وه‌ هاته‌ خواره‌وه‌ و ده‌ هه‌زار پیاویش به‌دوایه‌وه‌.
15
یه‌زدانیش له‌به‌رده‌می باراك به‌ زه‌بری شمشێر سه‌ری له‌ سیسرا و هه‌موو گالیسكه‌كان و هه‌موو له‌شكره‌كه‌ی شێواند، ئینجا سیسرا له‌ گالیسكه‌كه‌ دابه‌زی و به‌ پێ هه‌ڵات.
16
باراكیش به‌دوای گالیسكه‌كان و له‌شكره‌كه‌ كه‌وت بۆ حه‌رۆشه‌ت هه‌گۆیم، هه‌موو له‌شكره‌كه‌ی سیسرا به‌ شمشێر كوژران، كه‌سیان نه‌ما.
17
به‌ڵام سیسرا ڕایكرد بۆ چادری یاعێلی ژنی حه‌ڤه‌ری قێنی، چونكه‌ په‌یوه‌ندییه‌كی ئاشتییانه‌ له‌نێوان یاڤینی پاشای حاچۆر و ماڵی حه‌ڤه‌ری قێنی هه‌بوو.
18
یاعێل چووه‌ ده‌ره‌وه‌ بۆ پێشوازی سیسرا و پێی گوت: «لابده‌ گه‌وره‌م، لابده‌ بۆ ئێره‌ مه‌ترسه‌.» ئه‌ویش لایدا بۆ لای چادره‌كه‌ و ئیتر به‌ جاجم دایپۆشی.
19
پێی گوت: «تۆزێك ئاوم بده‌رێ، چونكه‌ تینوومه‌.» ئه‌ویش مه‌شكه‌ی شیره‌كه‌ی كرده‌وه‌ و پێیدا، ئینجا دایپۆشییه‌وه‌.
20
ئیتر پێی گوت: «له‌به‌رده‌م چادره‌كه‌ بوه‌سته‌، ئه‌گه‌ر یه‌كێك هات و پرسیاری لێكردیت: ”ئایا ئێره‌ كه‌سی لێیه‌؟“ تۆش بڵێ: ”نه‌خێر.“»
21
به‌ڵام یاعێلی ژنی حه‌ڤه‌ر مێخێكی[b] چادره‌كه‌ و چه‌كوشێكی هه‌ڵگرت، به‌ شێنه‌یی بۆی چوو و مێخه‌كه‌ی كێشا به‌ لاجانیدا[c] و به‌ زه‌وییه‌كه‌دا خستی، ئه‌ویش له‌ خه‌وێكی قووڵدا بوو، چونكه‌ ماندوو بوو، ئیتر مرد.
22
له‌ كاتێكدا باراك به‌دوای سیسرا كه‌وتبوو، یاعێل چووه‌ ده‌ره‌وه‌ بۆ پێشوازیكردنی و پێی گوت: «وه‌ره‌ با ئه‌و پیاوه‌ت پیشان بده‌م كه‌ تۆ به‌دوایدا ده‌گه‌ڕێیت.» ئه‌ویش هات بۆ لای و بینی سیسرا به‌ مردوویه‌تی كه‌وتووه‌ و مێخی چادره‌كه‌ له‌ناو لاجانییه‌تی.
23
خوداش له‌و ڕۆژه‌دا یاڤینی پاشای كه‌نعانی له‌به‌رده‌م نه‌وه‌ی ئیسرائیلدا زه‌لیل كرد.
24
نه‌وه‌ی ئیسرائیل به‌هێزتر و به‌هێزتر ده‌بوون به‌سه‌ر یاڤینی پاشای كه‌نعان، هه‌تا یاڤینی پاشای كه‌نعانیان له‌ناوبرد.
  1. a. 4‏:11 برای خێزانه‌كه‌ی یان كوڕی خه‌زووری.
  2. b. 4‏:21 مێخی: سنگی.
  3. c. 4‏:21 لاجان: نێوان گوێ و چاو.