عیسا فەرمووی:
ئاسمان و زەوی بەسەر دەچن ، بەڵام وشەکانم ھەرگیز بەسەرناچن .

عیسا وه‌ڵامیدایه‌وه‌: (....، بۆ ئه‌مه‌ له‌دایكبووم و بۆ ئه‌مه‌ش هاتوومه‌ته‌ جیهان،
تاكو شایه‌تی بۆ راستی بده‌م. هه‌ركه‌سێك له‌ راستییه‌وه‌ بێت گوێ له‌ ده‌نگم ده‌گرێت.)

کتێبی پیرۆز
1
یه‌فتاحی گلعادی جه‌نگاوه‌رێكی به‌هێز بوو، كوڕی له‌شفرۆشێك بوو، گلعادیش باوكی بوو.
2
ژنه‌كه‌ی گلعاد چه‌ند كوڕێكی بوو، كاتێك كوڕه‌كان گه‌وره‌ بوون یه‌فتاحیان ده‌ركرد و پێیان گوت: «نابیت به‌ میراتگر له‌ ماڵی باوكمان، چونكه‌ تۆ كوڕی ژنێكی دیكه‌یت.»
3
بۆیه‌ یه‌فتاح له‌ ده‌ست براكانی هه‌ڵات و له‌ خاكی تۆڤ نیشته‌جێ بوو، چه‌ند پیاوێكی یاخی و چاونه‌ترس له‌ ده‌وری كۆبوونه‌وه‌ و دوای كه‌وتن.
4
ئینجا پاش ماوه‌یه‌ك عه‌مۆنییه‌كان له‌ دژی ئیسرائیل جه‌نگان.
5
كاتێك عه‌مۆنییه‌كان له‌ دژی ئیسرائیل جه‌نگان، پیرانی گلعاد چوون بۆ ئه‌وه‌ی یه‌فتاح له‌ خاكی تۆڤه‌وه‌ بهێنن.
6
به‌ یه‌فتاحیان گوت: «وه‌ره‌ ببه‌ به‌ سه‌ركرده‌مان هه‌تا له‌ دژی عه‌مۆنییه‌كان بجه‌نگین.»
7
یه‌فتاحیش به‌ پیرانی گلعادی گوت: «ئایا ئێوه‌ نه‌بوون كه‌ ڕقتان لێم بووه‌وه‌ و له‌ ماڵی باوكم ده‌رتانكردم؟ بۆچی ئێستا هاتوون بۆ لام كه‌ له‌ ته‌نگانه‌ دان؟»
8
پیرانی گلعادیش به‌ یه‌فتاحیان گوت: «بۆیه‌ ئێستا گه‌ڕاوینه‌ته‌وه‌ بۆ لات هه‌تا له‌گه‌ڵمان بێیت و له‌ دژی عه‌مۆنییه‌كان بجه‌نگین و ببیت به‌ سه‌ركرده‌مان به‌سه‌ر هه‌موو دانیشتووانی گلعاد.»
9
یه‌فتاحیش به‌ پیرانی گلعادی گوت: «ئه‌گه‌ر منتان گه‌ڕانده‌وه‌ بۆ جه‌نگ له‌ دژی عه‌مۆنییه‌كان و یه‌زدان ئه‌وانی به‌ده‌ستمه‌وه‌ دا، ئه‌وا به‌ڕاستی من ده‌بمه‌ سه‌ركرده‌تان؟»
10
پیرانی گلعادیش به‌ یه‌فتاحیان گوت: «با یه‌زدان له‌نێوانمان شایه‌ت بێت، به‌ دڵنیاییه‌وه‌ ئاوا ده‌كه‌ین به‌پێی ئه‌وه‌ی گوتت.»
11
ئینجا یه‌فتاح له‌گه‌ڵ پیرانی گلعاددا ڕۆیشت و گه‌ل كردیان به‌سه‌ركرده‌ و فه‌رمانده‌ی خۆیان و یه‌فتاحیش هه‌موو قسه‌كانی خۆی له‌ میچپا له‌به‌رده‌م یه‌زدان دووباره‌ كرده‌وه‌.
12
ئینجا یه‌فتاح چه‌ند نێردراوێكی بۆ لای پاشای عه‌مۆنییه‌كان ڕه‌وانه‌ كرد و گوتی: «چیم له‌گه‌ڵ تۆ هه‌یه‌، تۆ هاتوویته‌ سه‌رم هه‌تا له‌ خاكه‌كه‌م له‌ دژم بجه‌نگیت؟»
13
پاشای عه‌مۆنییه‌كانیش به‌ نێردراوه‌كانی یه‌فتاحی گوت: «له‌به‌ر ئه‌وه‌ی ئیسرائیل له‌ كاتی هاتتنیدا له‌ میسر خاكه‌كه‌ی بردووم، له‌ ئه‌رنۆنه‌وه‌ هه‌تا یه‌بۆق و هه‌تا ڕووباری ئوردون، ئێستاش به‌ ئاشتی بیگه‌ڕێنه‌وه‌.»
14
ئینجا یه‌فتاح دووباره‌ چه‌ند نێردراوێكی بۆ لای پاشای عه‌مۆنییه‌كان ڕه‌وانه‌ كرده‌وه‌ و
15
پێی گوت:
«یه‌فتاح ئاوا ده‌ڵێت: ئیسرائیل خاكی مۆئاب و خاكی عه‌مۆنییه‌كانی نه‌بردووه‌،
16
چونكه‌ له‌ كاتی هاتنی ئیسرائیل له‌ میسره‌وه‌ به‌ناو چۆڵه‌وانیدا هه‌تا ده‌ریای سوور[a] ڕۆیشت و هات بۆ قادێش.
17
ئیتر ئیسرائیل چه‌ند نێردراوێكی نارد بۆ لای پاشای ئه‌دۆم و گوتی: ”لێمانگه‌ڕێ با به‌ناو خاكه‌كه‌تدا تێپه‌ڕ بین،“ به‌ڵام پاشای ئه‌دۆم گوێی نه‌گرت. هه‌روه‌ها نێردراویان بۆ لای پاشای مۆئاب نارد، به‌ڵام ڕازی نه‌بوو. ئینجا نه‌وه‌ی ئیسرائیل له‌ قادێش مانه‌وه‌.
18
«ئینجا به‌ناو چۆڵه‌وانیدا ڕۆیشتن و به‌ده‌وری خاكی ئه‌دۆم و خاكی مۆئابدا سووڕانه‌وه‌، له‌لای ڕۆژهه‌ڵاته‌وه‌ هاتن بۆ خاكی مۆئاب و له‌ كه‌ناری ئه‌رنۆن چادریان هه‌ڵدا، نه‌هاتنه‌ ناو خاكی مۆئاب، چونكه‌ ڕووباری ئه‌رنۆن سنووری مۆئاب بوو.
19
«پاشان ئیسرائیل چه‌ند نێردراوێكی بۆ لای سیحۆنی پاشای ئه‌مورییه‌كان و پاشای حه‌شبۆن نارد و پێی گوتن: ”لێمانگه‌ڕێن با به‌ناو خاكه‌كه‌تاندا تێپه‌ڕین بۆ شوێنه‌كه‌مان.“
20
به‌ڵام سیحۆن متمانه‌ی به‌ ئیسرائیل نه‌بوو به‌ناو سنووره‌كه‌یدا تێبپه‌ڕێت، به‌ڵكو سیحۆن هه‌موو هێزه‌كانی كۆكرده‌وه‌ و له‌ یه‌هه‌چ چادریان هه‌ڵدا و له‌ دژی ئیسرائیل جه‌نگان.
21
«ئینجا یه‌زدانی په‌روه‌ردگاری ئیسرائیل سیحۆن و هه‌موو سوپاكه‌ی دا به‌ده‌ست نه‌وه‌ی ئیسرائیله‌وه‌ و ئه‌وانیان به‌زاند. ئیتر ئیسرائیل بوو به‌ خاوه‌نی هه‌موو زه‌وی ئه‌مورییه‌كان و دانیشتووانی ئه‌و خاكه‌،
22
ده‌ستیان به‌سه‌ر هه‌موو سنووری ئه‌مورییه‌كاندا گرت، له‌ ئه‌رنۆنه‌وه‌ هه‌تا یه‌بۆق و له‌ چۆڵه‌وانییه‌وه‌ هه‌تا ڕووباری ئوردون.
23
«ئێستاش كه‌ یه‌زدانی په‌روه‌ردگاری ئیسرائیل ئه‌مورییه‌كانی له‌به‌رده‌م ئیسرائیلی گه‌لی خۆی ده‌ركردووه‌، ئایا به‌ چ مافێك تۆ خاوه‌نداریێتی ده‌كه‌یت؟
24
ئایا نابیته‌ خاوه‌نی ئه‌وه‌ی كه‌ كه‌مۆشی[b] خوداوه‌ندت پێت ده‌دات؟ ئێمه‌ش خاوه‌نی هه‌موو ئه‌وانه‌ین كه‌ یه‌زدانی په‌روه‌ردگارمان له‌به‌رده‌مماندا وه‌ده‌رینان.
25
ئێستاش ئایا تۆ به‌ڕاستی له‌ بالاقی كوڕی چیپوری پاشای مۆئاب چاكتریت؟ ئایا ئه‌و به‌ربه‌ره‌كانێی ئیسرائیلی كرد، یاخود له‌ دژیان جه‌نگا؟
26
ئه‌و كاته‌ی ئیسرائیل له‌ حه‌شبۆن و گونده‌كانی و عه‌رۆعێر و گونده‌كانی و هه‌موو شارۆچكه‌كانی كه‌ناری ئه‌رنۆن سێ سه‌د ساڵ نیشته‌جێ بوو، بۆچی له‌و كاته‌دا به‌ده‌ستت نه‌هێنایه‌وه‌؟
27
من هیچ گوناهم ده‌رهه‌ق به‌ تۆ نه‌كردووه‌، به‌ڵام تۆ خراپه‌م له‌گه‌ڵ ده‌كه‌یت به‌ شه‌ڕكردن له‌گه‌ڵ من. با ئه‌مڕۆ یه‌زدانی دادوه‌ر حوكم له‌نێوان ئیسرائیل و عه‌مۆنییه‌كاندا بدات.»
28
به‌ڵام پاشای عه‌مۆنییه‌كان گوێی له‌ قسه‌كانی یه‌فتاح نه‌گرت كه‌ بۆی نارد.
29
جا ڕۆحی یه‌زدان هاته‌ سه‌ر یه‌فتاح، له‌ گلعاد و مه‌نه‌شه‌ په‌ڕییه‌وه‌ و له‌ میچپای گلعادیش په‌ڕییه‌وه‌، له‌ میچپای گلعادیشه‌وه‌ بۆ عه‌مۆنییه‌كان په‌ڕییه‌وه‌.
30
ئینجا یه‌فتاح نه‌زری[c] بۆ یه‌زدان كرد و گوتی: «ئه‌گه‌ر عه‌مۆنییه‌كانت دا به‌ده‌ستمه‌وه‌،
31
ئه‌وا له‌ كاتی گه‌ڕانه‌وه‌مدا به‌ سه‌ركه‌وتوویی له‌لای عه‌مۆنییه‌كانه‌وه‌، ئه‌وه‌ی بۆ پێشوازیلێكردنم له‌ ده‌رگای ماڵه‌كه‌مه‌وه‌ بێته‌ ده‌ره‌وه‌، ئه‌وه‌ بۆ یه‌زدان ده‌بێت و وه‌ك قوربانی سووتاندن پێشكه‌شی ده‌كه‌م.»
32
ئینجا یه‌فتاح په‌ڕییه‌وه‌ بۆ عه‌مۆنییه‌كان بۆ جه‌نگ له‌ دژیان و یه‌زدان ئه‌وانی دایه‌ ده‌ستی.
33
له‌نێوان عه‌رۆعێره‌وه‌ و مینیت هه‌تا ئابێل كه‌رامیم بیست شارۆچكه‌ی وێران كرد و به‌م شێوه‌یه‌ عه‌مۆنییه‌كان كه‌وتنه‌ ژێرده‌ستی نه‌وه‌ی ئیسرائیل.
34
پاشان یه‌فتاح گه‌ڕایه‌وه‌ بۆ میچپا بۆ ماڵه‌كه‌ی و ته‌ماشای كرد وا كچه‌كه‌ی به‌ ده‌فلێدان و سه‌ماكردنه‌وه‌ هاتووه‌ته‌ ده‌ره‌وه‌ بۆ پێشوازیلێكردنی. ئه‌و كچه‌ش تاقانه‌ بوو، جگه‌ له‌و كوڕ و كچی دیكه‌ی نه‌بوو.
35
له‌و كاته‌دا كه‌ چاوی پێكه‌وت جله‌كانی دادڕی و گوتی: «ئای كچه‌كه‌م ئه‌ژنۆت شكاندم و ژیانت لێ تاڵ كردم، چونكه‌ سوێندم بۆ یه‌زدان خواردووه‌ و ناتوانم لێی پاشگه‌ز ببمه‌وه‌.»
36
ئه‌ویش پێی گوت: «ئه‌ی باوكه‌ تۆ نه‌زرت بۆ یه‌زدان كردووه‌؟ به‌وه‌م له‌گه‌ڵ بكه‌ كه‌ له‌ ده‌مت هاتووه‌ته‌ ده‌ره‌وه‌، چونكه‌ یه‌زدان تۆڵه‌ی بۆ سه‌ندییه‌وه‌ له‌ دوژمنه‌كانت، له‌ عه‌مۆنییه‌كان.»
37
پاشان به‌ باوكی گوت: «با ئه‌و كاره‌م له‌گه‌ڵدا بكرێت، دوو مانگ لێم بگه‌ڕێ هه‌تا بڕۆم و له‌سه‌ر چیاكان بگه‌ڕێم و له‌گه‌ڵ هاوڕێیه‌كانم شیوه‌ن بگێڕم، چونكه‌ هه‌رگیز شوو ناكه‌م.»
38
ئه‌ویش گوتی: «بڕۆ.» دوو مانگ ناردی، ڕۆیشت و له‌گه‌ڵ ده‌سته‌ خوشكه‌كانی له‌سه‌ر چیاكان شیوه‌نی گێڕا، چونكه‌ هه‌رگیز شوو ناكات.
39
له‌ كۆتایی دوو مانگه‌كه‌دا گه‌ڕایه‌وه‌ بۆ لای باوكی، ئیتر ئه‌و نه‌زره‌ی كردبووی ئه‌نجامی دا، كچه‌كه‌ش پاكیزه‌ بوو.
ئیتر ئه‌مه‌ له‌ناو ئیسرائیلدا بوو به‌ نه‌ریت
40
كه‌ كچه‌كانی ئیسرائیل ساڵانه‌ چوار ڕۆژ ده‌چن بۆ ئه‌وه‌ی شیوه‌ن بۆ كچه‌كه‌ی یه‌فتاحی گلعادی بگێڕن.
  1. a. 11‏:16 عیبری \+tl سوف\+tl* واته‌ (زه‌ل). ده‌شێت مه‌به‌ست له‌ ده‌ریای سوف بێت، ئه‌و ده‌ریایه‌ بێت كه‌ ده‌كه‌وێته‌ سه‌رووی باكووری كه‌نداوی سوێسی ئه‌مڕۆ، به‌ڵام له‌ ده‌قی یۆنانی په‌یمانی نوێ هه‌ر به‌ ده‌ریای سوور نووسراوه‌. بڕوانه‌ \+xt عیبرانییه‌كان 11‏:29‏\+xt*‏.
  2. b. 11‏:24 خوداوه‌ندی هه‌ره‌ گه‌وره‌ی مۆئابییه‌كان بوو. بڕوانه‌ \+xt سه‌رژمێری 21‏:29‏\+xt*‏.
  3. c. 11‏:30 نه‌زر: واته‌ پابه‌ندكردنی مرۆڤ خۆیه‌تی به‌ مه‌رجێكه‌وه‌، له‌ كاتێكدا كه‌ داخوازییه‌ك به‌رز ده‌كاته‌وه‌ بۆ خودا و به‌ ئه‌رێ وه‌ڵام ده‌درێته‌وه‌ له‌لایه‌ن خوداوه‌. بڕوانه‌ \+xt سه‌رژمێری 21‏:2‏\+xt*‏.